Etẹwutu Wẹ Hiẹ to Jiwheyẹwhe Sẹ̀n?

Ahọlu budisi-Jiwheyẹwhe tọ́ de na ayinamẹ ehe visunnu etọn to ojlẹ de mẹ dọmọ: “Yọ́n Jiwheyẹwhe otọ́ towe tọn, bo nọ yí ayiha pipé de do sẹ̀n ẹn po [alindọn homẹhunhun] tọn de po.” (1 Otannugbo lẹ 28:9) E họnwun dọ, Jehovah nọ jlo dọ devizọnwatọ etọn lẹ ni sẹ̀n ẹn po ahun pẹdido, yèdọ pinpẹn-nutọn-yinyọnẹn tọn lẹ po.

TAIDI Kunnudetọ Jehovah tọn lẹ, mí nọ yigbe po awuyiya po dọ to whenuena opagbe Biblu tọn lẹ yin zẹẹmẹ basina to tintan whenu, ahun mítọn lẹ nọ gọ́ po numọtolanmẹ pinpẹn-nutọn-yinyọnẹn tọn po. Egbesọegbesọ, mí nọ plọn onú yọyọ de gando lẹndai Jiwheyẹwhe tọn lẹ go. Dile mí plọnnu gando Jehovah go sọ, mọwẹ ojlo mítọn nado ‘yí ahun pipé de po alindọn homẹhunhun tọn po do sẹ̀n ẹn’ nọ sinyẹn deji do niyẹn.

Susu mẹhe lẹzun Kunnudetọ Jehovah tọn lẹ nọ zindonukọn nado to Jehovah sẹ̀n po ayajẹ susugege po to gbẹzan yetọn lẹpo mẹ. Etomọṣo, Klistiani delẹ nọ bẹjẹeji ganji, ṣigba dile ojlẹ to yìyì, yé nọ hẹn whẹwhinwhẹ́n mẹwhinwhàn tọn he nọ whàn mí nado to Jiwheyẹwhe sẹ̀n lẹ bu. Be enẹ ko jọ do hiẹ go wẹ ya? Eyin e ko jọ, ma hẹn todido bu blo. Ayajẹ heyin hinhẹnbu sọgan yin hinhẹn gọwá. Gbọnna?

Lẹnnupọndo Dona Towe lẹ Ji

Tintan, lẹnayihamẹpọn do dona egbesọegbesọ tọn he hiẹ nọ mọyi sọn Jiwheyẹwhe dè lẹ ji. Lẹnnupọndo nunina dagbe Jehovah tọn lẹ ji: alọnuzọ́n susugege nudida tọn etọn lẹ—he tin na mẹlẹpo mahopọnna teninọ ogbẹ́ kavi akuẹzinzan tọn—awuwledainanu jọwamọ tọn etọn lẹ heyin núdùdù po núnùnù po, agbasalilo jẹ obá de mẹ he hiẹ nọ duvivi etọn, kavi oyọnẹn nugbo Biblu tọn towe, podọ dehe yin titengbe hugan, nunina Visunnu etọn tọn. Okú etọn hùn aliho dote na we nado sẹ̀n Jiwheyẹwhe po ayihadawhẹnamẹnu wiwe de po. (Johanu 3:16; Jakobu 1:17) Dile hiẹ lẹnayihamẹpọn do dagbewà Jiwheyẹwhe tọn ji sọ, mọwẹ pinpẹn-nutọn-yinyọnẹn towe na ewọ na whẹ́n deji do niyẹn. Whenẹnu wẹ ahun towe na whàn we nado sẹ̀n ẹn sọn pinpẹn-nutọn-yinyọnẹn na nuhe e ko wà na we lẹpo mẹ. Matin ayihaawe hiẹ na jẹ numọtolanmẹ lọ tindo ji whladopo dogọ taidi psalm-kàntọ lọ mẹhe wlan dọmọ: “OKLUNỌ E Jiwheyẹwhe ṣie, susu wẹ azọ́njiawu he hiẹ ko wà, po linlẹn towe po hlan míwlẹ dali: yè ma sọgan hia yé hlan we kannukannu gba. . . . Yé hú onú hihia.”—Psalm 40:5.

Hogbe ehelẹ yin kinkàn gbọn Davidi dali, yèdọ dawe de he ogbẹ̀ etọn ma vò sọn nuhahun lẹ mẹ. Taidi sunnu jọja de, Davidi yí suhugan gbẹzan etọn tọn zan nado to hinhọ̀n danpe dile Ahọlu ylankan Sauli po agbóhọtọ etọn lẹ po to dindin in nado hù i. (1 Samuẹli 23:7, 8, 19-23) Davidi sọ tindo madogán mẹdetiti tọn he e dona diahi hẹ lẹ ga. E yigbe ehe tọn to Psalm 40tọ mẹ dọmọ: “Oylan lẹdo mi pé kaka bọ yè ma sọgan yí sọha na yé. Ylanwiwa ṣie yiaga sọmọ bọ yẹn ma sọgan mọnú; yé sù hú odà ota ṣie tọn lẹ.” (Psalm 40:12, NW  ) Mọwẹ, Davidi tindo nuhahun lẹ, ṣigba ewọ mayin dududeji mlẹnmlẹn gbọn yé dali gba. E ze ayidonugo do aliho he mẹ Jehovah to didona ẹn te lẹ ji, mahopọnna nuhahun etọn lẹ, podọ e mọdọ dona enẹlẹ zẹ̀ tukla etọn lẹ go tlala.

To whenuena hiẹ tlọ́ biọ nuhahun mẹdetiti tọn lẹ mẹ kavi tindo numọtolanmẹ nuvọ́nọ-yinyin tọn, e na yọ́n nado yì agbọji bo lẹnnupọndo dona towe lẹ ji, dile Davidi wà do. Matin ayihaawe, pinpẹn-nutọn-yinyọnẹn na dona mọnkọtọn  lẹ wẹ whàn we nado klán dewe dowiwe hlan Jehovah; linlẹn mọnkọtọn lẹ sọgan sọ gọalọna we nado vọ́ ayajẹ he ko yin hinhẹnbu lọ mọyi bo na gọalọna we nado to Jiwheyẹwhe sẹ̀n sọn ahun pinpẹn-nutọn-yinyọnẹn tọn de mẹ.

Opli Agun Tọn lẹ Sọgan Gọalọ

To yidogọmẹ na ayihamẹlinlẹnpọn mẹdetiti tọn do dagbewà Jehovah tọn lẹ ji, mí sọ dona nọ dogbẹ́ hẹ Klistiani hatọ lẹ. Tulinamẹnu wẹ e nọ yin nado nọ pli to gbesisọmẹ hẹ sunnu, yọnnu, po jọja he yiwanna Jiwheyẹwhe lẹ po bo magbe nado to ewọ sẹ̀n. Apajlẹ yetọn sọgan dozolanmẹna mí hlan nuyiwa alindọn lẹpo tọn kọ̀n to sinsẹ̀nzọn Jehovah tọn mẹ. Tintin to Plitẹnhọ Ahọluduta tọn mẹ mítọn sọgan na tuli yé ga.

Nugbo wẹ dọ, to whenuena mí lẹkọwa whégbè to azọ́n sinsinyẹn azán de tọn gbè godo kavi to whenuena mí yin hinhẹn gbọjọ na nuhahun kavi madogán delẹ wutu, e sọgan gọ̀n ma bọawu nado lẹnnupọndo opli yìyì to Plitẹnhọ Ahọluduta tọn mẹ ji. To ojlẹ mọnkọtọn lẹ mẹ, mí dona yin nujikudonọ po mídelẹ po, yèdọ ‘tunnú agbasa mítọn,’ to yẹhiadonu-liho, na mí nido sọgan setonuna gbedide lọ nado pli hẹ Klistiani hatọ lẹ.—1 Kọlintinu lẹ 9:26, 27; Heblu lẹ 10:23-25.

Eyin enẹ lẹzun dandan, be mí dona wá tadona lọ kọ̀n dọ mí ma yiwanna Jehovah nugbonugbo wẹ ya? Paali. Klistiani he whèwhín heyin ojlẹ he wayi tọn he yè ma sọgan tindo ayihaawe gando owanyi yetọn hlan Jiwheyẹwhe go lẹ dona dovivẹnu sinsinyẹn nado wà ojlo Jiwheyẹwhe tọn. (Luku 13:24) Apọsteli Paulu yin dopo to Klistiani mọnkọtọn lẹ mẹ. E basi zẹẹmẹ numọtolanmẹ etọn lẹ tọn hezeheze to aliho ehe mẹ dọmọ: “Yẹn yọnẹn dọ to ohò ṣie mẹ (enẹ wẹ, to agbasalan ṣie mẹ,) onú dagbe de ma nọ nọ̀ e mẹ: na nado jlo tin to dè e; ṣigba nado wà enẹ he yọ́n ma tin. Na dagbe he yẹn jlo yẹn ma wà, ṣigba ylankan he yẹn ma jlo, enẹ wẹ yẹn to wiwà.” (Lomunu lẹ 7:18, 19) Podọ e dọna Kọlintinu lẹ dọmọ: “Na le yẹn tlẹ to yẹwheho wẹndagbe tọn dọ sọ, yẹn ma tindo nude nado doawagun na: na mananọmawà tin to oji e. . . . Na eyin yẹn yí ojlo do to onú helẹ wà, yẹn tindo ale de: ṣigba eyin e jẹagọdo ojlo ṣie go, yè ko yí mánamẹ wẹndagbe tọn de hlan mi.”—1 Kọlintinu lẹ 9:16, 17.

Taidi susu mítọn lẹ, Paulu tindo linlẹn ylanwiwa tọn lẹ he nọ glọnalina ojlo etọn nado wà nuhe sọgbe. Ṣigba, e hoavùn sinsinyẹn sọta linlẹn enẹlẹ, podọ to suhugan ojlẹ lẹ tọn mẹ, e tindo kọdetọn dagbe. Na nugbo tọn, Paulu ma basi wadotana ehe tọn to huhlọn ede tọn mẹ gba. E wlan dọmọ: ‘Yẹn sọgan wà onú popo gbọn ewọ he to huhlọnna mi dali.’ (Filippinu lẹ 4:13) Jehovah, omẹ lọ he na huhlọn Paulu, nasọ na huhlọn hiẹ nado wà nuhe sọgbe eyin hiẹ biọ alọgọ etọn. (Filippinu lẹ 4:6, 7) Enẹwutu “hoavùn zògbè na yise,” podọ Jehovah nasọ dona we.—Juda 3.

E mayin hiẹ dopo kẹdẹ wẹ na hoavùn ehe gba. To agun Kunnudetọ Jehovah tọn lẹ tọn mẹ, Klistiani mẹho he whèwhín lẹ, he yé lọsu lẹ to linsinyẹn to ‘avùn zògbè yise’ tọn hihò mẹ, tindo ojlo nado gọalọna we. Eyin hiẹ dọnsẹpọ mẹho de na alọgọ, ewọ na dovivẹnu nado ‘dọho na we po homẹmimiọn po.’ (1 Tẹsalonikanu lẹ 5:14) Yanwle etọn na yin nado yinuwa “taidi otẹn whiwhla tọn sọn jẹhọn nu, bẹtẹn sọn yujẹhọn nu.”—Isaia 32:2.

“Jiwheyẹwhe wẹ owanyi,” podọ e nọ jlo dọ devizọnwatọ etọn lẹ ni sẹ̀n ẹn sọn owanyi mẹ. (1 Johanu 4:8) Eyin owanyi towe na Jiwheyẹwhe dona yin hinhẹn jẹ yọyọ, ze afọdide he sọgbe lẹ nado wàmọ, dile e yin titodohukanji to aga do. Homẹ towe na hùn dọ hiẹ wàmọ.