‘Yé Nọ Dọho Gando Dagbewà po Owanyi po Go’

TO OWHE agọe tọn lẹ mẹ, Kunnudetọ Jehovah tọn lẹ to France ko lẹzun yanwle nujijla vlẹko sinsinyẹn tọn. Nugbo-daa po nudọnamẹ agọ̀ lẹ po ko yin yiyizan gbọn agọjẹdomẹtọ yetọn lẹ dali nado do yé hia to aliho agọ̀ mẹ to gbẹtọ lẹ nukọn. To bẹjẹeji owhe 1999 tọn, Kunnudetọ Jehovah tọn lẹ lẹdo France pé má vọkan livi donu 12 alọnuwe pẹvi de he hosọ etọn yin Français, on vous trompe! To alọnuwe pẹvi ehe mẹ, yé gblewhẹdo hodidọ vlẹko tọn heyin didọ gando yé go lẹ.

Azán vude lẹ to nujijla lọ godo, Mẹdaho Jean Bonhomme, dotozọ́nwatọ de po hagbẹ Sẹ́nbasitọ dai tọn de po yí wekanhlanmẹ gbangba tọn de hlan linlinwe lẹdo lọ tọn de. E wlan dọmọ: “Sọn ojlẹ de mẹ jẹ devo mẹ, Kunnudetọ Jehovah tọn lẹ nọ wá owhé ṣie gbè. Yé nọ wá nado dọho na mi dogbọn dagbewiwa po owanyi lẹdo aihọn pé po dali. . . . Yé ma nọ yí huhlọn do hẹnmẹ gba. Yé nọ basi zẹẹmẹ yedelẹ tọn po huwhẹ po bo nọ dotoai po sọwhiwhe po hlan ayihaawe tintindo ṣie.”

To hodidọ gando pọndohlan gbigbọmẹ Kunnudetọ Jehovah tọn lẹ tọn go mẹ, Mẹdaho Bonhomme dọmọ: “Wunvinọ-yinyin, to whẹho yetọn mẹ, ma sọgan gbleawunamẹ gba. To alọ devo mẹ, wunvinọ-yinyin tonudọtọ delẹ tọn yin owùnu na jijọho tòvi lẹ tọn po pọninọ otò lọ tọn po.”