Be Hiẹ Flin Ya?

Be hiẹ ko yọ́n pinpẹn zinjẹgbonu agọe Atọ̀họ̀-Nuhihọ́ Lọ Tọn lẹ hihia tọn ya? Eyọ́n, pọ́n vlavo eyin hiẹ sọgan na gblọndo na kanbiọ he bọdego helẹ:

• Etẹwẹ yin onú dodonu tọn lẹ nado didẹ̀ gbèmanọpọ mítọn hẹ mẹdevo?

Mí dona yọnẹn jẹnukọn whẹ́ dọ mímẹpo wẹ yin hunhundonuvo hlan linlẹn po walọyizan agọ̀ lẹ po. Enẹgodo mí dona lẹnnupọn sisosiso eyin míwlẹ wẹ yin asisa nuhahun lọ tọn kakati ni yin omẹ awetọ.—15/8, weda 23.

• Whetẹnu wẹ “ojlẹ hẹngọ̀ onú popo tọn,” heyin nùdego to Owalọ lẹ 3:21 mẹ na wá?

Hinhẹngọwa lọ na wá do ogbẹ́ awe ji. Tintan, hinhẹngọwa do ninọmẹ paladisi gbigbọmẹ tọn mẹ bẹjẹeji sọn 1919 gbọ́n. Hinhẹngọwa yinukọn dogọ de na wá to whenuena aigba mítọn na yin hinhẹngọwa ninọmẹ paladisi yinukundomọ tọn de mẹ.—1/9, weda 17, 18.

• Dile e yin ayidego do to Howhinwhẹn lẹ 6:6-8 mẹ, nawẹ zánwhlan he ma tindo ogán penugo nado wleawuna apajlẹ dagbe de na mí gbọn?

To pipli zánwhlan tọn de mẹ, ahọsi dopo nọ tin, ṣigba e nọ yin ahọsi to linlẹn azin lẹ dido po onọ̀ pipli lọ tọn yinyin po mẹ poun. Zánwhlan lẹ yin azọ́n sinsinyẹnwatọ, podọ mọwẹ mílọsu lẹ dona yin do, bo vánkan nado hẹn azọ́n mítọn pọnte, yèdọ eyin ogán de ma tlẹ tin nado deanana mí.—15/9, weda 26.

• Be dọdai Hulda tọn, dile e yin kinkàndai to 2 Ahọlu lẹ 22:20 mẹ, dọ Josia na kú to “jijọho mẹ,” sọgbe ya, to whenuena e yindọ ewọ yin awugblena sinsinyẹn to awhàngbenu?

Mọwẹ, e kú to jijọho mẹ to linlẹn lọ mẹ dọ e kú jẹnukọnna nugbajẹmẹji 609-607 J.W.M. tọn, to whenuena Babilọninu lẹ doslá lẹdo Jelusalẹm bo và ẹ sudo.—15/9, weda 30.

• Naegbọn e do yin hogbe mẹpipa tọn na Sọlọmọni nado basi zẹẹmẹ asi de tọn taidi ‘agbanlin asi de podọ otẹgbọẹ whanpẹnọ osó ji tọn de’? (Howhinwhẹn lẹ 5:18, 19)

Otẹgbọẹ asi, kavi ogbọ́ osó ji tọn, yin abọẹnọtọ to jọwamọ-liho bosọ yọnwhanpẹ to awusọhia mẹ. Ṣogan, e sọgan lùntọ́n bosọ jivi to osókla ṣẹnṣẹn, yèdọ nọtẹn he sinyẹnawu nado jẹ bọ núdùdù ma sù sọmọ te lẹ.—1/10, weda 30, 31.

• Mẹnu wẹ Henry Grew po George Storrs po yin?

Sunnu awe ehelẹ nọgbẹ̀ to owhe 1800 tọn lẹ mẹ bosọ yin Biblu plọntọ zohunhunnọ lẹ. Grew plọn dọ Atọ̀n-to-dopomẹ ma sọgbe hẹ Owe-wiwe, kẹdẹdile sinsẹ̀n-nuplọnmẹ jọmaku alindọn tọn po olọnzomẹ po tọn lẹ yin do. Storrs yọnẹn dọ mẹdelẹ na mọ ale ogbẹ̀ mavọmavọ tọn yí to aigba ji. Yé omẹ awe lẹ yin nukọnjẹnamẹtọ Charles Taze Russell tọn, mẹhe bẹ zinzinjẹgbonu linlinnamẹwe ehe tọn jẹeji to 1879.—15/10, weda 26-30.

• Nawẹ Kunnudetọ Jehovah tọn lẹ nọ pọ́n nuyiwa amasinzọnwiwa tọn he bẹ ohùn mẹdetiti tọn yiyizan hẹn lẹ hlan gbọn?

To nuyise yetọn zize sinai do Biblu ji mẹ, yé ma nọ dè ohùn yedetiti tọn dai bọ to godo mẹ nọ yí ì do lanmẹ taidi ohùndido gba. Klistiani dopodopo nọ basi nudide lehe ohùn etọn na yin yiyizan gbọn to nuyiwa mẹzizẹ tọn, mẹtẹnpọn amasinzọnwiwa tọn, kavi nukunpedomẹgo amasinzọnwiwa tọn de whenu. E dona gbadopọnna nuhe Biblu dọ gando ohùn go bosọ flin dọ emi yin kinklandowiwe mlẹnmlẹn hlan Jiwheyẹwhe.—15/10, weda 30, 31.

• Nuhudo titengbe tẹwẹ dodinnanu heyin bibasi to bẹjẹeji owhe ehe tọn dehia to Kunnudetọ Jehovah tọn lẹ ṣẹnṣẹn lẹdo aihọn pé?

Nuhudo tin na Plitẹnhọ Ahọluduta tọn he hugan 11 000 to akọta he to nukunhùn lẹ mẹ, fie akuẹ ma tin sọmọ te lẹ. Nunina lẹ sọn Klistiani lẹ dè to aigba susu lẹ ji to yinyin yiyizan nado gọalọna gbigbá nọtẹn opli tọn he pemẹnu lẹ.—1/11, weda 30.

• Etẹwẹ yin delẹ to hogbe-dowhenu tọn heyin yiyizan to Biblu mẹ he gando sinsẹ̀n-bibasi go lẹ mẹ?

Dopo wẹ lei·tour·giʹa, heyin lilẹdogbedevomẹ dọ “sinsẹ̀nzọn gbangba tọn.” Devo wẹ la·treiʹa, heyin lilẹdogbedevomẹ dọ “sinsẹ̀nzọn wiwe.” (Heblu lẹ 10:11; Luku 2:36, 37)—15/11, weda 11, 12.

• Etẹwẹ yin nuplọnmẹ dodonu tọn dopo he mí sọgan plọn sọn kandai Biblu tọn mẹ gando Adam po Evi po go?

Alọsọakọ́n mẹdekannujẹ sọn Jehovah Jiwheyẹwhe dè tọn depope na yin nululu mlẹnmlẹn.—15/11, weda 24-7.

• Kunnudenu Owe-wiwe tọn tẹwẹ tin dọ Jiwheyẹwhe nọ na huhlọn devizọnwatọ etọn lẹ?

Davidi, Habbakuk, po apọsteli Paulu po wleawuna kunnudenu mẹdetiti tọn lẹ hlan nugbo lọ dọ Jehovah Jiwheyẹwhe ko hẹn yé lodo, kavi na huhlọn yé. (Psalm 60:12; Habbakuk 3:19; Filippinu lẹ 4:13) Enẹwutu, mí sọgan deji dọ Jiwheyẹwhe tindo ojlo bosọ penugo nado hẹn mí lodo ga.—1/12, weda 10, 11.