“Apajlẹ Pọninọ Tọn De”

ENẸ wẹ yin hosọ linlinwe de tọn heyin zinzinjẹgbonu to linlinwe de mẹ to Indaiatuba, São Paulo, Brésil. Mẹnu lẹ wẹ wleawuna apajlẹ lọ? “Kunnudetọ Jehovah tọn lẹ, he basi tito nado gbá ‘Plitẹnhọ Ahọluduta tọn’ yọyọ de, dile tẹmpli kavi ohọ̀ plidopọ tọn yetọn lẹ nọ yin yiylọ dọ, to apajlẹ gbekọndopọ dagbe tọn po dehe dolido po he ma sọgan yin gbigbẹdai de zedai,” wẹ wekantọ lọ basi zẹẹmẹ etọn.

Pọninọ he tin to Kunnudetọ Jehovah tọn lẹ ṣẹnṣẹn nọ sọawuhia to nujijọ mọnkọtọn lẹ whenu. Enẹwutu, hosọ lọ dlẹnalọdo dọmọ: “Ojlofọndotenamẹnu wẹ e yin nado mọ sunnu, yọnnu, po jọja aflanmẹ mẹdezejotọ lẹ po he to azọ́nwa dopọ sọn ojlo mẹ wá nado gbá nọtẹn de fie yé sọgan nọ pli dopọ bosọ basi sinsẹ̀n hlan Jiwheyẹwhe te.”

Kunnudetọ Jehovah tọn lẹ ze apajlẹ dagbe de dai to adà devo lẹ mẹ ga. “To yidogọmẹ na nupinplọn po dẹ̀hiho po, yanwle yetọn wẹ nado hẹn ahànnumunọ lẹ po mẹhe peve to amasin adínọ mẹ lẹ po nado basi vọjlado bosọ do aliho pọninọ po owanyi tọn po hia gbẹtọ lẹ,” wẹ linlinwekantọ lọ yidogọ. Nawẹ yé nọ wà ehe dotana gbọn? Kunnudetọ lẹ yọnẹn dọ ayinamẹ Biblu tọn lẹ pinplọn po yíyí-do-yizan mẹ po nọ gọalọna mẹde nado gbẹ́ ylanwiwa lẹ dai. Nuhe zọ́n niyẹn bọ yé nọ vánkan nado plọn mẹdevo lẹ nuhe yé ko plọn sọn Biblu mẹ. Linlinwekantọ lọ dotana dọ “matin ayihaawe apajlẹ yetọn wẹ dona yin hihodo po awuyiya po.”

Opli Kunnudetọ Jehovah tọn lẹ tọn yin hunhundo nùvo hlan mẹlẹpo podọ akuẹjijọ depope ma nọ yin yíyí. Hiẹ yin oylọ basina po zohunhun po nado dla Plitẹnhọ Ahọluduta tọn he sẹpọ we de pọ́n.