Adọkun Alọtútlú Tọn lẹ Nọ Hẹn Ayajẹ Wá

TAIDI Klistiani nugopọntọ owanyinọ de, apọsteli Paulu tindo ojlo dagbe hugan yisenọ hatọ etọn lẹ tọn to ahun mẹ. (2 Kọlintinu lẹ 11:28) Enẹwutu, to whenuena e basi tito na akuẹ jijọ de na Klistiani Judé tọn he tin to nuhudo mẹ lẹ to ṣẹnṣẹn owhe 50 owhe kanweko tintan Whe-Mítọn-nu tọn mẹ, e yí dotẹnmẹ hundote lọ zan nado plọnmẹ nuplọnmẹ họakuẹ de gando alọtútlú go. Paulu zinnudeji dọ Jehovah nọ yí nukun nujọnu tọn do pọ́n nunamẹ homẹhunhun tọn dọmọ: “Omẹ dopodopo dile e lẹn to ayiha etọn mẹ do, mọwẹ mì ni gbọ e ni na do; e yin po hùnhlún po blo, kavi huhlọndohẹnbasi tọn blo: na Jiwheyẹwhe yiwanna nunamẹtọ homẹhunhunnọ.”—2 Kọlintinu lẹ 9:7.

To Ohẹ́n Klókló mẹ, Ṣogan Yin Alọtlútọ

Suhugan Klistiani owhe kanweko tintan whenu tọn lẹ ma diyin to ogbẹ́-liho sọmọ gba. Paulu doayi e go dọ “hlọnhlọnnọ susu” matin to ṣẹnṣẹn yetọn gba. Yé yin “onú madogán aihọn tọn lẹ,” “onú hlò aihọn tọn lẹ.” (1 Kọlintinu lẹ 1:26-28) Di apajlẹ, Klistiani he nọ nọ̀ Makedonia lẹ tin to ‘ohẹ́n klókló mẹ’ podọ ‘to nukunbibia glọ.’ Etomọṣo, yisenọ whiwhẹnọ Makedonia tọn enẹlẹ vẹvẹ na lẹblanulọkẹyi nunina to akuẹzinzan-liho tọn na “devizọnwiwa hlan mẹwiwe lẹ tọn”; podọ Paulu dekunnu dọ, nuhe yé na lẹ ‘zẹ̀ huhlọn taun yetọn lẹ go’!—2 Kọlintinu lẹ 8:1-4.

Etomọṣo, nunina alọtútlú tọn mọnkọtọn ma nọ yin jijlẹ gbọn sọha nuhe yin nina tọn dali gba. Kakatimọ, mẹwhinwhàn, ojlo tintindo nado má hẹmẹ, podọ ninọmẹ ahun mẹ tọn yin nujọnu. Paulu dohia Klistiani Kọlinti tọn lẹ dọ nado basi nunina nọ bẹ ayiha po ahun po hẹn. E dọmọ: “Yẹn yọ́n awuwiwle ayiha mìtọn tọn, na ehe wutu yẹn yí mì do doawagun hlan Makedoniatọ lẹ; . . . [podọ] vivẹnu mìtọn ko sọ [dozolanmẹna] omẹ susu tlala.” Klistiani Kọlinti tọn lẹ ko ‘magbè to ahun yetọn mẹ’ nado na po alọtútlú po.—2 Kọlintinu lẹ 9:2, 7.

‘Gbigbọ Yetọn Whàn Yé’

Apọsteli Paulu sọgan ko tindo apajlẹ nunina alọtútlú dowhenu tọn de to ayiha mẹ, yèdọ dehe wá aimẹ to zungbo mẹ he ko hugan owhe kanweko 15 jẹnukọnna ojlẹ etọn. Whẹndo 12 Islaeli tọn lẹ ko yin tuntundote sọn kanlinmọgbenu to Egipti. Todin yé tin to dodonu Osó Sinai tọn kọ̀n, bọ Jehovah ko degbena yé nado gbá gòhọtúntún de na sinsẹ̀n-bibasi bo yí nuyizan sinsẹ̀n-bibasi tọn lẹ do wleawuna ẹn. Ehe na biọ núzinzan susu, podọ akọta lọ sọ yin oylọ basina nado basi nunina.

Nawẹ Islaelivi enẹlẹ yinuwa gbọn? “Yé sọ wá, omẹ dopodopo ayiha mẹhe tọn fọ́n ẹn daga, podọ omẹ depope mẹhe gbigbọ etọn hẹn yin ojlonọ, bo hẹn [nunina, NW ] OKLUNỌ tọn lọ wá, na azọ́n gòhọ opli tọn lọ tọn.” (Eksọdusi 35:21) Be akọta lọ basi nunina alọtútlú tọn de ya? E sù tlala! Linlin he bọdego ehe yin nina hlan Mose dọmọ: “Gbẹtọ lẹ lọ hẹnwa sù gbau na sinsẹ̀n azọ́n lọ tọn, he OKLUNỌ lọ degbena nado basi.”—Eksọdusi 36:5.

Etẹwẹ yin ninọmẹ whẹho akuẹzinzan Islaelivi lẹ tọn to whenẹnu dọ́n? To madẹnmẹ wayi, yé ko yin afanumẹ lèlènọ lẹ, ‘heyin kọgbidina to agbàn-pinpẹn hinhẹn mẹ,’ he to ‘gbẹzan he vẹawu’ zan, yèdọ gbẹzan “nukunbibia” tọn. (Eksọdusi 1:11, 14; 3:7; 5:10-18) Nuhe ma yọnbasi taun wẹ e yin to whenẹnu dọ, yé ni tindo kọdetọn dagbe to agbasanu-liho. Nugbo wẹ dọ, Islaelivi lẹ tọ́nsọn aigba kanlinmọgbenu tọn yetọn ji po lẹngbọpa gọna kanlinpa lẹ po. (Eksọdusi 12:32) Ṣigba enẹlẹ ma na ko jideji susugege gba, to whenuena e yindọ to tlolo he yé tọ́nsọn Egipti, yé wule dọ yé ma tindo olàn kavi akla nado dù.—Eksọdusi 16:3.

To whelọnu lo, fie wẹ Islaelivi lẹ mọ nuhọakuẹ he yé na hlan gbigbá gòhọtúntún lọ tọn lẹ te? Sọn ogán dai tọn yetọn lẹ dè, yèdọ Egiptinu lẹ. Biblu  dọmọ: “Ovi Islaeli tọn lẹ . . . sọ biọ sọn Egiptinu lẹ si núzinzan fataka tọn lẹ, po núzinzan sika tọn lẹ po, po avọ̀ po. . . . [Egiptinu lẹ] gbọ yé ni tindo nuhe yé biọ lẹ.” Nuyiwa alọtútlú tọn ehelẹ to adà Egiptinu lẹ tọn mẹ yin dona de sọn Jehovah dè, e mayin sọn Falo dè gba. Kandai gbọdo sọn olọn mẹ wá lọ dọmọ: “OKLUNỌ sọ na nukundagbe gbẹtọ ewlẹ to nukun Egiptinu lẹ tọn mẹ, sọmọ bọ yé gbọ yé ni tindo nuhe yé biọ lẹ.”—Eksọdusi 12:35, 36.

To whenẹnu, lẹnnupọndo nuhe na yin numọtolanmẹ Islaelivi lẹ tọn ji. Whẹndo lẹ ko jiya gbọn kanlinmọgbenu vẹadi po hẹ́njijẹ po gblamẹ. Todin yé yin tuntundote bosọ tindo nutindo họakuẹ agbasanu tọn lẹ. Etẹwẹ na yin numọtolanmẹ yetọn gando delẹ to nutindo enẹlẹ nina go? Yé sọgan ko lẹndọ yé ko mọ yé yí bosọ tindo jlọjẹ nado whlá yé. Ṣigba, to whenuena yè basi oylọ na yé nado na nunina to akuẹzinzan-liho nado nọgodona sinsẹ̀n-bibasi wiwe ṣeke, yé wàmọ—podọ e mayin po awuwhiwhle kavi tẹnkuku po gba! Yé ma wọnji dọ Jehovah wẹ ko hẹn ẹn yọnbasi na yé nado tindo nutindo agbasa tọn enẹlẹ gba. Enẹwutu, yé na fataka po sika po gọna kanlin-yìnyìn yetọn lẹ susugege. Yé yin “ojlonọ ayiha tọn.” ‘Ahun yetọn lẹ whàn yé.’ ‘Gbigbọ yetọn fọ́n yé dote.’ Na nugbo tọn ‘avọnunina sọn ojlo mẹ wá hlan Jehovah’ wẹ e yin.—Eksọdusi 25:1-9; 35:4-9, 20-29; 36:3-7.

Tintin to Aṣeji Nado Ná

Kiklo nunina de tọn ma nọ yin dohia nugbonugbo alọtútlú nunatọ lọ tọn na dandan tọn gba. To ojlẹ de mẹ wayi Jesu Klisti to pinpọn lehe gbẹtọ lẹ to akuẹ dlan do adọkun potin tẹmpli mẹ tọn mẹ dó. Adọkunnọ lẹ to abọgan-kuẹ susu dlan do e mẹ, ṣigba Jesu yin nuyiwadeji to whenuena e mọ asuṣiọsi wamọnọ de he dlan abọgan-kuẹ pẹvi awe he ma họakuẹ sọmọ do e mẹ. E dọmọ: “Asuṣiọsi wamọnọ he dlan do e mẹ hú yé omẹ pó. . . . Sọn matindo etọn mẹ [e] dlan do e mẹ dùdù he e tindo lẹpo.”—Luku 21:1-4; Malku 12:41-44.

Hodidọ Paulu tọn hlan Kọlintinu lẹ tin to kọndopọmẹ hẹ linlẹn Jesu tọn ehe. Gando nunina lẹ bibasi nado gọalọna yisenọ hatọ he tin to nuhudo mẹ lẹ go, Paulu doayi e go dọmọ: “Eyin ojlo homẹ tọn tin jẹnukọn, yè kẹalọyi i kẹdẹdi ehe omẹ lọ tindo, e mayin kẹdẹdi ehe e ma tindo gba.” (2 Kọlintinu lẹ 8:12) Mọwẹ, nunina lẹ mayin whẹho agbàwhinwhlẹn kavi nuyijlẹdonugo tọn de gba. Mẹde nọ na sọgbe hẹ nugopipe etọn, podọ homẹ Jehovah tọn nọ hùn to gbigbọ alọtútlú tọn mẹ.

Dile etlẹ yindọ mẹdepope na taun tọn ma sọgan hẹn Jehovah, mẹhe tindo onú lẹpo yin adọkunnọ do, nunina yin lẹblanulọkẹyi de he nọ hẹn sinsẹ̀n-basitọ lẹ tindo dotẹnmẹ hundote lọ nado do owanyi yetọn hia hlan ẹn. (1 Otannugbo lẹ 29:14-17) Onú heyin nina lẹ, bọ e mayin na nsọle-yinyin kavi na mẹwhinwhàn ṣejannabi tọn devo lẹ wutu, ṣigba po walọyizan he sọgbe lọ po podọ nado hẹn sinsẹ̀n-bibasi nugbo yinukọn, nọ hẹn ayajẹ wá to pọmẹ hẹ dona Jiwheyẹwhe tọn. (Matiu 6:1-4) Jesu dọmọ: “Nado namẹ do dona hú nado mọyi.” (Owalọ lẹ 20:35) Mí sọgan  duvivi mahẹ tintindo to ayajẹ enẹ mẹ tọn gbọn huhlọn mítọn nina to sinsẹ̀nzọn Jehovah tọn mẹ dali podọ gbọn nude dide do apadopo sọn nutindo agbasa tọn mítọn lẹ mẹ nado nọgodona sinsẹ̀n-bibasi nugbo po alọgigọna mẹhe jẹna ẹn lẹ po dali.—1 Kọlintinu lẹ 16:1, 2.

Tintin to Aṣeji Nado Ná to Egbehe

To egbehe, Kunnudetọ Jehovah tọn lẹ nọ yin ojlofọndotena nado mọ nukọnyiyi lẹdo aihọn pé to azọ́n yẹwhehodidọ ‘wẹndagbe ahọluduta tọn he mẹ.’ (Matiu 24:14) To owhe ao godo tọn owhe kanweko 20tọ tọn mẹ, hugan gbẹtọ 3 000 000 wẹ yin bibaptizi nado basi yẹhiadonu klandowiwe yetọn tọn hlan Jehovah Jiwheyẹwhe, podọ hugan agun yọyọ 30 000 wẹ yin didoai. Mọwẹ, madatọ̀n agun Kunnudetọ Jehovah tọn lẹ tọn he tin-to-aimẹ to egbehe wẹ yin didoai to owhe ao he wayi lẹ whenu! Suhugan jideji ehelẹ tọn yin kọdetọn azọ́n sinsinyẹn sunnu po yọnnu Klistiani ahundoponọ lẹ po tọn he nọ na ojlẹ po huhlọn yetọn po nado sọgan dla kọmẹnu yetọn lẹ pọ́n bo dọho na yé gando lẹndai Jehovah tọn lẹ go. Delẹ to jideji lọ mẹ yin na kọdetọn azọ́n mẹdehlan lẹ tọn wutu, yèdọ mẹhe jo owhé yetọn lẹ do bosọ basi gbejizọnlin yì aigba dindẹn lẹ ji nado gọalọna mẹhe tin to finẹ lẹ to azọ́n yẹwhehodidọ-Ahọluduta tọn lọ mẹ. Jideji lọ ko dekọtọn do awuwiwlena lẹdo yọyọ lẹ mẹ, he ko hẹn ẹn lẹzun dandannu nado de nugopọntọ lẹdo tọn yọyọ lẹ. To yidogọ mẹ, nuhudo ko tin na Biblu susu dogọ na yizan to yẹwhehodidọ po oplọn mẹdetiti tọn po mẹ. Nuhudo ko tin na owe zinjẹgbonu dogọ lẹ. Podọ to otò susu mẹ, họgbigbá alahọ tọn lẹ dona yin hinhẹn gblodeji kavi dona yin tẹnmẹdiọna po owhé daho lẹ po. Nuhudo dogọ ehe lẹpo ko yin awuwlena gbọn nunina sọn ojlo mẹ wá dali sọn omẹ Jehovah tọn lẹ dè.

Nuhudo de na Plitẹnhọ Ahọluduta Tọn Lẹ

Nuhudo titengbe de he ko sọawuhia to kọndopọmẹ hẹ jideji to sọha Kunnudetọ Jehovah tọn lẹ tọn mẹ wẹ Plitẹnhọ Ahọluduta tọn lẹ. Dodinnanu lẹ heyin bibasi to bẹjẹeji owhe 2000 tọn mẹ dohia dọ nuhudo tin na Plitẹnhọ Ahọluduta tọn hugan 11 000 to akọta he to nukunhùn lẹ mẹ, fie akuẹ matin te sọmọ lẹ. Lẹnnupọndo Angola ji. Mahopọnna owhe susu tòwhan tọn, otò enẹ to numimọ jideji madozẹnzẹn whemẹ-whemẹ tọn nudi 10 to kanweko ji tindo to sọha wẹnlatọ Ahọluduta tọn lẹ tọn mẹ. Etomọṣo, suhugan agun 675 he tin to otò Aflika tọn daho ehe mẹ ma tindo ohọ̀ he mẹ yè na nọ pli te gba. Plitẹnhọ Ahọluduta tọn 22 poun wẹ tin to otò lọ mẹ, podọ to ehelẹ mẹ 12 poun wẹ tindo wunmẹ họta delẹ tọn.

Ninọmẹ mọnkọtọn de tin-to-aimẹ to République Démocratique du Congo. Dile etlẹ yindọ diblayi agun 300 wẹ tin to tatọ́-tònọ Kinshasa tọn mẹ, Plitẹnhọ Ahọluduta tọn ao poun wẹ tin to finẹ. Lẹdo otò lọ pé, otò ehe tindo nuhudo Plitẹnhọ Ahọluduta tọn he hugan 1 500 tọn to niyaniya mẹ. Na jideji niyaniya tọn he tin to otò Whèzẹtẹn-waji Europe tọn lẹ mẹ wutu, Russie po Ukraine po na linlin nuhudo Plitẹnhọ Ahọluduta tọn kanweko susu to pọmẹ. Jideji niyaniya tọn to Amérique Latine yin didohia to Brésil, fie nuhe hugan Kunnudetọ livi daa lẹ tin te podọ nuhudo daho de na Plitẹnhọ Ahọluduta tọn lẹ.

Nado jẹ nuhudo lẹ kọ̀n to otò mọnkọtọn lẹ mẹ, Kunnudetọ Jehovah tọn lẹ to tito-to-whinnu Plitẹnhọ Ahọluduta tọn gbigbá niyaniya tọn de yizan. Tito-to-whinnu lọ nọ yin godonọna to akuẹ-liho gbọn nunina alọtútlú tọn mẹmẹsunnu-yinyin lẹdo aihọn pé tọn lẹ dali, na agun he tlẹ yin wamọnọ hugan lẹ nido penugo nado tindo nọtẹn sinsẹ̀n-bibasi tọn dagbe de.

Dile e yin do to ojlẹ Islaeli hohowhenu tọn mẹ, nususu sọgan yin wiwadotana na Klistiani ahundoponọ lẹ ‘nọ yí nutindo họakuẹ yetọn lẹ do gbògbéna Jehovah’ wutu. (Howhinwhẹn lẹ 3:9, 10) Hagbẹ Anademẹtọ Kunnudetọ Jehovah tọn lẹ tọn na jlo na yí dotẹnmẹ hundote ehe zan nado do pinpẹn-nutọn-yinyọnẹn sisosiso yetọn hia mẹhe ahun etọn ko whàn ẹn nado tindo mahẹ to nunina sọn ojlo mẹ wá ehe mẹ lẹpo. Podọ mí sọgan deji dọ gbigbọ Jehovah tọn na to ahun omẹ etọn lẹ tọn whàn zọnmii nado nọgodona nuhudo azọ́n Ahọluduta lọ tọn he to gbigblodeji tẹgbẹ̀ tọn.

Dile jideji lẹdo aihọn pé lọ to nukọnzindo, na mí ni to dotẹnmẹ hundote lẹ dín zọnmii nado do homẹhunnọ-yinyin po ojlonọ-yinyin mítọn to huhlọn mítọn, ojlẹ mítọn, po nutindo mítọn lẹ po nina mẹ hia. Podọ na mí ni tindo numimọ ayajẹ nugbo tọn he gbigbọ nunamẹ tọn mọnkọtọn lẹ nọ hẹn wá.

[Apotin to weda  29]

“MÌ YÍ I ZAN PO NUYỌNẸN PO!”

“Yẹn yin owhe ao mẹvi. Yẹn to akuẹ ehe dohlan mì na mì nido sọgan họ̀ wema kavi onú devo depope nado basi owe lẹ.”—Cindy.

“Yẹn jlo nado do akuẹ ehe hlan mì nado basi owe lẹ na mí dogọ. Yẹn bẹ akuẹ ehe pli sọn alọgigọna otọ́ ṣie mẹ. Enẹwutu mì yí ì zan po nuyọnẹn po!”—Pam, owhe ṣinawe.

“Yẹn blawu na jẹhọn-ahìzì lọ wutu. Yẹn lẹndọ mì tin to jijọho mẹ. [Dọla 2, Amelika tọn] ehe wẹ yin akuẹ he yẹn tindo to nuhe mẹ yẹn nọ sẹ akuẹ do lẹpo.”—Allison, owhe ẹnẹ.

“Yinkọ ṣie wẹ Rudy, podọ yẹn yin owhe 11-mẹvi. Nọvisunnu ṣie Ralph yin owhe ṣidopo-mẹvi. Podọ nọviyọnnu ṣie Judith yin owhe awe daa. Mí ko to akuẹ bẹpli sọn apomẹ-kuẹ mítọn mẹ na osun atọ̀n nado gọalọna mẹmẹsunnu mítọn lẹ to [lẹdo heyin gbigbà gbọn awhàn dali lẹ mẹ]. Mí penugo nado bẹ dọla 20 pli he mí to didohlan todin.”

“Yẹn tindo numọtolanmẹ awubla tọn na mẹmẹsunnu lẹ [heyin gbigbà gbọn jẹhọn-ahìzì dali]. Yẹn bẹ dọla 17 pli sọn azọ́nwiwa hẹ otọ́ ṣie mẹ. Yẹn ma to akuẹ ehe dohlan na nude na taun tọn gba, enẹwutu yẹn na dike mì ni basi nudide.”—Maclean, owhe ṣinatọ̀n.