To Madẹnmẹ Aihọn de Matin Todido Matindo

GBẸNINỌ to awusinyẹn deji taun, podọ whẹwhinwhẹ́n lẹ na todido matindo sù taun. To whenuena yè jẹflumẹ, mí sọgan mọ ẹn taidi awusinyẹnnamẹnu nado dava numọtolanmẹ mítọn lẹ. Etẹ, yèdọ mẹhe yiwanna gbẹninọ lẹ tlẹ sọgan hẹn ayajẹ bu mlẹnmlẹn! Lẹnnupọndo apajlẹ vude ji.

To hohowhenu, yẹwhegán Mose jẹflumẹ sọmọ bọ e dọna Jiwheyẹwhe dọmọ: “Yẹn vẹ̀ we, hù mi sọn alọ towe mẹ, eyin yẹn ko mọ nukundagbe to nukun towe mẹ; bo dike ma mọ [nugbajẹmẹji, NW ] ṣie blo.” (Osọha lẹ 11:15) Na e to hinhọ̀n na kẹntọ etọn lẹ wutu, yẹwhegán Elija dawhá dọmọ: “E tin sù; dinvie, OKLUNỌ E, yí ogbẹ̀ ṣie sẹ̀.” (1 Ahọlu lẹ 19:⁠4) Podọ yẹwhegán Jona dọmọ: “OKLUNỌ E, yẹn vẹ̀ we, yí ogbẹ̀ ṣie sọn dee; na e tin pọnte na mi nado kú hú nado nọgbẹ̀.” (Jona 4:⁠3) Ṣigba depope to Mose, Elija, po Jona po mẹ ma hù yede gba. Yemẹpo yọ́n gbedide Jiwheyẹwhe tọn dọmọ: “Hiẹ ma na yọ́n gbẹtọ kú de.” (Eksọdusi 20:13) Na yise sinsinyẹn tintindo to Jiwheyẹwhe mẹ wutu, yé yọnẹn dọ ninọmẹ depope matin heyin todido matindo tọn gba podọ dọ ogbẹ̀ yin nunina de sọn Jiwheyẹwhe dè.

Etẹwẹ dogbọn nuhahun he mí to nukọnpan todin lẹ dali? To yidogọmẹ na ayimajai numọtolanmẹ kavi nuhahun agbasa tọn lẹ, mí sọgan nọ doakọnna nuyiwahẹmẹ agọ̀ sọn hagbẹ whẹndo tọn lẹ, kọmẹnu lẹ, po azọ́nwatọgbẹ́ lẹ po dè to whedelẹnu.  Biblu dọho gando mẹdelẹ go he “yé yí mawadodo lẹpo do gọ́ yé, kanyinylan, nukunkẹn, linlẹn ylankan; yé gọ́ na nuvẹun, mẹhùhù, avùn, oklọ, homẹhá; mẹnudọtọ, mẹslẹtọ, wangbẹna Jiwheyẹwhe tọ́, mẹvlẹtọ, saklanọ, goyitọ, awagundotọ, tolivẹtọ hlan mẹjitọ lẹ, matin wuntuntun, alẹgbatọ, matin owanyi jọwamọ [tọn], madolẹblanunọ.” (Lomunu lẹ 1:28-31) Yinyin lilẹdo pé gbọn omẹ mọnkọtọn lẹ dali egbesọegbesọ sọgan hẹn gbẹninọ nado taidi agbàn pinpẹn de. Nawẹ mí sọgan gọalọna mẹhe tindo nuhudo homẹmiọnnamẹ po kọgbọ po tọn lẹ gbọn?

Jijlo Nado Dotoai

Awufiẹsa lẹ po yajiji po sọgan hẹn mẹde nado hẹn jlẹkajininọ apọ̀nmẹ tọn etọn bu. Dawe nuyọnẹntọ lọ dọmọ: “Awusinyẹnnamẹ hẹn nuyọnẹntọ dalẹ.” (Yẹwhehodọtọ 7:⁠7) Enẹwutu mẹhe to hodọ gando edetiti-hùhù go de dona yin pinpọn taidi mẹhe to nujọnu dọ. Nuhahun he e to tintindo lẹ, vlavo numọtolanmẹ tọn, agbasamẹ tọn, apọ̀nmẹ tọn, kavi gbigbọmẹ tọn, sọgan biọ ayidonugo niyaniya tọn. Nugbo wẹ dọ, nukunpedomẹgo po pọngbọ azọ́nyinyọnẹn tọn lẹ po gbọnvo, podọ nudide mẹdetiti tọn de dona yin bibasi gando wunmẹ pọngbọ tọn lẹ go.—Galatianu lẹ 6:⁠5.

Depope he whẹwhinwhẹ́n lọ na numọtolanmẹ mẹdetiti-hùhù tọn lẹ na yin, tintindo wuntuntunnọ, awuvẹmẹtọ, po homẹfanọ de po nado nọ dọ aṣli lẹ na sọgan hẹn vogbingbọn de wá. Hagbẹ whẹndo tọn lẹ po họntọn he tindo ojlo nado dotoai lẹ po sọgan penugo nado gọalọ. To yidogọmẹ na awuvẹmẹ hatọ tọn po homẹdagbe po, linlẹn mẹjlọdote tọn lẹ sọn Ohó Jiwheyẹwhe tọn mẹ sọgan yin alọgọnamẹnu taun na mẹhe ko hẹn todido bu lẹ.

Alọgọ Gbigbọmẹ Tọn na Mẹhe Jẹflumẹ Lẹ

E sọgan paṣa we nado plọn lehe Biblu hihia sọgan yin tulinamẹnu de do. Dile e ma tlẹ yin alọnuwe dagbemẹ-ninọ apọ̀nmẹ tọn de do, Biblu sọgan gọalọna mí nado yí nukun nuhọakuẹ tọn do pọ́n ogbẹ̀. Ahọlu Sọlọmọni dọmọ: “Yẹn yọnẹn dọ dagbe de matin to yé mẹ, adavo na gbẹtọ ni to ayajẹ, bosọ to dagbe wà to [gbẹwhenu etọn NW ]. Podọ na mẹdopodopo ni to dùdù, bosọ to nùnù, na e ni to vivi magbọjẹ etọn lẹpo tọn dù, nunina Jiwheyẹwhe tọn wẹ.” (Yẹwhehodọtọ 3:12, 13) Gbọnvona azọ́n pekọhẹnwanamẹ tọn he nọ hẹn gbẹninọ tindo zẹẹmẹ, onú he bọawu lẹ—taidi jẹhọn fifá, hinhọ́n owhè tọn, vounvoun lẹ, atin lẹ, po ohẹ̀ lẹ po—yin nunina heyin ninamẹ gbọn Jiwheyẹwhe dali he mí sọgan duvivi yetọn lẹ.

Dehe tlẹ nọ jlọmẹdote hugan wẹ mẹhẹndeji Biblu tọn dọ Jehovah Jiwheyẹwhe po Visunnu etọn, Jesu Klisti po, nọ hò mítọn pọ́n. (Johanu 3:16; 1 Pita 5:6, 7) Po gbesisọ po, psalm-kàntọ lọ dọmọ: “Donanọ wẹ OKLUNỌ, mẹhe to agbàn hẹn na mí egbesọegbesọ, yèdọ Jiwheyẹwhe whlẹngán mítọn tọn.” (Psalm 68:19) Dile etlẹ yindọ mí sọgan tindo numọtolanmẹ nuvọ́nọ-yinyin po nujọnu mayin tọn po, Jiwheyẹwhe to mí ylọ nado hodẹ̀ hlan ewọ. Mí ni deji dọ mẹdepope he gbọn whiwhẹ dali podọ po ahundopo po biọ alọgọ sọn ewọ dè ma na yin vivlẹ gba.

Mẹdepope ma sọgan gbọn gbesisọ dali donukun gbẹzan he vò sọn nuhahun si de to egbehe gba. (Job 14:⁠1) Ṣogan, nugbo he wá sọn Ohó Jiwheyẹwhe tọn mẹ ko dohia mẹsusu dọ mẹdetiti-hùhù mayin aliho he sọgbe lọ nado didẹ̀ nuhahun yetọn lẹ gba. Saa lẹnnupọn do lehe apọsteli Paulu gọalọna gàntọ-ṣọ́tọ he ma tindo todido depope de ji do mẹhe, “whenuena [e] fọ́n sọn amlọn mẹ bo mọ ohọ̀n oganhọ tọn lẹ to nùvo, e dọ̀n ohí etọn sún, ewọ do ko hù ede, na e lẹndọ ogàntọ lẹ ko wọ̀ yì” wutu. To afọdopolọji, gàntọ-ṣọ́tọ lọ ko wá tadona lọ kọ̀n dọ mẹdetiti-hùhù pọnte hugan nado yin winyando podọ vlavo na yin hùhù to nukọn mẹ na awugbopo etọn wutu. Apọsteli lọ dawhá jẹgbonu dọmọ: “A gbleawu [na] dewe blo: na mí omẹ pó tin to ofi.” Paulu ma nọte do hodidọ enẹ ji gba. Na nugbo tọn, ewọ po Sila po miọnhomẹna gàntọ-ṣọ́tọ lọ bosọ na gblọndo hlan kanbiọ etọn lọ dọ: “Mẹho emi, etẹwẹ yẹn do wà nado yin whinwhlẹngán?” Yé gblọn dọmọ: “Yí Jesu Klisti Oklunọ sè, yè nasọ whlẹn we po whédo towe po.” Enẹgodo yé dọ ohó Jehovah tọn hlan ewọ po whédo etọn po, po kọdetọn lọ po dọ “yè sọ baptizi i po omẹ etọn lẹpo po to tẹndoponẹmẹ.” Gàntọ-ṣọ́tọ lọ po whédo etọn blebu po jaya tlala bosọ mọ zẹẹmẹ yọyọ to gbẹzan mẹ.—Owalọ lẹ 16:27-35.

To egbehe, kọgbọ nankọtọn die nado yọnẹn dọ Jiwheyẹwhe ma wẹ mẹhe zọn bọ kanyinylan do tin! Ohó etọn do gbigbọ ylankan de hia, “he yè nọ ylọ Lẹgba, podọ Satani,” taidi omẹ lọ “he nọ to aihọn lẹpo klọ.” Ṣigba ojlẹ etọn ko to vivọ. (Osọhia 12:9, 12) To madẹnmẹ, ayimajai lẹpo he Satani po aovi etọn lẹ po ko hẹn wá mẹhe tin to aigba ji lẹ ji na wá vivọnu gbọn didademẹ sọn olọn mẹ wá  dali. To enẹgodo aihọn yọyọ dodowiwa tọn he Jiwheyẹwhe ko dopagbe etọn na hẹn opodo tẹgbẹ tọn wá na nuhe nọ hẹn todido matindo po mẹdetiti-hùhù po wá lẹ.—2 Pita 3:13.

Homẹmimiọn na Mẹhe to Awhádo na Alọgọ Lẹ

Etlẹ yin todin, mẹhe to numọtolanmẹ flumẹjijẹ tọn tindo lẹ sọgan mọ homẹmimiọn yí sọn Owe-wiwe lẹ mẹ. (Lomunu lẹ 15:⁠4) Psalm-kàntọ Davidi jihàn dọmọ: “Ayiha gbigbà finfinyọn, Jiwheyẹwhe E, hiẹ ma to na vlẹ gba.” (Psalm 51:17) Nugbo wẹ dọ, mí ma sọgan dapana pipehẹ whlepọn delẹ bosọ tindo nugandomẹgo mapenọ-yinyin tọn lẹ gba. Ṣigba oyọnẹn he pegan Otọ́ olọn mẹ tọn mítọn he jọmẹ, owanyinọ, po lẹnpọn dagbenọ tọn po tintindo na vọ́ mí hẹn deji dọ mí họakuẹ to nukun etọn lẹ mẹ. Jiwheyẹwhe sọgan lẹzun Họntọn po Nuplọnmẹtọ he klo hugan mítọn po. Eyin mí wleawuna haṣinṣan pẹkipẹki de hẹ Jehovah Jiwheyẹwhe, ewọ ma na hẹn mí jẹflumẹ pọ́n gbede gba. Mẹdatọ mítọn dọmọ: “Yẹn wẹ OKLUNỌ Jiwheyẹwhe towe, he plọn we na alè, he plan we gbọn aliho he ji hiẹ na gbọ̀n.”—Isaia 48:⁠17.

Ginganjẹ Jiwheyẹwhe go ko gọalọna gbẹtọ susu. Nado basi dohia: Mara ko yin hinhẹn gbọjọ gbọn flumẹjijẹ he gbọṣi aimẹ de dali to whenuena e hẹn visunnu dopo akàn etọn bu to owù-nú jijọ aliho ji tọn de mẹ. a E tindo numọtolanmẹ sijijọ tọn bosọ tẹnpọn nado hù ede. Ṣigba, todin e nọ yawu fọ́n taun to afọnnu lẹpo nado penukundo whégbèzọ́n etọn lẹ go. E nọ duvivi todidoai na húnhiho po alọgigọna mẹdevo lẹ po tọn. Todido lọ dọ “fọnsọnku dodonọ lẹ tọn, po mawadodonọ lẹ po tọn de na tin” ko de awubla awufiẹsa okú visunnu vivẹ etọn tọn pò bo ko sọ hẹn yise etọn lodo to Jiwheyẹwhe mẹ. (Owalọ lẹ 24:15) To whenuena e yindọ Mara ma tindo ojlo nado taidi angẹli de to olọn mẹ pọ́n gbede, hogbe Psalm 37:11 tọn lẹ ko yinuwado ahun etọn ji dọmọ: “Homẹmiọnnọ lẹ na dugu aigba tọn; yé na hẹn homẹhun yede to jijọho susu mẹ.”

Yọnnu Brésil tọn devo, yèdọ Sandra, wazọ́n sinsinyẹn nado yin onọ̀ he yọ́n hugan na ovi etọn atọ̀n lẹ. E yigbe dọmọ: “Alọnu ṣie ján sọmọ bọ to whenuena otọ́ ṣie kú to ajiji mẹ bọ yẹn, to ojlẹ dopolọ mẹ, mọdọ asu ṣie to kọndopọ tindo hẹ yọnnu devo, yẹn ma tlẹ sọ lẹnnupọn gando dẹ̀hiho hlan Jiwheyẹwhe na alọgọ go ba.” To todido matindo mẹ Sandra tẹnpọn nado hù ede. Etẹwẹ ko gọalọna  ẹn nado vọ́ huhlọn mọyi? Pinpẹn-nutọn-yinyọnẹn etọn na onú gbigbọmẹ tọn lẹ wẹ. “Whẹpo yẹn nido damlọn to whèjai lẹpo, yẹn nọ hia Biblu, podọ yẹn nọ tẹnpọn nado ze dee do otẹn mẹhe go yẹn hianu gando lọ tọn mẹ. Yẹn sọ nọ hia linlinnamẹwe Atọ̀họ̀-Nuhihọ́ lọ Tọn po Réveillez-vous! tọn lẹ po, podọ yẹn nọ tindo homẹhunhun taun to otàn gbẹzan tọn lẹ mẹ na yé nọ gọalọna mi nado tindo pekọ to aliho gbẹzan tọn ṣie mẹ.” To yinyọnẹn mẹ dọ Jehovah yin họntọn vivẹ́ etọn, ewọ ko plọn nado nọ hodẹ̀ do onú agokun lọ ji tlọlọ to odẹ̀ etọn lẹ mẹ.

Sọgodo de Matin Todido Matindo

Homẹmiọnnamẹ nankọtọn die nado yọnẹn dọ yajiji gbẹtọvi tọn yin na ojlẹ gli de! To gandudu Ahọluduta Jiwheyẹwhe tọn glọ, ovi lẹ po mẹhomẹ he ko jiya sẹ́nhẹngba, whẹdida mawadodo tọn, kavi nuvẹun tọn po lẹ na jaya. Dile e yin didọ to psalm dọdai tọn de mẹ do, Ahọlu dide Jehovah tọn, yèdọ Jesu Klisti “na whlẹn agbátọnọ lọ whenu e to awhádo; oyanọ ga, podọ ewọ he ma tindo alọgọnamẹtọ de.” Humọ, “ewọ na tindo lẹblanu to oyanọ po agbátọnọ po ji; e nasọ whlẹn [alindọn] agbátọnọ tọn gán.” Na nugbo tọn “ewọ na fli [alindọn] yetọn sọn awusinsinyẹn po adìngbàndido po mẹ: nuhọakuẹ wẹ ohùn yetọn na yin to nukun etọn mẹ.”—Psalm 72:12-14.

Ojlẹ he mẹ hogbe dọdai tọn enẹlẹ na yin hinhẹndi te ko sẹpọ. Be linlẹn vivi ogbẹ̀ madopodo tọn dùdù to aigba ji to ninọmẹ mọnkọtọn lẹ glọ ma dọ̀n we dogo ya? Eyin mọwẹ, be hiẹ tindo whẹwhinwhẹ́n nado yin homẹhunnọ podọ nado wlebòna ogbẹ̀ taidi nunina de sọn Jiwheyẹwhe dè. Podọ eyin hiẹ má opagbe homẹmiọnnamẹ tọn Owe-wiwe tọn ehelẹ hẹ mẹdevo lẹ, be hiẹ sọgan hẹn ayajẹ daho wá gbẹzan mẹhe to awhádo na alọgọ to aihọn he ma tindo numọtolanmẹ, he mẹ owanyi matin te ehe mẹ lẹ tọn mẹ.

[Nudọnamẹ Odò Tọn]

[Yẹdide to weda 6]

Nujijọ susu wẹ tin he nọ hẹn ayajẹ wá to egbehe

[Yẹdide to weda 7]

Be hiẹ to nukọnpọnhlan na aihọn de he vò sọn todido matindo si ya?