Be Hiẹ Flin Ya?

Be hiẹ ko yọ́n pinpẹn zinjẹgbonu agọe Atọ̀họ̀-Nuhihọ́ Lọ Tọn lẹ tọn hihia ya? Eyọ́n, pọ́n vlavo eyin hiẹ sọgan na gblọndo na kanbiọ he bọdego helẹ:

• Naegbọn mí sọgan tindo jide dọ hẹndi dọdai “olọn yọyọ lẹ po aigba yọyọ de po” tọn to Isaia 65:17-19 mẹ bẹ hugan kọlilẹ Juvi lẹ tọn sọn kanlinmọgbenu hẹn?

Na to wekinkan to owhe kanweko tintan W.M. mẹ, apọsteli Pita po Johanu po dlẹnalọdo hẹndi sọgodo tọn de, he bẹ dona he na gbẹ́ wá to nukọnmẹ lẹ hẹn wutu. (2 Pita 3:13; Osọhia 21:1-4)—15/4, weda 10-12.

• Etẹwẹ sọgan yin dodonu otangblo Glẹki hohowhenu tọn dogbọn gbẹtọ-daa-yẹwhe-daa danuwiwa tọn lẹ dali?

Ehelẹ sọgan yin nugbo lọ didohia to wunmẹ whanpẹnọ po tasọ́dònanu tọn de po mẹ dọ jẹnukọnna Osingigọ lọ angẹli delẹ yí agbasa gbẹtọ tọn dó bo zan gbẹzan danuwiwa, fẹnnuwiwa tọn lẹ to aigba ji. (Gẹnẹsisi 6:1, 2)—15/4, weda 27.

• Etẹwẹ yin owù delẹ he Klistiani he whèwhín lẹ na họ́ yedelẹ sọta to hùnwhẹ alọwle tọn lẹ whenu?

Onú titengbe wẹ e yin nado dapana paṣadudu susu hugan, he sọgan wleawu eyin ahàn sinsinyẹn sù taun bọ wedudu zingidi tọn po húnhiho awhá lélé tọn po tin. Adavo e yin hinhẹn họnwun dọ jonọyíyí de tin na mẹlẹpo, mẹhe ma yin oylọ-basina lẹ ma dona yì gba. Asisunọ lọ dona hẹn ẹn diun dọ Klistiani he whèwhín lẹ tin to finẹ kakajẹ whenuena hùnwhẹ lọ na wá vivọnu to ganmẹ he sọgbe hẹ lẹnpọn dagbe de mẹ.—1/5, weda 19-22.

• Etẹ dọ wẹ yè te gbọn didonù e go to Psalm 128:3 mẹ dali dọ visunnu lẹ ‘taidi atin-vú atin olivieli tọn’ lẹdo tafo sunnu de tọn?

Ovi yọyọ lẹ nọ saba tọ́n sọn dodonu atin olivieli tọn de mẹ. To whenuena atin daho atin hoho de tọn ma gbẹsọ to sinsẹ́n susu detọ́n ba, ovi yọyọ lẹ sọgan lẹzun atin huhlọnnọ lẹ lẹdo e pé. Mọdopolọ, mẹjitọ lẹ sọgan jaya nado tindo ovi he nọ dè sinsẹ́n tọ́n lẹ he to Jehovah sẹ̀n to pọmẹ hẹ yé.—15/5, weda 27.

• Etẹwẹ yin alemọyi delẹ he ovi lẹ nọ mọ sọn lẹdo dagbe whẹndo tọn de mẹ?

E nọ ze dodonu dai na yé nado tindo pọndohlan dagbe aṣẹpipa tọn, pinpẹn-nutọn-yinyọnẹn na nujọnu lẹ, po haṣinṣan ayajẹ tọn hẹ mẹdevo lẹ po. Lẹdo mọnkọtọn de sọgan sọ gọalọna yé nado wleawuna họntọnjiji hẹ Jiwheyẹwhe.—1/6, weda 18.

• To aigba Dindẹn Whèzẹtẹn tọn de ji, etẹwẹ yin wiwà nado ze linlẹn lọ daga dọ mẹmẹsunnu wẹ Klistiani lẹpo yin?

Agun lọ lẹpo yin tulina ma nado yí tẹnmẹ-yinkọ yẹyidogonamẹ tọn de do ylọ omẹ tangan delẹ. Kakatimọ, mẹlẹpo dona yin yiylọ to aliho dopolọ mẹ taidi mẹmẹsunnu.—15/6, weda 21, 22.

• Be Kunnudetọ Jehovah tọn lẹ nọ kẹalọyi amasin he yin dide sọn ohùn mẹ lẹ wẹ ya?

Mí yise dọ gbedide Biblu tọn nado ‘joagọ sọn ohùn kọ̀n’ gbẹ́ ohùn blebu didó kavi dopo to nugonu titengbe etọn lẹ mẹ (plasma, nugonu vẹẹ ohùn tọn lẹ, nugonu wéwé ohùn tọn lẹ, po plaquettes po) dai. (Owalọ lẹ 15:28, 29) Na nuhe dù adà flinflin he nọ yin dide sọn nugonu titengbe ohùn tọn lẹ mẹ, Klistiani dopodopo wẹ nọ basi nudide mẹdetiti tọn, to hinhẹn nuhe Biblu dọ po haṣinṣan etọn hẹ Jiwheyẹwhe po do ayiha mẹ mẹ.—15/6, weda 29-31.

• Be e yọnbasi na nugbo tọn nado mọ jijọho ahun mẹ tọn to egbehe ya?

Mọwẹ. Gbọn Biblu gblamẹ, Jesu Klisti to anadena gbẹtọ lẹ hlan aliho sinsẹ̀n-bibasi wiwe-ṣeke tọn po jijọho heyin zẹẹmẹ etọn basi to Isaia 32:18 mẹ po kọ̀n. Humọ, mẹhe to awuwlena jijọho mọnkọtọn lẹ tindo nukundido lọ nado wá duvivi jijọho tẹgbẹ̀ tọn to aigba ji to hẹndi Psalm 37:11, 29 tọn mẹ.—1/7, weda 7.

• Azọngban tẹwẹ George Young yiwa to whenuho yẹwhehọluduta tọn egbezangbe tọn mẹ?

Bẹsọn 1917, e do ede hia nado yin hinhọ́n hẹntọ wẹndagbe Ahọluduta lọ tọn tọn to aigba susu ji. Lizọnyizọn etọn hẹn ẹn gbọn Canada lẹpo mẹ, yì lopo Caraïbe tọn lẹ ji, yì Brésil podọ aigba devo Hùwaji Amelika tọn lẹ ji, yì Ṣẹnṣẹn Amelika tọn, yì Espagne, yì Portugal, yì Union Soviétique whenẹnu tọn, bo yì États-Unis.—1/7, weda 22-7.

• Etẹ dọ wẹ 1 Kọlintinu lẹ 15:29 te to whenuena e dọho gando mẹdelẹ he “yè baptizi na oṣiọ lẹ wutu” go?

Nuagokun lọ wẹ yindọ to whenuena Klistiani lẹ yin amisisadode gbọn gbigbọ wiwe dali, yé yin yinylọ́n biọ aliho gbẹzan tọn de mẹ he nọ plan yé jẹ okú yetọn mẹ podọ to godo mẹ fọnsọnku hlan ogbẹ̀ olọn mẹ tọn mẹ.—15/7, weda 17.

• Etẹ wà wẹ apọsteli Paulu te to nuhe ko yin zẹẹmẹ etọn basi taidi owhe he mẹ nude mayin yinyọnẹn gando ewọ go te lẹ whenu?

E sọgan yindọ e to alọgọ nado ze agun lẹ dai bo hẹn yé lodo to Silia po Silisia po mẹ. Susu to yajiji heyin nùdego to 2 Kọlintinu lẹ 11:23-27 mẹ lẹ dona ko jọ to ojlẹ ehe whenu, bo dohia dọ e to lizọnyizọn zohunhunnọ de wà zọnmii.—15/7, weda 26, 27.

• Etẹwẹ sọgan gọalọna mí nado yin lẹnpọn dagbenọ to nukundido mítọn lẹ mẹ?

Flin dọ Jehovah yin nukunnumọjẹnumẹtọ. Dẹ̀hiho hlan ẹn sọgan gọalọna mí nado hẹn nulẹnpọn mítọn do jlẹkaji, podọ e nọ do whiwhẹ hia. Alọgọ devo wẹ pọndohlan yinukọn dogọ tintindo gbọn hodidọ hẹ họntọn he whèwhín de dali.—1/8, weda 29, 30.