Lilatọ Ahọluduta Tọn lẹ Na Linlin

Jehovah Nọ Wleawuna Gbọjẹtẹn de Na Omẹ Etọn Lẹ

GBỌJẸTẸN he tindo yẹtẹn to aliho osó ji tọn de wẹ yin bẹtẹn homẹhunhun tọn tlala de na gbejizọnlin-basitọ he nuṣikọna de. To Népal, gbọjẹtẹn mọnkọtọn lẹ nọ yin yiylọdọ chautara. Chautara nujọnu tọn sọgan yin mimọ bọdo atin banian he vùn de go, yèdọ yẹtẹn de fihe yè na sinai bo gbọjẹ te. Awuwiwlena Chautara de yin nuyiwa homẹdagbe tọn, podọ suhugan mẹhe nọ wleawuna ẹn lẹ tọn ma nọ yin yinyọnẹn.

Numimọ lẹ sọn Népal do lehe Jehovah Jiwheyẹwhe ko lẹzun Asisa ayajẹ tọn po kọfanamẹ gbigbọmẹ tọn po hlan “gbejizọnlin-basitọ” susu he nuṣikọna lẹ to titonu ehe mẹ do hia.—Psalm 23:2.

Lil Kumari nọ nọ tòdaho whanpẹnọ Pokhara tọn mẹ, fie Osó Himalaya tọn lẹ he osin-ago ṣinyọ́n nọ yin mimọhlan to aliho mẹdọndogo tọn de mẹ te. Ṣigba na yinyin tuklado dogbọn ninọmẹ akuẹzinzan whẹndo tọn lẹ dali wutu, Lil Kumari lẹndọ todido nujọnu tọn de matin gba. To whenuena dopo to Kunnudetọ Jehovah tọn lẹ mẹ dla ẹ pọ́n, ewọ yin whinwhàn gbọn todido he họnwun Biblu tọn dali bosọ biọ plọnmẹ Biblu whégbè tọn de to afọdopolọji.

Dile etlẹ yindọ Lil Kumari duvivi oplọn lọ tọn, e ma bọawu nado zindonukọn na nukundiọsọmẹ sinsinyẹn whẹndo tọn wutu. Ṣigba ewọ ma jogbe gba. E nọ yì opli Klistiani tọn lẹ to gbesisọmẹ bosọ nọ yí nuhe e to pinplọn do yizan mẹ, na titengbe tọn do whẹho mẹmẹglọ-yinyin asi tọn ji. Taidi kọdetọn de, asu etọn po onọ̀ etọn po wá yọnẹn dọ oplọn Biblu tọn Lil Kumari tọn to alemọyi hẹnwa na whẹndo lọ blebu.

Asu etọn po hẹnnumẹ delẹ po to Ohó Jiwheyẹwhe tọn plọn todin. To plidopọ agọe tọn heyin bibasi to Pokhara de ji, Lil Kumari duvivi tito-to-whinnu lọ tọn gọna 15 to hẹnnumẹ etọn lẹ mẹ. E dọmọ: “Owhé ṣie ko lẹzun gbọjẹtẹn de na whẹndo mítọn ko kọndopọ to sinsẹ̀n-bibasi nugbo mẹ todin, podọ yẹn ko mọ jijọho nugbo ayiha mẹ tọn.”

Dile etlẹ yindọ ogbẹ́ kinklan ma sọgbe hẹ osẹ́n to Népal, e gbẹsọ tindo nuyiwadomẹji huhlọnnọ de do aliho gbẹzan gbẹtọ lẹ tọn ji. Gbọnmọ dali, mẹsusu tindo ojlo to nuhe Biblu tindo nado dọ gando zẹnsisọ po mẹnukuntamahopọn po go. Pinplọn dọ “Jiwheyẹwhe mayin mẹnukuntahopọntọ” diọ gbẹzan Surya Maya po whẹndo etọn po tọn tlala.—Owalọ lẹ 10:34.

Surya Maya yin ayimajainọ gbọn whẹdida mawadodo tọn heyin ogbẹ́ kinklan tọn po agbàn pinpẹn aṣa he hẹnai sisosiso tọn lẹ po dali. Taidi yọnnu mẹdezejotọ de, na owhe susu Surya Maya biọ alọgọ sọn yẹwhe boṣiọ tọn etọn lẹ dè. Ṣigba odẹ̀ etọn lẹ ma mọ gblọndo yí gba. To gbèdopo whenuena e to avivi na alọgọ, ovivi owhe-ṣidopo-mẹvi etọn Babita dọnsẹpọ ẹ bo kanse dọmọ: “Naegbọn hiẹ do to avivi na alọgọ to yẹwhe he ma sọgan wà nudepope lẹ nukọn?”

E wá yindọ onọ̀ Babita tọn to Biblu plọn hẹ dopo to Kunnudetọ Jehovah tọn lẹ mẹ. Po zohunhun po Babita basi oylọna onọdaho etọn wá opli Klistiani tọn de. To whenuena Surya Maya yì, e paṣa ẹ nado mọ gbẹtọ ogbẹ́ voovo tọn lẹ nado to vivi gbẹdido ode awetọ tọn dù matin nuvẹun depope. Ewọ biọ plọnmẹ Biblu whégbè tọn de to afọdopolọji. Dile etlẹ yindọ ehe dekọtọn do yinyin didesẹ sọn ogbẹ́ mẹ gbọn kọmẹnu etọn lẹ dali, ewọ ma jẹflumẹ gba; mọjanwẹ nugopipe etọn he tindo dogbó na nuhe dù wehihia po wekinkan po ma glọnalina ẹn sọn nukọnyiyi gbigbọmẹ tọn tintindo mẹ do niyẹn.

Owhe ṣinatọ̀n ko juwayi, podọ hagbẹ ṣidopo whẹndo etọn tọn, he bẹ asu etọn po ovi atọ̀n po hẹn ko lẹzun Kunnudetọ Jehovah tọn lẹ. Surya Maya yin lizọnyizọnwatọ whenu-gigọ́ tọn de todin, gbehosọnalitọ whepoponu tọn de, he gbọn ayajẹ dali do to alọgọna mẹdevo lẹ nado de agbàn pinpẹn yetọn lẹ sẹ to gbọjẹtẹn nujọnu tọn lọ ehe Jehovah kẹdẹ wẹ sọgan wleawuna mẹ.