Avọ́sinsan Pipà Tọn lẹ He Nọ Hẹn Homẹhun Jehovah
Avọ́sinsan Pipà Tọn lẹ He Nọ Hẹn Homẹhun Jehovah
“Mì ni yí agbasa mìtọn do basi avọ́sinsan ogbẹ̀nọ, wiwe, alọkẹyi hlan Jiwheyẹwhe.”—LOMUNU LẸ 12:1.
1. Etẹwẹ Biblu dọ gando nuhọakuẹ jlẹkaji tọn he avọ́sinsan lẹ tindo to Osẹ́n Mose tọn glọ go?
‘TO WHENUENA e yindọ Osẹ́n lọ tindo oyẹ̀ onú dagbe he ja lẹ tọn, ṣigba mayin ojlẹmọ onú lọ lẹ pẹpẹ tọn, gbẹtọ lẹ ma sọgan gbọn avọ́sinsan dopolọ he yé nọ basi tẹgbẹ̀ to whemẹwhemẹ lẹ gblamẹ hẹn mẹhe dọnsẹpọ lẹ yin pipé gba.’ (Heblu lẹ 10:1) To finẹ, to hodidọ he họnwun dopo mẹ, apọsteli Paulu zinnudeji dọ avọ́sinsan he nọ yin nina to Osẹ́n Mose tọn glọ lẹpo ma tindo nuhọakuẹ tẹgbẹ̀ tọn gba na nuhe dù whlẹngán gbẹtọ tọn.—Kọlọsinu lẹ 2:16, 17.
2. Naegbọn tintẹnpọn nado mọnukunnujẹ nudọnamẹ gigọ́ lẹ to Biblu mẹ gando avọ́nunina lẹ po avọ́sinsan heyin bibiọ to Osẹ́n glọ lẹ po go mayin to ovọ́ mẹ gba?
2 Be ehe zẹẹmẹdo dọ nudọnamẹ he tin to Pẹntateki mẹ lẹ gando avọ́nunina po avọ́sinsan lẹ po go ma tindo nuhọakuẹ depope na Klistiani lẹ to egbehe wẹ ya? Na taun tọn, to nuhe dite vude hugan owhe dopo gblamẹ, mẹhe ze yinkọ dai to Wehọmẹ Lizọnyizọn Yẹwhehọluduta tọn mẹ to agun Kunnudetọ Jehovah tọn lẹ mẹ lẹdo aihọn pé lẹ hia owe atọ́n tintan Biblu tọn to agọe. Mẹdelẹ ko dovivẹnu sọwhiwhe tọn nado hia bosọ mọnukunnujẹ zẹẹmẹ gigọ́ lẹpo mẹ. Be vivẹnudido yetọn lẹpo ko yin to ovọ́ mẹ wẹ ya? Na jide tọn enẹ ma sọgan yin whẹho lọ gba, na “onú depope he yè ko wlan dai, yè wlan yé na oplọn mítọn, dọ míwlẹ gbọn homẹfa po homẹmiọn Owe-wiwe lẹ tọn po dali nido tindo todo.” (Lomunu lẹ 15:4) To whelọnu lo, kanbiọ lọ wẹ yin ‘Nuplọnmẹ’ po “homẹmiọn” tẹ po wẹ mí sọgan ṣinyan pli sọn bẹplidopọ nudọnamẹ he tin to Osẹ́n lọ mẹ gando avọ́nunina po avọ́sinsan lẹ po go mẹ?
Na Nuplọnmẹ po Homẹmiọn Mítọn Po
3. Nuhudo dodonu tọn tẹwẹ mí tindo?
3 Dile yè ma tlẹ biọ to míwlẹ si nado basi avọ́sinsan paa lẹ to wunmẹ heyin zizedai gbọn Osẹ́n lọ dali mẹ do, mí gbẹsọ tindo nuhudo nuhe avọ́sinsan lẹ wà na Islaelivi lẹ tọn jẹ obá de mẹ taun, yèdọ nado mọ jona yí na ylando mítọn lẹ bosọ duvivi nukundagbe Jiwheyẹwhe tọn tọn. To whenuena e yindọ mí ma gbẹsọ nọ basi avọ́sinsan paa lẹ, nawẹ mí sọgan mọ alemọyi mọnkọtọn lẹ yí gbọn? To alọdindlẹndo dogbó he avọ́sinsan kanlin lẹ tọn tindo godo, Paulu lá dọmọ: ‘Whenuena Jesu wá aihọn mẹ, e dọmọ, Avọ́sinsan po avọ́nunina po hiẹ ma jlo, ṣigba agbasa wẹ hiẹ ko wleawu etọn dai na mi: avọ́nunina mimẹ̀ podọ avọ́nunina na ylando hiẹ masọ tindo homẹhunhun na. Whenẹnu wẹ yẹn dọmọ, Doayi e go, yẹn wá, (to apò owe lọ tọn mẹ wẹ yè wlanwe ṣie do,) nado wà ojlo towe, Jiwheyẹwhe E.’—Heblu lẹ 10:5-7.
4. Nawẹ Paulu basi yọn-na-yizan Psalm 40:6-8 tọn do Jesu Klisti go gbọn?
4 To hoyidọ sọn Psalm 40:6-8 mẹ, Paulu dlẹnalọdo dọ Jesu ma wá nado hẹn ‘avọ́sinsan po avọ́nunina,’ yèdọ “avọ́nunina mimẹ̀ podọ avọ́nunina na ylando,” he to ojlẹ he mẹ Paulu to owe etọn wlan te ma gbẹsọ tindo alọkẹyi Jiwheyẹwhe tọn gbọṣi aimẹ kakadoi gba. Kakatimọ, Jesu wá po agbasa heyin awuwlena gbọn Otọ́ olọn mẹ tọn etọn dali de po, heyin dehe sọgbe pẹpẹ to ninọmẹ lẹpo mẹ hẹ enẹ he Jiwheyẹwhe wleawu etọn to whenuena E dá Adam. (Gẹnẹsisi 2:7; Luku 1:35; 1 Kọlintinu lẹ 15:22, 45) Taidi Visunnu pipé Jiwheyẹwhe tọn, Jesu tin to otẹn “okún” yọnnu lọ tọn tọn mẹ, dile e yin didọdai to Gẹnẹsisi 3:15 mẹ do. E na ze afọdide lẹ nado ‘só ota Satani tọn,’ dile etlẹ yindọ Jesu lọsu na yin ‘siso to afọgbẹn’ do. To aliho ehe mẹ, Jesu lẹzun nuyizan lọ he gblamẹ Jehovah wleawu whlẹngán tọn na gbẹtọvi, he sunnu nugbonọ lẹ ko to nukundo sọn azán Abẹli tọn lẹ gbè gbọ́n.
5, 6. Aliho he yiaga hugan nado dọnsẹpọ Jiwheyẹwhe tẹwẹ tin-to-aimẹ na Klistiani lẹ?
5 To hodidọ gando azọngban vonọtaun he Jesu yiwà ehe go, Paulu dọmọ: “Na [Jiwheyẹwhe] ko yí ewọ he ma yọ́n ylando depope nado yin ylando na mí; na yè nido yí mí do basi [dodowiwa] Jiwheyẹwhe tọn to ewọ mẹ.” (2 Kọlintinu lẹ 5:21) Hodidọ lọ “yin ylando” sọgan sọ yin lilẹdogbedevomẹ do ‘yin bibasi taidi avọ́nunina ylando tọn de.’ Apọsteli Johanu dọmọ: “Ewọ sọ wẹ [avọ́sinsan, NW ] oyẹsu [tọn] na ylando mítọn: e mayin mítọn kẹdẹ, ṣigba na ylando aihọn lẹpo tọn ga.” (1 Johanu 2:2) Enẹwutu, to whenuena e yindọ Islaelivi lẹ tindo nuyizan whenu gli tọn de nado dọnsẹpọ Jiwheyẹwhe gbọn avọ́sinsan yetọn lẹ gblamẹ, Klistiani lẹ tindo dodonu he yiaga hugan de na Jiwheyẹwhe dè wiwá—yèdọ avọ́sinsan Jesu Klisti tọn. (Johanu 14:6; 1 Pita 3:18) Eyin mí yí yise zan to avọ́sinsan ofligọ tọn heyin awuwlena gbọn Jiwheyẹwhe dali mẹ bosọ setonuna Ewọ, mílọsu sọgan tindo jona ylando mítọn lẹ tọn bosọ duvivi nukundagbe po dona Jiwheyẹwhe tọn tọn po. (Johanu 3:17, 18) Be enẹ mayin asisa homẹmiọnnamẹ tọn de ya? Nalete, nawẹ mí sọgan dohia gbọn dọ mí tindo yise to avọ́sinsan ofligọ tọn mẹ?
6 To whenuena e ko basi zẹẹmẹ dọ Klistiani lẹ tindo dodonu he yiaga hugan de nado dọnsẹpọ Jiwheyẹwhe godo, apọsteli Paulu basi todohukanji aliho atọ̀n he mẹ mí sọgan do yise po pinpẹn-nutọn-yinyọnẹn mítọn po hia te na awuwledainanu owanyinọ Jiwheyẹwhe tọn lẹ, dile mí hia do to Heblu lẹ 10:22-25. Dile etlẹ yindọ tudohomẹnamẹ Paulu tọn yin didọ tlọlọ hlan mẹhe tindo “[aliho lọ, NW ] nado biọ ofi he wé gbau mẹ” lẹ do sọ—enẹ wẹ yin, Klistiani yiamisisadode he tindo oylọ olọn mẹ tọn lẹ—po jide po gbẹtọvi lẹpo wẹ dona dotoaina hodidọ gbọdo Paulu tọn lẹ eyin yé jlo na mọaleyi sọn avọ́sinsan ofligọ tọn Jesu tọn mẹ.—Heblu lẹ 10:19.
Sanvọ́ He Wé bo Ma Dowángo Lẹ
7. (a) Nawẹ Heblu lẹ 10:22 do nuhe nọ yin wiwà to avọ́sinsan de mẹ hia gbọn? (b) Etẹwẹ dona yin wiwà nado hẹn ẹn diun dọ Jiwheyẹwhe kẹalọyi avọ́sinsan de?
7 Jẹnukọn, Paulu dotuhomẹna Klistiani lẹ dọmọ: “Mì gbọ mí ni yí ayiha nugbo de do dọnsẹpọ ẹ, to gigọ́ yise tọn mẹ, na yè ni yí nuyìnnú do klọ́ ayiha ylankan mítọn mẹ, bosọ yí osin wiwe do klọ́ agbasa mítọn wé.” (Heblu lẹ 10:22) Po gbesisọ po hogbe heyin yiyizan tofi lọ do nuhe nọ yin wiwà to avọ́sinsan taun de mẹ to Osẹ́n lọ glọ hia. Ehe sọgbe taun na whẹpo avọ́sinsan de nido yin alọkẹyi, e dona yin bibasi po mẹwhinwhàn he sọgbe po bo sọ dona yin nude he wé bo ma dowángo. Kanlin he nọ yin yíyí do sanvọ́ lọ nọ yin sọn kanlinpo kavi kanlinpa lọ mẹ, enẹ wẹ nado dọ dọ kanlin lọ lẹ yin madodiho, bosọ yin “madoazọ̀n,” yèdọ matindo oblọ depope. Eyin avọ́sinsan lọ yin sọn ohẹ̀ lẹ mẹ, e dona yin sọn owhlé lẹ kavi awhannẹvu lẹ mẹ. Eyin nubiọtomẹsi enẹlẹ yin jijẹ e kọ̀n, “e na sọ yin alọkẹyi [po homẹdagbe po] na ẹn nado basi ovẹsè na ẹn.” (Levitiku 1:2-4, 10, 14; 22:19-25) Avọ́nunina jinulili tọn ma nọ tindo otọ́n depope gba, he yin yẹhiadonu hẹnflu tọn; mọjanwẹ e ma dona tindo owín do, vlavo he zẹẹmẹdo osin vivi atin-sinsẹ́n tọn, he tindo nugopipe nado hẹn nude nado jí. To whenuena avọ́sinsan lẹ—kanlin kavi jinulili tọn—yin bibasi to agbà lọ ji, ojẹ̀, he nọ zọ́n bọ onú ma nọ gble, nọ yin yiyidogọ.—Levitiku 2:11-13.
8. (a) Etẹwẹ nọ yin bibiọ sọn mẹhe to avọ́nunina de basi dè? (b) Nawẹ mí sọgan hẹn ẹn diun dọ Jehovah na kẹalọyi sinsẹ̀n-bibasi mítọn gbọn?
8 Etẹwẹ dogbọn mẹhe to avọ́nunina lọ basi dali? Osẹ́n lọ dọ dọ mẹdepope he ja Jehovah nukọn dona wé bo ma na dowángo. Mẹdepope he ko yin hinhẹnflu na whẹwhinwhẹ́n depope wutu dona na avọ́nunina ylando tọn kavi whẹhuhu tọn jẹnukọn whẹ́ nado hẹn teninọ wiwé etọn to Jehovah nukọn gọdotẹnmẹ na avọ́nunina mimẹ̀ tọn kavi kọndopọ tọn etọn nido sọgan yin alọkẹyi gbọn Ewọ dali. (Levitiku 5:1-6, 15, 17) Enẹwutu, be mí mọnukunnujẹ nujọnu-yinyin teninọ wiwé de go hinhẹn to Jehovah nukọn to whepoponu mẹ ya? Eyin mí jlo dọ Jiwheyẹwhe ni kẹalọyi sinsẹ̀n-bibasi mítọn, mí dona nọ yawu nado basi vọjlado na osẹ́n Jiwheyẹwhe tọn lẹ depope gbigbà. Mí dona nọ yawu nado nọ basi yizan alọgọnamẹnu he Jiwheyẹwhe wleawudaina lẹ tọn—yèdọ ‘mẹho he tin to agun mẹ lẹ’ po ‘avọ́sinsan oyẹsu tọn na ylando mítọn lẹ’ po, heyin Jesu Klisti.—Jakobu 5:14; 1 Johanu 2:1, 2.
9. Vogbingbọn titengbe tẹwẹ tin to avọ́sinsan he nọ yin bibasi hlan Jehovah po dehe nọ yin bibasi hlan yẹwhe lalo tọn lẹ po lẹ ṣẹnṣẹn?
9 Na taun tọn, nùzindonuji do mẹdekannujẹ sọn oblọ wunmẹ depope si wẹ yin vogbingbọn titengbe lọ to avọ́sinsan he nọ yin bibasi hlan Jehovah po dehe nọ yin bibasi hlan yẹwhe lalo tọn lẹ gbọn gbẹtọ he tin to akọta he lẹdo Islaeli pé lẹ mẹ po dali. To zẹẹmẹ bibasi do adà vonọtaun avọ́sinsan he tin to Osẹ́n Mose tọn mẹ ehe ji mẹ, azọ́n alọdlẹndonu tọn dopo doayi e go dọmọ: “Gando avọ́sinsan he tin to Osẹ́n Mose tọn glọ lẹ go, mí sọgan doayi e go dọ kọndopọ depope matin to dọṣẹdidọ po ohia lẹ po mẹ gba; numọtolanmẹ sinsinyẹn sinsẹ̀n tọn, awugbigblena-mẹdetiti, kavi ogalilọ wiwe depope matin gba, hùnwhẹ nugopipe vijiji zanhẹmẹ po paṣadudu tọn lẹ po depope yin osùnú mlẹnmlẹn; avọ́sinsan gbẹtọvi tọn depope; avọ́sinsan hlan oṣiọ lẹ depope matin gba.” Ehe lẹpo dọ̀n ayidonugo wá nuagokun dopo ji: Jehovah yin wiwé, podọ e ma nọ yí nukun pẹvi do pọ́n kavi kẹalọyi ylando kavi hẹnflu wunmẹ depope gba. (Habbakuk 1:13) Sinsẹ̀n-bibasi po avọ́sinsan heyin bibasi hlan ẹn lẹ po dona wé bo ma dowángo—to agbasa-liho, walọyizan-liho, podọ to gbigbọ-liho.—Levitiku 19:2; 1 Pita 1:14-16.
10. To kọndopọmẹ hẹ tudohomẹnamẹ Paulu tọn dile e yin kinkàndai to Lomunu lẹ 12:1, 2 mẹ do, mẹdetiti-gbigbejepọn tẹwẹ mí dona basi?
10 To pọndohlan mẹ na ehe, mí dona gbeje mídelẹ pọ́n to lẹdo gbẹzan tọn lẹpo mẹ nado hẹn ẹn diun dọ sinsẹ̀nzọn mítọn hlan Jehovah yin alọkẹyi gbọn ewọ dali. Mí ma dona lẹn gbede dọ dile e na dẹnsọ bọ mí nọ tindo mahẹ delẹ to opli Klistiani tọn lẹ mẹ podọ to lizọnyizọn lọ mẹ, nuhe mí nọ wà to gbẹzan mẹdetiti tọn mítọn mẹ mayin nujọnu gba. Mí ma sọ dona tindo numọtolanmẹ lọ dọ mahẹ tintindo to nuwiwa Klistiani tọn lẹ mẹ to aliho de mẹ hẹn mí vò sọn nuhudo lọ nado setonuna osẹ́n Jiwheyẹwhe tọn lẹ si to lẹdo gbẹzan mítọn tọn devo lẹ mẹ gba. (Lomunu lẹ 2:21, 22) Mí ma sọgan donukun dona po nukundagbe Jiwheyẹwhe tọn po gba eyin mí nọ dike na onú depope heyin mawé kavi dowángo to nukun etọn lẹ mẹ ni hẹn nulẹnpọn po nuyiwa mítọn lẹ po flu. Mì hẹn hodidọ Paulu tọn lẹ do ayiha mẹ dọmọ: “Yẹn yí lẹblanu Jiwheyẹwhe tọn lẹ do vẹ̀ mì, mẹmẹsunnu emi, dọ mì ni yí agbasa mìtọn do basi [avọ́sinsan] ogbẹ̀nọ, wiwe, alọkẹyi hlan Jiwheyẹwhe, heyin [sinsẹ̀nzọn wiwe po huhlọn nulẹnpọn tọn mìtọn po, NW ]. Podọ mì yin mẹkọndopọ hlan aihọn he blo; ṣigba mì ni yin mẹdiọadana gbọn hinhẹnjẹ yọyọ ayiha mìtọn tọn dali, na mì nido mọdona nuhe ojlo Jiwheyẹwhe tọn he yọ́n, alọkẹyi, bosọ sọgbe nẹ yin.”—Lomunu lẹ 12:1, 2.
Sanvọ́ Pipà Tọn lẹ po Ahun Lẹpo Po
11. Etẹ lẹ wẹ hodidọ lọ “lilá gbangba tọn,” heyin nùdego to Heblu lẹ 10:23 mẹ bẹhẹn?
11 To wekinkan hlan Heblu lẹ mẹ, Paulu to enẹgodo dọ̀n ayidonugo wá adà titengbe sinsẹ̀n-bibasi nugbo tọn de ji dọmọ: “Mì gbọ mí ni hẹn ogbèyí [gbangba todido, NW ] mítọn tọn go gligli to mado ayi awe mẹ; na nugbonọ wẹ ewọ he dopagbe.” (Heblu lẹ 10:23) Hogbe lọ “ogbèyí gbangba” tọn to paa mẹ zẹẹmẹdo “gbeyiyi ylando tọn,” podọ Paulu sọ dọho gando ‘avọ́sinsan pipà tọn’ go ga. (Heblu lẹ 13:15) Ehe flinnu mí gando avọ́sinsan wunmẹ he gbẹtọ taidi Abẹli, Noa, po Ablaham po basi go.
12, 13. Ogbè etẹ tọn yí wẹ Islaelivi de te to whenuena e basi avọ́sinsan avọ́nunina mimẹ̀ tọn de, podọ etẹwẹ míwlẹ sọgan wà nado do gbigbọ dopolọ hia?
12 To whenuena Islaelivi de na avọ́nunina mimẹ̀ de, e nọ yin wiwà ‘sọn ojlo edetiti tọn mẹ to Jehovah nukọn.’ (Levitiku 1:3) Gbọn avọ́sinsan mọnkọtọn de dali, e nọ basi nulila, kavi gbeyiyi gbangba tọn de sọn ojlo mẹ wá, na dona po dagbewanyi susugege Jehovah tọn po hlan omẹ etọn lẹ. Flin dọ adà vonọtaun avọ́nunina mimẹ̀ tọn de wẹ yindọ avọ́nunina lọ blebu nọ yin mimẹ̀ to agbà lọ ji—yèdọ yẹhiadonu he sọgbe de na mẹdezejo po klandowiwe mlẹnmlẹn po. To gbesisọmẹ, mí nọ do yise tintindo mítọn to avọ́sinsan ofligọ tọn mẹ po pinpẹn-nutọn-yinyọnẹn mítọn na awuwledainanu enẹ po hia to whenuena mí desọn ojlo mẹ wá podọ po ahun lẹpo po ze ‘avọ́sinsan pipà tọn, heyin sinsẹ́n nùflo mítọn tọn lẹ,’ donukọnna Jehovah.
13 Dile etlẹ yindọ Klistiani lẹ ma nọ basi avọ́sinsan paa lẹ—kanlin kavi jinukun tọn lẹ—yé tindo azọngban lọ nado dekunnu wẹndagbe Ahọluduta lọ tọn podọ nado hẹn gbẹtọ lẹ zun devi Jesu Klisti tọn. (Matiu 24:14; 28:19, 20) Be hiẹ nọ yí dagbenu dotẹnmẹ hundote lẹ tọn zan nado tindo mahẹ to wẹndagbe Ahọluduta Jiwheyẹwhe tọn lilá to gbangba mẹ na gbẹtọ susu dogọ ni sọgan wá nado yọ́n onú jiawu he Jiwheyẹwhe tindo to sẹdotẹnmẹ na gbẹtọvi tonusetọ lẹ ya? Be hiẹ nọ desọn ojlo mẹ wá nado yí whenu po huhlọn towe po zan to pinplọn po alọgigọna jlodotọ lẹ po nado lẹzun devi Jesu Klisti tọn lẹ mẹ ya? Mahẹ zohunhun tọn tintindo to lizọnyizọn lọ mẹ mítọn, he taidi owán vivi avọ́nunina mimẹ̀ tọn de, nọ hẹn homẹ Jiwheyẹwhe tọn hùn.—1 Kọlintinu lẹ 15:58.
Mì Nọ Jaya to Gbẹdido hẹ Jiwheyẹwhe po Gbẹtọ lẹ po Mẹ
14. Nawẹ hodidọ Paulu tọn lẹ to Heblu lẹ 10:24, 25 yin nudopolọ hẹ linlẹn avọ́sinsan kọndopọ tọn gbọn?
14 To tadona mẹ, Paulu dọ̀n ayidonugo wá haṣinṣan mítọn hẹ Klistiani hatọ lẹ ji dile mí to sinsẹ̀n-basi hlan Jiwheyẹwhe. “Mì gbọ mí ni sọ nọ lẹn mínọzo tọn pọ́n nado nọ jlahomẹdona to owanyi po azọ́n dagbe lẹ po mẹ: to ma gbẹ́ opli míde tọn mẹ, dile jijọ mẹdelẹ tọn te; ṣigba mí ni nọ to homẹjladona mínọzo; humọ na le mì mọ dọ azán lọ to sisẹpọ.” (Heblu lẹ 10:24, 25) Hodidọ lọ lẹ “nado nọ jlahomẹdona to owanyi po azọ́n dagbe lẹ po mẹ,” “opli míde tọn lẹ,” po “nọ to homẹjladona mínọzo” po flinnu mí gando nuhe avọ́nunina jijọho tọn nọ wà na omẹ Jiwheyẹwhe tọn lẹ to Islaeli go.
15. Nudopolọ yinyin tẹwẹ mí mọ to avọ́sinsan kọndopọ tọn po opli Klistiani tọn lẹ po ṣẹnṣẹn?
15 Hogbe lọ ‘avọ́nunina kọndopọ tọn’ nọ yin lilẹdogbedevomẹ do “avọ́nunina jijọho tọn lẹ” to whedelẹnu. Hogbe Heblu tọn tofi na “jijọho” yin sọha susu tọn, na vlavo tọn he zẹẹmẹdo dọ mahẹ tintindo to avọ́sinsan mọnkọtọn lẹ mẹ nọ dekọtọn do jijọho mẹ hẹ Jiwheyẹwhe po jijọho hẹ sinsẹ̀n-basitọ hatọ lẹ po. Gando avọ́sinsan kọndopọ tọn lọ go, weyọnẹntọ dopo doayi e go dọmọ: “Na nugbo tọn, ehe yin ojlẹ kọndopọ ayajẹ tọn hẹ Jiwheyẹwhe Alẹnu tọn, to ehe mẹ Ewọ nọ ze ede whè nado lẹzun Jonọ Islaeli tọn to núdùdù avọ́sinsan tọn lọ whenu, dile etlẹ yindọ Ewọ wẹ yin Johẹmẹtọ yetọn to whepoponu.” Ehe flinnu mí gando opagbe Jesu tọn go dọmọ: “Na ofi he omẹ awe kavi atọ̀n bẹ́ yede pli dopọ to oyín ṣie mẹ te, yẹn tin to gblagbla yetọn mẹ to finẹ.” (Matiu 18:20) To whedepopenu he mí yì opli Klistiani tọn de, mí nọ mọaleyi sọn gbẹdido mẹjlọdote tọn, nudọnamẹ tulinamẹ tọn mẹ, podọ sọn linlẹn lọ dọ Oklunọ mítọn Jesu Klisti tin to finẹ hẹ mí mẹ. Enẹ nọ hẹn opli Klistiani tọn de yin ayajẹnu po ojlẹ yise-hẹn-lodo tọn de po nugbonugbo.
16. To tintindo avọ́sinsan kọndopọ tọn to ayiha mẹ, etẹwẹ nọ hẹn opli Klistiani tọn lẹ yin nuyiwa ayajẹ tọn na taun tọn?
16 To avọ́sinsan kọndopọ tọn mẹ, ojó lọ lẹpo—enẹ he lẹdo adọ̀vi lẹ, ahun lọ, adajamẹ tọn he tin to alín lọ ji, po otlán lọ po, gọna osí he dojo lẹngbọ lọ tọn—nọ yin nina hlan Jehovah gbọn yinyin mimẹ̀, yèdọ nado fiọ ẹ to agbà lọ ji dali. (Levitiku 3:3-16) Ojó lọ nọ yin pinpọnhlan taidi adà he dotọ́n hugan bosọ yọ́n hugan kanlin de tọn. Nina ẹn to agbà lọ ji nọtena nina dehe yọ́n hugan lọ hlan Jehovah. Nuhe nọ hẹn opli Klistiani tọn lẹ yin nuyiwa ayajẹ tọn hugan wẹ yindọ e mayin dọ mí nọ mọ nuplọnmẹ yí kẹdẹ wẹ gba ṣigba sọ nọ na pipà hlan Jehovah ga. Mí nọ wà ehe gbọn mahẹ tintindo—to vivẹnudido whiwhẹ tọn ṣigba he yọ́n hugan mítọn mẹ—to hànjiji sọn ahun mẹ wá, todidoai po sọwhiwhe po, po gblọndo nina to whenuena e yọnbasi po mẹ dali. “Mì pà Jah, mì gbẹtọ lẹ emi!” wẹ psalm-kàntọ lọ dawhá dọ. “Mì jihàn yọyọ de hlan Jehovah, podọ pipà etọn to agun omẹ nugbonọ lẹ tọn mẹ.”—Psalm 149:1, NW.
Dona Susugege lẹ sọn Jehovah dè to Tenọpọn Mí
17, 18. (a) Avọ́sinsan pligidi tẹwẹ Sọlọmọni basi to hùnhùn tẹmpli Jelusalẹm tọn whenu? (b) Dona tẹlẹ wẹ dekọtọn sọn hùnwhẹ tẹmpli lọ hùnhùn tọn mẹ na gbẹtọ lẹ?
17 To hùnhùn tẹmpli Jelusalẹm tọn whenu, to osun ṣinawetọ owhe 1026 J.W.M., Ahọlu Sọlọmọni “sán avọ́ [daho de, NW ] to OKLUNỌ nukọn,” he bẹ “avọ́nunina mimẹ̀ . . . po avọ́nunina jinulili tọn po, po ojó avọ́nunina jijọho tọn lẹ po” hẹn. To yidogọ mẹ na nuhe yin yíyí do sanvọ́ to avọ́nunina jinulili tọn lọ mẹ lẹ, oyìn 22 000 po lẹngbọ 120 000 po wẹ yin yíyí do sanvọ́ to nujijọ enẹ whenu.—1 Ahọlu lẹ 8:62-65.
18 Be hiẹ sọgan lẹnnupọndo akuẹ po azọ́n sọha he hùnwhẹ bibasi pligidi mọnkọtọn de na bẹhẹn po ji ya? Ṣogan, e họnwun dọ dona he Islaeli mọyi lẹ zẹ̀ akuẹ lọ go tlala. To vivọnu hùnwhẹ bibasi lọ lẹ tọn, Sọlọmọni “do gbẹtọ lẹ hlan yì, yé sọ dona ahọlu, bo yì gòhọ yetọn lẹ kọ̀n gọna ayajẹ po homẹhun ayiha tọn po na dagbewanyi he OKLUNỌ dohia hlan Davidi mẹmẹsi etọn, podọ hlan Islaeli omẹ etọn lẹ.” (1 Ahọlu lẹ 8:66) Na nugbo tọn, dile Sọlọmọni dọ e do, “dona OKLUNỌ tọn, e wẹ nọ hẹn omẹ wàdọkun, e ma nọ yí awubla dogọ ẹ gba.”—Howhinwhẹn lẹ 10:22.
19. Etẹwẹ mí sọgan wà nado mọ dona daho hugan lẹ yí sọn Jehovah dè todin podọ kakadoi?
19 Mí to gbẹnọ to ojlẹ de mẹ to whenuena “oyẹ̀ onú dagbe he ja lẹ tọn” ko yin tẹnmẹ diọna gbọn ‘ojlẹmọ taun onú lọ lẹ tọn’ dali. (Heblu lẹ 10:1) To azọngban daho Yẹwhenọ Daho yẹhiadonu tọn etọn mẹ, Jesu Klisti ko biọ olọn lẹ lọsu mẹ bo basi dohia nuhọakuẹ ohùn edetiti tọn nado basi ovẹsè na mẹlẹpo he do yise hia to avọ́sinsan etọn mẹ. (Heblu 9:10, 11, 24-26) To dodonu avọ́sinsan daho enẹ tọn ji podọ to ahun lẹpo yíyí do na avọ́sinsan pipà tọn he wé bo ma dowángo mítọn lẹ hlan Jiwheyẹwhe dali mẹ, míwlẹ lọsu sọgan zindonukọn “gọna ayajẹ po homẹhun ayiha tọn po,” bo to nukọnpọnhlan na dona susugege lẹ sọn Jehovah dè.—Malaki 3:10.
Nawẹ Hiẹ Na Na Gblọndo Gbọn?
• Nuplọnmẹ po homẹmiọnnamẹ po tẹwẹ mí sọgan mọyi sọn nudọnamẹ he tin to Osẹ́n lọ mẹ gando avọ́sinsan po avọ́nunina lẹ po go?
• Etẹwẹ yin nubiọtomẹsi tintan na avọ́sinsan de nado yin alọkẹyi, podọ zẹẹmẹ tẹwẹ enẹ tindo na míwlẹ?
• Etẹwẹ míwlẹ sọgan na he sọgan yin yiyijlẹdo avọ́nunina mimẹ̀ he wá sọn ojlo mẹ de go?
• To aliho tẹlẹ mẹ wẹ opli Klistiani tọn lẹ sọgan yin yiyijlẹdo avọ́nunina kọndopọ tọn go te?
[Kanbiọ Oplọn Tọn Lẹ]
[Yẹdide to weda 18]
Avọ́sinsan ofligọ Jesu tọn yin awuwlena gbọn Jehovah dali na whlẹngán gbẹtọvi tọn
[Yẹdide to weda 20]
Na Jehovah nido kẹalọyi sinsẹ̀nzọn mítọn, mí dona jẹ mẹdekannu sọn hẹnflu wunmẹ lẹpo si
[Yẹdide to weda 21]
Mí nọ yigbe dagbewà Jehovah tọn to gbangba to whenuena mí tindo mahẹ to lizọnyizọn lọ mẹ