Lehe Hiẹ Sọgan Dọnsẹpọ Jiwheyẹwhe Do
Lehe Hiẹ Sọgan Dọnsẹpọ Jiwheyẹwhe Do
“Mì [dọnsẹpọ] Jiwheyẹwhe, ewọ nasọ [dọnsẹpọ] mì,” wẹ Jakobu 4:8 dọ. Nado do lehe Jehovah Jiwheyẹwhe jlo dọ gbẹtọvi lẹ ni tindo haṣinṣan pẹkipẹki hẹ ewọ sọ hia, e na Visunnu etọn do ota mítọn mẹ.
TO GBEYIYI mẹ na nuyiwa owanyinọ enẹ, apọsteli Johanu wlan dọmọ: “Mí yiwanna [Jiwheyẹwhe], na ewọ whẹwhẹ wẹ yiwanna mí wutu.” (1 Johanu 4:19) Ṣigba na míwlẹ lọsu nido sọgan dọnsẹpọ Jiwheyẹwhe mí dona ze afọdide delẹ. Yé yin onú dopolọ po aliho ẹnẹ he mẹ mí nọ dọnsẹpọ gbẹtọvi hatọ lẹ te po, dile e yin titodohukanji to hosọ he jẹnukọn lọ mẹ. Mì gbọ mí ni gbadopọnna ehelẹ todin.
Doayi Jẹhẹnu Jiawu Jiwheyẹwhe Tọn lẹ Go
Jiwheyẹwhe tindo jẹhẹnu jiawu susu, to dehe sẹhundaga hugan lẹ mẹ wẹ owanyi, nuyọnẹn, whẹdida dodo, po huhlọn etọn po tin te. Nuyọnẹn po huhlọn etọn po yin didohia susugege to wẹkẹ gblagada lọ mẹ podọ to aihọn he lẹdo mí pé lọ mẹ, yèdọ sọn bẹplidopọ sunwhlẹvu he klo tlala lẹ ji jẹ nuvikun he whè hugan lẹ ji. Psalm-kàntọ lọ wlan dọmọ: “Olọn lẹ to gigo Jiwheyẹwhe tọn hodọ; agahomẹ sọ to alọnuzọn etọn lá.”—Psalm 19:1; Lomunu lẹ 1:20.
Nudida lọsu sọ to owanyi Jiwheyẹwhe tọn dohia. Di apajlẹ, aliho he mẹ mí yin bibasi te dohia dọ Jiwheyẹwhe jlo dọ mí ni duvivi ogbẹ̀ tọn. E na mí nugopipe lọ nado mọ sinmẹ voovo lẹ, nado dọnupọn bosọ sewan, nado duvivi húnhiho tọn, nado konu, nado duvivi whanpẹ tọn, bosọ na mí nugopipe po jẹhẹnu susu devo lẹ po ga he mayin dandan na gbẹninọ. Mọwẹ, Jiwheyẹwhe yin alọtlútọ, jọmẹ, bosọ yin owanyinọ na nugbo tọn—yèdọ jẹhẹnu lẹ he matin ayihaawe nọ yidogọna ‘Jiwheyẹwhe ayajẹnọ’ yinyin etọn.—1 Timoti 1:11; Owalọ lẹ 20:35.
Jehovah nọ doawagun to nugbo lọ mẹ dọ nupojipetọ-yinyin etọn po godonọnamẹ etọn po didohia gbọn nudida nuyọnẹntọ etọn lẹ dali yin zize sinai na taun tọn do owanyi ji. (1 Johanu 4:8) Nugbo wẹ dọ, Jehovah wẹ yin Nupojipetọ Wẹkẹ lọ tọn, ṣigba e nọ yinuwa hẹ gbẹtọvi lẹ, na titengbe tọn devizọnwatọ nugbonọ etọn lẹ, kẹdẹdile otọ́ owanyinọ de nọ yinuwa hẹ ovi etọn lẹ do. (Matiu 5:45) E ma nọ whlá nudepope he na yin dagbe yetọn do yé gba. (Lomunu lẹ 8:38, 39) Dile e ko yin nùdego do, e tlẹ sọ na ogbẹ̀ Visunnu dopo akàn etọn tọn do ota mítọn mẹ. Mọwẹ, owanyi Jiwheyẹwhe tọn wẹ yin whẹwhinwhẹ́n he wutu míwlẹ tin bosọ tindo nukundido ogbẹ̀ mavọmavọ tọn.—Johanu 3:16.
Jesu na mí wuntuntun sisosiso do gbẹtọ-yinyin Jiwheyẹwhe tọn ji na e gbọn pipé dali hodo apajlẹ Otọ́ etọn tọn wutu. (Johanu 14:9-11) E yin ṣejannabi matindonọ, mẹtọnhopọntọ, po lẹnpọn dagbenọ po mlẹnmlẹn. To nujijọ dopo whenu, yè do Jesu hia dawe de he yin tókunọ po unbọpẹnnọ po. Hiẹ sọgan yí nukun homẹ tọn do pọ́n dọ awú ma na vò dawe lọ to gbẹtọgun lẹ mẹ. Po homẹhunhun po, Jesu plan dawe ehe jẹ nọtẹn he tin to olá de mẹ bo hẹn ẹn jẹ gángán. (Malku 7:32-35) Be hiẹ nọ yọ́n pinpẹn mẹhe nọ doayi numọtolanmẹ towe lẹ go po mẹhe nọ na sisi yẹyi towe lẹ po ya? Eyin mọwẹ, to whelọnu hiẹ na dọnsẹpọ Jehovah po Jesu po pẹkipẹki dile hiẹ to nuplọn dogọ gando yé go.
Lẹnnupọndo Jẹhẹnu Jiwheyẹwhe Tọn lẹ Ji
Mẹde sọgan tindo jẹhẹnu jiawu lẹ, ṣigba mí dona lẹnnupọndo omẹ enẹ ji nado sọgan yin dindọ̀n hlan omẹ lọ. Onú dopolọ wẹ e yin gando Jehovah go. Ayihamẹlinlẹnpọn do jẹhẹnu etọn lẹ ji yin afọdide titengbe awetọ to dindọ̀n sẹpọ ẹ mẹ. Ahọlu Davidi, yèdọ dawe de he yiwanna Jehovah nugbonugbo bosọ yin ‘mẹhe ahun Jehovah tọn kẹalọyi,’ dọmọ: “Yẹn flin azán hoho tọn lẹ; yẹn lẹn azọ́n towe lẹpo pọ́n; yẹn ayihamẹlẹnpọn na azọ́n alọ towe tọn lẹpo.”—Owalọ lẹ 13:22; Psalm 143:5.
To whenuena hiẹ doayi nujiawu nudida tọn lẹ go kavi hia Ohó Jiwheyẹwhe tọn, Biblu, taidi Davidi, be hiẹ ma nọ lẹnayihamẹpọn do nuhe hiẹ mọ bo hia lẹ ji ya? Lẹnnupọndo visunnu de ji he ko ṣẹṣẹ mọ wekanhlanmẹ de yí sọn otọ́ he e tindo owanyi na sisosiso de dè. Nawẹ e na pọ́n wekanhlanmẹ enẹ hlan gbọn? Na jide tọn e ma na yìnnukun gbọn nuhe e bẹhẹn lẹ ji bo dlan ẹn do tafo de glọ poun gba. Kakatimọ, e na plọn ẹn, bo na ṣinyan zẹẹmẹ gigọ́ po flinflin lẹpo po sọn e mẹ. Mọdopolọ, Ohó Jiwheyẹwhe tọn dona yin nuhọakuẹ na mí kẹdẹdile e yin na psalm-kàntọ lọ do mẹhe jihàn dọmọ: “Ṣo na yẹn ka yiwanna osẹ́n towe dole! Ewu wẹ ayihamẹlẹnpọn ṣie to azán popo gbè.”—Psalm 119:97.
Hodọdopọ Dagbe Tintindo
Hodọdopọ dagbe wẹ yin nuhe nọ na huhlọn haṣinṣan depope. E bẹ hodidọ po todidoai po hẹn—e mayin po ayiha po kẹdẹ gba ṣigba po ahun lọsu po ga. Mí nọ dọho hẹ Mẹdatọ lọ gbọn odẹ̀ gblamẹ, heyin hodọhẹmẹ tlọlọ sinsẹ̀n-bibasi tọn hlan Jiwheyẹwhe. Jehovah nọ hùnhomẹ do odẹ̀ mẹhe yiwanna ẹn bo nọ sẹ̀n ẹn lẹ gọna mẹhe yigbe Jesu Klisti tọn taidi ogán nukunmọnu Etọn tọn lẹ tọn go.—Psalm 65:2; Johanu 14:6, 14.
To ojlẹ he wayi lẹ mẹ, Jiwheyẹwhe dọho na gbẹtọvi lẹ to aliho voovo lẹ mẹ, he bẹ numimọ, odlọ lẹ, podọ gbọn angẹli lẹ gblamẹ hẹn. Ṣigba, to egbehe e nọ wà mọ gbọn Ohó heyin kinkàndai etọn gblamẹ, yèdọ Biblu Wiwe lọ. (2 Timoti 3:16) Ohó heyin kinkàndai lọ tindo dagbenu susu. E sọgan yin dogbapọnna to ojlẹ depope mẹ. Taidi wekanhlanmẹ de, e sọgan yin vivi etọn dù pludopludo. Podọ e ma sọgan yin kọslona kẹdẹdile e nọ saba yin do na otàn heyin vivọdọ lẹ gba. Enẹwutu lẹnnupọndo Biblu ji taidi bẹplidopọ susugege wekanhlanmẹ lẹ tọn sọn Otọ́ yiwanna olọn mẹ tọn towe dè, podọ gbọ ewọ ni nọ dọho hẹ we egbesọegbesọ gbọn wekanhlanmẹ ehelẹ gblamẹ.—Matiu 4:4.
Di dohia, Biblu do pọndohlan Jehovah tọn hia gando nuhe sọgbe po dehe ylan po go. E basi zẹẹmẹ lẹndai etọn tọn gando gbẹtọvi po aigba po go. Podọ e de nuyiwahẹmẹ etọn lẹ hẹ gbẹtọ voovo po akọta lẹ po hia, sọn sinsẹ̀n-basitọ nugbonọ lẹ ji jẹ kẹntọ sinsinyẹn lẹ ji. Gbọn hinhẹn nuyiwahẹ gbẹtọvi lẹ etọn yin kinkàndai to aliho ehe mẹ dali, Jehovah ko do wunmẹ gbẹtọ-yinyin etọn tọn hia to gigọ́mẹ. E de owanyi, ayajẹ, awubla, flumẹjijẹ, homẹgble, lẹblanu, po mẹtọnhopọn etọn po hia—mọwẹ, yèdọ linlẹn po numọtolanmẹ voovo etọn lẹ po, gọna whẹwhinwhẹ́n lẹ na ehelẹ—popolẹpo to aliho de mẹ he gbẹtọvi lẹ sọgan mọnukunnujẹemẹ po awubibọ po.—Psalm 78:3-7.
To whenuena hiẹ ko hia apadewhe Ohó Jiwheyẹwhe tọn godo, nawẹ hiẹ sọgan mọaleyi sọn nuhihia towe mẹ gbọn? Podọ, na taun tọn, nawẹ hiẹ sọgan dọnsẹpọ Jiwheyẹwhe pẹkipẹki gbọn? Tintan whẹ́, lẹnnupọndo nuhe hiẹ ko hia bo plọn dogbọn Jiwheyẹwhe dali taidi gbẹtọ de ji, bo dike nuagokun lọ lẹ ni biọ ahun towe mẹ. Enẹgodo to odẹ̀ mẹ, dọ linlẹn po numọtolanmẹ sisosiso towe lẹ po gando nuhe hiẹ ko gbadopọnna lọ podọ lehe hiẹ na tẹnpọn nado mọaleyi sọn e mẹ do na Jehovah. Nuhe hodọdopọ yin niyẹn. Na nugbo tọn, eyin hiẹ tindo onú devo lẹ to ayiha towe mẹ ga, ehelẹ sọgan yin yíyí dogọ to odẹ̀ towe mẹ na jide tọn.
Wà Onú lẹ Dopọ hẹ Jiwheyẹwhe
Biblu dọ gando sunnu nugbonọ hohowhenu tọn delẹ go dọ yé zinzọnlin hẹ, kavi to nukọn, Jiwheyẹwhe nugbo lọ tọn. (Gẹnẹsisi 6:9; 1 Ahọlu lẹ 8:25) Etẹwẹ enẹ zẹẹmẹdo? Na taun tọn dọ yé nọgbẹ̀ to azán dopodopo gbè taidi dọ Jiwheyẹwhe tin to finẹ hẹ yé tlọlọ wẹ nkọtọn. Nugbo wẹ dọ, yé yin ylandonọ. Ṣogan, yé yiwanna osẹ́n po nunọwhinnusẹ́n Jiwheyẹwhe tọn lẹ po, podọ yé sọ nọgbẹ̀ to kọndopọmẹ hẹ lẹndai Jiwheyẹwhe tọn. Jehovah dọnsẹpọ omẹ mọnkọtọn lẹ, podọ e nọ hò yetọn pọ́n, dile e yin didohia to Psalm 32:8 mẹ do dọmọ: “Yẹn na plọn we, yẹn nasọ yí afọ towe do ali he ji hiẹ na gbọ̀n; yẹn na yí nukun ṣie do dewe hẹ we.”
Hiẹ lọsu sọgan tindo Jehovah taidi họntọn pẹkipẹki de—yèdọ mẹde he nọ zinzọnlin hẹ we, penukundo go we, bo nọ na ayinamẹ otọ́ tọn we. Yẹwhegán Isaia basi zẹẹmẹ Jehovah tọn taidi ‘Omẹ lọ he to pinplọn we na alemọyi dewetiti tọn, Omẹ lọ he hẹn we nado to zọnlinzin to aliho he ji hiẹ dona to zọnlinzin gbọ̀n.’ (Isaia 48:17) Dile mí to numimọ alemọyi ehelẹ tọn tindo, mí nọ doayi tintin “to adusi [mítọn] mẹ” Jehovah tọn go, to yẹhiadonu liho, kẹdẹdile Davidi mọ do.—Psalm 16:8.
Yinkọ Jiwheyẹwhe Tọn—Tá Hinhọ́nna Jẹhẹnu Etọn Lẹ
Sinsẹ̀n susu po sọha he to jijideji lẹdogbedevomẹ Biblu tọn lẹ po gboawupo nado yí yinkọ Jiwheyẹwhe tọn zan bo hẹn ẹn zun yinyọnẹn. (Psalm 83:18) Etomọṣo, to nukinkan Heblu dowhenu tọn mẹ, yinkọ enẹ—Jehovah—sọawuhia nudi whla 7 000! (Po gbemasọ po, dile yé to oyín sọn olọn mẹ wá lọ desẹ, suhugan lẹdogbedevomẹtọ Biblu tọn lẹ jo susu yinkọ yẹwhe lalo tọn heyin nùdego to wekinkan dowhenu tọn mẹ lẹ do, taidi Baali, Bẹl, Madọku, podọ etlẹ yin Satani!)
Mẹdelẹ lẹndọ yinkọ Jiwheyẹwhe tọn didesẹ yin whẹho pẹvi de poun. Ṣigba lẹnnupọndeji: Be nuhe sinyẹnawu kavi bọawu wẹ e yin nado wleawuna haṣinṣan pẹkipẹki, nukunnumọjẹnumẹ tọn de hẹ mẹhe ma tindo yinkọ de ya? Tẹnmẹ-yinkọ lẹ taidi Jiwheyẹwhe po Oklunọ po (he nọ yin yiyizan na yẹwhe lalo tọn lẹ lọsu ga) sọgan dọ̀n ayidonugo wá huhlọn, aṣẹpipa, kavi tẹnmẹ Jehovah tọn ji, ṣigba yinkọ mẹdetiti tọn etọn kẹdẹ wẹ nọ do e hia tlọlọ. (Eksọdusi 3:15; 1 Kọlintinu lẹ 8:5, 6) Yinkọ mẹdetiti Jiwheyẹwhe nugbo lọ tọn nọ dọ̀n ayidonugo wá jẹhẹnu po aliho nuwiwa tọn etọn lẹ po ji. Sinsẹ̀n-nuplọnmẹtọ Walter Lowrie dọ po gbesisọ po dọmọ: “Mẹhe ma yọ́n Jiwheyẹwhe gbọn yinkọ etọn dali de ma yọnẹn taidi gbẹtọ de na taun tọn gba.”
Lẹnnupọndo apajlẹ Maria, heyin Katoliki mẹdezejotọ he nọ nọ Australie tọn ji. To whenuena Kunnudetọ Jehovah tọn lẹ dukosọhẹ ẹ to tintan whenu, Maria na dotẹnmẹ Kunnudetọ lọ lẹ nado do yinkọ Jiwheyẹwhe tọn hia ẹ to Biblu mẹ. Etẹwẹ yin gbeyiyi etọn? “To whenuena yẹn mọ yinkọ Jiwheyẹwhe tọn to Biblu mẹ to tintan whenu, yẹn viavi. Yẹn yin whinwhàn tlala gbọn oyọnẹn lọ dali dọ yẹn sọgan yọnẹn bosọ yí yinkọ mẹdetiti Jiwheyẹwhe tọn zan na taun tọn.” Maria zindonukọn nado to Biblu plọn, podọ na ojlẹ tintan to gbẹzan etọn mẹ, e wá yọ́n Jehovah taidi omẹ de bosọ penugo nado wleawuna haṣinṣan dẹn-to-aimẹ de hẹ ẹ.
Mọwẹ, mí sọgan “dọnsẹpọ Jiwheyẹwhe,” dile etlẹ yindọ mí ma sọgan mọ ẹn po nukun paa mítọn lẹ po. Mí sọgan “mọ” gbẹtọ-yinyin whanpẹnọ he sọgbe mlẹnmlẹn etọn to ayiha po ahun mítọn lẹ po mẹ bo gbọnmọ dali whẹ́n to owanyi mẹ hlan ewọ. Owanyi mọnkọtọn wẹ “yin pọninọ gbesisọ tọn.”—Kọlọsinu lẹ 3:14.
[Yẹdide to weda 7]
Nulinlẹnpọndo nudida Jehovah tọn lẹ ji yin aliho dopo nado dọnsẹpọ ewọ