Be Hiẹ Sọgan Dọnsẹpọ Jiwheyẹwhe Mayinukundomọ de Ya?
Be Hiẹ Sọgan Dọnsẹpọ Jiwheyẹwhe Mayinukundomọ de Ya?
‘Nawẹ yẹn sọgan wleawuna haṣinṣan pẹkipẹki hẹ mẹhe yẹn ma sọgan mọ de gbọn?’ wẹ hiẹ sọgan kanse. Enẹ sọgan taidi kanbiọ he sọgbe de. Ṣigba lẹnnupọndo ehe ji:
NAWẸ nukunnumimọ yin nujọnu sọ na awuwiwlena haṣinṣan owanyinọ po dehe na dẹn-to-aimẹ de po? Be jẹhẹnu he yè ma sọgan yí nukundomọ lẹ lọsu mayin nujọnu, etlẹ yin hugan mọ ya? Na nugbo tọn mọwẹ! Na whẹwhinwhẹ́n enẹ wutu mẹdelẹ ko wleawuna haṣinṣan pẹkipẹki hẹ mẹdevo lẹ gbọn wekanhlanmẹ gbesisọ tọn dali—wekanhlanmẹ yetọn lẹ nọ gbọn nugbonọ-yinyin dali do nuhe yè yiwanna lẹ, gbẹwanna lẹ, yanwle lẹ, nunọwhinnusẹ́n lẹ, linlẹn wuntuntun po nukunnumọjẹnumẹ tọn po, podọ jijọ gbẹtọ-yinyin tọn po nujlomẹ devo lẹ po hia.
Nukuntọ́nnọ lẹ lọsu nọ dohia dọ nukunnumimọ mayin dandan nado wleawuna haṣinṣan pẹkipẹki de hẹ mẹdevo gba. Lẹnnupọndo apajlẹ Edward po Gwen tọn po ji, yèdọ asu po asi po heyin nukuntọ́nnọ de. a Edward dukosọ hẹ Gwen to wehọmẹ nukuntọ́nnọ lẹ tọn de mẹ, fie ewọ lọsu yin wehọmẹvi hatọ mẹhomẹ de te. Jẹhẹnu Gwen tọn lẹ duto e ji taun, na titengbe tọn nugbodidọ to hodidọ po walọyizan po mẹ etọn, podọ walọyizan dagbe etọn hlan azọ́n. To alọ devo mẹ, Gwen yin dindọ̀n hlan Edward na, dile e dọ ẹ do, “ewọ nọ do jẹhẹnu lẹpo he yẹn yin pinpọn e go whẹ́n nado yise dọ yé yin nujọnu lẹ hia.” Họntọnmẹninọ de bẹjẹeji, podọ yé wlealọ to owhe atọ̀n godo.
“To whenuena mì tin topọ,” wẹ Edward dọ, “nukuntintọ́n ma nọ hẹn vogbingbọn de wá to awuwiwlena haṣinṣan de hẹ mẹdevo mẹ na taun tọn gba. Mì sọgan nọ ma penugo nado mọ ode awetọ, ṣigba numọtolanmẹ lẹ ma tọ́nnukun gba.” Todin, yèdọ to owhe 57 godo, yé gbẹsọ tin to owanyi mẹ sisosiso. Yé dọ dọ aṣli lọ na haṣinṣan jiawu yetọn bẹ e whè gbau onú ẹnẹ hẹn: (1) ayidido jẹhẹnu omẹ awetọ tọn lẹ go, (2) nulinlẹnpọndo podọ yinyin dindọ̀n hlan jẹhẹnu enẹlẹ, (3) hodọdopọ dagbe tintindo, podọ (4) onú lẹ wiwà dopọ.
Nuagokun ẹnẹ ehelẹ yin titengbe na haṣinṣan dagbe depope, vlavo to họntọn lẹ ṣẹnṣẹn, alọwlemẹ lẹ kavi, dehe yin nujọnu hugan lọ, to gbẹtọvi lẹ po Jiwheyẹwhe po ṣẹnṣẹn. To hosọ he na bọdego mẹ, mí na mọ lehe nuagokun ehelẹ yíyí do yizan mẹ sọgan gọalọna mí nado wleawuna haṣinṣan pẹkipẹki de hẹ Jiwheyẹwhe do, yèdọ dile etlẹ yindọ mí ma sọgan mọ ẹn. b
[Nudọnamẹ Odò Tọn Lẹ]
a Yinkọ lẹ ko yin didiọ.
b To ma taidi haṣinṣan de to gbẹtọvi lẹ ṣẹnṣẹn, haṣinṣan de hẹ Jiwheyẹwhe nọ yin zize sinai do yise to tintin etọn mẹ ji. (Heblu lẹ 11:6) Na hodidọ mlẹnmlẹn do awuwiwlena yise he dolido de to Jiwheyẹwhe mẹ ji, jaale pọ́n Y a-t-il un Créateur qui se soucie de vous? mẹ, heyin zinzinjẹgbonu gbọn Watchtower Bible and Tract Society of New York, Inc. dali.