Ojlẹ Fifli Na Wehihia po Nupinplọn Po
Ojlẹ Fifli Na Wehihia po Nupinplọn Po
“Mì nọ fli ojlẹ; na ylankan wẹ azán lẹ wutu.”—Efesunu Lẹ 5:16.
1. Naegbọn e yin nuyọnẹnnu na mí nado basi tito na whenu mítọn, podọ etẹwẹ aliho he mẹ mí nọ yí whenu mítọn zan te sọgan dehia gando mí go?
E KO nọ yin didọ dọ “nado de whenu dovo zẹẹmẹdo ma nado hẹn whenu gú.” Mẹhe nọ de whenu sọha tangan de dovo nado wà nuhe dona yin wiwà lẹ nọ saba duale susu sọn whenu yetọn mẹ. Ahọlu nuyọnẹn Sọlọmọni wlan dọmọ: “Onú lẹpo wẹ tindo ojlẹ dide etọn, ojlẹ de tin na onú lẹpo to olọn glọ.” (Yẹwhehodọtọ 3:1, Moffatt) Mímẹpo wẹ tindo whenu dopolọ to nukọn mítọn; lehe mí yí ì zan gbọn pò to mí si. Lehe mí nọ basi tito na onú titengbe hugan mítọn lẹ bo nọ má whenu mítọn lẹ zan do nọ de nuhe ahun mítọn jlo hugan lẹ hia jẹ obá daho de mẹ.—Matiu 6:21.
2. (a) To Yẹwhehodidọ Osó ji tọn etọn mẹ, etẹwẹ Jesu dọ gando nuhudo gbigbọmẹ tọn mítọn go? (b) Mẹdetiti gbigbeje pọ́n tẹwẹ na yin nuhe sọgbe?
2 Mí tin to dandannu glọ nado yí whenu zan nado dùnú podọ nado damlọn na nuhudo agbasa tọn wẹ ehelẹ yin wutu. Ṣigba etẹwẹ dogbọn nuhudo gbigbọmẹ tọn mítọn lẹ dali? Mí yọnẹn dọ yé dona mọ pekọ yí ga. To Yẹwhehodidọ Osó ji tọn etọn mẹ, Jesu lá dọmọ: “Ayajẹnọ wẹ mẹhe nuhudo gbigbọmẹ tọn yetọn nọ duahunmẹna lẹ.” (Matiu 5:3, NW ) Enẹwutu wẹ “afanumẹ nugbonọ, nuyọnẹntọ” nọ flin nujọnu-yinyin whenu didedovo na Biblu hihia po pinplọn po tọn mí gbọzangbọzan. (Matiu 24:45) Hiẹ sọgan yọ́n lehe ehe yin nujọnu sọ, ṣigba mí sọgan lẹndọ mí ma tindo whenu nado plọnnu kavi nado hia Biblu wẹ poun. Eyin mọwẹ, mì gbọ mí ni gbadopọnna aliho po nuyiwa lẹ po he sọgan na dotẹnmẹ dogọ na Ohó Jiwheyẹwhe tọn hihia, na oplọn mẹdetiti tọn, podọ na ayihamẹlinlẹnpọn to gbẹzan mítọn mẹ.
Whenu Mimọ na Biblu Hihia po Nupinplọn Po
3, 4. (a) Ayinamẹ tẹwẹ apọsteli Paulu na gando yizan ojlẹ tọn mítọn go, podọ etẹwẹ ehe bẹhẹn? (b) Etẹ dọ wẹ Paulu te to whenuena e na ayinamẹ mí nado ‘fli ojlẹ na mídelẹ’?
3 To pọndohlan mẹ na ojlẹ he mẹ mí to gbẹnọ te, mímẹpo wẹ dona setonuna hogbe apọsteli Paulu tọn lẹ dọmọ: “Mì nọ payi do zinzọnlin to jijọ pipé mẹ, e ma yin di nulunọ gba, ṣigba di nuyọnẹntọ. Mì nọ fli ojlẹ; na ylankan wẹ azán lẹ wutu. Enẹwutu mì yin wunvinọ blo, ṣigba mì ni tunwun onú he ojlo Oklunọ tọn yin go.” (Efesunu lẹ 5:15-17) Nugbo wẹ dọ, taidi Klistiani klandowiwe lẹ, ayinamẹ ehe bẹ adà gbẹzan mítọn tọn lẹpo hẹn, he bẹ whenu mimọ na odẹ̀, nupinplọn, opli lẹ, podọ mahẹ gigọ́ tintindo to azọ́n yẹwhehodidọ “wẹndagbe ahọludu tọn” mẹ dile e sọgan yọnbasi do hẹn.—Matiu 24:14; 28:19, 20.
4 To egbehe e taidi dọ susu devizọnwatọ Jehovah tọn lẹ wẹ e nọ sinyẹnawuna nado basi tito na Biblu hihia po nupinplọn sisosiso po nado sọgbe do gbẹzan yetọn lẹ mẹ. E họnwun dọ, mí ma sọgan yí ganhiho dopo devo dogọ azán mítọn gba, enẹwutu ayinamẹ Paulu tọn dona zẹẹmẹdo nuhe gbọnvo de. To Glẹkigbe mẹ, hodidọ lọ “fli ojlẹ” zẹẹmẹdo fifli sọn nudevo de mẹ. To Expository Dictionary etọn mẹ, W. E. Vine na ẹn zẹẹmẹ lọ dọ “nado basi yizan he yọ́n hugan dotẹnmẹ hundote lẹpo tọn, yèdọ yizan dagbe hugan dotẹnmẹ hundote dopodopo tọn to whenuena e yindọ dotẹnmẹ heyin hinhẹngú depope ma sọgan yin fifli ba.” Sọn etẹ mẹ kavi fie wẹ mí sọgan fli ojlẹ te na Biblu hihia po pinplọn po?
Mí Dona Basi Titona Onú Titengbe Lẹ
5. Etẹwutu podọ nawẹ mí sọgan ‘mọdona nuhe yin nujọnu hugan lẹ’ gbọn?
5 To yidogọmẹ na azọngban agbasa tọn mítọn lẹ, mí tindo onú gbigbọmẹ tọn susu he go mí dona penukundo lẹ. Taidi devizọnwatọ klandowiwe Jehovah tọn lẹ, mí tindo ‘nususu nado wà to azọ́n Oklunọ tọn mẹ.’ (1 Kọlintinu lẹ 15:58) Na whẹwhinwhẹ́n ehe tọn wutu, Paulu na ayinamẹ Klistiani he tin to Filippi lẹ nado “[mọdona nuhe yin nujọnu hugan lẹ, NW ].” (Filippinu lẹ 1:10) Ehe zẹẹmẹdo dọ nuhe yin onú titengbe lẹ dona yin zizedai. Onú gbigbọmẹ tọn lẹ dona nọ yí otẹn tintan to agbasanu lẹ ji to whepoponu. (Matiu 6:31-33) Ṣogan, jlẹkajininọ sọ yin bibiọ to azọngban gbigbọmẹ tọn mítọn lẹ hinhẹndi mẹ. Nawẹ mí to ojlẹ mítọn má to adà voovo gbẹzan Klistiani tọn mítọn lẹ mẹ gbọn? Nugopọntọ tomẹyitọ lẹ na linlin dọ to “nuhe yin nujọnu hugan” he Klistiani de dona penukundego lẹ mẹ, e taidi dọ oplọn mẹdetiti tọn po Biblu hihia po nọ yin kọgbẹ́ e go.
6. Etẹwẹ ojlẹ fifli sọgan zẹẹmẹdo to whenuena e wá jẹ agbasazọ́n kavi whégbèzọ́n ji?
6 Dile mí ko mọ do, ojlẹ fifli bẹ “nado basi yizan he yọ́n hugan dotẹnmẹ hundote lẹpo tọn” po “yizan dagbe hugan dotẹnmẹ hundote dopodopo tọn” po hẹn. Enẹwutu eyin walọyizan Biblu hihia po nupinplọn tọn mítọn lẹ po ma lodo ganji, e na yọ́n nado basi dodinnanu mẹdetiti tọn nado mọ lehe ojlẹ mítọn nọ yin yiyizan do. Eyin agbasazọ́n mítọn nọ biọ nususu hugan, bo nọ dù suhugan whenu po huhlọn mítọn tọn po, mí dona yí ì do basi whẹho odẹ̀ tọn hlan Jehovah. (Psalm 55:22) Mí sọgan penugo nado basi vọjlado he na hẹn mí tindo whenu dogọ na onú titengbe he gando sinsẹ̀n-bibasi Jehovah tọn go lẹ, he bẹ nupinplọn po Biblu hihia po hẹn. E ko nọ yin didọ po gbesisọ po dọ azọ́n yọnnu de tọn ma nọ vọ̀ gbede. Enẹwutu mẹmẹyọnnu Klistiani lẹ dona basi titona onú titengbe lẹ bo dè whenu tangan delẹ dovo na Biblu hihia po nupinplọn nujọnu tọn po.
7, 8. (a) To nuwiwa tẹlẹ mẹ wẹ ojlẹ sọgan nọ saba yin fifli sọn na wehihia po nupinplọn po? (b) Etẹwẹ yin lẹndai ayidedai tọn, podọ nawẹ ehe finflin na gọalọna mí nado ze nuhe yin nujọnu hugan lẹ do otẹn yetọn mẹ gbọn?
7 To paa mẹ, suhugan mítọn lẹ sọgan fli ojlẹ na nupinplọn gbọn nuwiwa he mayin dandan tọn lẹ gbigbẹdai dali. Mí sọgan kanse mídelẹ dọ, ‘Ojlẹ nẹmu wẹ yẹn nọ yizan na linlinnamẹwe kavi linlinwe aihọn tọn lẹ hihia, tito-to-whinnu televiziọn tọn lẹ pinpọn, todidoai na húnhiho lẹ, kavi aihundida video tọn lẹ? Be yẹn nọ yí ojlẹ susu zan to zomọ nudọnamẹ-sẹdo tọn nukọn hugan dehe yẹn nọ yizan to Biblu hihia mẹ wẹ ya?’ Paulu dọmọ: “Mì yin wunvinọ blo, ṣigba mì ni tunwun onú he ojlo Oklunọ tọn yin go.” (Efesunu lẹ 5:17) Lẹnpọn dagbenọ mayin to televiziọn pinpọn mẹ sọawuhia nado yin whẹwhinwhẹ́n titengbe he wutu Kunnudetọ susu ma nọ de ojlẹ he sù pé dovo na oplọn mẹdetiti tọn po Biblu hihia po.—Psalm 101:3; 119:37, 47, 48.
8 Mẹdelẹ sọgan dọ dọ yé ma sọgan to nuplọn to ojlẹ lẹpo mẹ gba, dọ yé tindo nuhudo ayidedai delẹ tọn. Dile ehe tlẹ yin nugbo do, e na yọ́n nado gbadopọnna sọha ojlẹ he mí nọ yizan to gbọjẹyíyí mẹ bo yí ì jlẹdo ojlẹ tangan he mí nọ yizan to Biblu hihia po nupinplọn po mẹ go. Kọdetọn lọ sọgan paṣa mí. Ayidedai po gbọjẹyíyí po, dile yé tlẹ yin dandannu do, dona yin hinhẹn do otẹn he sọgbe yetọn mẹ. Lẹndai yetọn wẹ nado fakọna mí na nuwiwa gbigbọmẹ tọn heyin hinhẹn jẹ yọyọ lẹ. Susu tito-to-whinnu televiziọn tọn lẹ po aihundida video tọn lẹ po nọ hẹn nuṣikọnamẹ, to whenuena Ohó Jiwheyẹwhe tọn hihia po pinplọn po nọ fakọnamẹ bo nọ vọ́ huhlọn namẹ.—Psalm 19:7, 8.
Lehe Mẹdelẹ Nọ Dín Whenu Mọ na Nupinplọn Do
9. Etẹlẹ wẹ yin alemọyinu hihodo ayinamẹ heyin nina to alọnuwe Dogbapọnna Owe-Wiwe lẹ Egbesọegbesọ—1999 tọn mẹ tọn?
9 Hodidọ nukọn tọn to alọnuwe Dogbapọnna Owe-Wiwe lẹ Egbesọegbesọ zinjẹgbonu 1999 tọn mẹ dọmọ: “E na yin alemọyinu hugan nado gbadopọnna wefọ egbesọegbesọ tọn po zẹẹmẹ etọn lẹ po sọn alọnuwe ehe mẹ to afọnnu. Hiẹ na tindo numọtolanmẹ taidi dọ Jehovah, Nuplọnmẹtọ Daho lọ, wẹ to finfọ́n we po anademẹ etọn lẹ po. Jesu Klisti yin hodọdego to dọdai liho taidi mẹhe to alemọyi sọn anademẹ Jehovah tọn lẹ mẹ to afọnnu-afọnnu dọmọ: ‘E [Jehovah] to finfọ́n to afọnnu-afọnnu, e hùn otó ṣie, nado sè di nuyọnẹntọ tọn.’ Anademẹ mọnkọtọn lẹ na ‘odẹ́ nuyọnẹntọ tọn’ Jesu na ewọ nido ‘yọ́n le yè nọ dọho do to ojlẹ mẹ hlan mẹhe nuṣikọna.’ (Isa. 30:20; 50:4; Mat. 11:28-30) Tintin to nukle hlan ayinamẹ he wá do ganmẹ sọn Ohó Jiwheyẹwhe tọn mẹ to afọnnu-afọnnu na gọalọna we e mayin nado doakọnna nuhahun towe titi lẹ kẹdẹ wẹ gba ṣigba nasọ wleawuna we po ‘odẹ́ nuyọnẹntọ tọn’ po nado gọalọna mẹdevo lẹ.” a
10. Nawẹ mẹdelẹ nọ dín whenu mọ na Biblu hihia po nupinplọn po gbọn, podọ po alemọyi tẹlẹ po?
10 Klistiani susu wẹ nọ hodo ayinamẹ ehe gbọn wefọ egbesọegbesọ tọn po zẹẹmẹ lẹ hihia po dali podọ gbọn Biblu hihia kavi nupinplọn to afọnnu fuu dali. To France gbehosọnalitọ nugbonọ de nọ yawu fọ́n taun to afọnnu bo nọ de nukunwhiwhe 30 dovo na Biblu hihia. Etẹwẹ ko gọalọna ẹn nado to ehe wà na owhe susu lẹ? E dọmọ: “Yẹn yin whinwhàn sisosiso, bọ yẹn sọ nọ tẹdo todohukanji wehihia tọn ṣie go mahopọnna nudepope he sọgan jọ!” Ojlẹ azán lọ tọn depope he mí dè, onú titengbe lọ wẹ yindọ mí ni tẹdo todohukanji mítọn go. René Mica, he ko tin to sinsẹ̀nzọn gbehosọnalitọ tọn mẹ na nuhe hugan owhe 40 to Europe podọ to Agewaji Aflika tọn, dọmọ: “E ko yin yanwle ṣie sọn 1950 gbọ́n nado nọ hia Biblu to blebu etọn mẹ to owhe lẹpo mẹ, yèdọ nude he yẹn ko wà whla 49 todin. Yẹn lẹndọ ehe yin onú titengbe nado hẹn haṣinṣan pẹkipẹki de go hẹ Mẹdatọ ṣie. Ayihamẹlinlẹnpọn do Ohó Jiwheyẹwhe tọn ji nọ gọalọna mi nado mọnukunnujẹ whẹdida dodo Jehovah tọn po jẹhẹnu etọn devo lẹ po mẹ ganji podọ e ko yin asisa huhlọn sẹhundaga tọn de.” b
‘Núdùdù Ninamẹ to Ojlẹ Sisọ Mẹ’
11, 12. (a) ‘Núdùdù ninamẹ’ gbigbọmẹ tọn tẹlẹ wẹ ko to yinyin awuwlena gbọn “họ̀nkọnsi nugbonọ” lọ dali? (b) Nawẹ ‘núdùdù ninamẹ lọ’ lẹ ko to yinyin awuwlena to ojlẹ sisọ mẹ gbọn?
11 Dile walọyizan núdùdù to gbesisọmẹ tọn nọ yidogọna agbasalilo dagbe do, todohukanji gbesisọ tọn de na Biblu hihia po nupinplọn po nọ yidogọna agbasalilo dagbe gbigbọmẹ tọn ga. To Wẹndagbe Luku tọn mẹ, mí hia hogbe Jesu tọn lẹ dọmọ: “Mẹnu wẹ họ̀nkọnsi nugbonọ, nuyọnẹntọ lọ, mẹhe Oklunọ etọn na do basi ogán do owhé etọn ji, nado na núdùdù sọha yetọn yé to ojlẹ [sisọ] etọn mẹ?” (Luku 12:42) Na nuhe hugan owhe 120 todin, ‘núdùdù gbigbọmẹ tọn ninamẹ to ojlẹ sisọ mẹ’ ko yin awuwlena to Atọ̀họ̀-Nuhihọ́ Lọ Tọn, gọna owe sinai-do-Biblu ji po zinjẹgbonu devo lẹ po mẹ.
12 Doayi hodidọ lọ lẹ ‘to ojlẹ sisọ mẹ’ go. To ojlẹ he sọgbe mẹ, ‘Nuplọnmẹtọ Daho’ mítọn, yèdọ Jehovah, ko nọ deanana omẹ etọn lẹ to whẹho sinsẹ̀n-nuplọnmẹ po walọyizan tọn po mẹ, gbọn Visunnu etọn po hagbẹ afanumẹ lọ tọn po dali. E taidi dọ to pọmẹ mí ko sè ogbè de he to didọmọ: “Ehe wẹ aliho [lọ], mì zinzọnlin to e mẹ, whenuena mì lẹ́ do adusi, podọ whenuena mì lẹ́ do amiyọn.” (Isaia 30:20, 21) Humọ, to whenuena mẹdopodopo yí sọwhiwhe do hia Biblu po owe sinai do Biblu ji lẹpo po, yé nọ saba tindo numọtolanmẹ lọ dọ linlẹn heyin didọ to e mẹ lẹ yin anadena titengbe hlan yé. Mọwẹ, ayinamẹ po anademẹ jijọ-di-Jiwheyẹwhe tọn po na wá na mí to ojlẹ sisọ mẹ, bo hẹn mí penugo nado nọavunte sọta whlepọn kavi nado basi nudide nuyọnẹn tọn de.
Wleawuna Walọyizan Dagbe Núdùdù Tọn
13. Etẹwẹ yin delẹ to walọyizan núdùdù gbigbọmẹ tọn dùdù he ma lodo lẹ mẹ?
13 Nado mọaleyi to gigọ́mẹ sọn ‘núdùdù ninamẹ’ he to yinyin awuwlena to ojlẹ sisọ mẹ lọ mẹ, mí dona tindo walọyizan dagbe núdùdù tọn. Dandannu wẹ e yin nado tindo todohukanji gbesisọ tọn de na Biblu hihia po oplọn mẹdetiti tọn po bosọ tẹdego. Be hiẹ tindo walọyizan dagbe núdùdù gbigbọmẹ tọn dùdù tọn po ojlẹ gbesisọ tọn lẹ po na oplọn mẹdetiti tọn he siso ya? Kavi be hiẹ nọ yìnnukun gbọ̀n nudọnamẹ heyin awuwlena po sọwhiwhe po na mí lẹ ji poun, bo nọ tin to whlẹndo ji, dile e nọ yin didọ do, kavi tlẹ nọ gbọ̀ núdùdù delẹ go mlẹnmlẹn wẹ ya? Walọyizan núdùdù tọn he ma lodo ko hẹn mẹdelẹ nado lẹzun madogánnọ to yise mẹ—yèdọ tlẹ jai.—1 Timoti 1:19; 4:15, 16.
14. Naegbọn e yin alemọyinu nado yí sọwhiwhe do vọ́ dogbapọnna nudọnamẹ he sọgan sọawuhia taidi nuhe yè ko jẹakọ hẹ lẹ?
14 Mẹdelẹ sọgan lẹndọ yé ko yọ́n sinsẹ̀n-nuplọnmẹ dodonu tọn lẹ podọ e mayin hosọ lẹpo wẹ nọ ze onú yọyọ mlẹnmlẹn lẹ donukọnnamẹ gba. Enẹwutu, nupinplọn po opli yìyì he tin to kannukannu po mayin dandannu gba. Ṣigba, Biblu dohia dọ mí dona nọ yin finflin nuhe ko yin pinplọn wayi lẹ. (Psalm 119:95, 99; 2 Pita 3:1; Juda 5) Kẹdẹdile núdùdù-datọ dagbe de nọ wleawuna dàdónu dopolọ lẹ to aliho he vivi voovo lẹ mẹ do, hagbẹ afanumẹ lọ to awuwlena núdùdù dojo gbigbọmẹ tọn lẹ to aliho he gbọnvo susu mẹ. Etlẹ yin to hosọ he dọhodo nuhe ko yin zẹẹmẹ basi deji gbọzangbọzan wayi lẹ mẹ, nuagokun dagbe taun lẹ nọ tin he mí ma na jlo nado gbọ̀ e go. Nugbo lọ wẹ yindọ nuhe mí mọyi sọn nuhe mí to hihia lọ mẹ nọ sinai tlala do sọha ojlẹ po vivẹnudido he mí yizan to pinplọn ẹn mẹ po ji.
Alè Gbigbọmẹ Tọn lẹ sọn Wehihia po Nupinplọn po Mẹ
15. Nawẹ Biblu hihia po pinplọn po sọgan gọalọna mí nado yin lizọnyizọnwatọ he pọnte Ohó Jiwheyẹwhe tọn lẹ tọn gbọn?
15 Alè he mí nọ mọyi sọn Biblu hihia po pinplọn po mẹ sù tlala. Mí nọ yin alọgọna nado pegan na dopo to azọngban dodonu Klistiani tọn mítọn lẹ mẹ, yèdọ, na dopodopo mítọn lẹ nido sọgan lẹzun “azọ́nwatọ he ma dona kuwinyan, ehe nọ má ohó nugbo tọn dile e jẹ do kẹdẹ.” (2 Timoti 2:15) Lehe mí hia bo plọn Biblu lọ sọ, mọwẹ ayiha mítọn na yin gigọ́ po linlẹn Jiwheyẹwhe tọn lẹ po do niyẹn. Whenẹnu, taidi Paulu, mí na penugo nado ‘yihojlẹdohogo hẹ gbẹtọ lẹ sọn Owe-wiwe lẹ mẹ, bo to zẹẹmẹ nugbo jiawu lẹndai Jehovah tọn lẹ tọn basi bosọ to kunnudenu he nọgodo na yé lẹ dohia.’ (Owalọ lẹ 17:2, 3) Azọ́nyinyọnẹn mẹpinplọn tọn mítọn na yin hinhẹn pọnte, podọ hodọdopọ, hodidọ, po ayinamẹ mítọn lẹ po na yin dehe nọ jlọmẹdote to gbigbọ-liho taun.—Howhinwhẹn lẹ 1:5.
16. To aliho mẹdetiti tọn tẹlẹ mẹ wẹ mí nọ mọaleyi sọn Ohó Jiwheyẹwhe tọn hihia po pinplọn po mẹ te?
16 To yidogọmẹ, ojlẹ heyin kinklandovo na dogbigbapọnna Ohó Jiwheyẹwhe tọn na hẹn mí penugo nado hẹn gbẹzan mítọn wá kọndopọmẹ hẹ aliho Jehovah tọn lẹ to gigọ́mẹ. (Psalm 25:4; 119:9, 10; Howhinwhẹn lẹ 6:20-23) E na hẹn jẹhẹnu gbigbọmẹ tọn mítọn lẹ, taidi whiwhẹ, nugbonọ-yinyin, po ayajẹ po lodo. (Deutelonomi 17:19, 20; Osọhia 1:3) To whenuena mí yí oyọnẹn he mí mọyi sọn Biblu hihia po pinplọn po mẹ do yizan mẹ, mí nọ duvivi nuyiwa gbigbọ Jiwheyẹwhe tọn mimọyi to gbẹzan mítọn mẹ tọn, he nọ dekọtọn do sinsẹ́n gbigbọ tọn susugege lẹ mẹ to nuhe mí to wiwà lẹpo mẹ.—Galatianu lẹ 5:22, 23.
17. Nawẹ sọha ojlẹ he mí nọ yizan gọna jẹhẹnu Biblu hihia po pinplọn mẹdetiti tọn mítọn po nọ yinuwado haṣinṣan mítọn hẹ Jehovah ji gbọn?
17 Dehe yin titengbe hugan, ojlẹ he yin fifli sọn nuwiwa devo lẹ mẹ nado hia bo plọn Ohó Jiwheyẹwhe tọn na hẹn alè họakuẹ lẹ wá to kọndopọmẹ hẹ haṣinṣan mítọn hẹ Jiwheyẹwhe. Paulu hodẹ̀ dọ Klistiani hatọ etọn lẹ nido sọgan “gọ́ na [oyọnẹn he pegan ojlo Jiwheyẹwhe tọn] to wuntuntun mẹ podọ to nuyọnẹn gbigbọnọ lẹpo mẹ; [nado sọgan to zọnlinzin dole e jẹ na Jehovah do, NW ] to nukundagbe lẹpo mẹ.” (Kọlọsinu lẹ 1:9, 10) Mọdopolọ, na míwlẹ nido to “zọnlinzin dole e jẹ na Jehovah” do, mí dona “gọ́ na oyọnẹn he pegan ojlo [etọn] tọn to wuntuntun mẹ podọ to nuyọnẹn gbigbọnọ lẹpo mẹ.” E họnwun dọ, dona po alọkẹyi Jehovah tọn mimọyi mítọn po sinai tlala do lehe ojlẹ po jẹhẹnu Biblu hihia gọna pinplọn mẹdetiti tọn mítọn sù sọ po ji.
18. Dona tẹlẹ wẹ sọgan yin mítọn eyin mí hodo hogbe Jesu tọn heyin kinkàn to Johanu 17:3 mẹ lẹ?
18 “Podọ ehe wẹ ogbẹ̀ madopodo, dọ yé ni yọ́n hiẹ ṣokẹdẹ Jiwheyẹwhe nugbo, podọ ewọ mẹhe hiẹ dohlan, yèdọ Jesu Klisti.” (Johanu 17:3) Enẹ yin dopo to wefọ he nọ yin yiyizan gbayipe gbọn Kunnudetọ Jehovah tọn lẹ dali nado gọalọna mẹdevo lẹ nado yọ́n pinpẹn nujọnu-yinyin Ohó Jiwheyẹwhe tọn pinplọn tọn. Na taun tọn mọwẹ e sọ yin nujọnu do na dopodopo mítọn lẹ nado nọ wàmọ ga. Todido taun mítọn na gbẹninọ kakadoi sinai do susudeji to oyọnẹn Jehovah po Visunnu etọn, yèdọ Jesu Klisti tọn po mẹ mítọn ji. Podọ lẹnnupọn poun do nuhe enẹ zẹẹmẹdo ji. Opodo ma na tin na nupinplọn mítọn gando Jehovah go pọ́n gbede—podọ ojlẹ madopodo de na tin nado to nuplọn gando ewọ go!—Yẹwhehodọtọ 3:11; Lomunu lẹ 11:33.
Kanbiọ Dogbapọn Tọn Lẹ
• Etẹwẹ nọ yin didehia gbọn aliho he mẹ mí nọ yí whenu mítọn zan te dali?
• To nuwiwa tẹlẹ mẹ wẹ mí sọgan fli ojlẹ sọn na Biblu hihia po pinplọn po?
• Naegbọn mí dona payi walọyizan núdùdù gbigbọmẹ tọn dùdù mítọn go?
• Alemọyi tẹlẹ wẹ nọ wá sọn Owe-wiwe lẹ hihia po pinplọn po mẹ?
[Nudọnamẹ Odò Tọn]
a Yin zinzinjẹgbonu gbọn Watchtower Bible and Tract Society of New York, Inc. dali.
b Pọ́n hosọ lọ “Whenuena Yé Nọ Hia Ẹ po Lehe Yé Nọ Mọaleyi Do Po,” heyin zinzinjẹgbonu to Atọ̀họ̀-Nuhihọ́ Lọ Tọn 1er mai 1995, weda 30-1 mẹ.
[Kanbiọ Oplọn Tọn Lẹ]
[Yẹdide to weda 21]
Biblu hihia po pinplọn gbesisọ tọn po na hẹn mí penugo nado “má ohó nugbo tọn dile e jẹ do kẹdẹ”
[Yẹdide to weda 23]
Hinhẹn nuwiwa devo lẹ to gbẹzan he ján mítọn mẹ do jlẹkaji hẹ yanwle gbigbọmẹ tọn lẹ nọ hẹn alè họakuẹ lẹ wá