Klistiani lẹ Nọ Mọ Ayajẹ to Sinsẹ̀nzọnwiwa Mẹ
Klistiani lẹ Nọ Mọ Ayajẹ to Sinsẹ̀nzọnwiwa Mẹ
“Nado namẹ do [ayajẹ] hú nado mọyi.”—OWALỌ LẸ 20:35.
1. Walọyizan agọ̀ tẹwẹ gbayipe to egbehe, podọ naegbọn e do yin awugblenamẹnu?
TO OWHE ao godo tọn 1900 tọn lẹ whenu, hogbe lọ “walọyizan yẹn-whẹ́ tọn” ko yin sisè gbọzangbọzan. To alọ devo mẹ, “walọyizan yẹn-whẹ́ tọn” zẹẹmẹdo “yẹn whẹ́ jẹnukọn” bo nọ do kọndopọ walọyizan ṣejannabi po nukunkẹn tọn po gọna mẹdevo lẹ tọn mahopọn hia. Mí sọgan deji dọ to owhe 2000 mẹ, walọyizan yẹn-whẹ́ tọn ma na busẹ sọn aimẹ to alọ depope mẹ gba. Whla nẹmu wẹ hiẹ sè kanbiọ lọ, “Etẹwẹ tin to e mẹ na mi?” kavi, “Etẹwẹ yẹn na mọyi sọn e mẹ?” Walọyizan ṣejannabi tọn mọnkọtọn ma nọ ze ayajẹ daga gba. Adà awetọ nunọwhinnusẹ́n he Jesu dọ na taun tọn wẹ e yin dọmọ: “Nado namẹ do [ayajẹ] hú nado mọyi.”—Owalọ lẹ 20:35.
2. Nawẹ e yin ayidego do dọ nunamẹ nọ hẹn ayajẹ wá gbọn?
2 Be nugbo wẹ e yin dọ nado namẹ nọ hẹn ayajẹ daho tlala wá hugan nado mọyi ya? Mọwẹ. Lẹnnupọndo Jehovah Jiwheyẹwhe ji. Ewọ dè wẹ “asisa ogbẹ̀ tọn te.” (Psalm 36:9) E nọ wleawuna nulẹpo he mí tindo nuhudo etọn nado hẹn mí tindo ayajẹ bosọ de sinsẹ́n tọ́n. Na nugbo tọn, ewọ wẹ Asisa “nunina dagbedagbe po nunina he sọgbe lẹpo po” tọn. (Jakobu 1:17) Jehovah ‘Jiwheyẹwhe ayajẹ tọn,’ nọ nanumẹ gbọzangbọzan. (1 Timoti 1:11) E yiwanna nudida gbẹtọvi tọn etọn lẹ, mẹhe e na to susugege mẹ lẹ. (Johanu 3:16) Lẹnnupọndo whẹndo gbẹtọvi tọn de ji ga. Eyin mẹjitọ de wẹ hiẹ yin, hiẹ yọ́n avọ́sinsan lẹ, nunamẹ sọha he, e nọ biọ nado penukundo ovi de go whẹ́n. Podọ na owhe susu lẹ ovi lọ ma nọ yọ́n avọ́sinsan he hiẹ basi lẹ gba. E nọ yí nukunpẹvi do pọ́n avọ́sinsan towe lẹ. Etomọṣo, e nọ hẹn hiẹ jaya nado mọ ovi towe to vùnvùn taidi kọdetọn de na nunamẹ matin ṣejannabi tọn towe. Etẹwutu? Na hiẹ yiwanna ẹn wutu.
3. Naegbọn e do yin homẹhunnu nado wà sinsẹ̀nzọn hlan Jehovah po yisenọ hatọ mítọn lẹ po?
3 To aliho mọnkọtọn de mẹ, sinsẹ̀n nugbo nọ yin yinyọnẹn gbọnvo gbọn nunamẹ he sinai do owanyi ji dali. To whenuena e yindọ mí yiwanna Jehovah bọ mí sọ yiwanna yisenọ hatọ mítọn lẹ, awuvivinu de wẹ e yin nado wadevizọn hlan yé, nado ze mídelẹ jo na yé. (Matiu 22:37-39) Mẹdepope he wadevizọn po mẹwhinwhàn ṣejannabi tọn lẹ po nọ tindo ayajẹ vude poun. Ṣigba mẹhe wà sinsẹ̀nzọn matin ṣejannabi, bo nọ yin ahunmẹduna tlala dogbọn nuhe yé sọgan namẹ dali hugan nuhe yé nọ donukun nado mọyi lẹ, nọ mọ ayajẹ yí na nugbo tọn. Nugbo ehe nọ yin yinyọnẹn gbọn dogbigbapọnna lehe hogbe Biblu tọn delẹ he gando sinsẹ̀n-bibasi mítọn go yin yiyizan to Owe-wiwe lẹ mẹ do dali. Mí na gbadopọnna atọ̀n to hogbe ehelẹ mẹ to hosọ ehe po dehe bọdego po mẹ.
Sinsẹ̀nzọnwiwa Gbangba Jesu Tọn
4. Etẹwẹ yin aliho nuwiwa ‘sinsẹ̀nzọnwiwa gbangba’ tọn to Mẹylọhodotọklisti mẹ?
4 To Glẹki dowhenu tọn mẹ, hogbe titengbe dopo he gando sinsẹ̀n-bibasi go wẹ lei·tour·giʹa, he yin lilẹdogbedevomẹ dọ “sinsẹ̀nzọnwiwa gbangba tọn” to Traduction du monde nouveau mẹ. To Mẹylọhodotọklisti mẹ lei·tour·giʹa ko wleawuna hogbe lọ “sinsẹ̀nzọnwiwa.” a Ṣigba, sinsẹ̀nzọnwiwa nuwiwa mọmọ Mẹylọhodotọklisti tọn lẹ mayin sinsẹ̀nzọnwiwa gbangba tọn he nọ hẹn alemọyi wá nugbonugbo de gba.
5, 6. (a) Sinsẹ̀nzọnwiwa gbangba tọn tẹwẹ nọ yin bibasi to Islaeli, po alemọyinu tẹlẹ po? (b) Sinsẹ̀nzọnwiwa gbangba tọn he yiaga tlala tẹwẹ diọtẹnna dehe nọ yin bibasi to Islaeli, podọ etẹwutu?
5 Apọsteli Paulu yí hogbe Glẹki tọn he gando lei·tour·giʹa go de zan to alọdlẹndonu mẹ hlan yẹwhenọ Islaeli tọn lẹ. E dọmọ: ‘Yẹwhenọ lẹ dopodopo nọ nọte egbesọegbesọ, bo nọ to sinsẹ̀nzọn gbangba tọn wà [wunmẹ lei·tour·giʹa tọn] bosọ nọ to avọ́ dopolọ sán whepoponu.’ (Heblu lẹ 10:11) Yẹwhenọ Levinu lẹ nọ wà sinsẹ̀nzọn gbangba tọn he họakuẹ titengbe de to Islaeli. Yé nọ plọnmẹ Osẹ́n Jiwheyẹwhe tọn bosọ nọ basi avọ́sinsan lẹ he nọ ṣinyọnnudo ylando gbẹtọ lẹ tọn. (2 Otannugbo lẹ 15:3; Malaki 2:7) To whenuena yẹwhenọ lẹ po gbẹtọ lẹ po hodo Osẹ́n Jehovah tọn, akọta lọ tindo whẹwhinwhẹ́n lẹ nado yin ayajẹnọ.—Deutelonomi 16:15.
6 Sinsẹ̀nzọnwiwa gbangba tọn bibasi to Osẹ́n glọ yin lẹblanulọkẹyi taun de na yẹwhenọ Islaeli tọn lẹ, ṣigba sinsẹ̀nzọnwiwa yetọn ma tindo nuhọakuẹ depope ba to whenuena Islaeli yin gbigbẹdai na nugbonọ-mayin wutu. (Matiu 21:43) Jehovah basi tito na nude he klohugan—yèdọ sinsẹ̀nzọnwiwa gbangba tọn lọ heyin bibasi gbọn Jesu dali, Yẹwhenọ Daho lọ. Mí hia gando ewọ go dọmọ: “Na e tin to [ogbẹ̀] kakadoi wutu, tindo yẹwhenọ gánduta he yè ma nọ diọ. Enẹwutu e sọgan whlẹn yé gán ga kakajẹ opodo, yé he wá Jiwheyẹwhe dè gbọn afọ etọn ji lẹ, na e tin to ogbẹ̀ tẹgbẹ̀ nado nọ vẹvẹ na yé.”—Heblu lẹ 7:24, 25.
7. Naegbọn sinsẹ̀nzọnwiwa gbangba Jesu tọn hẹn alemọyi he ma tindo awetọ lẹ wá?
7 Jesu zindonukọn taidi yẹwhenọ kakadoi, matin mẹjẹmẹtẹnmẹ lẹ. Enẹwutu, ewọ kẹdẹ wẹ sọgan whlẹn gbẹtọ lẹ gán mlẹnmlẹn. E wà sinsẹ̀nzọn gbangba tọn matin awetọ enẹ, e mayin to tẹmpli yíalọ-do-gbá de mẹ gba, ṣigba to tẹmpli yẹhiadonu tọn lọ mẹ, yèdọ tito daho Jehovah tọn na sinsẹ̀n-bibasi he bẹjẹeji to owhe 29 W.M. Jesu to sinsẹ̀nzọnwa to Fiwiwe Gbaugbau tẹmpli enẹ tọn mẹ todin, to olọn mẹ. ‘Devizọnwatọ gbangba [lei·tour·gosʹ] fiwiwe lọ tọn po gòhọ nugbo tọn po he Jehovah pẹ́n, e mayin gbẹtọ gba’ wẹ e yin. (Heblu lẹ 8:2; 9:11, 12) Dile etlẹ yindọ Jesu tindo otẹn he yiaga, e gbẹsọ yin ‘devizọnwatọ gbangba tọn de.’ E nọ yí aṣẹpipa he yiaga etọn zan nado namẹ, e mayin nado yí gba. Podọ nunamẹ mọnkọtọn nọ hẹn ayajẹ wá na ẹn. E yin apadewhe “ayajẹ he yè ze do nukọn etọn” tọn podọ enẹ hẹn ẹn lodo nado doakọnnanu to gbẹzan etọn lẹpo mẹ to aigba ji.—Heblu lẹ 12:2.
8. Nawẹ Jesu wà sinsẹ̀nzọn gbangba tọn de nado diọtẹnna alẹnu Osẹ́n tọn lọ gbọn?
8 Adà sinsẹ̀nzọnwiwa gbangba Jesu tọn devo tin. Paulu wlan dọmọ: “[Jesu] tindo [sinsẹ̀nzọnwiwa gbangba tọn] he doyẹyi hú enẹ, nawẹ e ma na yín hoyidọtọ whẹgbọtọ alẹnu he yọnwhanpẹ hú tọn do, ehe yè hẹn lodo do opagbe he bọawu humọ tọn ji.” (Heblu lẹ 8:6) Mose yin whẹgbọtọ alẹnu he yin dodonu haṣinṣan Islaeli tọn hẹ Jehovah tọn. (Eksọdusi 19:4, 5) Jesu yin whẹgbọtọ alẹnu yọyọ de tọn, he hẹn akọta yọyọ de jiji yọnbasi, yèdọ “Islaeli Jiwheyẹwhe tọn,” he bẹ Klistiani mẹyiamisisadode gbọn gbigbọ dali lẹ sọn akọta susu mẹ hẹn. (Galatianu lẹ 6:16; Heblu lẹ 8:8, 13; Osọhia 5:9, 10) Sinsẹ̀nzọnwiwa gbangba tọn dagbe hugan nankọtọn die enẹ yin! Lehe mí yin ayajẹnọ do sọ nado jẹakọ hẹ Jesu, yèdọ devizọnwatọ gbangba tọn de mẹhe gblamẹ mí sọgan basi sinsẹ̀n alọkẹyi tọn hlan Jehovah te!—Johanu 14:6.
Klistiani lẹ Nọ Wà Sinsẹ̀nzọn Gbangba Tọn Ga
9, 10. Sinsẹ̀nzọnwiwa gbangba tọn wunmẹ tẹlẹ wẹ nọ yin bibasi gbọn Klistiani lẹ dali?
9 Gbẹtọvi depope ma ko wà sinsẹ̀nzọn gbangba tọn he yiaga taidi dehe yin Jesu tọn gba. Ṣigba, to whenuena Klistiani yiamisisadode lẹ mọ dona olọn mẹ tọn yetọn yí, yé yí tẹnmẹ yetọn to adà Jesu tọn mẹ bosọ tindo mahẹ to sinsẹ̀nzọnwiwa gbangba tọn etọn mẹ taidi ahọlu po yẹwhenọ olọn mẹ tọn lẹ po. (Osọhia 20:6; 22:1-5) Ṣogan, Klistiani lẹ to aigba ji nọ wà sinsẹ̀nzọn gbangba tọn, podọ yé mọ ayajẹ daho to mọwiwà mẹ. Di apajlẹ, to whenuena núdùdù whèdomẹ tin to Palestine, apọsteli Paulu hẹn nunina lẹ yì sọn mẹmẹsunnu he tin to Europe lẹ dè nado gọalọ nado de ayimajai Klistiani Juvi he tin to Judé lẹ tọn pò. Sinsẹ̀nzọnwiwa gbangba tọn de wẹ enẹ yin. (Lomunu lẹ 15:27; 2 Kọlintinu lẹ 9:12) To egbehe, Klistiani lẹ nọ yin homẹhunnọ nado wà sinsẹ̀nzọn dopolọ, nọ na godonọnamẹ afọdopolọji tọn to whenuena mẹmẹsunnu yetọn lẹ tindo numimọ yasanamẹ, nugbajẹmẹji jọwamọ tọn lẹ, kavi nugbajẹmẹji devo lẹ tọn.—Howhinwhẹn lẹ 14:21.
10 Paulu dlẹnalọdo sinsẹ̀nzọnwiwa gbangba tọn devo to whenuena e wlan dọmọ: “Eyin yè tlẹ kọ̀n mi jẹgbonu taidi núnùnù he nọ yin nina do avọ́sinsan po sinsẹ̀nzọnwiwa gbangba tọn po ji dohlan yise he ko deanana mì, yẹn jaya bosọ to ayajẹ hẹ mìmẹpo.” (Filippinu lẹ 2:17, NW ) Azọ́n sinsinyẹn wiwà Paulu tọn do ota Filippinu lẹ tọn mẹ ko yin sinsẹ̀nzọnwiwa gbangba tọn de heyin bibasi to owanyi po sọwhiwhe po mẹ. Sinsẹ̀nzọnwiwa gbangba tọn dopolọ to yinyin bibasi to egbehe, na titengbe tọn gbọn Klistiani mẹyiamisisadode lẹ dali, he nọ wadevizọn taidi “afanumẹ nugbonọ, nuyọnẹntọ,” bo to awuwlena núdùdù gbigbọmẹ tọn to ojlẹ sisọ etọn mẹ. (Matiu 24:45-47) Humọ, taidi pipli de, ehelẹ yin ‘yẹwhenọduta wiwe de,’ heyin azọ́ndena “nado sán avọ́ gbigbọnọ, he yin alọkẹyi hlan Jiwheyẹwhe gbọn Jesu Klisti mẹ” podọ nado “jla pipà ewọ he ylọ [yé] sọn zinvlu mẹ do hinhọ́n ablanọ etọn tọn mẹ.” (1 Pita 2:5, 9) Taidi Paulu, yé jaya to lẹblanulọkẹyi mọnkọtọn mẹ etlẹ yin dile yé ‘kọ̀n yedelẹ jẹgbonu’ to azọngban yetọn lẹ hinhẹndi mẹ. Podọ “lẹngbọ devo” heyin gbẹdohẹmẹtọ yetọn lẹ kọnawudopọ hẹ yé bosọ nọgodona yé to azọ́n didọna gbẹtọvi lẹ gando Jehovah po lẹndai etọn lẹ po go tọn mẹ. b (Johanu 10:16; Matiu 24:14) Lehe enẹ yin sinsẹ̀nzọnwiwa gbangba tọn daho po ayajẹ tọn po do sọ!—Psalm 107:21, 22.
Wà Sinsẹ̀nzọn Wiwe
11. Nawẹ yẹwhenọ-yọnnu lọ Anna wleawuna apajlẹ dagbe de na Klistiani lẹpo gbọn?
11 Hogbe Glẹki tọn devo he gando sinsẹ̀n-bibasi mítọn go wẹ la·treiʹa, heyin lilẹdogbedevomẹ do “sinsẹ̀nzọn wiwe” to Traduction du monde nouveau mẹ. Sinsẹ̀nzọn wiwe tindo onú nado yiwà hẹ nuwiwa sinsẹ̀n-bibasi tọn lẹ. Di apajlẹ, asuṣiọsi owhe-84-mẹvi po yẹwhenọ-yọnnu lọ po Anna yin zẹẹmẹ basina taidi mẹhe ‘ma fọnyi sọn tẹmpli mẹ, bosọ yí nùbibla po ovẹ̀ po do to sinsẹ̀nzọn wiwe wà [hogbe Glẹki tọn de he gando la·treiʹa go] to ozán po okle po.’ (Luku 2:36, 37) Anna sẹ̀n Jehovah po nugbonọ-yinyin po. Apajlẹ dagbe de wẹ ewọ yin na mímẹpo—jọja po mẹhomẹ po, sunnu po yọnnu po. Dile Anna nọ hodẹ̀ dohlan Jehovah vẹkuvẹku bosọ nọ basi sinsẹ̀n hlan ẹn to gbesisọmẹ to tẹmpli mẹ do, sinsẹ̀nzọn wiwe mítọn bẹ odẹ̀ po opli yìyì po hẹn.—Lomunu lẹ 12:12; Heblu lẹ 10:24, 25.
12. Etẹwẹ yin adà tangan dopo sinsẹ̀nzọn wiwe mítọn tọn, podọ nawẹ ehe sọ yin sinsẹ̀nzọnwiwa gbangba tọn de gbọn?
12 Apọsteli Paulu donu adà tangan sinsẹ̀nzọn wiwe mítọn tọn de go to whenuena e wlan dọmọ: “Jiwheyẹwhe wẹ kunnudetọ ṣie, mẹhe yẹn yí gbigbọ ṣie do to sinsẹ̀n to wẹndagbe Ovi etọn tọn mẹ, dọ yẹn nọ to mì flin magbọjẹ to odẹ̀ ṣie mẹ whepoponu.” (Lomunu lẹ 1:9) Mọwẹ, yẹwheho wẹndagbe lọ tọn didọ ma yin sinsẹ̀nzọnwiwa gbangba tọn hlan mẹhe sè e lẹ kẹdẹ gba ṣigba sọ yin nuwiwa sinsẹ̀n-bibasi tọn hlan Jehovah Jiwheyẹwhe ga. Vlavo mí mọ gbeyiyi dagbe kavi lala, azọ́n yẹwhehodidọ tọn yin sinsẹ̀nzọn wiwe he nọ yin bibasi hlan Jehovah. Vivẹnudido mítọn nado dọna mẹdevo lẹ dogbọn jẹhẹnu dagbe po lẹndai alemọyi tọn heyin Otọ́ owanyinọ olọn mẹ tọn mítọn po dali na taun tọn nọ hẹn ayajẹ daho wá na mí.—Psalm 71:23.
Fie Wẹ Mí Nọ Wà Sinsẹ̀nzọn Wiwe Te?
13. Etẹwẹ yin todido mẹhe ko wà sinsẹ̀nzọn wiwe to awánu homẹ tẹmpli gbigbọmẹ Jehovah tọn lẹ tọn, podọ mẹnu lẹ wẹ jaya hẹ yé?
13 Paulu wlan dohlan Klistiani yiamisisadode lẹ dọmọ: “Le míwlẹ to ahọlu yigba he yè ma sọgan whàn yí, mì gbọ mí ni hẹn ojọmiọn go, ehe mẹ mí sọgan nọ [wà sinsẹ̀nzọn wiwe] homẹhunnọ hlan Jiwheyẹwhe te po yẹyi po, po osi po.” (Heblu lẹ 12:28) Po nukundido jidide tọn nado dugu Ahọluduta lọ tọn po, mẹyiamisisadode lẹ nọ lodo gligli to yise mẹ dile yé to sinsẹ̀n basi dohlan Ganhunupotọ lọ. Yewlẹ kẹdẹ wẹ sọgan wà sinsẹ̀nzọn wiwe hlan ẹn to nọtẹn Wiwe lọ mẹ podọ to awánu homẹ tọn heyin tẹmpli gbigbọmẹ Jehovah tọn tọn mẹ, bọ yé to nukọnpọnhlan po nukundido vẹkuvẹku po nado wà sinsẹ̀nzọn hẹ Jesu to Fiwiwe Gbaugbau lọ, yèdọ olọn lọsu mẹ. Gbẹdohẹmẹtọ yetọn lẹ, heyin lẹngbọ devo lẹ, nọ jaya hẹ yé to todido jiawu yetọn mẹ.—Heblu lẹ 6:19, 20; 10:19-22.
14. Nawẹ gbẹtọ susugege lọ nọ mọaleyi sọn sinsẹ̀nzọnwiwa gbangba Jesu tọn mẹ gbọn?
14 Nalete, etẹwẹ dogbọn lẹngbọ devo lẹ dali? Dile apọsteli Johanu mọhlan jẹnukọn do, gbẹtọgun daho yetọn de ko sọawuhia to azán godo tọn ehelẹ mẹ, podọ “[yé ko] yàn aṣọ́vọ̀ yetọn bosọ hẹn yé zun wewe to ohùn lẹngbọvu lọ tọn mẹ.” (Osọhia 7:14) Ehe zẹẹmẹdo dọ, taidi sinsẹ̀n-basitọ hatọ yiamisisadode yetọn lẹ, yé yí yise zan to sinsẹ̀nzọnwiwa gbangba Jesu tọn mẹ, heyin ogbẹ̀ pipé gbẹtọvi tọn etọn nina do ota gbẹtọvi lẹ tọn mẹ. Lẹngbọ devo lẹ sọ mọaleyi sọn sinsẹ̀nzọnwiwa gbangba Jesu tọn mẹ to enẹ mẹ dọ yé “hẹn alẹnu [Jehovah tọn] go.” (Isaia 56:6) Lala, yé ma yin apadewhe alẹnu yọyọ lọ tọn gba, ṣigba yé hẹn e go gbọn tonusise na osẹ́n he gandego lọ lẹ dali bosọ kọngbedopọ hẹ tito heyin bibasi gbọn dali etọn lẹ. Yé nọ dogbẹ́ hẹ Islaeli Jiwheyẹwhe tọn, bo to núdù to tafo gbigbọmẹ tọn dopolọ ji bosọ to azọ́nwa to pọmẹ hẹ hagbẹ etọn lẹ, bo to Jiwheyẹwhe pà to gbangba bosọ to avọ́sinsan gbigbọmẹ tọn he yin homẹhunnu hlan ẹn lẹ basi.—Heblu lẹ 13:15.
15. Fie wẹ gbẹtọ susugege lọ nọ wà sinsẹ̀nzọn wiwe te, podọ nawẹ dona ehe gando yé go gbọn?
15 Gbọnmọ dali, gbẹtọ susugege lọ yin mimọ nado “ṣite to ofin lọ nukọn podọ to Lẹngbọvu lọ nukọn, yè do aṣọ́vọ̀ wewe na yé.” Humọ, “yé . . . tin to ofin Jiwheyẹwhe tọn lọ nukọn bosọ to sinsẹ̀n ẹn to okle po ozán po to tẹmpli etọn mẹ: podọ ewọ he sinai to ofin ji nasọ dlẹn gòhọ etọn do yé ji.” (Osọhia 7:9, 15) To Islaeli, mẹdiọzun Juvi lẹ nọ basi sinsẹ̀n to gbonu awánu tẹmpli Sọlọmọni tọn mẹ. To aliho dopolọ mẹ, gbẹtọ susugege lọ nọ basi sinsẹ̀n hlan Jehovah to gbonu awánu tẹmpli gbigbọmẹ tọn etọn mẹ. Sinsẹ̀nzọnwiwa to finẹ hẹn yé nado jaya. (Psalm 122:1) Etlẹ yin to whenuena omẹ godo tọn heyin gbẹdohẹmẹtọ yiamisisadode yetọn lẹ mọ gududu olọn mẹ tọn yí godo, yé na zindonukọn nado to sinsẹ̀nzọn wiwe wà dohlan Jehovah taidi omẹ etọn lẹ.—Osọhia 21:3.
Sinsẹ̀nzọn Wiwe He Mayin Alọkẹyi
16. Avase tẹlẹ wẹ yin nina gando sinsẹ̀nzọn wiwe go?
16 To azán Islaeli hohowhenu tọn lẹ mẹ, sinsẹ̀nzọn wiwe dona yin bibasi to kọndopọmẹ hẹ osẹ́n Jehovah tọn lẹ. (Eksọdusi 30:9; Levitiku 10:1, 2) Mọdopolọ to egbehe, nubiọtomẹsi lẹ tin nado payi eyin sinsẹ̀nzọn wiwe mítọn na yin alọkẹyi hlan Jehovah. Enẹwutu wẹ Paulu wlan dohlan Kọlọsinu lẹ dọmọ: “Mí ma gọ̀n odẹ̀ ma hò na mì, bosọ to bibiọ na mì nido gọ́ na yinyọnẹn ojlo etọn tọn to wuntunnu mẹ podọ to nuyọnẹn gbigbọnọ lẹpo mẹ; na mì nido to zọnlinzin dole e jẹ na [Jehovah, NW ] to nukundagbe lẹpo mẹ, na mì ni yin sinsẹ́nnọ to azọ́n dagbe lẹpo mẹ, bosọ to susu to oyọnẹn Jiwheyẹwhe tọn mẹ.” (Kọlọsinu lẹ 1:9, 10) E mayin míwlẹ tọn nado magbe aliho he sọgbe he mẹ mí na basi sinsẹ̀n hlan Jiwheyẹwhe te tọn gba. Oyọnẹn Owe-wiwe tọn he pegan, nukunnumọjẹnumẹ gbigbọmẹ tọn, po nuyọnẹn jijọ-di-Jiwheyẹwhe tọn po yin nujọnu. Eyin e mayin mọ, kọdetọn lẹ sọgan yin nugbajẹmẹji tọn.
17. (a) Nawẹ sinsẹ̀nzọn wiwe yin hinhẹn gblezọn to azán Mose tọn lẹ gbè gbọn? (b) Nawẹ sinsẹ̀nzọn wiwe sọgan yin anadena to aliho agọ̀ mẹ to egbehe gbọn?
17 Flin Islaelivi lẹ to azán Mose tọn lẹ gbè. Mí hia dọmọ: “Jiwheyẹwhe lẹ́, bo jo yé do nado to [sinsẹ̀nzọn wiwe wà hlan] awhànpa olọn tọn lẹ.” (Owalọ lẹ 7:42) Islaelivi enẹlẹ ko mọ nuwiwa huhlọnnọ Jehovah tọn lẹ do ota yetọn mẹ. Ṣogan, yé lẹhlan yẹwhe devo lẹ to whenuena yé lẹndọ ehe na yin na dagbe yetọn. Yé mayin nugbonọ gba, podọ nugbonọ-yinyin yin dandannu eyin sinsẹ̀nzọn wiwe mítọn na yin homẹhunnu hlan Jiwheyẹwhe. (Psalm 18:25) Na nugbo tọn, omẹ kleun delẹ to egbehe wẹ na lẹ́ sọn Jehovah dè nado basi sinsẹ̀n dohlan sunwhlẹvu lẹ kavi oyìnvu sika tọn, ṣigba wunmẹ boṣiọ-sinsẹ̀n tọn devo lẹ tin. Jesu gbẹnunamẹ sọta “Adọkunnu lẹ” sinsẹ̀n, podọ Paulu ylọ nukunkẹn dọ boṣiọ-sinsẹ̀n. (Matiu 6:24; Kọlọsinu lẹ 3:5) Satani nọ ze edetiti daga taidi yẹwhe de. (2 Kọlintinu lẹ 4:4) Boṣiọ-sinsẹ̀n alọpa mọnkọtọn gbayipe bosọ yin omọ̀ de. Di apajlẹ, lẹnnupọndo mẹde he sọalọakọ́n nado hodo Jesu ṣigba yanwle nujọnu tọn etọn to gbẹ̀mẹ wẹ nado lẹzun adọkunnọ kavi mẹhe jidide nujọnu tọn etọn tin to edetiti po linlẹn edetiti tọn lẹ po mẹ ji. Mẹnu wẹ e to sinsẹ̀n basi hlan na nugbo tọn? Nawẹ ewọ gbọnvo na Ju azán Isaia gbè tọn lẹ he whlé to oyín Jehovah tọn mẹ ṣigba nọ ze pipà nuyiwa daho etọn lẹ tọn hlan boṣiọ mawé lẹ gbọn?—Isaia 48:1, 5.
18. Nawẹ sinsẹ̀nzọn wiwe ko yin bibasi to aliho agọ̀ mẹ to ojlẹ he wayi mẹ podọ to egbehe gbọn?
18 Jesu sọ na avase dọmọ: “Ojlẹ lọ ja, whenuena mẹdepope he hù mì, na lẹndọ e to [sinsẹ̀nzọn wiwe wà] hlan Jiwheyẹwhe.” (Johanu 16:2) Saulu, he lẹzun apọsteli Paulu, matin ayihaawe lẹn dọ emi to Jiwheyẹwhe sẹ̀n to whenuena e ‘kẹalọyi Stefani hùhù’ bosọ “to gbigbọ adi po hùhù po tọn gbọ̀ do nuplọntọ Oklunọ tọn lẹ ji.” (Owalọ lẹ 8:1; 9:1) To egbehe, mẹhe nọ hẹn hẹnnu zizasẹ po akọ vivasudo po wá delẹ sọ nọ sọalọakọ́n nado to sinsẹ̀n basi hlan Jiwheyẹwhe. Mẹsusu wẹ tin he sọalọakọ́n nado to sinsẹ̀n basi hlan Jiwheyẹwhe, ṣigba sinsẹ̀n-bibasi yetọn na taun tọn yin anadena dohlan yẹwhe owanyi akọta mẹtọn tọn lẹ, akọta ṣinṣinyan, adọkun, mẹdetiti, kavi yẹwhe devo delẹ.
19. (a) Nukun tẹwẹ mí nọ yí do pọ́n sinsẹ̀nzọn wiwe mítọn? (b) Sinsẹ̀nzọn wiwe wunmẹ tẹwẹ na hẹn ayajẹ wá na mí?
19 Jesu dọmọ: “Hiẹ na litaina Oklunọ Jiwheyẹwhe towe, ewọ dopokẹdẹ wẹ hiẹ na nọ [wà sinsẹ̀nzọn wiwe hlan].” (Matiu 4:10) E to hodọ hlan Satani, ṣigba lehe e yin onú titengbe do sọ dọ mímẹpo ni setonuna ohó etọn lẹ! Sinsẹ̀nzọn wiwe bibasi hlan Oklunọ Nupojipetọ wẹkẹ lọ tọn yin lẹblanulọkẹyi he yiaga bo dobu de. Podọ etẹwẹ sọgan yin didọ gando sinsẹ̀nzọnwiwa gbangba tọn bibasi he yin kinkọndopọ hẹ sinsẹ̀n-bibasi mítọn go? Ehe wiwà do ota gbẹtọ hatọ mítọn lẹ tọn mẹ yin azọ́n ayajẹ tọn de he nọ hẹn homẹhun daho wá. (Psalm 41:1, 2; 59:16) Etomọṣo, sinsẹ̀nzọnwiwa mọnkọtọn nọ hẹn homẹhun nujọnu tọn wá kiki eyin e yin bibasi po ahundopo po podọ to aliho he sọgbe mẹ. Mẹnu lẹ wẹ to sinsẹ̀n basi hlan Jiwheyẹwhe po gbesisọ po? Sinsẹ̀nzọn wiwe mẹnu lẹ tọn wẹ Jehovah nọ kẹalọyi? Mí sọgan na gblọndo hlan kanbiọ mọnkọtọn lẹ eyin mí gbadopọnna hogbe atọ̀ntọ Biblu tọn he gando sinsẹ̀n-bibasi mítọn go. Ehe wẹ mí na wà to hosọ he bọdego mẹ.
[Nudọnamẹ Odò Tọn Lẹ]
a Sinsẹ̀nzọnwiwa Mẹylọhodotọklisti tọn lẹ to paa mẹ vlavo nọ yin aliho sinsẹ̀n-bibasi tọn lẹ kavi hùnwhẹ tangan lẹ, taidi hùnwhẹ Communion tọn to Ṣọṣi Katoliki Lomu tọn mẹ.
b To Owalọ lẹ 13:2 mẹ, eyin linlin etọn na dọ yẹwhegán lẹ po mẹplọntọ lẹ po to Antioku to ‘lizọnyizọn wà to gbangba’ (heyin lilẹdogbedevomẹ sọn hogbe Glẹki tọn de he gando lei·tour·giʹa go mẹ) dohlan Jehovah. Vlavo, lizọnyizọnwiwa gbangba tọn ehe bẹ yẹwhehodidọ hlan gbẹtọ lẹ hẹn.
Nawẹ Hiẹ Na Na Gblọndo Gbọn?
• Sinsẹ̀nzọn gbangba tọn daho tẹwẹ Jesu wà?
• Sinsẹ̀nzọn gbangba tọn tẹwẹ Klistiani lẹ nọ wà?
• Etẹwẹ yin sinsẹ̀nzọn wiwe Klistiani tọn, podọ fie wẹ e nọ yin bibasi te?
• Etẹwẹ mí dona tindo eyin sinsẹ̀nzọn wiwe mítọn na hẹn homẹhun Jiwheyẹwhe?
[Kanbiọ Oplọn Tọn Lẹ]
[Yẹdide to weda 10]
Mẹjitọ lẹ nọ mọ ayajẹ daho to nunamẹ mẹ
[Yẹdide to weda 13]
Klistiani lẹ nọ wà sinsẹ̀nzọn gbangba tọn to whenuena yé gọalọna mẹdevo lẹ podọ to whenuena yé lá wẹndagbe lọ
[Yẹdide to weda 14]
Mí tindo nuhudo oyọnẹn he pegan po nukunnumọjẹnumẹ po tọn nado tindo nujikudo dọ sinsẹ̀nzọn wiwe mítọn yin alọkẹyi gbọn Jiwheyẹwhe dali