Aigba—Be Nọtẹn Mẹtẹnpọn Tọn de Poun Wẹ Ya?

KỌGBỌ nankọtọn die! E dín. Wehọmẹvi he ko jugbọn mẹtẹnpọn sinsinyẹn osẹ awe tọn de gblamẹ mọ linlin homẹhunhun tọn de yí to godo mẹ. E sọgan doafọna agbasazọ́n he e ko nọ saba tindo ojlo na lọ todin.

Mẹsusu nọ pọ́n ogbẹ̀ to aigba ji hlan to aliho dopolọ mẹ. Yé nọ lẹnnupọn gandego taidi mẹtẹnpọn bẹjẹeji tọn de ehe glọ mẹlẹpo dona gbọ̀n. Mẹhe “dín” lẹ nọ zindonukọn hlan nude he pọnte to wunmẹ Ogbẹ̀ to okú godo tọn delẹ mẹ. Na nugbo tọn, e na blawu eyin gbẹzan dintọn—yèdọ tintin-to-aimẹ mẹsusu tọn poun—wẹ yin onú dagbe hugan he gbẹtọvi lẹ sọgan donukun. Dile etlẹ tindo agbasalilo po adọkun po to suhugan gbẹzan etọn tọn mẹ, Job mẹhe Biblu dọho gandego lọ doayi e go dọmọ: “Gbẹtọ he yè ji sọn yọnnu de mẹ yin azán lẹ vude tọn, bosọ gọ́ na tukla.”—Job 14:1.

To nulẹnpọn mẹsusu tọn didohia mẹ, New Catholic Encyclopedia dọmọ: “Gigo olọn mẹ tọn wẹ yin nọtẹn he Jiwheyẹwhe tindo to linlẹn mẹ na gbẹtọ lẹ. . . . Ayajẹ gbẹtọ lẹ tọn sọgan yin mimọ to ayajẹ gigọ́ olọn mẹ tọn tintindo etọn mẹ.” Dodinnanu agọe tọn de heyin bibasi gbọn Église du Christ dali to États-Unis dohia dọ 87 to kanweko ji mẹhe na gblọndo lẹ tọn wẹ yise dọ e yọnbasi dọ yé na yì olọn mẹ to okú yetọn godo.

Susu mẹhe mayin Klistiani lẹ tọn lọsu tindo todido nado tọ́nsọn aigba ji yì nọtẹn dagbe de mẹ to okú godo. Di apajlẹ, Malenu lẹ tindo todido lọ nado yì paladisi olọn mẹ tọn de mẹ. Hodotọ hagbẹ klandovo Aigba Wiwe Buddha tọn lẹ to Chine po Japon po yise dọ gbọn “Amitabha,” yèdọ oyín Buddha tọn heyin Hinhọ́n he Mado-dogbó lọ vivọdọ pludopludo dali, yé na yin vivọji to Aigba Wiwe lọ ji, kavi to Paladisi Whèyihọ-waji tọn mẹ, fie yé na nọgbẹ̀ te to ayajẹ he yiaga hugan mẹ.

Po homẹhunhun po, Biblu, heyin owe wiwe he yin lilẹdogbedevomẹ bosọ yin mimá gbayipe hugan to aihọn mẹ, ma do aigba hia taidi nọtẹn he na yin jijodo de, yèdọ wunmẹ zánnu afọdotẹn tọn de gba. Di dohia, e dọmọ: “Dodonọ wẹ na dugu aigba tọn, bo nasọ nọnọ̀ e mẹ kakadoi.” (Psalm 37:29) Hodidọ he diyin Jesu tọn sọ yin mimọ to Biblu mẹ ga he dọmọ: “Donanọ wẹ homẹmimiọnnọ lẹ; na yé na dugu aigba tọn.”—Matiu 5:5.

Pọndohlan paa lọ dọ tintin to aigba ji mítọn yin ojlẹ gli tọn dohia dọ okú wẹ aliho lọ hlan ogbẹ̀ ayajẹ tọn to okú godo. Eyin mọwẹ, to whelọnu lo okú yin dona de na taun tọn. Ṣigba be gbẹtọ lẹ to paa mẹ nọ pọ́n okú hlan to aliho enẹ mẹ, kavi be yé nọ tẹnpọn nado hẹn ogbẹ̀ ehe dite wẹ ya? Numimọ dohia dọ to whenuena gbẹtọ lẹ duvivi agbasalilo po hihọ́ po tọn to obá dagbe mẹ, yé ma nọ jlo nado kú gba.

Ṣigba, na ogbẹ̀ to aigba ji gọ́ na oylan po yajiji po wutu, olọn gbẹsọ yin pinpọnhlan gbọn mẹsusu dali taidi nọtẹn dopo kẹdẹ lọ fie yè sọgan mọ jijọho po ayajẹ nugbo tọn po te. Be olọn yin nọtẹn jijọho mlẹnmlẹn tọn de poun, he vò pete sọn oylan po gbèmanọpọ po si wẹ ya? Podọ be agblò olọn tọn delẹ mẹ kẹdẹ wẹ Ogbẹ̀ to okú godo na tin te ya? Gblọndo Biblu tọn lẹ sọgan paṣa we. Jaale hia yinukọn dogọ.