Miwlẹ Wẹ Gbẹtọ Wunmẹ He Tindo Yise

Wẹndagbe Lilá to Aigba Lẹsi Tọn Taïwan Tọn lẹ Ji

TAÏWAN nọ saba duvivi jikun susu tọn, ehe nọ hẹn ẹn penugo nado gbẹ̀n jinukun dagbe lẹsi tọn awe to owhe dopodopo mẹ. Ṣigba, to whedelẹnu jikun ma nọ jà to whenuena yé dona jà gba, podọ jinukun flinflin lẹ nọ kú. To whenuena ehe jọ, be glesi lọ nọ jogbe wẹ ya? Lala. E nọ yọnẹn dọ linsinsinyẹn yin nuhudo etọn tindo. E nọ và lẹsi lẹ bosọ nọ vọ́ ogle lọ dó. Enẹgodo, eyin ninọmẹ lọ pọnte, glesi lọ nọ bẹ jinukun dagbe de wá whégbè. Nudido po jibẹwawhé gbigbọmẹ tọn po to whedelẹnu nọ taidi onú dopolọ pẹpẹ.

Linsinsinyẹn to Jibẹwawhé Gbigbọmẹ Tọn Mẹ

To owhe lẹ gblamẹ Kunnudetọ Jehovah tọn lẹ to Taïwan ko wazọ́n sinsinyẹn nado dó bosọ bẹ jinukun nugbo Owe-wiwe tọn wá whégbè to lẹdo he taidi dehe ma sọgan de sinsẹ́n tọn delẹ mẹ. Apajlẹ dopo wẹ Miao-li County. Gbeyiyi vude wẹ ko tin na vivẹnudido vlavo tọn nado dekunnu to lẹdo lọ mẹ. Enẹwutu to 1973 asu po asi po gbehosọnalitọ titengbe de yin azọ́ndena nado wazọ́n to finẹ taidi lilatọ whenu-gigọ́ Ahọluduta lọ tọn lẹ. To tintan whenu, mẹdelẹ do ojlo hia to wẹndagbe lọ mẹ. Ṣigba, to madẹnmẹ ojlo enẹ busẹ. To enẹgodo gbehosọnalitọ titengbe lọ lẹ yin azọ́ndena dohlan lẹdo devo mẹ.

To 1991 gbehosọnalitọ titengbe awe devo lẹ yin azọ́ndena yì finẹ. Ṣigba whladopo dogọ nujijọ lẹ dohia dọ ninọmẹ aimẹ tọn ma sọgbe na whinwhẹ́n gbigbọmẹ tọn. To owhe kleun de godo, gbehosọnalitọ titengbe lọ lẹ yin azọndiọna dohlan aigba he na de sinsẹ́n tọ́n taun na jide tọn lẹ ji. Gbọnmọ dali, aigba lọ yin hinhẹn-gbọgbé na ojlẹ de.

Vivẹnu Heyin Hinhẹn-jẹ-Yọyọ Tindo Kọdetọn Dagbe

To septembre 1998 nudide yin bibasi nado dovivẹnu nado dín lẹdo he na de sinsẹ́n tọ́n lẹ dogọ to aigba gbloada he ma yin didenamẹ Taïwan tọn ji. Nawẹ ehe na yin wiwadotana gbọn? Gbọn azọndidena gbehosọnalitọ titengbe whenu-gli tọn 40 nado wazọ́n to aigba he ma yin didenamẹ lẹ ji to fie gbẹtọ susu tin te dali.

Tòdaho awe he tin to yakẹ Miao-li County tọn tin to aigba-denamẹ heyin kinklandovo na nujijla lọ lẹ mẹ. Mẹmẹyọnnu tlẹnnọ ẹnẹ dona wazọ́n to finẹ na osun atọ̀n nado tẹ́n aigba-denamẹ lọ pọ́n. To madẹnmẹ to wiwá yetọn godo, yé wlan linlin ayajẹ tọn gando sọha jlodotọ lẹ tọn he yé to mimọ lẹ go. To ojlẹ he mẹ yé dotana osun atọ̀n gbehosọnalitọ bibasi tọn yetọn to lẹdo lọ mẹ, yé to anadena oplọn Biblu whégbè tọn susu lẹ. Yé sọ ze pipli oplọn agunwe tọn de dai po alọgọ mẹho de tọn po sọn agun he tin to yakẹ de mẹ.

Atọ̀n to mẹmẹyọnnu ehelẹ mẹ hẹn ẹn họnwun dọ yé na jlo nado zindonukọn nado to nukunpedo “jinukun flinflin” he to whinwhẹ́n ganji lẹ go. Taidi kọdetọn de, awe to yé mẹ yin dide taidi gbehosọnalitọ titengbe tẹgbẹ̀ tọn lẹ, podọ atọ̀ntọ zindonukọn nado to azọ́nwa to finẹ taidi gbehosọnalitọ whepoponu tọn de. Mẹho de sọn agun he tin to yakẹ de mẹ sẹtẹn yì lẹdo lọ mẹ nado gọalọna yé. Hugan gbẹtọ 60 wẹ wá hodidọ gbangba tọn tintan heyin didọ to lẹdo enẹ mẹ. Todin agun he tin to yakẹ lọ to alọgọna pipli he ma ko tindo numimọ ehe nado basi opli gbesisọ Sẹgbe tọn lẹ gọna oplọn agunwe voovo lẹ. To madẹnmẹ agun yọyọ de sọgan yin didoai to lẹdo lọ mẹ.

 Linsinsinyẹn Hẹn Dona lẹ Wá to Adà Taïwan Tọn Devo lẹ Ji

Lẹdo devo lẹ yigbe to aliho dopolọ mẹ. To I-lan County to adà agewaji whèzẹtẹn-waji lopo lọ tọn, Oplọn Agunwe yọyọ de yin zizedai to lẹdo he mẹ gbehosọnalitọ titengbe whenu-gli tọn lọ lẹ wazọ́n te.

Dile e to dlapọn whédegbè-jẹ-whédegbè tọn basi to whèjai dopo, gbehosọnalitọ titengbe whenu-gli tọn de dukosọ hẹ sunnu jọja de bo do oylọ-basinamẹwe de he basi todohukanji opli agun tọn lẹ tọn de hia ẹ. E kanse to afọdopolọji dọmọ: “Be yẹn sọgan yì opli lọ to osọ̀ whèjai ya? Eyin mọwẹ, etẹwẹ yẹn dona do?” Gbehosọnalitọ ehe mọ ede nado to anadena plọnmẹ Biblu ṣinatọ̀n hẹ jlodotọ lẹ to osẹ dopodopo mẹ. Susu to plọnmẹ Biblu lọ lẹ mẹ to madẹnmẹ basi tito nado lẹzun wẹnlatọ wẹndagbe lọ tọn lẹ na yedelẹ, po yanwle lọ po nado yin bibaptizi.

Mẹdevo to otò ehe dopolọ mẹ ko yin ṣọṣi-yitọ de na owhe susu ṣigba ma sọgan mọ mẹdepope nado plọn ẹn Biblu gba. To whenuena e sè gando tito oplọn Biblu tọn go, e yí dotẹnmẹ hundote lọ zan. E yin tulina nado wleawuna nupinplọn etọn jẹnukọn. To whenuena gbehosọnalitọ titengbe whenu-gli tọn lọ wá nado deanana oplọn lọ, e mọ dọ yọnnu lọ ko wà “azọ́ndenamẹ whégbè tọn” etọn gbọn kandai-wema de hihọ̀ to ehe mẹ e ko kàn kanbiọ heyin zinzinjẹgbonu to owe oplọn tọn etọn mẹ lẹ do dali. Enẹgodo e ko kàn gblọndo etọn lẹ na kanbiọ dopodopo. E ko sọ basi vọkan wefọ heyin dide to oplọn etọn mẹ lẹpo tọn do kandai-wema lọ mẹ. To ojlẹ he mẹ mẹmẹyọnnu lọ wá nado deanana oplọn tintan, yọnnu lọ ko wleawuna nupinplọn atọ̀n tintan lẹ dai!

Kọdetọn dopolọ yin mimọ to otò Dongshih tọn mẹ to ṣẹnṣẹn Taïwan tọn. Gbehosọnalitọ titengbe whenu-gli tọn lọ lẹ do alọnuwe he hugan 2 000 gbonu to osun atọ̀n he yé yí do wazọ́n to finẹ lẹ mẹ. To osun atọ̀ntọ mẹ, yé ko to anadena plọnmẹ Biblu whégbè tọn 16 lẹ. Otò lọ yin hinhẹngble tlala gbọn aigba sisọsisọ de he jọ to ṣẹnṣẹn Taïwan tọn to 21 septembre 1999 dali, ṣigba jlodotọ delẹ zindonukọn nado to nukọnyiyi gbigbọmẹ tọn tindo, dile etlẹ yindọ yé dona zinzọnlin na nudi ganhiho dopo nado yì opli lẹ to Plitẹnhọ Ahọluduta tọn he sẹpọ hugan lọ mẹ. Mọwẹ, linsinsinyẹn yin nuhudo etọn tindo nado gbẹ̀n sinsẹ́n dagbe de, vlavo sinsẹ́n agbasa tọn kavi dehe yin wunmẹ gbigbọmẹ tọn.

[Yẹdide Otò Tọn to weda 8]

CHINE

Ogblọ́n Taïwan tọn

TAÏWAN

[Asisa Yẹdide Tọn]

Mountain High Maps® Copyright © 1997 Digital Wisdom, Inc.