Hiẹ Sọgan Gbọṣi Wiwejininọ mẹ to Walọyizan-Liho
Hiẹ Sọgan Gbọṣi Wiwejininọ mẹ to Walọyizan-Liho
“Ehe wẹ owanyi Jiwheyẹwhe tọn, dọ mí ni yìn osẹ́n etọn.”—1 JOHANU 5:3.
1. Vogbingbọn to walọyizan mẹ tẹwẹ yin mimọ to gbẹtọ lẹ mẹ to egbehe?
TO OJLẸ dindẹn die wayi, yẹwhegán Malaki yin gbigbọdo nado dọ dọdai ojlẹ de tọn to whenuena walọyizan omẹ Jiwheyẹwhe tọn lẹ tọn na gbọnvo mlẹnmlẹn na mẹhe ma nọ sẹ̀n Jiwheyẹwhe lẹ tọn. Yẹwhegán lọ wlan dọmọ: “Whenẹnu wẹ mìwlẹ na lẹgọ bosọ yọ́n vogbingbọn to dodonọ po mẹylankan po ṣẹnṣẹn, to ewọ he to Jiwheyẹwhe sẹ̀n po ewọ he ma to sinsẹ̀n ẹn po ṣẹnṣẹn.” (Malaki 3:18) Dọdai enẹ to yinyin hinhẹndi to egbehe. Tonusise na gbedide Jiwheyẹwhe tọn lẹ, gọna enẹlẹ he bẹ wiwejininọ walọyizan tọn hẹn, yin aliho nuyọnẹn tọn po dehe sọgbe gbẹzan tọn po. Ṣogan, e ma nọ saba yin aliho nuyiwa tọn he bọawu de gba. Na whẹwhinwhẹ́n dagbe wutu, Jesu dọ dọ Klistiani lẹ dona vánkan sinsinyẹn nado mọ whlẹngán yí.—Luku 13:23, 24.
2. Kọgbidinamẹ gbonu tọn tẹlẹ wẹ nọ hẹn ẹn sinyẹnawu na mẹdelẹ nado gbọṣi wiwejininọ mẹ to walọyizan-liho?
2 Naegbọn e nọ yin nuhe sinyẹnawu nado gbọṣi wiwejininọ mẹ to walọyizan-liho? Whẹwhinwhẹ́n dopo wẹ yindọ kọgbidinamẹnu gbonu tọn lẹ tin. Azọ́nwhé ayidedai tọn nọ do yẹdide zanhẹmẹ he ma sọgbe hẹ osẹ́n tọn lẹ hia taidi nuhe nọ dọnmẹdogo, awuvivinu, po nuyiwa mẹho-yinyin tọn po, to whenuena e yindọ yé nọ dibla gbẹ́ kọdetọn agọ̀ etọn lẹ dai mlẹnmlẹn. (Efesunu lẹ 4:17-19) Suhugan haṣinṣan pẹkipẹki he nọ yin didohia lẹ nọ yin to sunnu po yọnnu po he ma wlealọ hẹ ode awetọ lẹ ṣẹnṣẹn. Sinemoto po televiziọn lẹ po nọ saba do kọndopọ zanhẹmẹ tọn lẹ hia to ninọmẹ paa, he ma nọ biọ gbemima depope mẹ. Na taun tọn, zohunhun po sisi na ode awetọ po ma nọ tin gba. Mẹsusu ko yin hunhundo nùvo hlan wẹndomẹ mọnkọtọn lẹ sọn ovuwhenu. Humọ, kọgbidinamẹ sinsinyẹn hagbẹ tọn nado sọgbe hẹ lẹdo walọyizan gbeyina onú popo egbezangbe tọn tin to finẹ, bọ mẹhe ma wàmọ lẹ nọ yin vivlẹko kavi tlẹ nọ yin zunzun to whedelẹnu.—1 Pita 4:4.
3. Etẹwẹ yin whẹwhinwhẹ́n delẹ he wutu susu mẹhe tin to aihọn mẹ lẹ tọn nọ tindo mahẹ to fẹnnuwiwa mẹ?
3 Kọgbidinamẹnu homẹ tọn sọ nọ hẹn ẹn sinyẹnawu ga nado gbọṣi wiwejininọ mẹ to walọyizan-liho. Jehovah dá gbẹtọvi lẹ po ojlo zanhẹmẹ tọn lẹ po, podọ ojlo mọnkọtọn lẹ sọgan sinyẹn taun. Ojlo nọ tindo nususu nado wà po nuhe mí nọ lẹn po, podọ fẹnnuwiwa nọ yin kinkọndopọ hẹ nulẹnpọn he ma nọ zọnpọ hẹ linlẹn Jehovah tọn lẹ. (Jakobu 1:14, 15) Di apajlẹ, sọgbe hẹ hokansemẹ agọe tọn de heyin zinzinjẹgbonu to British Medical Journal mẹ, susu mẹhe nọ tindo mahẹ to kọndopọ zanhẹmẹ tọn mẹ to tintan whenu lẹ wẹ nọ tin to jejeji nado mọdona nuhe zanhẹmẹ nọ taidi poun. Mẹdevo lẹ nọ yise dọ suhugan mẹhe tindo owhe dopolọ hẹ yé lẹ tọn wẹ yin zohunhunnọ to zanhẹmẹ-liho, enẹwutu yé lọsu jlo nado hẹn alọjininọ yetọn bu ga. Ṣogan mẹdevo lẹ dọ dọ yé yin dududeji gbọn numọtolanmẹ yetọn lẹ dali kavi “nùahànmú vude to ojlẹ lọ mẹ.” Eyin mí jlo nado to homẹ Jiwheyẹwhe tọn hẹn hùn, mí dona nọ lẹnnupọn to aliho he gbọnvo mẹ. Nulẹnpọn wunmẹ tẹwẹ na gọalọna mí nado hẹn wiwejininọ walọyizan tọn go?
Wleawuna Nujikudo He Lodo Lẹ
4. Nado gbọṣi wiwejininọ mẹ to walọyizan-liho, etẹwẹ mí dona wà?
4 Nado gbọṣi wiwejininọ mẹ to walọyizan-liho, mí dona yọnẹn dọ hihodo aliho gbẹ̀zan tọn mọnkọtọn de yin nuhe sọgbe. Ehe tin to kọndopọmẹ hẹ nuhe apọsteli Paulu wlan hlan Klistiani he tin to Lomu lẹ dọmọ: “Mì . . . mọdona nuhe ojlo Jiwheyẹwhe tọn he yọ́n, alọkẹyi, bosọ sọgbe nẹ yin.” (Lomunu lẹ 12:2) Yinyọnẹn dọ wiwejininọ walọyizan tọn yin nuhe sọgbe bẹ nususu hẹn hugan yinyọnẹn poun dọ Ohó Jiwheyẹwhe tọn gblewhẹdo fẹnnuwiwa. E bẹ nukunnumimọjẹ whẹwhinwhẹ́n lẹ he wutu fẹnnuwiwa yin whẹgbledo mẹ podọ lehe mí sọgan mọaleyi gbọn didapana ẹn do dali hẹn. Delẹ to whẹwhinwhẹ́n ehelẹ mẹ yin dogbapọnna to hosọ he jẹnukọn mẹ.
5. Na taun tọn, naegbọn Klistiani lẹ dona jlo nado gbọṣi wiwejininọ mẹ to walọyizan-liho?
5 Na taun tọn, whẹwhinwhẹ́n huhlọnnọ hugan he wutu Klistiani lẹ nọ dapana fẹnnuwiwa zanhẹmẹ tọn lẹ yin dide sọn haṣinṣan mítọn hẹ Jiwheyẹwhe mẹ. Mí ko plọn dọ ewọ yọ́n nuhe yin dagbe hugan na míwlẹ. Owanyi mítọn hlan ẹn nọ gọalọna mí nado gbẹwanna nuhe ylan. (Psalm 97:10) Jiwheyẹwhe wẹ yin Nunamẹtọ “nunina dagbedagbe po nunina he sọgbe lẹpo po” tọn. (Jakobu 1:17) E yiwanna mí. Gbọn tonusise na ẹn mítọn dali, mí nọ dohia dọ mí yiwanna ẹn bosọ yọ́n pinpẹn nuhe e ko wà na mí lẹpo tọn. (1 Johanu 5:3) Mí ma na jlo nado hẹn Jehovah jẹflumẹ bo hẹn awufiẹsa wá na ẹn gbọn gbedide dodowiwa tọn etọn lẹ gbigbà dali pọ́n gbede gba. (Psalm 78:41) Mí ma na jlo nado yinuwa to aliho de mẹ he na hẹn aliho wiwe po dodowiwa sinsẹ̀n-bibasi tọn etọn po nado yin hodọdego to aliho he ma sọgbe mẹ gba. (Titu 2:5; 2 Pita 2:2) Gbọn gbigbọṣi wiwejininọ mẹ to walọyizan-liho dali, mí nọ hẹn Nupojipetọ lọ jaya.—Howhinwhẹn lẹ 27:11.
6. Nawẹ nujinọtedo walọ dagbe tọn mítọn lẹ hinhẹn zun yinyọnẹn na mẹdevo lẹ nọ gọalọ gbọn?
6 To afọdopolọji he mí ko magbe nado gbọṣi wiwejininọ mẹ to walọyizan-liho, hihọ́ yinukọn dogọ devo wẹ nado hẹn nujikudo enẹ zun yinyọnẹn hlan mẹdevo lẹ. Gbọ gbẹtọ lẹ ni yọnẹn dọ hiẹ yin devizọnwatọ Jehovah Jiwheyẹwhe tọn de podọ dọ hiẹ ko magbe nado hẹn nujinọtedo yiaga etọn lẹ go. Ogbẹ̀ towe, agbasa towe, po nudide towe po wẹ e yin. Etẹwẹ yin whẹho he tin to ote lọ? Haṣinṣan họakuẹ towe hẹ Otọ́ olọn mẹ tọn towe wẹ. Enẹwutu hẹn ẹn họnwun dọ tenọgligo-hinhẹn walọ dagbe tọn towe ma dona yin homọdọdego gba. Doawagun to afọ Jiwheyẹwhe tọn zizedai mẹ gbọn titẹdo nunọwhinnusẹ́n etọn lẹ go dali. (Psalm 64:10) Ma dike winyan ni hù we pọ́n gbede nado dọhodo nujikudo walọ dagbe tọn towe lẹ ji hẹ mẹdevo lẹ blo. Hodidọ jẹgbonu sọgan hẹn we lodo, basi hihọ́na we, bosọ na tuli mẹdevo lẹ nado hodo apajlẹ towe.—1 Timoti 4:12.
7. Nawẹ mí sọgan hẹn gbemima mítọn nado gbọṣi wiwejininọ mẹ to walọyizan-liho go gbọn?
7 Bọdego, to whenuena mí ko magbe nado hẹn nujinọtedo walọ dagbe tọn he yiaga de go bo ko sọ hẹn teninọ mítọn zun yinyọnẹn godo, mí dona ze afọdide lẹ nado tẹdo gbemima mítọn go. Aliho dopo nado wà ehe wẹ nado yin sọwhiwhenọ to whenuena mí to họntọn lẹ dè. “Ewọ he to zọnlinzin hẹ nuyọnẹntọ na yọnnu in,” wẹ Biblu dọ. Nọ dogbẹ́ hẹ mẹhe yọ́n nuhọakuẹ walọ dagbe tọn towe lẹ; yé na hẹn we lodo. Wefọ ehe sọ dọ ga dọmọ: “Ṣigba ogbẹ́ nulunọ lẹ tọn na sudo.” (Howhinwhẹn lẹ 13:20) Jẹ obá he yọnbasi mẹ, dapana mẹhe sọgan hẹn gbemima towe gbọjọ lẹ.—1 Kọlintinu lẹ 15:33.
8. (a) Naegbọn mí dona nọ yí nuhe nọ jlọmẹdote lẹ do gọ́ ayiha mítọn lẹ? (b) Etẹwẹ mí dona dapana?
8 Humọ, mí dona nọ yí nuhe yin nugbo, dagbe, dodo, wiwe, tindo owanyi, he yè nọ dọ dagbe etọn, he tindo jijọ dagbe, po dehe jẹna pipà lẹ po do gọ́ ayiha mítọn lẹ mẹ. (Filippinu lẹ 4:8) Mí nọ wà ehe gbọn yinyin nuṣinyantọ to nuhe mí nọ pọ́n bo nọ hia podọ to ohàn he mí nọ dotoai hlan lẹ mẹ dali. Nado dọ dọ owe mawé tọn lẹ ma nọ yinuwadomẹji to aliho he gblezọn mẹ yin nudopolọ taidi didọ dọ owe walọ dagbe tọn lẹ ma nọ yinuwadomẹji to aliho dagbe de mẹ gba. Flindọ, gbẹtọvi mapenọ lẹ sọgan jai biọ fẹnnuwiwa mẹ po awubibọ po. Enẹwutu owe lẹ, linlinnamẹwe lẹ, yẹdide-to-kanji lẹ, po húnhiho he nọ na tuli numọtolanmẹ zanhẹmẹ tọn lẹ po na planmẹ jẹ ojlo agọ̀ lẹ kọ̀n, podọ ehelẹ sọgan planmẹ jẹ ylando mẹ to agọgbọnẹnmẹ. Nado hẹn wiwejininọ walọ dagbe tọn go, mí dona yí nuyọnẹn Jiwheyẹwhe tọn do gọ́ ahun mítọn lẹ.—Jakobu 3:17.
Afọdide He Nọ Planmẹ jẹ Fẹnnuwiwa Kọ̀n Lẹ
9-11. Dile e yin didọ gbọn Sọlọmọni dali do, afọdide debọdo-dego tẹlẹ wẹ nọ plan yọpọsunnu de yì fẹnnuwiwa mẹ?
9 Gbọzangbọzan, afọdide he go yè sọgan doayi delẹ tin he nọ planmẹ jẹ fẹnnuwiwa kọ̀n. Afọdide dopodopo heyin zize nọ hẹn ẹn sinyẹnawu dogọ nado lẹkọ do godo. Doayi lehe ehe yin zẹẹmẹ basina to Howhinwhẹn lẹ 7:6-23 mẹ do go. Sọlọmọni doayi “yọpọsunnu de he zinzin pò na,” kavi he ma tindo mẹwhinwhàn dagbe go. Yọpọsunnu lọ “juwayi to tòhomẹ, họ̀gosu [yọnnu ayọdetọ de tọn] dali, e sọ yì aliho owhé etọn gbè tọn ji. To flifli mẹ to tenu.” Ehe wẹ yin nuṣiwa tintan etọn. To ganhiho fliflimẹ tọn lẹ mẹ, ‘ahun’ etọn ko deanana ẹn, e mayin hlan tòhomẹ-liho de ji poun gba, ṣigba hlan dehe ji e yọnẹn dọ yọnnu ayọdetọ de sọgan yin mimọ te na taun tọn.
10 Enẹgodo mí hia dọmọ: “Doayi e go, yọnnu de pé e, e do avọ̀ ogalọtọ tọn de, yẹwiwa ayiha tọn.” Todin e ko mọ ẹn! E sọgan lẹkọ do godo bo yì whégbè, ṣigba ehe ko sinyẹnawu hugan dai tọn, na titengbe tọn to whenuena e yindọ e yin madogánnọ to walọyizan-liho. Yọnnu lọ tẹdego bosọ donùnùgo na ẹn. To whenuena e ko kẹalọyi nùdonùgo de godo, e jẹ todoai na linlẹndiọnamẹ mẹkiklọ tọn yọnnu lọ tọn lẹ ji dọmọ: “[Avọ́sinsan] jijọho tọn tin to dè e; egbé wẹ yẹn sú opagbe ṣie.” Avọ́sinsan jijọho tọn lẹ bẹ olàn, linfin, amì, po ovẹn po hẹn. (Levitiku 19:5, 6; 22:21; Osọhia lẹ 15:8-10) Gbọn nùdido yé go dali, e sọgan ko to didọ dọ emi ma gbọ̀agba gbigbọnọ-yinyin tọn gba podọ, to ojlẹ dopolọ mẹ, sọgan ko to hinhẹn sunnu lọ nado yọnẹn dọ onú dagbe susugege wẹ tin nado dù bosọ nù to owhé etọn gbè. “Wá,” wẹ e vẹ̀ sunnu lọ dọ, “gbọ̀ mí ni yí gigọ́ owanyi mítọn tọn kakajẹ afọnnu: gbọ̀ mí ni yí owanyi do miọn agbasa na míde.”
11 Kọdetọn lọ ma sinyẹnawu nado padọ gba. “Yẹwiwa nùflo etọn tọn wẹ e do wẹ́n awà na ẹn.” E hodo e yì whégbè “di oyìn he jei hùhù tẹnmẹ” podọ “dile ohẹ̀ nọ yawu jẹ omọ̀ [mẹ].” Sọlọmọni dotana po hogbe mẹhẹnlẹnnupọn tọn lọ lẹ po dọmọ: “E masọ yọnẹn dọ e bẹ alindọn emitọn hẹn gba, NW ].” E bẹ alindọn, kavi ogbẹ̀ etọn hẹn na “ogalọtọ po ayọdetọ lẹ po wẹ Jiwheyẹwhe na dawhẹna” wutu. (Heblu lẹ 13:4) Nuplọnmẹ huhlọnnọ nankọtọn die na sunnu po yọnnu lẹ po! Mí dona dapana etlẹ yin afọdide tintan lẹ zize hlan omọ́-liho he planmẹ yì nukundagbe Jiwheyẹwhe tọn hinhẹnbu mẹ lẹ ji.
12. (a) Etẹwẹ hogbe lọ “zinzin pò na” zẹẹmẹdo? (b) Nawẹ mí sọgan wleawuna huhlọn walọ dagbe tọn gbọn?
12 Doayi e go dọ “zinzin pò na” yọpọsunnu he go kandai lọ donu. Hodidọ ehe dọna mí dọ linlẹn, ojlo, owanyi zògbè, numọtolanmẹ lẹ, po yanwle etọn lẹ po to gbẹ̀mẹ ma tin to kọndopọmẹ hẹ nuhe Jiwheyẹwhe kẹalọyi gba. Madogán walọ dagbe tọn etọn dekọtọn do kọdetọn awubla tọn lẹ mẹ. To ‘azán godo tọn’ awusinyẹnnamẹ tọn ehelẹ mẹ, e nọ biọ vivẹnudido nado wleawuna huhlọn walọ dagbe tọn. (2 Timoti 3:1) Jiwheyẹwhe basi awuwledainanu lẹ nado gọalọna mí. E wleawuna opli agun Klistiani tọn lẹ nado to tuli na mí do omọ́-liho he jlọ lọ ji bosọ hẹn mí wá kọndopọmẹ hẹ mẹdevo lẹ he tindo yanwle dopolọ he míwlẹ tindo. (Heblu lẹ 10:24, 25) Mẹho agun tọn lẹ tin he nọ penukundo mí go bo nọ plọn aliho dodowiwa tọn lẹ mí. (Efesunu lẹ 4:11, 12) Mí tindo Ohó Jiwheyẹwhe tọn, Biblu, nado deanana bosọ họ́ mí. (2 Timoti 3:16) Podọ to ojlẹ lẹpo mẹ, mí tindo dotẹnmẹ hundote lọ nado hodẹ̀ na gbigbọ Jiwheyẹwhe tọn nado gọalọna mí.—Matiu 26:41.
Nupinplọn sọn Ylando Davidi Tọn lẹ Mẹ
13, 14. Nawẹ Ahọlu Davidi wá tindo mahẹ to ylando sinsinyẹn mẹ gbọn?
13 Nalete, e blawu dọ, devizọnwatọ he diyin Jiwheyẹwhe tọn lẹ lọsu ko tlẹ nọ tindo mahẹ to fẹnnuwiwa zanhẹmẹ tọn mẹ. Dopo to omẹ mọnkọtọn lẹ mẹ wẹ Ahọlu Davidi, mẹhe ko sẹ̀n Jehovah po nugbonọ-yinyin po na owhe ao ao lẹ. Ayihaawe depope matin dọ ewọ yiwanna Jiwheyẹwhe tlala gba. Ṣogan, e tlọ biọ aliho nuyiwa ylando tọn mẹ. Kẹdẹdile e yin na yọpọsunnu he Sọlọmọni basi zẹẹmẹ etọn lọ do, afọdide delẹ tin he plan Davidi biọ ylando mẹ podọ to godo mẹ hẹn ẹn sinyẹn deji.
14 Davidi tin to owhe ṣẹnṣẹn tọn lẹ mẹ to whenẹnu, vlavo to owhe 50 etọn lẹ mẹ. Sọn aga ohọ̀ etọn tọn, e mọ Bati-ṣeba whanpẹnọ to awulẹ. E dindona ẹn bosọ yọ́n mẹhe ewọ yin. E mọyọnẹn dọ asu etọn, Ulia, tin to awhàn-gbenu to Labba, yèdọ tòdaho Ammọni lẹ tọn de. Davidi hẹn ẹn wá họ̀nmẹ etọn bosọ tindo kọndopọ hẹ ẹ. To godo mẹ, onú lẹ doglẹ deji—e mọdọ emi tin to ohò gbọn Davidi dali. Po todido lọ po dọ Ulia na yí ozán lọ zan hẹ asi etọn, Davidi dowẹn ylọ ẹ lẹkọ sọn awhàn-gbenu. To aliho enẹ mẹ, Ulia na ko sọawuhia nado yin otọ́ ovi Bati-ṣeba tọn. Ṣigba Ulia ma yì owhé etọn gbè gba. To dindin nado ṣinyọnnudo ylando etọn to aliho egblemaku tọn mẹ, Davidi to enẹgodo do Ulia lẹkọ yì Labba po wekanhlanmẹ de po hlan awhàngán awhànpa lọ tọn dọ Ulia ni yin zize do otẹn de mẹ fie ewọ na yin hùhù te. Gbọnmọ dali Ulia hẹn ogbẹ̀ etọn bu, podọ Davidi wlealọ hẹ asuṣiọsi lọ whẹpo e do yin yinyọnẹn gbayipe dọ ohò wẹ e tin te.—2 Samuẹli 11:1-27.
15. (a) Nawẹ ylando Davidi tọn yin gòhùnna gbọn? (b) Nawẹ Davidi yigbe hlan wọhẹ azọ́nyinyọnẹn tọn Natani tọn gbọn?
15 E sọawuhia taun dọ, wedido Davidi tọn nado ṣinyọnnudo ylando etọn ko tindo kọdetọn dagbe. Osun lẹ juwayi. Ovi lọ—yèdọ visunnu de—yin jiji. Eyin Davidi tindo nujijọ ehe to ayihamẹ to whenuena e wleawuna Psalm 32 wẹ, to whenẹnu e họnwun dọ ayihadawhẹnamẹnu etọn dotukla ẹ tlala. (Psalm 32:3-5) Ṣigba, ylando lọ ma whlá do Jiwheyẹwhe gba. Biblu dọmọ: “Onú he Davidi wà ma hẹn homẹhun OKLUNỌ gba.” (2 Samuẹli 11:27) Jehovah do yẹwhegán Natani hlan, mẹhe gbọn azọ́nyinyọnẹn dali ze nuhe Davidi ko wà lọ donukọnna ẹn. Davidi yigbe ylando tọn to afọdopolọji bosọ biọ jona Jehovah tọn. Lẹnvọjọ nujọnu tọn etọn hẹn whẹgbigbọ hẹ Jiwheyẹwhe wá. (2 Samuẹli 12:1-13) Davidi ma gblehomẹ do wọhẹ lọ go gba. Kakatimọ, e do walọyizan heyin zẹẹmẹ basina to Psalm 141:5 mẹ hia dọmọ: “Gbọ dodonọ ni hò mi: dagbewanyi de wẹ e na yin: bosọ gbọ e ni degbedo mi: e na taidi amì to ota na mi: a dike ota ṣie gbẹ́ ẹ blo.”
16. Avase po ayinamẹ tẹ po wẹ Sọlọmọni na gando ylanwiwa lẹ go?
16 Sọlọmọni, heyin visunnu awetọ Davidi po Bẹti-ṣeba po tọn, sọgan ko lẹnnupọndo nujijọ ylankan ehe ji to gbẹzan otọ́ etọn tọn mẹ. E wlan to godo mẹ dọmọ: “Ewọ he ṣinyọnnudo ylanwa etọn ma na wà dagbe: ṣigba mẹdepope he yigbe bosọ jo e dai na mọ lẹblanu.” (Howhinwhẹn lẹ 28:13) Eyin mí jai jẹ ylando sinsinyẹn mẹ, mí dona setonuna ayinamẹ gbọdo ehe, he yin avase de po hogbe ayinamẹ tọn de po. Mí dona yigbe ylando mítọn tọn hlan Jehovah bosọ dọnsẹpọ mẹho agun tọn lẹ na alọgọ. Azọngban titengbe mẹho lẹ tọn wẹ nado gọalọ nado hẹn mẹhe ko jai jẹ nuṣiwa mẹ lẹ gọdotẹnmẹ.—Jakobu 5:14, 15.
Akọ́ndidona Kọdetọn Ylando Tọn Lẹ
17. Dile etlẹ yindọ Jehovah nọ jo ylando lẹ namẹ, etẹ mẹ wẹ e ma nọ whlá mẹ sọn?
17 Jehovah jona Davidi. Etẹwutu? Na Davidi yin dawe tenọgligo-hẹntọ de wutu, na e nọ walẹblanuna mẹdevo lẹ wutu, podọ na lẹnvọjọ etọn yin nujọnu tọn wutu. Etomọṣo, Davidi mayin whiwhla sọn kọdetọn nugbajẹmẹji tọn he bọdego lẹ mẹ gba. (2 Samuẹli 12:9-14) Eyin nudopolọ to egbehe. Dile etlẹ yindọ Jehovah ma nọ hẹn onú ylankan wá mẹhe lẹnvọjọ lẹ ji, e ma nọ whlá yé sọn kọdetọn jọwamọ nuyiwa nuṣiwa yetọn lẹ tọn mẹ gba. (Galatianu lẹ 6:7) To kọdetọn fẹnnuwiwa zanhẹmẹ tọn lẹ mẹ wẹ gbẹdai, hòmimọ he yè ma jlo, asamẹzọ̀n lẹ, podọ hẹnbu jidedomẹgo po sisi tọn po sọgan tin te.
18. (a) Nawẹ Paulu dọna agun Kọlintinu lẹ tọn nado yinuwa hẹ whẹho walọyizan zanhẹmẹ tọn sinsinyẹn de gbọn? (b) Nawẹ Jehovah nọ do owanyi po lẹblanu po hia ylandonọ lẹ gbọn?
18 Eyin mí ko ṣinuwa sinsinyẹn, e nọ bọawu nado tindo numọtolanmẹ flumẹjijẹ tọn to whenuena mí to oyà kọdetọn nuṣiwa he mí ko basi lẹ tọn ji. Etomọṣo, mí ma dona dike nudepope ni hẹnalọdotena mí sọn lẹnvọjọ bibasi bo yin whẹgbọ hẹ hlan Jiwheyẹwhe dè mẹ gba. To owhe kanweko tintan whenu, Paulu wlanwe hlan Kọlintinu lẹ dọ yé dona dè dawe de he ko tindo mahẹ to zanhẹmẹ hẹnnumẹ tọn mẹ sẹ sọn agun lọ mẹ. (1 Kọlintinu lẹ 5:1, 13) To whenuena dawe lọ ko lẹnvọjọ nujọnu tọn, Paulu deanana agun lọ dọmọ: “Mì [gbọn homẹ dagbe dali] jona ẹn, bo miọnhomẹna ẹn [bosọ] hẹn owanyi mìtọn lodo hlan e dali.” (2 Kọlintinu lẹ 2:5-8) To ayinamẹ gbọdo ehe mẹ, mí mọ owanyi po lẹblanu Jehovah tọn po hlan ylandonọ he lẹnvọjọ lẹ. Angẹli lẹ nọ jaya to olọn mẹ to whenuena ylandonọ dopo lẹnvọjọ.—Luku 15:10.
19. Yinyin hinhẹn blawu po gbesisọ po gbọn aliho nuyiwa nuṣiwa tọn de dali sọgan planmẹ jẹ alemọyi tẹlẹ kọ̀n?
19 Dile mí tlẹ nọ yin hinhẹn blawu gbọn aliho nuyiwa oylan tọn de dali do, numọtolanmẹ nuvẹnamẹ tọn he mí nọ tindo numimọ etọn nọ gọalọna mí nado ‘tin to aṣeji na mí ni masọ lẹkọyi nuhe nọ gbleawunamẹ kọ̀n whladopo ba blo.’ (Job 36:21) Na nugbo tọn, kọdetọn vẹadi ylando tọn lẹ dona glọnalina mí sọn nuṣiwa de vivọ́ basi mẹ. Humọ, Davidi yí numimọ awubla he e tindo sọn walọyizan ylanwiwa tọn mẹ etọn zan nado na ayinamẹ mẹdevo lẹ. E dọmọ: “Whenẹnu wẹ yẹn na plọn ali towe [nuṣiwatọ] lẹ: ylandonọ lẹ nasọ lẹgọ wá dè we.”—Psalm 51:13.
Ayajẹ Nọ Wá sọn Jehovah Sinsẹ̀n Mẹ
20. Alemọyi tẹlẹ wẹ nọ dekọtọn sọn tonusisena nubiọtomẹsi dodo tọn Jiwheyẹwhe tọn lẹ mẹ?
20 “[Ayajẹnọ, NW ] wẹ yé he sè ohó Jiwheyẹwhe tọn, bosọ yí ì whlá,” wẹ Jesu dọ. (Luku 11:28) Tonusisena nubiọtomẹsi dodo tọn Jiwheyẹwhe tọn lẹ nọ hẹn ayajẹ wá todin podọ biọ sọgodo madopodo lọ mẹ. Eyin mí ko gbọṣi wiwejininọ mẹ to walọyizan-liho, mì bo gbọ mí ni zindonukọn to aliho nuyiwa tọn enẹ mẹ gbọn dagbenu nuhe Jehovah ko wleawudaina nado gọalọna mí lẹpo tọn lẹ yíyí dali. Eyin mí ko jai jẹ fẹnnuwiwa mẹ, mì gbọ mí ni tindo adọgbigbo lọ dọ Jehovah ko wleawu nado jona mẹhe lẹnvọjọ nugbonugbo lẹ, podọ mì gbọ mí ni magbe ma nado vọ́ ylando lọ wà pọ́n gbede ba.—Isaia 55:7.
21. Tudohomẹnamẹ he wá sọn apọsteli Pita dè tẹ yíyí-do-yizan mẹ wẹ sọgan gọalọna mí nado gbọṣi wiwejininọ mẹ to walọyizan-liho?
21 To madẹnmẹ aihọn mawadodo tọn ehe na juwayi, to pọmẹ hẹ walọyizan po nuyiwa mawé tọn etọn lẹ po. Gbọn wiwejininọ walọyizan tọn go hinhẹn dali, mí na mọaleyi todin podọ kakadoi. Apọsteli Pita wlan dọmọ: “Mẹyiwanna emi, le mìwlẹ to nukundo onú helẹ nkọtọn, mì yin vivẹnunọ, na yè nido mọ mì to e dè to jijọho mẹ, to matin apà podọ to madowango. . . . Le mìwlẹ ko yọ́n onú helẹ dai, mì ni payi mìde go na yè nikaa yí alibubu mẹylankan lẹ tọn do dọ̀n mì, na mì nikaa jai sọn tenọgligli mìtọn mẹ.”—2 Pita 3:14, 17.
Be Hiẹ Sọgan Na Gblọndo Ya?
• Naegbọn e sọgan sinyẹnawu nado gbọṣi wiwejininọ mẹ to walọyizan-liho?
• Etẹwẹ yin aliho delẹ he mẹ mí sọgan nọgodona gbemima mítọn nado hodo nujinọtedo walọ dagbe tọn he yiaga lẹ te?
• Nuplọnmẹ tẹlẹ wẹ mí sọgan plọn sọn ylando yọpọsunnu heyin nùdego gbọn Sọlọmọni dali tọn mẹ?
• Etẹwẹ apajlẹ Davidi tọn plọn mí gando lẹnvọjọ go?
[Kanbiọ Oplọn Tọn Lẹ]
[Yẹdide to weda 13]
Hihọ́ de wẹ e yin nado dike mẹdevo lẹ ni yọ́n teninọ towe do whẹho walọyizan tọn lẹ ji
[Yẹdide to weda 17]
Na Davidi lẹnvọjọ sọn ahun mẹ wá wutu, Jehovah jona ẹn