Be Hiẹ Yiwanna Nuflinmẹ Jehovah Tọn lẹ Taun Ya?
Be Hiẹ Yiwanna Nuflinmẹ Jehovah Tọn lẹ Taun Ya?
“[Alindọn ṣie ko payi nuflinmẹ] towe lẹ go; yẹn sọ yiwanna yé gbaugbau.”—PSALM 119:167.
1. Fie wẹ mí mọ alọdlẹndonu pludopludo tọn hlan nuflinmẹ Jehovah tọn lẹ te na taun tọn?
JEHOVAH jlo dọ omẹ etọn lẹ ni yin ayajẹnọ. Nugbo wẹ dọ, nado duvivi ayajẹ nugbo tọn mí dona zinzọnlin to osẹ́n Jiwheyẹwhe tọn lẹ mẹ bo payi gbedide etọn lẹ go. Ewọ na mí nuflinmẹ lẹ, nado sọgan wà enẹ. Ehelẹ yin nùdego pludopludo to Owe-wiwe mẹ, na taun tọn to Psalm 119, he na vlavo tọn yin jiji gbọn Ahọvi jọja Juda tọn Hẹzekia dali. Ohàn whanpẹnọ ehe bẹjẹeji po hogbe ehelẹ po dọmọ: “[Ayajẹnọ] wẹ yé he aliho yetọn yin pipé lẹ, mẹhe to zọnlinzin to osẹ́n OKLUNỌ tọn mẹ lẹ. [Ayajẹnọ] wẹ yé he to [nuflinmẹ] etọn lẹ yìn, he yí ayiha pete do to dindin in.”—Psalm 119:1, 2.
2. Nawẹ nuflinmẹ Jiwheyẹwhe tọn lẹ gando ayajẹ go gbọn?
2 Mí nọ ‘zinzọnlin to osẹ́n Jehovah tọn mẹ’ gbọn oyọnẹn he pegan Ohó etọn tọn yíyí do ayiha mẹ dali podọ gbọn yíyí ì do yizan mẹ to gbẹzan mẹ dali. Ṣigba, to whenuena e yindọ mapenọ wẹ mí yin, mí tindo nuhudo nuflinmẹ lẹ tọn. Hogbe Heblu tọn heyin lilẹdogbedevomẹ do “nuflinmẹ lẹ” dohia dọ Jiwheyẹwhe nọ hẹn osẹ́n, aṣẹpipa, aṣẹdai, po gbedide etọn lẹ po wá oflin mẹ na mí. (Matiu 10:18-20) Mí na gbọṣi ayajẹ mẹ eyin mí zindonukọn nado to pipayi nuflinmẹ mọnkọtọn lẹ go kẹdẹ, na yé nọ gọalọna mí nado dapana aijijẹ gbigbọmẹ tọn he nọ dekọtọn do nugbajẹmẹji po awubla po mẹ lẹ.
Tẹdo Nuflinmẹ Jehovah Tọn lẹ Go
3. To dodonu Psalm 119:60, 61 tọn ji, jidide tẹwẹ mí tindo?
3 Nuflinmẹ Jiwheyẹwhe tọn lẹ họakuẹ tlala na psalm-kàntọ lọ mẹhe jihàn dọmọ: “Yẹn yawu, bo masọ whleawu nado payi gbedide towe lẹ go gba. Okàn mẹylankan lẹ tọn lẹhla mi pé: ṣigba yẹn ma wọnji osẹ́n towe go gba.” (Psalm 119:60, 61) Nuflinmẹ Jehovah tọn lẹ nọ gọalọna mí nado doakọnna homẹkẹn na mí deji dọ Otọ́ olọn mẹ tọn mítọn sọgan sán okàn alọhẹndotenamẹ tọn he kẹntọ lẹ blá lẹdo mí pé lẹ wutu. To ojlẹ sisọ mẹ, ewọ nọ tún mí dote sọn aliglọnnamẹnu mọnkọtọn lẹ mẹ na mí nido sọgan hẹn azọ́n yẹwhehodidọ-Ahọluduta tọn dì.—Malku 13:10.
4. Nawẹ mí dona yinuwa hlan nuflinmẹ Jiwheyẹwhe tọn lẹ gbọn?
4 To whedelẹnu, mí nọ yin vọjlado basina gbọn nuflinmẹ Jehovah tọn lẹ dali. Mì gbọ mí ni nọ yọ́n pinpẹn vọjlado basinamẹ mọnkọtọn tọn to whepoponu, yèdọ dile psalm-kàntọ lọ basi do. E dọ to odẹ̀ mẹ hlan Jiwheyẹwhe dọmọ: “[Nuflinmẹ] towe lẹ wẹ homẹhunhun ṣie . . . Yẹn yiwanna [nuflinmẹ] towe lẹ.” (Psalm 119:24, 119) Mí tindo nuflinmẹ Jiwheyẹwhe tọn susu hugan ehe psalm-kàntọ lọ tindo. Hoyidọ kanweko susu lẹ sọn Owe-wiwe Heblu tọn mẹ he sọawuhia to Owe-wiwe Glẹki tọn mẹ lẹ nọ flin mí e mayin anademẹ Jehovah tọn lẹ hlan omẹ etọn he nọgbẹ̀ to Osẹ́n glọ lẹ kẹdẹ wẹ gba ṣigba lẹndai etọn lẹ gando agun Klistiani tọn go ga. To whenuena Jiwheyẹwhe mọdọ e jẹ nado flinnu mí gando nuhe dù osẹ́n etọn lẹ go, mí nọ dopẹ́ na anademẹ mọnkọtọn. Podọ gbọn ‘titẹdo nuflinmẹ Jehovah tọn lẹ’ go dali, mí nọ dapana mẹdindọn ylando tọn lẹ he ma nọ hẹn homẹ Mẹdatọ mítọn tọn hùn bosọ nọ hò ayajẹ mílọsu tọn yí lẹ.—Psalm 119:31.
5. Nawẹ mí sọgan wá yiwanna nuflinmẹ Jehovah tọn lẹ taun gbọn?
5 Nawẹ owanyi mítọn hlan nuflinmẹ Jehovah tọn lẹ dona sù sọ? “Ayiha ṣie ko payi [nuflinmẹ] towe lẹ go; yẹn sọ yiwanna yé gbaugbau,” wẹ psalm-kàntọ jihàn dọ. (Psalm 119:167, wekun flinflin lẹ yin mítọn.) Mí na wá yiwanna nuflinmẹ Jehovah tọn lẹ taun eyin mí nọ pọ́n yé hlan bo nọ kẹalọyi yé taidi tudohomẹnamẹ Otọ́ de he nọ hò mítọn pọ́n na taun tọn tọn. (1 Pita 5:6, 7) Mí tindo nuhudo nuflinmẹ etọn lẹ tọn, podọ owanyi mítọn hlan yé na whẹ́n deji eyin mí mọ lehe mí nọ mọaleyi sọn yé mẹ do.
Nuhewutu Mí Tindo Nuhudo Nuflinmẹ Jiwheyẹwhe Tọn Lẹ
6. Whẹwhinwhẹ́n dopo tẹ wutu wẹ mí tindo nuhudo nuflinmẹ Jehovah tọn lẹ tọn, podọ etẹwẹ na nọ gọalọna mí nado nọ flin yé?
6 Dopo to whẹwhinwhẹ́n he wutu mí tindo nuhudo nuflinmẹ Jehovah tọn lẹ tọn mẹ wẹ yindọ mí nọ wọnjinu go. The World Book Encyclopedia dọmọ: “To paa mẹ, gbẹtọ lẹ nọ wọnji nudọnamẹ susu go dile ojlẹ to jujuyi. . . . Vlavo hiẹ ko tindo numimọ nugomape tọn nado lẹnnupọndo yinkọ de ji kavi nudọnamẹ delẹ he hiẹ nọ saba flin po awuyiya po dai ji. . . . Jiwọnnugo ojlẹ gli tọn mọnkọtọn, he nọ jọ gbọzangbọzan, nọ yin yiylọdọ awugbopo nado hẹn nuhe ko yin yinyọnẹn dai wá oflin mẹ. Lẹnunnuyọnẹntọ lẹ yí ì jlẹdo tintẹnpọn nado dín nude he yè ma yọ́n fie e tin te to abò jinján de mẹ go. . . . Aliho dagbe de nado hẹn ẹn diun dọ nudọnamẹ lẹ na nọ yin finflin wẹ nado plọn ẹn na ojlẹ dindẹn etlẹ yin to whenuena hiẹ lẹndọ emi ko yọ́n ẹn ganji godo.” Nupinplọn sọwhiwhe tọn po dọvọdọ po na gọalọna mí nado nọ flin nuflinmẹ Jiwheyẹwhe tọn lẹ bosọ setonuna yé na dagbe mílọsu lẹ tọn.
7. Naegbọn yè tindo nuhudo nuflinmẹ Jiwheyẹwhe tọn lẹ tọn to egbehe hugan gbede pọ́n tọn?
7 Mí tindo nuhudo nuflinmẹ Jehovah tọn lẹ tọn to egbehe hugan gbede pọ́n tọn na danuwiwa ko yiaga jẹ obá daho hugan mẹ to whenuho gbẹtọvi tọn mẹ wutu. Eyin mí setonuna nuflinmẹ Jiwheyẹwhe tọn lẹ, mí na mọ wuntuntun he mí tindo nuhudo etọn nado dapana yinyin kiklọ biọ aliho ylankan aihọn tọn mẹ lẹ. “Yẹn zìn hú mẹplọntọ ṣie lẹpo,” wẹ psalm-kàntọ lọ dọ, “na [nuflinmẹ] towe lẹ wẹ ayihamẹlẹnpọn ṣie. Yẹn zìn hú mẹhoho lẹ, na yẹn ko yìn ogbedai towe lẹ wutu. Yẹn ko dọ̀n afọ ṣie do godo sọn aliho ylankan lẹpo ji, na yẹn nido nọ payi ohó towe go.” (Psalm 119:99-101) Gbọn pipayi nuflinmẹ Jiwheyẹwhe tọn lẹ go dali, mí na họ̀n na “aliho ylankan lẹpo” bo nasọ dapana tintin taidi gbẹtọvi paa lẹ, he tin to ‘zinvlu mẹ to apọ̀nmẹ, bosọ yin hinhẹn jẹla sọn ogbẹ̀ heyin Jiwheyẹwhe tọn mẹ.’—Efesunu lẹ 4:17-19.
8. Nawẹ mí sọgan yin hinhẹn pegan ganji nado pehẹ whlepọn yise tọn lẹ po kọdetọn dagbe po gbọn?
8 Nuhudo sọ tin na nuflinmẹ Jiwheyẹwhe tọn lẹ ga na yé nọ hẹn mí lodo nado doakọnna whlepọn susu mítọn lẹ to “ojlẹ opodo . . . tọn” ehe mẹ wutu. (Daniẹli 12:4) Matin nuflinmẹ mọnkọtọn lẹ mí na lẹzun “sisètọ nuwọntọ” lẹ. (Jakobu 1:25) Ṣigba Owe-wiwe pinplọn po sọwhiwhe po na mẹdetiti podọ to opli agun tọn lẹ ji po alọgọnamẹnu owe he wá sọn “afanumẹ, nugbonọ nuyọnẹntọ” dè tọn lẹ po na gọalọna mí nado pehẹ whlepọn yise tọn lẹ po kọdetọn dagbe po. (Matiu 24:45-47) Awuwledainanu gbigbọmẹ tọn mọnkọtọn lẹ na hẹn mí penugo nado mọ nuhe mí dona wà nado hẹn homẹ Jehovah tọn hùn to whenuena mí mọ mídelẹ to ninọmẹ mẹwhlepọn tọn lẹ mẹ.
Azọngban Titengbe Opli Mítọn lẹ Tọn
9. Mẹnu lẹ wẹ yin ‘nunina to sunnu lẹ mẹ,’ podọ nawẹ yé nọ gọalọna yisenọ hatọ lẹ gbọn?
9 Nuhudo mítọn na nuflinmẹ Jiwheyẹwhe tọn lẹ nọ yin jijẹ e kọ̀n to aliho dopo mẹ to opli Klistiani tọn lẹ ji, fie nudọnamẹ lẹ nọ yin awuwlena gbọn mẹmẹsunnu dide lẹ dali te. Apọsteli Paulu wlan dọ to whenuena Jesu ‘hẹji yì aga, e wle mẹmẹglọ lẹ; e na nunina to sunnu lẹ mẹ.’ Paulu yidogọ dọmọ: “[Klisti] sọ yí na mẹdelẹ azọ́n apọsteli tọn; podọ na mẹdelẹ azọ́n yẹwhegán tọn; na mẹdelẹ azọ́n evangelisti tọn; na mẹdelẹ azọ́n lẹngbọhọtọ tọn po azọ́n mẹpinplọn tọn po; nado hẹn mẹwiwe lẹ sọgbe, na devizọnwiwa, nado hẹn agbasa Klisti tọn dote.” (Efesunu lẹ 4:8, 11, 12) Lehe mí sọgan dopẹ́ do sọ dọ ‘nunina to sunnu lẹ mẹ’—yèdọ mẹho dide—ehelẹ nọ deanana ayidonugo mítọn hlan nuflinmẹ Jehovah tọn lẹ ji to whenuena mí pli dopọ na sinsẹ̀n-bibasi!
10. Etẹwẹ yin nuagokun tangan he tin to Heblu lẹ 10:24, 25 mẹ?
10 Pinpẹn-nutọn-yinyọnẹn na awuwledainanu he wá sọn olọn mẹ lẹ na whàn mí nado nọ tin to opli atọ́n agun tọn lẹ ji to osẹ dopodopo mẹ. Nuhudo nado nọ pli dopọ to gbesisọmẹ yin nùzindeji gbọn Paulu dali. E wlan dọmọ: “Mì gbọ mí nisọ nọ lẹn mínọzo tọn pọ́n nado nọ jlahomẹdona to owanyi po azọ́n dagbe lẹ po mẹ: to ma gbẹ́ opli míde tọn mẹ, dile jijọ mẹdelẹ tọn te; ṣigba mí ni nọ to homẹjladona mínọzo; humọ na le mì mọ dọ azán lọ to sisẹpọ.”—Heblu lẹ 10:24, 25.
11. Nawẹ mí nọ mọaleyi sọn opli sẹmẹsẹmẹ tọn mítọn lẹ dopodopo mẹ gbọn?
11 Be hiẹ nọ mọnukunnujẹ nuhe opli mítọn lẹ nọ wà na mí lẹ mẹ ya? Oplọn sẹmẹsẹmẹ Atọ̀họ̀-Nuhihọ́ Lọ Tọn nọ hẹn yise mítọn lodo, nọ gọalọna mí nado setonuna nuflinmẹ Jehovah tọn lẹ, bosọ nọ na huhlọn mí nado nọavunte sọta “gbigbọ aihọn tọn.” (1 Kọlintinu lẹ 2:12; Owalọ lẹ 15:31) To Opli Togunmẹ hodidọ tọn ji, hodọtọ lẹ nọ ze nudọnamẹ lẹ donukọnnamẹ sọn Ohó Jiwheyẹwhe tọn mẹ, he nọ bẹ nuflinmẹ Jehovah tọn lẹ po “ohó ogbẹ̀ madopodo” jiawu Jesu tọn lẹ po hẹn. (Johanu 6:68; 7:46; Matiu 5:1–7:29) Azọ́nyinyọnẹn mẹpinplọn tọn mítọn lẹ nọ yin gingàn to Wehọmẹ Lizọnyizọn Yẹwhehọluduta tọn ji. Opli Sinsẹ̀nzọn tọn yin nuhọakuẹ taun to alọgigọna mí nado hẹn nuzedonukọnnamẹ wẹndagbe tọn mítọn sọn whédegbè-jẹ-whédegbè, to gọyìpọn lẹ whenu, to plọnmẹ Biblu whégbè tọn lẹ whenu, podọ to wunmẹ lizọnyizọn mítọn tọn devo lẹ mẹ pọnte deji. Pipli he whè hugan Oplọn Agunwe tọn nọ na mí dotẹnmẹ hundote daho nado dọ hogbe he nọ saba bẹ nuflinmẹ Jiwheyẹwhe tọn lẹ hẹn lẹ.
12, 13. Nawẹ omẹ Jiwheyẹwhe tọn lẹ to aigba Asia tọn dopo ji ko do pinpẹn-nutọn-yinyọnẹn hia na opli Klistiani tọn lẹ gbọn?
12 Tintin to opli agun tọn lẹ ji to gbesisọmẹ nọ yinuwa nado flin mí gbedide Jiwheyẹwhe tọn lẹ bosọ nọ gọalọ nado hẹn mí lodo to gbigbọ-liho to awhànfunfun, awusinyẹnnamẹ akuẹzinzan tọn, po whlepọn yise mítọn tọn devo lẹ po nukọn. Klistiani 70 delẹ to aigba Asia tọn dopo ji heyin yinyan sọn owhé yetọn lẹ gbè bosọ yin hinhẹn po huhlọn po nado nọ̀ zungbo de mẹ tindo numọtolanmẹ sisosiso nujọnu-yinyin opli lẹ tọn. Na gbemima nado to pipli dopọ to gbesisọmẹ zọnmii wutu, yé lẹkọ yì otò he ko yin tintlẹ́n gbọn awhàn dali yetọn mẹ, keje pipòtọ Plitẹnhọ Ahọluduta tọn lọ, bo vọ́ ẹ gbá do zungbo lọ ṣẹnṣẹn.
13 To akọndidona owhe susu awhànfunfun tọn to adà devo otò dopolọ tọn mẹ godo, omẹ Jehovah tọn lẹ gbẹ́ pò to sinsẹ̀nzọnwà po zohunhun po. Dopo to mẹho lẹ mẹ to lẹdo enẹ mẹ yin kinkanse dọ: “Etẹwẹ ko yin alọgọnamẹnu hugan to mẹmẹsunnu lẹ hinhẹn dopọ mẹ?” Etẹwẹ yin gblọndo etọn? “To owhe 19 gblamẹ, mí ma gọ̀n ma basi opli dopo tata pọ́n gbede gba. To whedelẹnu na bọmbu lẹ dide kavi awusinyẹnnamẹnu devo lẹ wutu, delẹ to mẹmẹsunnu lẹ mẹ sọgan gọ̀n ma jẹ nọtẹn opli lọ tọn, ṣigba mí ma zẹhudo opli depope ji pọ́n gbede.” Na jide tọn mẹmẹsunnu po mẹmẹyọnnu vivẹ ehelẹ po yọ́n pinpẹn nujọnu-yinyin ‘ma nado gbẹ́ pipli dopọ mídetiti tọn lẹ tọn dai tọn.’
14. Etẹwẹ mí sọgan plọn sọn aṣa Anna mẹhomẹ lọ tọn mẹ?
14 Anna asuṣiọsi owhe 84-mẹvi “ma fọnyi sọn tẹmpli mẹ [gbede].” Taidi kọdetọn de, ewọ tin to finẹ to whenuena oviyẹyẹ Jesu yin hinhẹnwa finẹ to madẹnmẹ to jiji etọn godo. (Luku 2:36-38) Be hiẹ yí ì do basi gbemima de ma nado nọ gọ̀n opli lẹ ya? Be hiẹ to nuhe go hiẹ pé lẹpo wà nado tin to adà plidopọ tọn lẹ po plidopọ agbegbe tọn lẹpo po ji ya? Nudọnamẹ alemọyi tọn gbigbọmẹ tọn he nọ yin mimọyi to pipli ehelẹ ji nọ na kunnudenu họnwun mí dọ Otọ́ olọn mẹ tọn mítọn nọ penukundo omẹ etọn lẹ go. (Isaia 40:11) Nujijọ mọnkọtọn lẹ sọ nọ ze ayajẹ daga, podọ tintin to finẹ mítọn nọ do pinpẹn-nutọn-yinyọnẹn mítọn na nuflinmẹ Jehovah tọn lẹ hia.—Nẹhemia 8:5-8, 12.
Yin Kinklandovo Gbọn Nuflinmẹ Jehovah Tọn lẹ Dali
15, 16. Nawẹ pipayi nuflinmẹ Jehovah tọn lẹ go nọ yinuwado walọyizan mítọn lẹ ji gbọn?
15 Pipayi nuflinmẹ Jiwheyẹwhe tọn lẹ go nọ gọalọ nado klán mí dovo sọn aihọn ylankan ehe go. Di dohia, tonusisena nuflinmẹ Jiwheyẹwhe tọn lẹ nọ glọnalina mí sọn mahẹ tintindo to fẹnnuwiwa zanhẹmẹ tọn mẹ. (Deutelonomi 5:18; Howhinwhẹn lẹ 6:29-35; Heblu lẹ 13:4) Whlepọn nado dolalo, nado yin nugbomadọtọ, kavi nado fìnnuyi sọgan yin dududeji po kọdetọn dagbe po gbọn tonusisena nuflinmẹ sọn olọn mẹ wá lẹ dali. (Eksọdusi 20:15, 16; Levitiku 19:11; Howhinwhẹn lẹ 30:7-9; Efesunu lẹ 4:25, 28; Heblu lẹ 13:18) Pipayi nuflinmẹ Jehovah tọn lẹ go sọ nọ glọnalina mí sọn hlọnvivi, mẹhẹndohomẹ, kavi mẹnudidọ mẹhẹngble tọn mẹ.—Levitiku 19:16, 18; Psalm 15:1, 3.
16 Gbọn tonusisena nuflinmẹ Jiwheyẹwhe tọn lẹ dali, mí na yin mẹhe yè klandowiwe, kavi klandovo, na sinsẹ̀nzọn etọn. Podọ lehe e yin nujọnu do sọ nado nọ kada na aihọn ehe! To odẹ̀ mẹ hlan Jehovah to ozán godo tọn gbẹzan aigba ji tọn etọn mẹ, Jesu basi ovẹvivẹ ehe do ota hodotọ etọn lẹ tọn mẹ dọmọ: “Yẹn ko na ohó towe yé; aihọn sọ gbẹwanna yé, na yé mayin aihọn tọn wutu, yèdọ dile yẹn mayin aihọn tọn. Yẹn ma basi okanbiọ dọ, hiẹ ni fọ̀ yé sọn aihọn mẹ gba, ṣigba dọ hiẹ ni whlá yé sọn oylan mẹ. Yé mayin aihọn tọn, yèdọ dile yẹn mayin aihọn tọn do. Lẹ̀ yé wé to nugbo towe mẹ: ohó towe wẹ nugbo.” (Johanu 17:14-17) Mì gbọ mí ni to bowlena Ohó Jiwheyẹwhe tọn zọnmii, he nọ klán mí dovo na sinsẹ̀nzọn wiwe etọn.
17. Etẹwẹ sọgan jọ eyin mí gbẹkọ nuflinmẹ Jiwheyẹwhe tọn lẹ go, enẹwutu etẹwẹ mí dona wà?
17 Taidi devizọnwatọ Jehovah tọn lẹ, mí jlo nado gbọṣi alọkẹyi mẹ na sinsẹ̀nzọn etọn. Ṣigba, eyin mí gbẹkọ nuflinmẹ etọn lẹ go, mí na yin dududeji gbọn gbigbọ aihọn ehe tọn dali, he nọ yin zizedaga gbọn suhugan hodidọ, owe, ayidedai, po walọyizan etọn lẹ po dali. Podọ na jide tọn mí ma na jlo nado lẹzun owanyina akuẹtọ lẹ, awagundotọ, saklanọ, mayọndagbenọ, nugbomadọtọ, fifiẹtọ, tasinyẹntọ, goyitọ, wanyina gbẹdudu hú Jiwheyẹwhe tọ́ lẹ gba—yèdọ nado donu vude poun go to walọyizan he nọ yin didohia gbọn mẹhe yin hinhẹn jẹla sọn Jiwheyẹwhe dè lẹ dali mẹ. (2 Timoti 3:1-5) To whenuena e yindọ mí ko to gbẹnọ biọ azán godo titonu ylankan ehe tọn lẹ mẹ sisosiso, mì gbọ mí ni nọ to dẹ̀ho zọnmii na alọgọ sọn olọn mẹ wá na mí nido sọgan zindonukọn nado to pipayi nuflinmẹ Jehovah tọn lẹ go bo gbọnmọ dali ‘tin to aṣeji gando ohó etọn go.’—Psalm 119:9.
18. Pipayi nuflinmẹ Jiwheyẹwhe tọn lẹ go na hẹn mí nado ze afọdide nujikudo tọn tẹlẹ?
18 Nuflinmẹ Jehovah tọn lẹ nọ wà nususu hugan hinhẹn mí tin to aṣeji gando nuhe mí ma dona wà lẹ go poun. Pipayi nuflinmẹ etọn lẹ go na hẹn mí nado ze afọdide nujikudo tọn, whàn mí nado dejido Jehovah go mlẹnmlẹn podọ nado yiwanna ẹn po ahun, alindọn, ayiha, gọna huhlọn mítọn lẹpo po. (Deutelonomi 6:5; Psalm 4:5; Howhinwhẹn lẹ 3:5, 6; Matiu 22:37; Malku 12:30) Nuflinmẹ Jiwheyẹwhe tọn lẹ sọ nọ whàn mí nado yiwanna kọmẹnu mítọn lẹ. (Levitiku 19:18; Matiu 22:39) Mí nọ do owanyi hia hlan Jiwheyẹwhe po kọmẹnu po na taun tọn gbọn ojlo sọn olọn mẹ wá wiwà po “oyọnẹn Jiwheyẹwhe tọn” he nọ namẹ ogbẹ̀ po mimá hẹ mẹdevo lẹ dali.—Howhinwhẹn lẹ 2:1-5.
Pipayi Nuflinmẹ Jehovah Tọn lẹ Go Nọ Zẹẹmẹdo Ogbẹ̀!
19. Nawẹ mí sọgan dohia mẹdevo lẹ dọ e yọnbasi bosọ yin alemọyinu nado setonuna nuflinmẹ Jehovah tọn lẹ gbọn?
19 Eyin mí payi nuflinmẹ Jehovah tọn lẹ go bosọ gọalọna mẹdevo lẹ nado wàmọ, mí na whlẹn mídelẹ po mẹhe dotoaina mí lẹ po. (1 Timoti 4:16) Nawẹ mí sọgan dohia mẹdevo lẹ dọ tonusisena nuflinmẹ Jehovah tọn lẹ yọnbasi bosọ yin alemọyinu na taun tọn gbọn? Gbọn nunọwhinnusẹ́n Biblu tọn lẹ yíyí-do-yizan mẹ to gbẹzan mídetiti tọn mẹ dali wẹ. Mẹhe ‘tindo ojlo na ogbẹ̀ madopodo lẹ’ na gbọnmọ dali tindo kunnudenu dọ aliho nuyiwa tọn heyin zizedai to Ohó Jiwheyẹwhe tọn mẹ wẹ yin dehe yọ́n hugan na taun tọn na mẹde nado doafọna. (Owalọ lẹ 13:48) Yé nasọ mọdọ ‘Jiwheyẹwhe tin to ṣẹnṣẹn mítọn nugbonugbo’ bo nasọ yin whinwhàn nado kọnawudopọ hẹ mí to sinsẹ̀n-bibasi hlan Oklunọ Nupojipetọ Jehovah mẹ.—1 Kọlintinu lẹ 14:24, 25.
20, 21. Nuflinmẹ Jiwheyẹwhe tọn lẹ po gbigbọ etọn po na hẹn mí penugo nado wà etẹ?
20 Gbọn nukọnzinzindo nado to Owe-wiwe plọn, yí nuhe mí plọn lẹ do yizan mẹ, podọ alọkikẹyi dagbenu awuwledainanu gbigbọmẹ tọn Jehovah tọn lẹ to gigọ́mẹ dali, mí na wá yiwanna nuflinmẹ etọn lẹ taun. Eyin mí setonuna yé, nuflinmẹ ehelẹ na gọalọna mí nado ze ‘gbẹtọ-yinyin yọyọ lọ dogo heyin didá sọgbe hẹ ojlo Jiwheyẹwhe tọn to dodowiwa nugbo tọn po nugbonọ-yinyin po mẹ.’ (Efesunu lẹ 4:20-24) Nuflinmẹ Jehovah tọn lẹ po gbigbọ wiwe etọn po na hẹn mí penugo nado do owanyi, ayajẹ, jijọho, linsinsinyẹn, homẹdagbe, dagbewà, yise, walọmimiọn, mawazẹjlẹgo hia—yèdọ jẹhẹnu he gbọnvo tlala lẹ na walọyizan aihọn he mlọnai to huhlọn Satani tọn mẹ tọn! (Galatianu lẹ 5:22, 23; 1 Johanu 5:19) Enẹwutu, mí sọgan dopẹ́ eyin mí nọ yin finflin nubiọtomẹsi Jehovah tọn lẹ to Biblu pinplọn mẹdetiti tọn mítọn whenu, gbọn mẹho heyin dide lẹ dali, podọ to opli lẹ, plidopọ lẹ, po plidopọ agbegbe tọn mítọn lẹ po ji.
21 Na míwlẹ nọ payi nuflinmẹ Jehovah tọn lẹ go wutu, mí nọ penugo nado jaya etlẹ yin to whenuena mí to yaji na dodowiwa tọn wutu. (Luku 6:22, 23) Mí nọ pọnhlan Jiwheyẹwhe dè nado whlẹn mí sọn ninọmẹ budonamẹ tọn hugan lẹ mẹ. Enẹ yin nujọnu taun todin he akọta lẹpo to yinyin bibẹpli na “awhàn azán daho Jiwheyẹwhe Ganhunupo tọn” to Amagẹdọni.—Osọhia 16:14-16.
22. Etẹwẹ dona yin gbemima mítọn gando nuflinmẹ Jehovah tọn lẹ go?
22 Eyin mí jlo nado mọ nunina majẹhẹ ogbẹ̀ madopodo tọn yí, mí dona yiwanna nuflinmẹ Jehovah tọn lẹ taun bosọ nọ payi yé go po ahun lẹpo po. Enẹwutu mì gbọ mí ni tindo gbigbọ psalm-kàntọ lọ tọn mẹhe jihàn dọmọ: “[Dodo wẹ nuflinmẹ] towe lẹ kakadoi: na nuyọnẹn mi, yẹn nasọ nọgbẹ̀.” (Psalm 119:144) Podọ mì gbọ mí ni do gbemima he sọawuhia sọn hogbe psalm-kàntọ lọ tọn lẹ mẹ hia dọmọ: “Yẹn dawhá hlan we [Jehovah]; whlẹn mi, yẹn nasọ nọ payi [nuflinmẹ] towe lẹ go.” (Psalm 119:146) Mọwẹ, gbọn hogbe po nuyiwa po dali, na nugbo tọn mì gbọ mí ni dohia dọ mí yiwanna nuflinmẹ Jehovah tọn lẹ taun.
Nawẹ Hiẹ Na Na Gblọndo Gbọn?
• Nawẹ psalm-kàntọ lọ pọ́n nuflinmẹ Jehovah tọn lẹ hlan gbọn?
• Naegbọn mí tindo nuhudo nuflinmẹ Jiwheyẹwhe tọn lẹ tọn?
• Azọngban tẹwẹ opli mítọn lẹ nọ yiwà gando nuhe dù nuflinmẹ sọn olọn mẹ wá lẹ go?
• Nawẹ nuflinmẹ Jehovah tọn lẹ nọ klán mí dovo sọn aihọn ehe go gbọn?
[Kanbiọ Oplọn Tọn Lẹ]
[Yẹdide to weda 15]
Psalm-kàntọ lọ yiwanna nuflinmẹ Jehovah tọn lẹ taun
[Yẹdide to weda 17]
To apajlẹ Anna tọn hihodo mẹ, be hiẹ nọ yí ì do basi gbemima towe ma nado gọ̀n opli lẹ ya?
[Yẹdide to weda 18]
Tonusisena nuflinmẹ Jehovah tọn lẹ nọ klán mí dovo taidi gbẹtọ wiwé heyin alọkẹyi na sinsẹ̀nzọn etọn lẹ