Mẹhe Yiwanna Jehovah lẹ Wẹ Yin Nuhọakuẹ Na Ẹn
Lilatọ Ahọluduta Tọn lẹ Na Linlin
Mẹhe Yiwanna Jehovah lẹ Wẹ Yin Nuhọakuẹ Na Ẹn
LẸBANỌNI ko yin ayidego na adọkunnu jọwamọ tọn etọn lẹ sọn ojlẹ Biblu tọn lẹ mẹ gbọ́n. (Psalm 72:16; Isaia 60:13) Atin kedali tọn lẹ wẹ yin nuhọakuẹ tlala etọn lẹ na titengbe tọn, ehe nọ yin dindin hugan na nuyizan họgbigbá tọn na whanpẹ, owán dagbe, po dindẹn-to-aimẹ etọn po wutu. To owhe kanweko tintan whenu, nude he yin nuhọakuẹ hugan mọ tọ́n sọn Lẹbanọni. Wẹndagbe Malku tọn na linlin dọ sọn Tile po Sidọni po, to agbegbe hoho Lẹbanọni tọn ji, “agundaho de, [to] sisè onú daho he [Jesu] wà lẹ wá e dè.”—Malku 3:8.
Mọdopolọ to egbehe, Lẹbanọni zindonukọn nado to sinsẹ́n he họakuẹ tlala to nukun Jehovah tọn mẹ detọ́n. Numimọ he bọdego lẹ zinnudo ehe ji.
• Kunnudetọ jọja de he nọ yin Wissam yin didọna nado na hodidọ nukunwhiwhe 30 tọn de na klasi etọn to wehọmẹ. Wissam magbe dọ e na yin dotẹnmẹ hundote dagbe de nado na kunnudide de. Enẹwutu e yí owe lọ La vie—comment est-elle apparue? Évolution ou Création? zan bo wleawuna hodidọ de do hosọ nudida tọn ji. Ṣigba, to whenuena e mọ nujidọhodo lọ, mẹplọntọ Wissam tọn dọ dọ to whenuena e yindọ hosọ titengbe de wẹ e yin, Wissam sọgan dlẹnkanna hodidọ etọn jẹ nukunwhiwhe 45.
Dile Wissam bẹ hodidọ etọn jẹeji, mẹplọntọ etọn doalọtena ẹn bo domẹhlan ogán wehọmẹ lọ tọn. To madẹnmẹ ogán wehọmẹ lọ tọn wá, bọ Wissam vọ́ hodidọ etọn bẹjẹeji. Dile ewọ dotoai hlan kanbiọ lẹ he Wissam detọ́n to homẹbibiọ hodidọ etọn tọn mẹ, homẹhun ogán wehọmẹ tọn lọ bọ e dọ dọ wehọmẹvi lẹpo dona mọ vọkan hodidọ lọ tọn yí.
Ojlẹ vude godo mẹplọntọ devo, he juwajei, doayi ninọmẹ awuvivi tọn he tin to klasi lọ mẹ go bosọ kàn nuhe to jijọ lọ sè. To whenuena e yin didọna, e kanse eyin Wissam to tintẹnpọn nado do nugbo-yinyin nudida kavi nulẹ tin yededenu tọn hia. “Nudida,” wẹ gbeyiyi lọ dọ. To whenuena e yọnẹn dọ Wissam yin dopo to Kunnudetọ Jehovah tọn lẹ mẹ, mẹplọntọ lọ dọ hlan klasi lọ dọmọ: “Mì na mọ to hodidọ etọn mẹ dọ lẹnunnuyọnẹn nọgodona nudida, e mayin nulẹ tin yededenu gba.”
E wá yindọ mẹplọntọ ehe tindo vọkan owe Création tọn bo ko nọ yí ì zan nado plọnnumẹ to wehọmẹ alavọ tọn mẹ! Whẹ̀po e do yì, e kanse eyin e sọgan lẹkọwa to wunkẹngbe po wehọmẹvi etọn lẹ po bọ Wissam nido sọgan dọho na klasi etọn. Enẹ dekọtọn do kunnudide dagbe devo mẹ hlan Jehovah.
• Nugbla osin nugbo lọ tọn to hùhù Nina owhe-konukunawe-mẹvi de. To gbèdopo tanyin-vi etọn na ẹn Biblu de bosọ plan ẹn yì Ṣọṣi Pentecôtiste tọn mẹ. Nina hia Biblu lọ po homẹhunhun po bosọ plọn sọn wehihia etọn mẹ dọ Klistiani lẹ dona dọyẹwheho, enẹwutu e jẹ hodọ hẹ mẹyinyọnẹn etọn lẹ ji. Mẹdepope he e dọho hẹ nọ kanse e dọmọ: “Dopo to Kunnudetọ Jehovah tọn lẹ mẹ wẹ hiẹ yin ya?” Enẹ paṣa ẹ taun.
To owhe ṣidopo godo, Kunnudetọ Jehovah tọn lẹ dla Nina pọ́n to whégbè bosọ dọna ẹn gando Ahọluduta Jiwheyẹwhe tọn go. To tintan whenu e tẹnpọn nado dín nuṣiwa to nuplọnmẹ yetọn lẹ mẹ. Ṣigba, e mọ dọ gblọndo yetọn lẹpo wẹ sọgbe hẹ lẹnpọn bosọ sinai do Biblu ji.
Nuhe Nina plọn to godo mẹ—yèdọ oyín Jiwheyẹwhe tọn, Jehovah; dona Ahọluduta tọn lẹ; po mọmọ po sọyi—hẹn ẹn kudeji dọ emi ko mọ nugbo lọ. E klán gbẹzan etọn do wiwe hlan Jiwheyẹwhe bosọ yí baptẹm. Na owhe ṣinawe he ko wayi lẹ, Nina ko wà sinsẹ̀nzọn taidi wẹndagbe-jlatọ whenu-gigọ tọn de. Na nugbo tọn, Jehovah nọ dona mẹhe tindo owanyi nujọnu tọn na ẹn lẹ.—1 Kọlintinu lẹ 2:9.