Ayajẹ Mavọmavọ—To Olọn mẹ Kavi to Aigba Ji?

BE AYAJẸ towe sinai do fie hiẹ nọ nọ̀ ji na taun tọn wẹ ya? Suhugan gbẹtọ lẹ tọn wẹ na yigbe po awuyiya po dọ ayajẹ sinai taun do onú taidi agbasalilo, lẹndai de to gbẹzan mẹ, po haṣinṣan dagbe tintindo hẹ mẹdevo lẹ po ji. Howhinwhẹn Biblu tọn de dọ ẹ to aliho ehe mẹ dọmọ: “[Ománúsọnú] to fie owanyi te, bọawu hú oyìn yìndù de podọ wangbẹnamẹ po e po.”—Howhinwhẹn lẹ 15:17.

Ṣigba, e blawu dọ owhé aigba tọn mítọn tindo whenuho dindẹn wangbẹna, danuwiwa, po wunmẹ kanyinylan tọn devo lẹ po. Ṣigba etẹwẹ dogbọn olọn, kavi agblò gbigbọ tọn mẹ, fie gbẹtọ susu jlo nado yì to whenuena yé kú godo dali? Be e ko yin nọtẹn ayajẹ mlẹnmlẹn po vivomẹ-ninọ tọn de po to whepoponu, matin tukladomẹ wunmẹ depope, dile linlẹn etọn gbayipe do wẹ ya?

Biblu plọnmẹ dọ Jiwheyẹwhe nọ nọ̀ olọn mẹ gọna livi susu nudida gbigbọnọ he nọ yin yiylọdọ angẹli lẹ. (Matiu 18:10; Osọhia 5:11) Ehelẹ yin zẹẹmẹ basina taidi ‘visunnu gbigbọnọ Jiwheyẹwhe tọn lẹ.’ (Job 38:4, 7) Taidi gbẹtọvi lẹ, angẹli lẹ sọ yin nudida he to mẹdekannu lẹ; yé ma yin zomọ he nọ taidi gbẹtọ (robots) lẹ gba. Enẹwutu, taidi kọdetọn de, yé lọsu sọgan basi nudide nado wà dagbe kavi nado wà oylan. Be angẹli lẹ na basi nudide nado wà oylan ya? E sọgan wá taidi nupaṣamẹ hlan mẹdelẹ nado yọnẹn dọ owhe fọtọ́n susu die wayi, sọha daho angẹli lẹ tọn wàmọ, na nugbo tọn, waylan sọta Jiwheyẹwhe—yèdọ yé ṣiatẹ sọta ẹ!—Juda 6.

Atẹṣiṣi to Olọn Mẹ

Ylando sọawuhia to agblò gbigbọnọ lẹ tọn mẹ na atẹṣiṣi angẹli de, he wá yin yiylọdọ Satani (Agọjẹdomẹtọ) podọ Lẹgba (Mẹhẹngbletọ) tọn wutu. Angẹli he ko yin tonusetọ to ojlẹ de mẹ dai ehe basi nudide nado wà oylan sọn ojlo mẹ wá. To enẹgodo e lẹzun mẹhe nọ yinuwado nudida gbigbọnọ devo lẹ ji to aliho he gblezọn de mẹ, enẹwutu to ojlẹ Noa tọn mẹ, jẹnukọnna Singigọ lọ, sọha daho yetọn de kọnawudopọ hẹ Satani to atẹṣiṣi sọta Jiwheyẹwhe mẹ.—Gẹnẹsisi 6:2, nudọnamẹ odò tọn, NW ; 2 Pita 2:4.

Angẹli he jai ehelẹ ma yin yinyan sọn olọn mẹ to afọdopolọji gba. Kakatimọ, tintin to olọn mẹ yetọn yin dotẹnmẹ jodona—yèdọ po alọhẹndotenamẹ delẹ po—na owhe fọtọ́n susu lẹ. a Ṣigba, to whenuena dotẹnmẹ nina ylanwatọ ehelẹ Jiwheyẹwhe tọn wá vivọnu, yé yin ‘yinyan’ sọn olọn mẹ, nado wá yin vivasudo to agọgbọnẹnmẹ. Ogbè de to olọn mẹ to whenẹnu dọmọ: “Enẹwutu mì to ayajẹ, mì olọn lẹ emi, po mì he nọ nọ̀ yé mẹ lẹ po.” (Osọhia 12:7-12) E họnwun dọ, angẹli nugbonọ lẹ jaya tlala dọ, to godo mẹ, olọn lẹ yin hinhẹn vò sọn tukla-hẹnwatọ ylankan enẹlẹ si!

To dogbigbapọnna zẹẹmẹ he mayin yinyọnẹn ehelẹ to paa mẹ, e họnwun dọ jijọho nugbo ma sọgan tin to whedepopenu he nudida nuyọnẹntọ lẹ yí nukunpẹvi do pọ́n osẹ́n po nunọwhinnusẹ́n Jiwheyẹwhe tọn lẹ po gba. (Isaia 57:20, 21; Jẹlemia 14:19, 20) To alọ devo mẹ, to whenuena mẹlẹpo setonuna Osẹ́n Jiwheyẹwhe tọn, jijọho po vivomẹ-ninọ po nọ gbayipe.  (Psalm 119:165; Isaia 48:17, 18) Enẹwutu eyin gbẹtọvi lẹpo yiwanna bosọ setonuna Jiwheyẹwhe bo yiwanna ode awetọ, be aigba ma na yin nọtẹn ayajẹ tọn, awuvivi tọn de nugbonugbo ya? Biblu na gblọndo dọ mọwẹ!

Ṣigba etẹwẹ dogbọn mẹhe nọ gbọn ṣejannabi dali gbẹ́ nado diọ aliho ylankan yetọn lẹ dali? Be yé na dotukla jijọho mẹhe jlo nado wà ojlo Jiwheyẹwhe tọn nugbonugbo lẹ kakadoi wẹ ya? Lala, Jiwheyẹwhe yinuwa hẹ angẹli ylankan lẹ to olọn mẹ, podọ ewọ nasọ yinuwa hẹ gbẹtọ ylankan he tin tofi to aigba ji lẹ.

Aigba Heyin Kiklọwé De

“Olọn [lẹ] wẹ ofìn ṣie, aigba wẹ tokloafọligbe ṣie tọn,” wẹ Jiwheyẹwhe dọ. (Isaia 66:1) Na yinyin mẹwiwe he yiaga hugan lọ, Jiwheyẹwhe ma na dike na “tokloafọligbe” etọn nado yin hinhẹngble gbọn oylan dali kakadoi gba. (Isaia 6:1-3; Osọhia 4:8) Kẹdẹdile e zà gbigbọ ylankan lẹ sẹ sọn olọn mẹ do, mọjanwẹ e na zà mẹylankan lẹpo sẹ sọn aigba ji do, dile wefọ he bọdego lẹ dohia do:

“Yè na sán ylanwatọ lẹ sẹ: ṣigba yé he nọtepọn OKLUNỌ lẹ wẹ na dugu aigba tọn.”—Psalm 37:9.

“Nugbonọ wẹ na nọ̀ aigba lọ ji, yé he pé lẹ wẹ na nọ̀ e mẹ. Ṣigba mẹylankan lẹ wẹ yè na sán sọn aihọn mẹ, sẹ́nmẹjẹtọ lẹpo wẹ yè na dọ̀nsún sọn e mẹ.”—Howhinwhẹn lẹ 2:21, 22.

“[Dodowiwa wẹ e yin] to Jiwheyẹwhe dè nado yí nukunbibia do yiahọsu to yé he to nukunbiana mì lẹ go; podọ hlan mì he yè bianukunna lẹ ni gbọjẹ to mí dè, to whenuena yè na do Jesu Oklunọ hia sọn olọn mẹ, po angẹli huhlọnnọ etọn lẹ po, mẹhe to ahọsuyi to yé he ma yọ́n Jiwheyẹwhe lẹ go, podọ yé he ma setonuna wẹndagbe Jesu Klisti Oklunọ mítọn tọn lẹ, to miyọ́n he to jiji mẹ; mẹhe yè na yí viva madopodo do sayana sọn Oklunọ nukọn, podọ sọn gigo huhlọn etọn tọn mẹ.”—2 Tẹsalonikanu lẹ 1:6-9.

“Aihọn [gbẹtọvi ylankan lẹ tọn] to jujujei po wantuntun etọn po: ṣigba ewọ he to ojlo Jiwheyẹwhe tọn wà wẹ na nọte kakadoi.”—1 Johanu 2:17.

Be Aigba na Gbọṣi Jijọho mẹ Ya?

Dile etlẹ yindọ Owe-wiwe lẹ dohia hezeheze dọ gbeyina mẹylankan lẹ Jiwheyẹwhe tọn tindo dogbó, nawẹ mí sọgan deji dọ oylan, to whenuena e yin didesẹ, ma nasọ lẹkọwa ba? Hú popolẹpo, bọdo Singigọ azán Noa tọn gbè go, e sọawuhia whladopo dogọ to madẹnmẹ jẹ obá he yiaga tlala mẹ sọmọ bọ Jiwheyẹwhe dona glọnalina tito ylankan gbẹtọvi lẹ tọn gbọn ogbè yetọn wuwlu dali.—Gẹnẹsisi 11:1-8.

Whẹwhinwhẹ́n tangan mítọn na adọgbigbo dọ oylan ma na lẹkọwa whladopo dogọ wẹ yindọ aigba ma nasọ yin gandudeji gbọn gbẹtọvi lẹ dali dile e yin do tlolo to Singigọ lọ godo ba. Kakatimọ, e na yin gandudeji gbọn Ahọluduta Jiwheyẹwhe tọn dali. To gandudu sọn olọn mẹ, Ahọluduta ehe na yin gandudu aigba tọn dopo kẹdẹ lọ. (Daniẹli 2:44; 7:13, 14) E na yinuwa po awuyiya po sọta mẹdepope he na tẹnpọn nado vọ́ oylan hẹnwa aimẹ. (Isaia 65:20) Na nugbo tọn, e na và dowatọ kanyinylan tọn—yèdọ Satani Lẹgba sudo to agọgbọnẹnmẹ—gọna aovi lẹ, yèdọ angẹli ylankan he hodo e lẹ.—Lomunu lẹ 16:20.

To yidogọ mẹ, gbẹtọvi lẹ ma na tindo whẹwhinwhẹ́n depope nado jẹtukla na núdùdù, avọ̀, adọtẹn, po agbasazọ́n po—ehe nọ dọ̀n mẹdelẹ biọ gbẹzan sẹ́nhẹngba tọn mẹ to egbehe. Mọwẹ, aigba lọ blebu na yin didiọzun paladisi he nọ de sinsẹ́n tọ́n po onú susugege po na mẹlẹpo.—Isaia 65:21-23; Luku 23:43.

Dehe yin nujọnu hugan, Ahọluduta lọ na plọn mẹjidugando etọn lẹ to aliho gbẹzan jijọho tọn de mẹ podọ to ojlẹ dopolọ mẹ na jlọ yé dote jẹ obá he yiaga tlala pipenọ-yinyin gbẹtọvi tọn kọ̀n. (Johanu 17:3; Lomunu lẹ 8:21) To enẹgodo, gbẹtọvi lẹ ma nasọ diahi hẹ madogán po ayilinlẹn ylando tọn lẹ po ba, bo na hẹn tonusise pipé hlan Jiwheyẹwhe yọnbasi bosọ yin  awuvivinu, dile e yin do to whẹho dawe pipé lọ Jesu tọn mẹ. (Isaia 11:3) Na nugbo tọn, Jesu gbọṣi nugbonọ-yinyin mẹ hlan Jiwheyẹwhe etlẹ yin to mẹtẹnpọn po yasanamẹ sinsinyẹn po nukọn—nuhe ma na sọawuhia paali lẹ na gbẹninọ to Paladisi mẹ.—Heblu lẹ 7:26.

Nuhewutu Mẹdelẹ Dona Yì Olọn Mẹ

Ṣigba, Biblu hiatọ susu lẹ wẹ jẹakọ hẹ ohó Jesu tọn lẹ dọmọ: “To owhé Otọ́ ṣie tọn gbè ofi ninọ̀ susu wẹ tin. . . . Yẹn jei nado wleawu otẹn de tọn dai na mì.” (Johanu 14:2, 3) Be ehe ma sọta linlẹn ogbẹ̀ madopodo to paladisi aigba ji tọn de mẹ ya?

Nuplọnmẹ ehelẹ ma sọta yede gba. Na nugbo tọn, ode nọgodona awetọ. Nado bẹjẹeji, Biblu dọ dọ sọha he tindo dogbó Klistiani nugbonọ lẹ tọn de kẹdẹ—enẹwẹ, 144 000 yetọn—wẹ yin zizedaga taidi nudida gbigbọnọ lẹ nado nọ̀ olọn mẹ. Etẹwutu wẹ ahọsumẹ jiawu ehe do yin nina yé? Na yé wleawuna pipli lọ he Johanu mọ to numimọ de mẹ he “tin to ogbẹ̀, bosọ to ahọludu hẹ Klisti họ̀ owhe fọtọ́n.” (Osọhia 14:1, 3; 20:4-6) Yijlẹdo liva susu he tin to aigba ji lẹ go, gbẹtọ 144 000 lẹ yin “lẹngbọpa pẹvi” de nugbonugbo. (Luku 12:32) Humọ, na yé ko tindo numimọ nuhahun he gbayipe to gbẹtọvi lẹ mẹ wutu, taidi Jesu yé na penugo nado ‘vẹawu madogán mítọn lẹ’ dile yé to nukunpedo hinhẹn jẹ yọyọ gbẹtọvi lẹ po aigba lọ tọn po go.—Heblu lẹ 4:15.

Aigba—Owhé Tẹgbẹ̀ Gbẹtọvi Tọn

Gbọn awuwiwlena avọ́sinsan ofligọ Jesu Klisti tọn dali, Jiwheyẹwhe jẹ 144 000 lẹ bẹpli ji diblayi owhe 2 000 die wayi, podọ kunnudenu lẹ dohia dọ pipli ehe ko pé todin. (Owalọ lẹ 2:1-4; Galatianu lẹ 4:4-7) Etomọṣo, avọ́sinsan Jesu tọn ma yin na ylando 144 000 lẹ tọn kẹdẹ gba, ‘ṣigba na aihọn lẹpo tọn ga.’ (1 Johanu 2:2) Enẹwutu, mẹhe yí yise zan to Jesu mẹ lẹpo tindo nukundido ogbẹ̀ mavọmavọ tọn. (Johanu 3:16) Mẹhe damlọn to yọdo mẹ lẹ ṣigba he tin to oflin Jiwheyẹwhe tọn mẹ lẹ na yin finfọnsọnku, e mayin do olọn mẹ wẹ gba, ṣigba do ogbẹ̀ to aigba klọwé de ji. (Yẹwhehodọtọ 9:5; Johanu 11:11-13, 25; Owalọ lẹ 24:15) Etẹwẹ na to tenọpọn yé to finẹ?

Osọhia 21:1-4 na gblọndo, dọmọ: ‘Doayi e go, gòhọ Jiwheyẹwhe tọn tin to gbẹtọ lẹ dè . . . Jiwheyẹwhe nasọ súnsún dasin lẹpo sẹ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba: na onú tintan lẹ ko juwayi.’ Yí nukun homẹ tọn do pọ́n—gbẹtọvi lẹ yin tuntundote sọn okú si, podọ awufiẹsa po avi he e nọ hẹn wá po ko busẹ kakadoi! To godo mẹ, lẹndai dowhenu Jehovah tọn na aigba po gbẹtọvi lẹ po na jẹ hẹndi gigonọ etọn kọ̀n.—Gẹnẹsisi 1:27, 28.

Nudide Mítọn—Ogbẹ̀ Kavi Okú

Adam po Evi po mayin nina nudide lọ nado yì olọn mẹ pọ́n gbede gba. Nudide yetọn wẹ yin vlavo nado setonuna Jiwheyẹwhe bo nọgbẹ̀ kakadoi to aigba paladisi tọn de ji kavi vẹtoli na ẹn bosọ kú. E blawu dọ, yé de tolivivẹ bo gbọnmọ dali gọ̀ do “kọ́gudu” aigba tọn mẹ. (Gẹnẹsisi 2:16, 17; 3:2-5, 19) E ma ko yin lẹndai Jiwheyẹwhe tọn pọ́n gbede na whẹndo gbẹtọvi tọn to paa mẹ nado kú bosọ tindo nọtẹn de to olọn mẹ gbọn yọdo gblamẹ. Jiwheyẹwhe dá fọtọ́n susu angẹli lẹ tọn nado nọ̀ olọn mẹ; nudida gbigbọnọ ehelẹ mayin gbẹtọvi he ko kú bosọ yin finfọnsọnku do ogbẹ̀ to olọn mẹ lẹ gba.—Psalm 104:1, 4; Daniẹli 7:10.

Etẹwẹ mí dona wà nado mọ dona gbẹninọ kakadoi to aigba Paladisi tọn de ji yí? Afọdide tintan wẹ nado plọn Ohó Jiwheyẹwhe tọn, Biblu Wiwe lọ. “Ehe wẹ ogbẹ̀ madopodo, dọ yé ni yọ́n hiẹ ṣokẹdẹ Jiwheyẹwhe nugbo, podọ ewọ mẹhe hiẹ dohlan, yèdọ Jesu Klisti,” wẹ Jesu dọ to odẹ̀ mẹ.—Johanu 17:3.

Oyọnẹn enẹ yíyí-do-yizan mẹ yin afọdide devo hlan ayajẹ madopodo to Paladisi mẹ. (Jakobu 1:22-24) Mẹhe to gbẹnọ gbọn Ohó Jiwheyẹwhe tọn dali lẹ tindo nukundido lọ nado mọ hẹndi dọdai awuvivi tọn mọnkọtọn lẹ po nukun yetọn lẹ po dile e yin kinkàndai to Isaia 11:9 mẹ do, he dọmọ: ‘Yé [gbẹtọvi lẹ] ma na gbleawunamẹ, mọ yé ma to na gbà sudo to osó wiwe ṣie lẹpo ji: na aihọn na gọ́ na nuyọnẹn OKLUNỌ tọn, dile osin ṣinyọ́n ohù ji do.’

[Nudọnamẹ Odò Tọn]

 [Yẹdide to weda 7]

“Dodonọ wẹ na dugu aigba tọn, bo nasọ nọnọ̀ e mẹ kakadoi.”—Psalm 37:29