Ahọluduta Jiwheyẹwhe Tọn—Gandudu Yọyọ Aigba Tọn
Ahọluduta Jiwheyẹwhe Tọn—Gandudu Yọyọ Aigba Tọn
‘Ahọluduta lọ . . . na gbà ahọluduta ehelẹ do flinflin bo sú ahọludu he lẹpo do, ewọ bo nasọ nọte kakadoi.’—DANIẸLI 2:44.
1. Jidide tẹwẹ mí sọgan tindo to Biblu mẹ?
OSỌHIA Jiwheyẹwhe tọn hlan gbẹtọvi lẹ wẹ Biblu yin. Apọsteli Paulu wlan dọmọ: “Whenuena mì yí ohó Jiwheyẹwhe tọn, ehe mì sè sọn mí dè, mì ma yí ì di ohó gbẹtọ tọn gba, ṣigba le e te to nugbo mẹ, ohó Jiwheyẹwhe tọn.” (1 Tẹsalonikanu lẹ 2:13) Biblu bẹ nuhe mí tindo nuhudo nado yọnẹn gando Jiwheyẹwhe go lẹ hẹn: yèdọ nudọnamẹ gando gbẹtọ-yinyin etọn, lẹndai etọn lẹ, po nubiọtomẹsi etọn lẹ na mí po go. E tindo ayinamẹ dagbe hugan do gbẹzan whẹndo tọn po walọyizan egbesọ tọn po ji. E bẹ zẹẹmẹ gigọ́ dọdai he ko mọ hẹndi yí to ojlẹ he wayi mẹ lẹ, he to yinyin hinhẹndi todin, bo nasọ yin hinhẹndi to sọgodo lẹ tọn hẹn. Mọwẹ, “Owe-wiwe lẹpo gbingbọ́n sọn Jiwheyẹwhe mẹ yin alenọ ga na mẹpinplọn, na wọhẹmẹ, na anademẹ, na nuplọnmẹ he tin to dodo mẹ: na Jiwheyẹwhe gbẹtọ nido pegan, he yè hẹn sọgbe mlẹnmlẹn hlan azọ́n dagbe lẹpo.”—2 Timoti 3:16, 17.
2. Nawẹ Jesu zinnudo hosọ Biblu tọn ji gbọn?
2 Nuhe yin titengbe hugan to Biblu mẹ wẹ hosọ etọn: yèdọ whẹsuna nupojipetọ-yinyin Jiwheyẹwhe tọn (jlọjẹ etọn nado duahọlu) gbọn Ahọluduta olọn mẹ tọn etọn gblamẹ. Jesu yí enẹ do basi adà tangan lizọnyizọn etọn tọn. “Jesu . . . ṣẹ̀ yẹwheho dọ, dọmọ, Mì lẹnvọjọ: ahọludu olọn tọn sẹpọ.” (Matiu 4:17) E do otẹn he mẹ e dona tin te to gbẹzan mítọn mẹ hia, bo dotuhomẹnamẹ dọmọ: “Ṣigba mì dín ahọludu Jiwheyẹwhe tọn, po dodo etọn po whẹ́.” (Matiu 6:33) E sọ do lehe e yin nujọnu do hia gbọn pinplọn hodotọ etọn lẹ nado hodẹ̀ dohlan Jiwheyẹwhe dali dọmọ: “Ahọludu towe ni wá. Ojlo towe ni yin wiwà to aigba go, dile e te to olọn mẹ.”—Matiu 6:10.
Gandudu Yọyọ Aigba Tọn
3. Naegbọn Ahọluduta Jiwheyẹwhe tọn do yin nujọnu taun na mí?
3 Naegbọn Ahọluduta Jiwheyẹwhe tọn do yin nujọnu taun sọmọ hlan gbẹtọvi lẹ? Na to madẹnmẹ e na yinuwa nado diọ gandudu aigba ehe tọn lẹ kakadoi wutu wẹ. Dọdai lọ to Daniẹli 2:44 mẹ dọmọ: “To azán ahọlu nẹlẹ tọn lẹ mẹ [he to gandu to aigba ji todin] wẹ Jiwheyẹwhe olọn tọn na ze ahọludu de daga [gandudu de to olọn mẹ], he ma na yin viva gbede, mọ yè ma na jo ahọludu etọn dai hlan gbẹtọ devo lẹ gba; ṣigba e na gbà ahọludu [gandudu aigba ji tọn lẹ] do flinflin bo sú ahọludu he lẹpo do, ewọ bo nasọ nọte kakadoi.” To whenuena Ahọluduta Jiwheyẹwhe tọn na dugán mlẹnmlẹn, gbẹtọvi lẹ ma nasọ deanana aigba pọ́n gbede ba. Gandudu kinklan po pekọ matindo gbẹtọvi lẹ tọn po na juwayi kakadoi.
4, 5. (a) Naegbọn Jesu wẹ yin mẹhe pegan hugan lọ nado yin Ahọlu Ahọluduta lọ tọn? (b) Azọ́ndenamẹ tẹwẹ Jesu tindo to sọgodo madẹnmẹ tọn mẹ?
4 Gandutọ Daho lọ to Ahọluduta olọn tọn mẹ, to anademẹ tlọlọ Jehovah tọn glọ, wẹ yin mẹhe pegan hugan lọ—yèdọ Klisti Jesu. Whẹpo e do wá aigba ji, e ko nọgbẹ̀ to olọn mẹ taidi “azọ́nwatọgan” Jiwheyẹwhe tọn, bo yin tintan to nudida Jiwheyẹwhe tọn lẹpo mẹ. (Howhinwhẹn lẹ 8:22-31) “Mẹhe basi apajlẹ Jiwheyẹwhe tọn he yè ma mọ, ovi plọnji to yé he yè dá lẹpo mẹ: na e dè wẹ yè gbọn dá onú lẹpo, ehe tin to olọn lẹ mẹ, po ehe tin to aihọn mẹ po.” (Kọlọsinu lẹ 1:15, 16) Podọ whenuena Jesu yin didohlan aigba ji gbọn Jiwheyẹwhe dali, e wà ojlo Jiwheyẹwhe tọn to ojlẹ lẹpo mẹ. E doakọnna mẹtẹnpọn he sinyẹn tlala lẹ bosọ kú to nugbonọ-yinyin mẹ hlan Otọ́ etọn.—Johanu 4:34; 15:10.
5 Na nugbonọ-yinyin etọn hlan Jiwheyẹwhe yèdọ jẹ okú wutu, Jesu yin ahọsuna. Jiwheyẹwhe fọ́n ẹn sọnku do olọn mẹ bo na ẹn jlọjẹ lọ nado yin Ahọlu Ahọluduta olọn mẹ tọn. (Owalọ lẹ 2:32-36) Taidi Ahọlu Ahọluduta lọ tọn, Klisti Jesu na tindo azọ́ndenamẹ jiawu lọ sọn Jiwheyẹwhe dè nado deanana nudida gbigbọnọ huhlọnnọ fọtọ́n susu to gandudu gbẹtọ tọn didesẹ sọn aigba lọ ji mẹ bo na hẹn globu mítọn vò sọn kanyinylan lẹpo mẹ. (Howhinwhẹn lẹ 2:21, 22; 2 Tẹsalonikanu lẹ 1:6-9; Osọhia 19:11-21; 20:1-3) To whenẹnu Ahọluduta olọn mẹ tọn Jiwheyẹwhe tọn to Klisti glọ na yin aṣẹpipa gandudu tọn yọyọ lọ, yèdọ gandudu dopo akàn lọ to aigba lọ blebu ji.—Osọhia 11:15.
6. Gandudu alọpa tẹwẹ mí sọgan donukun sọn Ahọlu Ahọluduta lọ tọn dè?
6 Ohó Jiwheyẹwhe tọn dọ gando Gandutọ yọyọ aigba tọn go dọmọ: “Yè sọ yí ahọluigba na ẹn finẹ, po gigo po, po ahọludu de po, na gbẹtọ lẹpo, po akọta lẹ po, po ogbè lẹ po ni do nọ sẹ̀n ẹn.” (Daniẹli 7:14) Na Jesu na hodo apajlẹ owanyi Jiwheyẹwhe tọn wutu, jijọho po ayajẹ po he na tin to gandudu etọn glọ na sù tlala. (Matiu 5:5; Johanu 3:16; 1 Johanu 4:7-10) “Gando jideji gandudu etọn po jijọho po go opodo ma na tin, . . . nado yí whẹdida dodo po dodowiwa po do hẹn ẹn lodo.” (Isaia 9:7, Revised Standard Version) Dona nankọtọn die e na yin nado tindo Gandutọ de he na dugán to owanyi, whẹdida dodo, po dodowiwa po mẹ! Gbọnmọ dali, 2 Pita 3:13 dọ dọdai dọmọ: “Di opagbe etọn, míwlẹ to nukundo olọn yọyọ lẹ [Ahọluduta olọn mẹ tọn Jiwheyẹwhe tọn], po aigba yọyọ de po [ogbẹ́ yọyọ aigba tọn de], ofi he dodo nọnọ̀.”
7. Nawẹ Matiu 24:14 to yinyin hinhẹndi to egbehe gbọn?
7 Na jide tọn Ahọluduta Jiwheyẹwhe tọn wẹ yin owẹ̀n yọyọ tlala lọ na mẹhe yiwanna nuhe sọgbe lẹpo. Nuhe zọ́n niyẹn, bọ taidi apadewhe ohia lọ tọn dọ mí to gbẹnọ to ‘azán godo tọn lẹ’ heyin titonu ylankan ehe tọn mẹ todin, Jesu dọ dọdai dọmọ: “Yè nasọ dọ yẹwheho wẹndagbe ahọludu tọn he lẹ to aigba fininọ lẹpo mẹ na okunnu de hlan akọta lẹpo; whenẹnu wẹ opodo na wá.” (2 Timoti 3:1-5; Matiu 24:14) Dọdai enẹ to yinyin hinhẹndi todin, dile nudi livi ṣidopo Kunnudetọ Jehovah tọn lẹ tọn to aigba 234 ji wẹ to hugan ganhiho liva dopo klán dovo to owhe mẹ nado to didọna mẹdevo lẹ gando Ahọluduta Jiwheyẹwhe tọn go. Po gbesisọ po, dopodopo to nọtẹn sinsẹ̀n-bibasi tọn yetọn lẹ mẹ na agun 90 000 delẹ lẹdo aihọn pé nọ yin yiylọdọ Plitẹnhọ Ahọluduta tọn de. To finẹ, gbẹtọ lẹ nọ wá nado plọnnu gando gandudu yọyọ he ja lọ go.
Gandutọ Gbẹdohẹmẹtọ Lẹ
8, 9. (a) Fie wẹ ganduhẹmẹtọgbẹ Klisti tọn lẹ wá sọn? (b) Jidide tẹwẹ mí sọgan tindo to gandudu Ahọlu lọ po ganduhẹmẹtọgbẹ etọn lẹ po tọn mẹ?
8 Gandutọ gbẹdohẹmẹtọ lẹ na tin hẹ Klisti Jesu to Ahọluduta olọn mẹ tọn Jiwheyẹwhe tọn mẹ. Osọhia 14:1-4 dọ dọdai dọ gbẹtọ 144 000 wẹ na yin ‘fifligọ sọn gbẹtọvi lẹ mẹ’ bo nasọ yin finfọnsọnku hlan ogbẹ̀ olọn mẹ tọn. Ehelẹ bẹ sunnu po yọnnu lẹ po hẹn he, kakati nado yin devizọnwa hlan, nọ gbọn whiwhẹ dali wadevizọn hlan Jiwheyẹwhe po gbẹtọ hatọ lẹ po. “Yé na yin yẹwhenọ Jiwheyẹwhe tọn lẹ po Klisti tọn po, bo nasọ duahọlu hẹ ẹ họ̀ owhe fọtọ́n.” (Osọhia 20:6) Sọha yetọn whè tlala hugan “gbẹtọ susugege, he mẹdepope ma sọgan hia, sọn ohẹnnu lẹpo mẹ, sọn gbẹtọ lẹpo mẹ, podọ sọn ogbè lẹpo mẹ” he na lùn opodo titonu ehe tọn tọ́n. Ehelẹ ga to ‘sinsẹ̀nzọn wiwe basi hlan Jiwheyẹwhe to okle po ozán po,’ ṣigba yé ma tindo oylọ olọn mẹ tọn gba. (Osọhia 7:9, 15) Yé wleawuna ahọ́nkan aigba yọyọ lọ tọn taidi mẹjidugando Ahọluduta olọn mẹ tọn Jiwheyẹwhe tọn.—Psalm 37:29; Johanu 10:16.
9 To whenuena e to mẹhe na dugán hẹ Klisti to olọn mẹ lẹ de, Jehovah ṣinyan gbẹtọvi nugbonọ he ko tindo numimọ gbẹ̀mẹ tọn lẹ po nuhahun etọn lẹpo po. Diblayin dọ nudepope matin he mẹ gbẹtọ lẹ ko jugbọn bọ ahọlu-yẹwhenọ ehelẹ lọsu ma ko tindo numimọ etọn. Enẹwutu gbẹzan yetọn to aigba ji na yidogọna nugopipe yetọn nado dugán do gbẹtọvi lẹ ji. Yèdọ Jesu lọsu “plọn tonuse gbọn onú he mẹ e jiya te.” (Heblu lẹ 5:8) Apọsteli Paulu dọ gando ewọ go dọmọ: “Míwlẹ ma tindo yẹwhenọ daho he ma yọ́n vivẹ́ madogán mítọn lẹ tọn; ṣigba to onú lẹpo mẹ he yè whlepọn kẹdẹdi míwlẹ, ṣigba to matin ylando mẹ.” (Heblu lẹ 4:15) Lehe e yin homẹmiọnnamẹnu do sọ nado yọnẹn dọ to aihọn yọyọ dodowiwa Jiwheyẹwhe tọn mẹ, gbẹtọ lẹ na yin gandudeji gbọn ahọlu po yẹwhenọ owanyinọ lẹ po he sọ nọ vẹawumẹ lẹ dali!
Be Ahọluduta lọ Tin to Lẹndai Jiwheyẹwhe Tọn mẹ Ya?
10. Naegbọn Ahọluduta olọn mẹ tọn ma do yin apadewhe lẹndai dowhenu Jiwheyẹwhe tọn tọn?
10 Be Ahọluduta olọn mẹ tọn yin apadewhe lẹndai dowhenu Jiwheyẹwhe tọn to whenuena e dá Adam po Evi po ya? To kandai nudida tọn Gẹnẹsisi tọn mẹ, Ahọluduta he na dugán do gbẹtọvi lẹ ji de mayin nùdego gba. Jehovah lọsu wẹ yin Gandutọ yetọn, podọ dile e na dẹnsọ bọ yé na setonu na ẹn, nuhudo depope ma na tin na gandudu devo gba. Gẹnẹsisi weta 1 dohia dọ, e yọnbasi dọ gbọn Visunnu plọnji olọn mẹ tọn etọn dali Jehovah yinuwa hẹ Adam po Evi po. Kandai lọ yí hogbe mọnkọtọn lẹ zan taidi “Jiwheyẹwhe dọna yé” podọ ‘Jiwheyẹwhe zindonukọn nado dọ’ hlan yé.—Gẹnẹsisi 1:28, 29; Johanu 1:1.
11. Bẹjẹeji pipé tẹwẹ gbẹtọvi lẹ tindo?
11 Biblu dọmọ: “Jiwheyẹwhe sọ mọ onú he e dá lẹpo, bo doayi e go e yọ́n tlala.” (Gẹnẹsisi 1:31) Nuhe tin to jipa Edẹni tọn mẹ lẹpo wẹ pipé mlẹnmlẹn. Adam po Evi po nọ̀ paladisi de mẹ. Yé tindo ayiha pipé lẹ po agbasalan pipé po. Yé sọgan dọho hẹ Basitọ yetọn podọ ewọ hẹ yé. Podọ gbọn gbigbọṣi nugbonọ-yinyin mẹ dali, yé na ji ovi pipé lẹ. Nuhudo depope ma na ko tin na gandudu yọyọ olọn mẹ tọn de gba.
12, 13. Dile gbẹtọvi pipé lẹ to susudeji, naegbọn Jiwheyẹwhe na gbẹsọ penugo nado dọho hẹ yé?
12 Dile whẹndo gbẹtọvi tọn to jijideji, nawẹ Jiwheyẹwhe na dọho hẹ yemẹpo gbọn? Lẹnnupọndo sunwhlẹvu olọn mẹ tọn lẹ ji. Yé yin hihopli dopọ to lopo wẹkẹ tọn lẹ mẹ he nọ yin yiylọdọ bẹplidopọ sunwhlẹvu lẹ tọn. Bẹplidopọ sunwhlẹvu lẹ tọn delẹ bẹ sunwhlẹvu liva dopo hẹn. Devo lẹ bẹ nudi liva donu fọtọ́n lẹ hẹn. Podọ lẹnunnuyọnẹntọ lẹ yí sọha na dọ nudi bẹplidopọ sunwhlẹvu lẹ tọn liva donu 100 wẹ tin to wẹkẹ yinukundomọ lọ mẹ! Ṣogan, Mẹdatọ lọ dọmọ: “Ze nukun mìtọn doaga, bo pọ́n, mẹnu wẹ dá onú helẹ, bosọ hẹn awhàn sọhasọha yetọn jẹgbonu: e nọ ylọ oyín yetọn dopodopo gbọn kiklo huhlọn etọn tọn dali, na ewọ sinyẹn to huhlọn mẹ; depope ma pò.”—Isaia 40:26.
13 To whenuena e yindọ Jiwheyẹwhe sọgan doayi nugonu olọn mẹ tọn ehe lẹpo go, na jide tọn e ma na yin nuhahun depope na ẹn nado doayi sọha gbẹtọvi tọn he whè hugan mọ tlala lẹ go gba. Etlẹ yin todin, livi susu devizọnwatọ etọn lẹ tọn nọ hodẹ̀ dohlan ẹn egbesọegbesọ. Odẹ̀ mọnkọtọn lẹ nọ yì Jiwheyẹwhe dè to afọdopolọji. Enẹwutu hodidọ hẹ gbẹtọvi pipé lẹpo ma na ko ze nuhahun depope donukọnna ẹn gba. E ma na ko tindo nuhudo Ahọluduta olọn mẹ tọn de nado sọgan doayi yé go gba. Tito jiawu nankọtọn die—nado tindo Jehovah taidi Gandutọ, nado tindo kanṣiṣa tlọlọ hẹ ẹ, podọ nado tindo nukundido ma nado kú gbede ba tọn, bo na to gbẹ̀nọ kakadoi to aigba paladisi tọn de ji!
‘E Ma Yin Gbẹtọ Tọn’
14. Naegbọn gbẹtọvi lẹ na tindo nuhudo gandudu Jehovah tọn kakadoi?
14 Ṣigba, gbẹtọ lẹ—etlẹ yin omẹ pipé lẹ—na tindo nuhudo gandudu Jehovah tọn kakadoi. Etẹwutu? Na Jehovah ma dá yé po nugopipe lọ po nado nọ mẹdekannu sọn gandudu etọn mẹ po kọdetọn dagbe po gba. Osẹ́n de wẹ enẹ yin na gbẹtọvi lẹ, dile yẹwhegán Jẹlemia yigbe do dọmọ: “OKLUNỌ E, yẹn yọnẹn dọ aliho gbẹtọ tọn ma tin to ewlọsu mẹ gba: e ma tin to omẹ he to zọnlinzin mẹ nado do afọdide etọn lẹ gba. OKLUNỌ E, . . . hẹn mi sọgbe.” (Jẹlemia 10:23, 24) Nululu wẹ e na yin na gbẹtọvi lẹ nado lẹndọ yé sọgan deanana ogbẹ́ gbẹtọvi tọn po kọdetọn dagbe po matin gandudomẹji Jehovah tọn. E na jẹagọdo aliho he mẹ yé yin didá te. Na dandan tọn, mẹdekannujẹ sọn gandudu Jehovah tọn mẹ, na dekọtọn do ṣejannabi, wangbẹna, kanyinylan, danuwiwa, awhàn lẹ, po okú po mẹ. ‘Gbẹtọ na dugán do gbẹtọ ji na awugble etọn.’—Yẹwhehodọtọ 8:9.
15. Kọdetọn tẹlẹ wẹ wá sọn nudide ylankan he mẹjitọ tintan mítọn lẹ basi mẹ?
15 E blawu dọ, mẹjitọ mítọn tintan lẹ basi nudide dọ yé ma tindo nuhudo Jiwheyẹwhe tọn taidi Gandutọ yetọn gba, podọ yé de nado jẹ mẹdekannu sọn ewọ dè. Taidi kọdetọn de, Jiwheyẹwhe ma sọ penukundo yé go to pipé mẹ ba. Todin yé wá taidi nuhe nọ zan lẹtliki de heyin sinsán sẹ sọn asisa huhlọn etọn tọn go. Enẹwutu to madẹnmẹ, yé na dèkanpò bosọ doalọte—to okú mẹ. Yé taidi wunmẹ nuyizan he tindo oblọ de, podọ ninọmẹ mọnkọtọn wẹ yin nulẹpo he yé sọgan na ovivi yetọn. (Lomunu lẹ 5:12) “Osé lọ [Jehovah], pipé wẹ azọ́n etọn na whẹdida wẹ ali etọn lẹpo: . . . Yé ko yí gbigble do zan hẹ ẹ, yé ma yin ovi etọn lẹ gba, ovlẹ yetọn wẹ.” (Deutelonomi 32:4, 5) Nugbo wẹ dọ, Adam po Evi po yin nuyiwadeji gbọn nudida gbigbọnọ atẹṣitọ he wá lẹzun Satani lọ dali, ṣigba yé tindo ayiha pipé lẹ bo sọgan ko gbẹ́ ayinamẹ agọ̀ etọn lẹ dai.—Gẹnẹsisi 3:1-19; Jakobu 4:7.
16. Nawẹ whenuho do kọdetọn mẹdekannujẹ sọn Jiwheyẹwhe dè tọn hia gbọn?
16 Whenuho do kọdetọn mẹdekannujijẹ sọn Jiwheyẹwhe dè tọn hia to aliho susugege mẹ. Na owhe fọtọ́n susu, gbẹtọ lẹ ko tẹ́n wunmẹ gandudu gbẹtọvi tọn lẹpo pọ́n, tito akuẹzinzan po ogbẹ́ tọn lẹpo po. Ṣogan, kanyinylan “to yinylan yì nukọn” zọnmii janwẹ. (2 Timoti 3:13) Owhe kanweko 20tọ do enẹ hia. E yin gigọ́ po wangbẹna ylankan gọna danuwiwa he ylan hugan po, awhàn lẹ, huvẹ, ohẹ́n, gọna yajiji he hugan ojlẹ depope tọn to whenuho mẹ. Podọ mahopọnna nukọnyiyi amasinzọnwiwa tọn he ko yin tintindo, e dẹn wẹo e ya wẹo mẹlẹpo nọ kú. (Yẹwhehodọtọ 9:5, 10) Gbọn tintẹnpọn nado deanana afọdide yetọn titi lẹ dali, gbẹtọvi lẹ ko na dotẹnmẹ yedelẹ nado lẹzun nuyànwẹnna Satani po aovi etọn lẹ po tọn, sọmọ bọ Biblu ylọ Satani dọ “yẹwhe owhenu he tọn.”—2 Kọlintinu lẹ 4:4.
Nunina Mẹdekannujẹ Nudide Tọn
17. Nawẹ nunina Jiwheyẹwhe tọn heyin mẹdekannujẹ nudide tọn na yin yiyizan gbọn?
17 Naegbọn Jehovah do na dotẹnmẹ gbẹtọvi lẹ nado tindo mẹdekannujẹ? Na e dá yé po nunina mẹdekannujẹ nudide tọn jiawu po, yèdọ nugopipe apọ̀nmẹ tọn heyin mẹdekannujẹ nudide tọn. ‘Fie gbigbọ Jehovah tọn tin te, mẹdekannujẹ tin to finẹ,’ wẹ apọsteli Paulu dọ. (2 Kọlintinu lẹ 3:17) Mẹdepope ma jlo nado yin robot, he na tindo mẹdevo de he na nọ basi nudide nuhe e na dọ bo na wà to ojlẹ azán lọ tọn lẹpo mẹ na ẹn gba. Ṣigba Jehovah biọ to gbẹtọvi lẹ si nado yí nunina mẹdekannujẹ nudide tọn enẹ zan to aliho dagbe mẹ, nado mọ nuyọnẹn he tin to ojlo etọn wiwà mẹ podọ nado yin mẹjidugando etọn. (Galatianu lẹ 5:13) Enẹwutu mẹdekannujẹ ma dona yin mlẹnmlẹn gba, to whenuena e yindọ enẹ na dekọtọn do bẹwlu mẹ. E dona yin anadena to gblagbla dogbó osẹ́n dagbewiwa Jiwheyẹwhe tọn lẹ tọn mẹ.
18. Etẹwẹ Jiwheyẹwhe ko dohia gbọn didike na gbẹtọ ni yí mẹdekannujẹ nudide tọn zan dali?
18 Gbọn didike na whẹndo gbẹtọvi tọn ni hodo aliho edetiti tọn dali, Jiwheyẹwhe to ojlẹ de mẹ podọ to ojlẹ lẹpo mẹ, ko dohia dọ mí tindo nuhudo gandudu etọn tọn. Aliho gandudu tọn etọn, nupojipetọ-yinyin etọn, wẹ yin aliho he sọgbe dopo kẹdẹ lọ. E nọ dekọtọn do ayajẹ daho hugan, pekọ, po kọdetọn dagbe tintindo po mẹ. Ehe yin mọ na ayiha po agbasa mítọn lẹ po yin awuwlena gbọn Jehovah dali nado wazọ́n dagbe to whenuena e tin to kọndopọmẹ hẹ osẹ́n etọn lẹ. “Yẹn wẹ OKLUNỌ Jiwheyẹwhe towe, he plọn we na alè, he plan we gbọn aliho he ji hiẹ na gbọ̀n.” (Isaia 48:17) Mẹdekannujẹ nudide tọn to gblagbla dogbó osẹ́n Jiwheyẹwhe tọn lẹ tọn mẹ ma na yin agbanpẹnmẹnu gba ṣigba na dekọtọn do núdùdù voovo, owhé lẹ, alọnuzọ́n, po húnhiho awuvivi tọn lẹ po mẹ. Eyin yè yí ì zan ganji, mẹdekannujẹ nudide tọn na ko dekọtọn do gbẹzan awuvivi tọn, jiawu hugan gbede pọ́n tọn to aigba paladisi tọn de ji.
19. Nuyizan tẹwẹ Jiwheyẹwhe yizan nado gbọwhẹ hẹ gbẹtọvi lẹ hlan edetiti?
19 Ṣigba na nudide ylankan yetọn wutu, gbẹtọvi lẹ klán yede sọn Jehovah dè, lẹzun mapenọ, bo gblezọn, bosọ nọ kú. Enẹwutu yé dona yin fifligọ sọn ninọmẹ awubla tọn enẹ mẹ bosọ yin hinhẹnwa haṣinṣan he sọgbe de mẹ hẹ Jiwheyẹwhe taidi visunnu po viyọnnu etọn lẹ po. Nuyizan he Jiwheyẹwhe de nado basi wadotana ehe tọn wẹ Ahọluduta lọ, podọ Mẹfligọtọ lọ wẹ Jesu Klisti. (Johanu 3:16) Gbọn tito ehe dali, mẹhe lẹnvọjọ nugbonugbo lẹ—taidi visunnu duvanọ oló Jesu tọn tọn lọ—na gbọwhẹ hẹ Jiwheyẹwhe bosọ yin alọkẹyi lẹkọ gbọn ewọ dali taidi ovi etọn lẹ.—Luku 15:11-24; Lomunu lẹ 8:21; 2 Kọlintinu lẹ 6:18.
20. Nawẹ lẹndai Jiwheyẹwhe tọn na yin hinhẹndi gbọn Ahọluduta lọ dali gbọn?
20 Na dandan tọn, ojlo Jehovah tọn na yin wiwadotana to aigba ji. (Isaia 14:24, 27; 55:11) Gbọn Ahọluduta etọn to Klisti glọ dali, Jiwheyẹwhe na suwhẹna (do whẹjijọ etọn hia) jlọjẹ etọn nado yin Nupojipetọ mítọn. Ahọluduta lọ na hẹn opodo wá na gandudu gbẹtọ po aovi tọn po do aigba ehe ji, podọ ewọ kẹdẹ wẹ na dugán sọn olọn mẹ na owhe fọtọ́n. (Lomunu lẹ 16:20; Osọhia 20:1-6) Ṣigba to ojlẹ enẹ mẹ, nawẹ ganhunupotọ-yinyin aliho gandudu tọn Jehovah tọn na yin didohia gbọn? Podọ to owhe fọtọ́n lọ godo, azọngban tẹwẹ Ahọluduta lọ na tindo? Hosọ he bọdego na gbadopọnna kanbiọ ehelẹ.
Nuagokun lẹ na Dogbapọnna
• Etẹwẹ yin hosọ Biblu tọn?
• Mẹnu lẹ wẹ gandudu yọyọ aigba tọn bẹhẹn?
• Naegbọn gandudu gbẹtọ tọn he jẹ mẹdekannu sọn Jiwheyẹwhe dè ma sọgan tindo kọdetọn dagbe pọ́n gbede?
• Nawẹ mẹdekannujẹ nudide tọn dona yin yiyizan gbọn?
[Kanbiọ Oplọn Tọn Lẹ]
[Yẹdide to weda 10]
Mẹpinplọn Jesu tọn zinnudo gandudu Jiwheyẹwhe tọn gbọn Ahọluduta lọ dali ji
[Yẹdide to weda 12]
To aigba lẹpo ji Kunnudetọ Jehovah tọn lẹ hẹn Ahọluduta lọ nado yin nuplọnmẹ tangan yetọn
[Yẹdide to weda 14]
Whenuho do nuhe Jiwheyẹwhe gbigbẹdai nọ hẹnwá hia
[Asisa Yẹdide Tọn]
Awhànfuntọ WWI tọn lẹ: U.S. National Archives photo; oslá yasanamẹ tọn: Oświęcim Museum; child: UN PHOTO 186156/J. Isaac