Naegbọn Mí Dona Yin Lẹnpọn Dagbenọ to Nukundido Mítọn lẹ Mẹ?

TODIDO heyin hinhẹndi lẹ po nukundido he mọ hẹndi yí lẹ po nọ na numọtolanmẹ pekọ tọn mí. Nalete, e yin alọkẹyi dọ susu odlọ po nukundido mítọn lẹ po tọn ma nọ dekọtọn do nuhe mí jlo mẹ gba. Flumẹjijẹ gbọzangbọzan tọn lẹ to gbẹzan mẹ sọgan hẹn mí tindo numọtolanmẹ homẹgble do mídetiti go tọn podọ etlẹ yin do mẹdevo lẹ go ga. Dawe nuyọnẹntọ de gbọn gbesisọ dali doayi e go dọmọ: “Todido susu hẹn ayiha jẹazọ̀n.”—Howhinwhẹn lẹ 13:12.

Etẹwẹ yin whẹwhinwhẹ́n delẹ he sọgan hẹnmẹ tindo numọtolanmẹ flumẹjijẹ tọn lẹ? Nawẹ mí sọgan wazọ́n do lẹnpọn dagbenọ yinyin to nukundido mítọn lẹ mẹ ji gbọn? Humọ, naegbọn e yin na alemọyi mítọn nado wàmọ?

Nukundido lẹ po Flumẹjijẹ lẹ Po

Po gbẹzan he tin to mizọnmizọn ji egbezangbe tọn po, dile mí to tintẹnpọn nado to yìyì afọsu-afọsi hẹ ẹ do, mọwẹ e nọ taidi dọ mí to awugbopo do niyẹn. Obiọ lẹ do ojlẹ po huhlọn mítọn po ji sọgan nọ ma tindo dogbó, podọ to whenuena mí gboawupo nado wà nuhe mí basi todohukanji nado wà lẹ, yọnbasi lọ tin nado gblewhẹdo mídelẹ. Mí tlẹ sọgan sọ jẹ numọtolanmẹ lọ tindo ji dọ e taidi dọ mí to mẹdevo lẹ hẹn jẹflumẹ. Cynthia, asi po onọ̀ de po he yọ́n kọgbidinamẹnu mẹjitọ-yinyin tọn lẹ, dọmọ: “Gbesisọnọ mayin to vọjlado bibasi na ovi ṣie lẹ mẹ po numọtolanmẹ lọ po dọ yẹn ma to yé plọn ganji nọ hẹn mi gblehomẹ.” Stephanie, jọja aflanmẹ de, dọ gando wepinplọn etọn go dọmọ: “Yẹn ma tindo ojlẹ he pé nado wà onú lẹpo he yẹn nọ jlo nado wà gba, podọ enẹ nọ fọ́n numọtolanmẹ sọmawhe tọn lẹ dote to yẹn mẹ.”

Nukundido he yiaga tlala bo ma sọgbe hẹ lẹnpọn dagbe lẹ nọ lẹzun pipenọ-yinyin to nulẹpo mẹ dindin po awubibọ po, podọ ehe sọgan hẹnmẹ jẹflumẹ taun. Ben, sunnu jọja he ko wlealọ de, yigbe dọmọ: “To whenuena yẹn gbeje nuyiwa, linlẹn, kavi numọtolanmẹ ṣie lẹ pọ́n, yẹn nọ saba mọ lehe yé dona ko yọ́n hugan mọ do. Yẹn nọ to pipé-yinyin dín to whepoponu, podọ ehe nọ dekọtọn do sọmawhe, po flumẹjijẹ po mẹ.” Gail, Klistiani asi de, dọmọ: “Linlẹn pipenọ-yinyin hugan dindin tọn ma nọ jo dotẹnmẹ do na awugbopo gba. Mí nọ jlo na yin onọ̀ he yọ́n hugan lẹ po asi he yọ́n hugan lẹ po. Mí dona nọ de sinsẹ́n tọn nado yin ayajẹnọ, enẹwutu vivẹnudido heyin hinhẹngú nọ hẹn mí gblehomẹ.”

Ṣogan whẹwhinwhẹ́n devo he sọgan dekọtọn do flumẹjijẹ mẹdetiti tọn mẹ wẹ doyiyi agbasalilo tọn po yọnhopipo po. Didepo nugopipe tẹnsisẹ tọn po huhlọn tọn po nọ hẹn dogbó mítọn lẹ sudeji bo nọ yidogọna numọtolanmẹ flumẹjijẹ tọn mítọn lẹ. “Yẹn lẹzun sọmawhenọ do dee titi go na nugomape nado basi wadotana onú lẹ he nọ bọawu bo yin jọwamọ tọn sọmọ whẹpo yẹn do bẹ awutu,” wẹ Elizabeth yigbe dọ.

Apajlẹ heyin nùdego to aga lẹ yin delẹ to nuhe sọgan fọ́n numọtolanmẹ flumẹjijẹ tọn dote lẹ mẹ. Yin e mayin didava, numọtolanmẹ mọnkọtọn lẹ tlẹ sọgan hẹn mí nado yise dọ mẹdevo lẹ ma yọ́n pinpẹn mítọn gba. Enẹwutu, afọdide nujikudo tọn tẹlẹ wẹ mí sọgan ze nado pehẹ flumẹjijẹ lẹ podọ nado wleawuna nukundido lẹnpọn dagbenọ lẹ?

Aliho lẹ Nado Wleawuna Nukundido Lẹnpọn Dagbenọ Lẹ

Tintan whẹ́, flindọ Jehovah yin lẹnpọn dagbenọ po nukunnumọjẹnumẹtọ po. Psalm 103:14 flin mí dọmọ: “Ewọ yọ́n didá mítọn; e sọ flin dọ kọ́gudu wẹ mí.” Na yinyọ́n nugopipe po dogbó mítọn lẹ po wutu, Jehovah nọ donukun nuhe mí penugo nado na lẹ kẹdẹ sọn mí dè. Podọ onú dopo he e to bibiọ sọn mí si wẹ ‘nado tin to jlẹkaji to zọnlinzinzin hẹ Jiwheyẹwhe mítọn mẹ.’—Mika 6:8.

 Jehovah sọ dotuhomẹna mí nado lẹhlan ewọ dè to odẹ̀ mẹ ga. (Lomunu lẹ 12:12; 1 Tẹsalonikanu lẹ 5:17) Ṣigba, nawẹ enẹ nọ gọalọna mí gbọn? Odẹ̀ nọ hẹn lẹnpọn mítọn lẹ lodo bo tin to jlẹkaji. Odẹ̀ vẹkuvẹku yin gbeyiyi de dọ mí tindo nuhudo alọgọ tọn—ohia jlẹkaji-ninọ po whiwhẹ tọn de po wẹ e yin. Jehovah tin to jejeji nado na gblọndo na odẹ̀ mítọn lẹ gbọn nina mí gbigbọ wiwe etọn dali, he sinsẹ́n etọn bẹ owanyi, homẹdagbe, dagbewà, po mawazẹjlẹgo po hẹn. (Luku 11:13; Galatianu lẹ 5:22, 23) Odẹ̀ sọ nọ de magbọjẹ po flumẹjijẹ po pò. Gbọn odẹ̀ gblamẹ, “hiẹ nọ mọ homẹmimiọn yí to mayọnẹn mẹ sọn asisa devo depope mẹ,” wẹ Elizabeth dọ. Kevin kọngbedopọ dọmọ: “Yẹn hodẹ̀ na ahun whiwhẹ tọn de po ayiha he họnwun de po na yẹn nido sọgan yinuwa hẹ nuhahun de. Jehovah ma hẹn mi jẹflumẹ pọ́n gba.” Apọsteli Paulu yọ́n nuhọakuẹ taun odẹ̀ tọn. Enẹwutu wẹ e na ayinamẹ dọmọ: “Mì nọ yí kanbiọ mìtọn hia Jiwheyẹwhe to onú popo mẹ. Jijọho Jiwheyẹwhe tọn he hú nuyọnẹn lẹpo na whlá [ahun mìtọn lẹ po huhlọn apọ̀nmẹ tọn mìtọn lẹ po, to NW] Klisti Jesu mẹ.” (Filippinu lẹ 4:6, 7) Mọwẹ, hodidọ hẹ Jehovah nọ wazọ́n na taun tọn nado gọalọna mí nado wleawuna nukundido lẹnpọn dagbenọ lẹ gando mídelẹ po mẹdevo lẹ po go.

Nalete, to whedelẹnu, mí nọ tindo nuhudo jidevọnamẹ afọdopolọji tọn. Ohó de to ojlẹ he sọgbe mẹ yin onú dagbe. Hodidọ aṣli tọn hẹ họntọn dejidego he whèwhín de sọgan gọalọna mí nado tindo pọndohlan yọyọ gando nuhe to numọtolanmẹ flumẹjijẹ kavi magbọjẹ tọn hẹn wá na mí de go. (Howhinwhẹn lẹ 15:23; 17:17; 27:9) Jọja he to avùnho hẹ flumẹjijẹ lẹ nọ plọn dọ dindin ayinamẹ mẹjitọ lẹ tọn nọ gọalọna yé nado mọ jlẹkaji-ninọ. Kandi yigbe po pinpẹn-nutọn-yinyọnẹn po dọmọ: “Anademẹ owanyinọ sọn mẹjitọ ṣie lẹ dè ko hẹn mi yin lẹnpọn dagbenọ po jlẹkanọtọ de po bosọ hẹn mi yin mẹhe bọawu nado dogbẹ́ hẹ.” Mọwẹ, nuflinmẹ he tin to Howhinwhẹn lẹ 1:8, 9 mẹ wá do ganmẹ taun dọmọ: “Ovi ṣie, sè mẹplọngbe otọ́ towe tọn, a gbẹ́ osẹ́n onọ̀ towe tọn dai blo: na yé na yin gbákún whanpẹ tọn de hlan ota towe, podọ okọ̀jẹ lẹ de lẹdo okọ̀ towe.”

Kọdetọn nulẹnpọn pipenọ-yinyin to nulẹpo mẹ tọn lẹ yin bibladopọ ganji to oló de mẹ dọ: “Nado donukun dọ gbẹzan ni yin hinhẹn sọgbe hẹ ojlo tangan mítọn lẹ yin nado basi oylọna flumẹjijẹ.” Nado dapana ehe, vọjlado to nulẹnpọn mẹ yin bibiọ. Whiwhẹ po jlẹkaji-ninọ po—yèdọ pọndohlan he sọgbe hẹ lẹnpọn dagbe tintindo gando dogbó mítọn lẹ go—na wleawuna nukundido jlẹkaji tọn po lẹnpọn dagbe tọn lẹ po do mí mẹ na jide tọn. Po gbesisọ po, Lomunu lẹ 12:3 na avase mí “ma nado lẹn [mídelẹ] tọn glanglan hú ehe jẹ e ni lẹn blo.” To yidogọ mẹ, Filippinu lẹ 2:3 na tuli mí nado tindo whiwhẹ ayiha mẹ tọn bosọ nọ pọ́n mẹdevo lẹ hlan taidi mẹhe klo hugan mí.

Elizabeth, heyin nùdego jẹnukọn, yin sọmawhenọ do ede go na azọ̀njijẹ etọn wutu. Na ewọ, e tindo nuhudo ojlẹ tọn nado wá tindo pọndohlan Jehovah tọn do whẹho lẹ ji podọ nado yin homẹmiọnna to yinyọnẹn mẹ dọ e ma wọnji sinsẹ̀nzọn mítọn go gba. Colin yin hinhẹn kuawu na awutu mẹhẹngbọjọ tọn de wutu. To bẹjẹeji, e tindo numọtolanmẹ lẹ dọ lizọnyizọn etọn diblayin onú tata yin e yin yiyijlẹdo nuhe e ko nọ wà to whenuena e tindo agbasalilo dagbe go. Gbọn ayihamẹlinlẹnpọn do wefọ lẹ taidi 2 Kọlintinu lẹ 8:12 ji dali, e penugo nado dè numọtolanmẹ ehelẹ sẹ̀. Wefọ ehe dọmọ: “Eyin ojlo homẹ tọn tin jẹnukọn, yè kẹalọyi i kẹdẹdi ehe omẹ lọ tindo, e ma yin kẹdẹdi ehe e ma tindo gba.” “Dile etlẹ yindọ onú vude poun wẹ yẹn tindo nado na,” wẹ Colin dọ, “yẹn sọgan gbẹsọ na, podọ Jehovah nọ kẹalọyi enẹ.” To Heblu lẹ 6:10, mí yin nuflin dọmọ: “Jiwheyẹwhe mayin mawadodonọ nado wọn azọ́n mìtọn po tukla owanyi mìtọn tọn po, he mì ko sọhia gbọn oyín etọn dali.”

To whelọnu lo, nawẹ mí sọgan yọnẹn gbọn vlavo dọ nukundido mítọn lẹ yin lẹnpọn dagbe tọn? Kanse dewe dọ, ‘Be nukundido ṣie lẹ nọ zọ̀n afọsu-afọsi hẹ nukundido Jiwheyẹwhe tọn lẹ ya?’ Galatianu lẹ 6:4 dọmọ: “Gbọ omẹ dopodopo mìtọn ni mọdona azọ́n ede tọn whẹ́, whenẹnu wẹ e na tindo ayajẹ to ede homẹ kẹdẹ, e ma na yin mẹdevo tọn gba.” Flin, Jesu dọmọ: “Zẹ̀gẹ̀ ṣie bọawu, agbàn ṣie sọ fua.” Mọwẹ, taidi Klistiani lẹ, mí tindo zẹ̀gẹ̀ de nado hẹn, ṣigba e “bọawu” bosọ “fua,” podọ Jesu dopagbe dọ e na miọnawunamẹ eyin mí plọn nado hẹn ẹn to aliho he sọgbe mẹ.—Matiu 11:28-30.

Nukundido Lẹnpọn Dagbe Tọn lẹ Nọ Hẹn Ahọsumẹ Họakuẹ lẹ Wá

Ahọsumẹ ojlẹ gli tọn po tẹgbẹ̀ tọn lẹ po nọ wá sọn todidoai po yíyí ayinamẹ Ohó Jiwheyẹwhe  tọn tọn lẹ po do yizan mẹ dile mí to awuwlena nukundido lẹnpọn dagbe tọn lẹ mẹ. Onú dopo wẹ yindọ, ehe nọ tindo nugandomẹgo dagbe de do mí ji to agbasa-liho. Jennifer, he ko mọaleyi sọn nuflinmẹ Jehovah tọn lẹ mẹ, yigbe dọmọ: “Yẹn tindo huhlọn po zohunhun dogọ po na gbẹzan.” Po gbesisọ po, Howhinwhẹn lẹ 4:21, 22 dotuhomẹna mí nado yí nukun po ahun mítọn po do payi hodidọ Jehovah tọn lẹ go, “na ogbẹ̀ wẹ yé yin na yé he dín yé mọ, podọ gángánninọ hlan agbasalan [yetọn] lẹpo.”

Ahọsumẹ devo wẹ dagbemẹ-ninọ apọ̀nmẹ po numọtolanmẹ tọn po. “To whenuena yẹn hùn ayiha po ahun ṣie po do nùvo hlan Ohó Jiwheyẹwhe tọn, yẹn mọdọ yẹn nọ yin gbẹtọ ayajẹnọ de to whepoponu,” wẹ Theresa dọ. Nugbo wẹ dọ, mí na gbẹsọ nọ tindo numimọ flumẹjijẹ tọn lẹ to gbẹ̀mẹ. Ṣogan, mí na penugo nado doakọnna yé po awubibọ po taun. “Mì sẹpọ Jiwheyẹwhe, ewọ nasọ sẹpọ mì,” wẹ Jakobu 4:8 dotuhomẹnamẹ dọ. Jehovah sọ dopagbe ga nado hẹn mí lodo to pipehẹ avùnnukundiọsọmẹnu gbẹ̀mẹ tọn lẹ mẹ podọ nado yí jijọho do dona mí.—Psalm 29:11.

Nukundido lẹnpọn dagbe tọn lẹ tintindo nọ gọalọna mí nado hẹn dolilo gbigbọmẹ tọn go. Ehe lọsu yin dona de. Mí sọgan ze ayidonugo he họnwun do nuhe yin nujọnu hugan to gbẹ̀mẹ lẹ ji. (Filippinu lẹ 1:10) To whenẹnu wẹ yanwle mítọn lẹ nọ yin dehe sọgbe hẹ lẹnpọn dagbe he kọ̀n yè sọgan jẹ lẹ, he nọ hẹn ayajẹ po pekọ daho po wá. Mí na nọ jlo dogọ nado ze mídelẹ do alọmẹ na Jehovah, to yinyọnẹn mẹ dọ ewọ na deanana onú lẹ nado tindo kọdetọn dagbe hugan. “Mì whiwhẹ mìde to alọ gángán Jiwheyẹwhe tọn glọ, na ewọ nido ze mì daga to ojlẹ etọn mẹ,” wẹ Pita dọ. (1 Pita 5:6) Be nudevo depope tin he na doale hugan yinyin gbégbòna gbọn Jehovah dali ya?

[Yẹdide to weda 31]

Awuwiwlena nukundido lẹnpọn dagbe tọn lẹ sọgan gọalọna mí nado pehẹ flumẹjijẹ lẹ