Jijọho Aihọn Tọn—Gbọnna?

BE JIJỌHO aihọn tọn ko tin to yakẹ wẹ ya? Mẹsusu lẹn mọ to ojlẹ de mẹ ṣigba to ayihaawe tindo todin. Sọgbe hẹ linlin de he dọho do avùnnukundiọsọmẹ lẹ na sọgodo mítọn ji, heyin zinzinjẹgbonu to Daily Mail & Guardian Afrique du Sud tọn mẹ, “dọdai lẹ gando gbekọndopọ yọyọ akọjọpli tọn de go heyin bibasi to owhe 10 die wayi poun ko taidi pọndohlan dagbe he matindo todido depope todin.”

Wekantọ lọ lẹ lẹnnupọndo gbigbọ todido tintindo tọn he gbayipe to owhe ao die wayi poun ji. Awhàn Nuglọ tọn ko ṣẹṣẹ doalọte, podọ nudindọn huhlọn-daho lẹ tọn masọ tin ba. To nuhe taidi bẹjẹeji ojlẹ yọyọ de tọn mẹ, mẹsusu donukun dọ gbẹtọvi lẹ na jẹ nukọnyiyi nujọnu tọn tindo ji to nukunpipedo ohẹ́n, azọ̀njijẹ, po whẹho lẹdo mẹ tọn lẹ po go. “Dọdai enẹlẹ taidi todido he ma sọgbe hẹ lẹnpọn dagbe todin,” wẹ linlin lọ dọ. “Nudindọn yọyọ lẹ ko gbajẹgbonu to lẹdo he e na vẹawu na mí nado yọnẹn lẹ mẹ; ohẹ́n aihọn tọn to jijideji. Otò he tindo huhlọn awhànfunnu nuzanusẹvaun tọn yọyọ awe wẹ tin. Yinkọ dagbe Plidopọ Akọta lẹ tọn tọn ko yin hinhẹngble tlala gbọn awugbopo etọn to gbeyiyi hlan hunyanhunyan dagbemẹ-ninọ gbẹtọvi tọn debọdo-dego lẹ dali mẹ. Ninọmẹ todido matindo tọn lọ to yinylan deji.”

Biblu plọntọ lẹ yọnẹn dọ vivẹnudido gbẹtọ tọn, mahopọnna lehe e tindo nukọnyiyi do sọ, ma sọgan tindo kọdetọn dagbe mlẹnmlẹn pọ́n gbede gba. Etẹwutu? Na, dile Biblu dọ do, “aihọn lẹpo sọ mlọnai to omẹ ylankan lọ mẹ.” (1 Johanu 5:19) Dile e tin to anademẹ Satani tọn glọ, aihọn ma sọgan yin hinhẹnwa ninọmẹ Paladisi tọn he mẹ Jiwheyẹwhe dá ẹ do gba.

To ojlẹ dopolọ mẹ, dodonu tin na pọndohlan dagbe. Jehovah Jiwheyẹwhe dopagbe nado hẹn jijọho aihọn tọn wá, e mayin nado hihẹ́ titonu ehe do wẹ gba, ṣigba gbọn hinhẹn “aigba yọyọ” de ehe mẹ ‘dodowiwa na nọ nọ̀’ wá dali. (2 Pita 3:13) Mọwẹ, gbọn Ahọluduta Jiwheyẹwhe tọn gblamẹ, globu mítọn na yin didiọzun owhé jijọho, ayajẹ tọn de, fie gbẹninọ po azọ́n po na yin ayajẹ whepoponu tọn na gbẹtọvi tonusetọ lẹpo te. Humọ, Jiwheyẹwhe dopagbe nado “súnsún dasin lẹpo sẹ̀ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba.” Opagbe ehelẹ ma sinai do dọdai he ma lodo gbẹtọ lẹ tọn ji gba. Kakatimọ, yé sinai do Ohó he pegan Mẹdatọ, he ma sọgan dolalo lọ tọn ji.—Osọhia 21:4; Titu 1:2.