Lilatọ Ahọluduta Tọn lẹ Na Linlin

Sinhuhuna Okún Nugbo lọ Tọn lẹ to Chili

TO DANFAFA agewaji Chili tọn ji, owhe susu lẹ sọgan juwayi whẹpo jikun na jà. Ṣigba to whenuena e jà, aigba húhú-klókló, he gọ́ na osé lẹ nọ yin didiọzun fie gọ́ na vounvoun sinmẹ whanpẹnọ susu lẹ. Awusọhia whanpẹnọ ehe nọ dọ̀n gbejizọnlin-basitọ lẹ dogo sọn gblagbla otò lọ tọn lẹpo mẹ.

Ṣigba, nujijọ ojlofọndotenamẹ hugan tọn de to jijọ to omẹ Chili tọn lẹ ṣẹnṣẹn. Osin nugbo Biblu tọn to sisà jẹ nuslómẹ aigba lọ tọn lẹpo mẹ, bọ omẹ ahunjijlọnọ susu lẹ to “sẹ́gbà” nado lẹzun devi Jesu Klisti tọn lẹ. Alokan yin dopo to aliho he nọ yin yiyizan nado hẹn osin nugbo lọ tọn gbayipe lẹ mẹ. Numimọ he bọdego helẹ basi dohia kọdetọn dagbe he aliho kunnudide tọn ehe to didetọn lẹ tọn.

• Wẹndagbe-jlatọ whenu-gigọ́ tọn de he nọ yin Karina yin didọna nado basi wadohia de to tito-to-whinnu plidopọ lẹdo tọn de ji gando lehe yè nọ dekunnu gbọn alokan dali do go. Ṣigba, Karina ma ko tindo mahẹ to adà azọ́n yẹwhehodidọ tọn enẹ mẹ pọ́n gbede. Nado sọgan na tuli i nado tindo mahẹ to tito-to-whinnu plidopọ tọn lọ mẹ, mẹho de po asi etọn po gbadopọnna nuagokun delẹ hẹ Karina do lehe ewọ sọgan dekunnu gbọn alokan dali do ji. Yé sọ dotuhomẹna ẹn nado hodẹ̀ na anademẹ Jehovah tọn to whẹho lọ mẹ. E wàmọ podọ to godo mẹ basi dide nado tẹ́n ẹn pọ́n.

Karina de sọha alokan tọn de sọn gbétatò he sẹpọ de mẹ. Nukunpedo alokan go tọ́ de wẹ yigbe, bọ Karina basi zẹẹmẹ lẹndai oylọ lọ tọn na ẹn. Gbeyiyi nukunpedonugotọ lọ tọn yin dagbe, bọ tito lẹ yin bibasi nado dọhodopọ whladopo dogọ to azán atọ̀n godo. Gọyìpọn alokan ji tọn lọ dekọtọn do plọnmẹ Biblu de mẹ, po yizan alọnuwe Etẹwẹ Jiwheyẹwhe Biọ to Mí Si? tọn po. Sọn whenẹnu gbọ́n, yé ko duvivi nupinplọn ojlofọndotenamẹ tọn po zohunhun tọn lẹ po, podọ Karina ko yí owe lẹ hlan nado na gblọndo na kanbiọ yọnnu lọ tọn lẹ.

• Bernarda ze afọdide tintan nado dekunnu na dawe de he gbọn nuṣiwa dali zín sọha alokan etọn tọn. Kakati nado do homẹgble hia, Bernarda do ede hia taidi dopo to Kunnudetọ Jehovah tọn lẹ mẹ bo biọ nado gọalọ. Hodọdopọ de bọdego, bọ dawe lọ dotoai dile e basi zẹẹmẹ lehe Ahọluduta Jiwheyẹwhe tọn na de whẹdida mawadodo sẹ̀ to madẹnmẹ do. Dawe lọ dọ sọha alokan etọn tọn na Bernarda, bọ e basi gọyìpọn lẹ to alokan ji. To dopo to hodọdopọ yetọn lẹ whenu, e hia apadewhe owe Oyọnẹn He Nọ Planmẹ Sọyi Ogbẹ̀ Madopodo Mẹ tọn na ẹn. E kanse lehe e sọgan mọ vọkan dopo yí gbọn, podọ Bernarda yí dopo hlan ẹn to pọmẹ po Biblu de po. Tito lẹ yin bibasi na e nido yin didlapọn gbọn mẹmẹsunnu lẹdo lọ mẹ tọn de dali, he zindonukọn todin nado to “sinhúna” “atin” he to vùnvùn ehe.

Mọwẹ, to aigba húhú-klóló gbigbọmẹ aihọn ehe tọn ji, okún he yin whiwhlá lẹ tin to aṣeji nado tọ́nkun to whenuena osin nugbo ogbẹ̀-namẹ tọn lọ na jẹ yé ji. Omẹ fọtọ́n susu lẹ he nugbla to hùhù zindonukọn nado “tọ́nkun” bo “gbàsẹ́” nado lẹzun devizọnwatọ nugbonọ Jehovah Jiwheyẹwhe tọn lẹ.—⁠Isaia 44:3, 4.