Nuyọnẹn Jijọ-di-Jiwheyẹwhe Tọn—Nawẹ E Nọ Yin Didehia Gbọn?

“YÈ VLẸ [nuyọnẹn, NW] dawe wamọnọ lọ tọn, ogbè etọn ma sọ hùnú.” Po hogbe ehelẹ po, Ahọlu nuyọnẹntọ Sọlọmọni dotana otàn dawe whiwhẹnọ ṣigba nuyọnẹntọ de tọn he whlẹn otò blebu de gán sọn vasudo mẹ. Ṣigba, e blawu dọ “mẹde ma flinnu jẹ dawe wamọnọ lọ go gba.”—Yẹwhehodọtọ 9:14-16.

Gbẹtọvi lẹ nọ saba yí nukun pẹvi do pọ́n wamọnọ lẹ, yèdọ eyin wamọnọ ehelẹ tlẹ wà onú dagbe lẹ. Ehe yin nugbo to whẹho Jesu tọn mẹ. Isaia dọ dọdai gando ewọ go dọmọ: “Yè vlẹ ẹ, yè sọ gbẹ́ ẹ to gbẹtọ lẹ dè, gbẹtọ awublanọ, he yọ́n awubla.” (Isaia 53:3) Jesu yin vivlẹ gbọn mẹdelẹ dali na e ma tindo otẹn kavi yindidi nukọntọ azán etọn gbè tọn lẹ tọn poun wutu. Ṣogan, e tindo nuyọnẹn he klo hugan enẹ heyin gbẹtọvi mapenọ depope tọn. Mẹhe nọ nọ̀ otò Jesu tọn mẹ lẹ gbẹ́ nado yigbe dọ “visunnu atinpatọ tọn” ehe do nuyọnẹn mọnkọtọn hia bosọ wà azọ́n huhlọnnọ mọnkọtọn lẹ. Ṣigba, enẹ yin nuṣiwa titengbe de, na kandai lọ zindonukọn nado dọ dọ Jesu “ma . . . wazọ́n hlọnhlọnnọ [susu] lẹ to finẹ gba na mayise yetọn tọn wutu.” Nuhẹngu nankọtọn die na omẹ enẹlẹ!—Matiu 13:54-58.

Na míwlẹ ni ma basi nuṣiwa dopolọ blo. “Yè ko suwhẹna nuyọnẹn gbọn azọ́n etọn lẹ dali,” wẹ Jesu dọ. Mẹhe to azọ́n Jiwheyẹwhe tọn wà bosọ to oyọnẹn he wá sọn olọn mẹ má namẹ lẹ nọ yin yinyọnẹn, e mayin gbọn otẹn kavi yindidi yetọn to ogbẹ́ mẹ dali gba, ṣigba gbọn “sinsẹ́n dagbe” he yé nọ dehia lẹ dali—yèdọ yise po nuyiwa sinai-do-Biblu ji yetọn lẹ po.—Matiu 7:18-20; 11:19.