Kanbiọ lẹ sọn Wehiatọ lẹ Dè

Obá tẹmẹ wẹ asi Klistiani nugbonọ de sọgan nọavunte sọta afọdide gbẹdai tọn heyin zize gbọn alọwlemẹ etọn dali jẹ?

To whenuena alọwle gbẹtọvi tọn bẹjẹeji, Jiwheyẹwhe dọ dọ asu po asi po dona “sẹbọdo” yede go. (Gẹnẹsisi 2:18-24) Gbẹtọvi lẹ lẹzun mapenọ, ehe dekọtọn do nuhahun lẹ mẹ to alọwle susu lẹ mẹ, ṣigba ojlo Jiwheyẹwhe tọn wẹ yindọ alọwlemẹ lẹ dona gbẹsọ sẹbọdo yede go. Apọsteli Paulu wlan dọmọ: “Ṣigba hlan alọwletọ lẹ wẹ yẹn dosẹ́n na, ganṣo e ma yin yẹn gba, adavo Oklunọ, mì dike asi klán sọn asu etọn dè blo: ṣigba eyin e klán, mì gbọ ni tin mawlealọhẹ, kavi yè ni hẹn ẹn gbọwhẹ hẹ asu etọn: mì sọ dike asu gbẹ́ asi etọn blo.”—1 Kọlintinu lẹ 7:10, 11.

Ohó enẹlẹ dohia dọ to gbẹtọvi mapenọ lẹ ṣẹnṣẹn to whedelẹnu alọwlemẹ de nọ basi nudide nado jo awetọ etọn do. Di apajlẹ, Paulu dọ dọ eyin alọwlemẹ de jo awetọ etọn do, yé omẹ awe lẹ na “tin mawlealọhẹ.” Etẹwutu? Eyọ́n, alọwlemẹ lọ jo awetọ etọn do, ṣigba yé omẹ awe lẹ gbẹsọ tin to kọndopọmẹ hẹ ode awetọ to nukun Jiwheyẹwhe tọn mẹ. Paulu sọgan dọ ehe na Jesu ko ze nujinọtedo lọ dai na alọwle Klistiani tọn dọmọ: “Mẹdepope he na jo asi etọn dai, adavo na whẹho galilọ tọn [Glẹki, por·neiʹa], bosọ wlealọ hẹ devo, e deayọ.” (Matiu 19:9) Mọwẹ, dodonu dopo kẹdẹ lọ na gbẹdai he hẹn alọwle de wá opodo sọgbe hẹ Owe-wiwe wẹ “galilọ,” enẹwẹ, fẹnnuwiwa zanhẹmẹ tọn. Kunnudenu dohia dọ, to whẹho he Paulu dlẹnalọdo lọ mẹ, depope to alọwlemẹ lọ lẹ mẹ ma ko túnwán gba, enẹwutu to whenuena asu kavi asi lọ jo awetọ etọn do, alọwle lọ ma ko wá opodo to nukun Jiwheyẹwhe tọn mẹ gba.

Enẹgodo Paulu dọho gando ninọmẹ lọ go to ehe mẹ Klistiani nugbo de tindo alọwlemẹ he yin mayisenọ de te. Gbadopọnna anademẹ Paulu tọn dọmọ: “Eyin mayisenọ lọ klán, mì gbọ e ni klán. Mẹmẹsunnu de kavi mẹmẹyọnnu de ma tin to sìnsìn glọ na whẹho mọnkọtọn gba: ṣigba Jiwheyẹwhe ylọ mí hlan jijọho.” (1 Kọlintinu lẹ 7:12-16) Etẹwẹ asi nugbonọ de sọgan wà eyin asu mayisenọ etọn jo e do, bo tlẹ to gbẹdai sọgbe hẹ osẹ́n de dín sọn e dè?

Ewọ sọgan gbẹ́ jlo nado nọpọ hẹ ẹ. E sọgan gbẹsọ yiwanna ẹn, bo gbẹ́ tindo nuhudo omẹ awetọ tọn to numọtolanmẹ po zanhẹmẹ po liho, bosọ yọnẹn dọ emi po ovi flinflin lọ lẹ po tindo nuhudo alọgọ agbasanu lẹ tọn. Ewọ sọgan sọ tindo todido ga dọ, to madẹnmẹ, asu emitọn na lẹzun yisenọ de bosọ yin whinwhlẹngán. Ṣogan, eyin ewọ dè afọdide lẹ nado hẹn alọwle lọ wá opodo (to dodonu he ma sọgbe hẹ Owe-wiwe delẹ ji), asi lọ sọgan “gbọ e ni klán,” dile Paulu wlan do. Onú dopolọ yọn-na-yizan eyin asu yisenọ de yí nukunpẹvi do pọ́n pọndohlan Jiwheyẹwhe tọn gando alọwle go bo tẹkudo kinklan ji.

Nalete, to ninọmẹ mọnkọtọn de mẹ, asi lọ sọgan mọ nuhudo lọ nado basi hihọ́na ede po ovi lẹ po to osẹ́n-liho. Nawẹ e na wà enẹ gbọn? E sọgan jlo nado to nukunpedo ovi yiwanna etọn lẹ go zọnmii na e nido sọgan zindonukọn nado to owanyi onọ̀ tọn dohia yé, bo plọn yé walọ dagbe, bosọ zín yise he sinai do nuplọnmẹ dagbe Biblu tọn lẹ ji do ahun yetọn mẹ. (2 Timoti 3:15) Gbẹdai lọ sọgan ze jlọjẹ etọn lẹ do owù mẹ. Enẹwutu, e sọgan ze afọdide lẹ nado yin tenọna ganji to aṣẹpatọ lẹ nukọn nado sọgan basi-hihọ́na jlọjẹ etọn nado mọ ovi etọn lẹ yí podọ nado hẹn ẹn diun dọ asu etọn tin to dandannu glọ nado gọalọna whẹndo he e to gbigbẹdai lọ. To fidelẹ, yọnnu he ylọwhẹ̀ afọdide gbẹdai tọn sọgan doalọ owe ahọlu tọn delẹ mẹ he bẹ awuwledainanu lẹ na nukunpipedo ovi go po alọgọ akuẹzinzan tọn po hẹn, matin gbeyiyi na gbẹdai he asu etọn to dindin. To fidevo lẹ, hodidọ alọdowemẹwe lọ tọn lẹ nọ dohia dọ yọnnu lọ kọngbedopọ hẹ gbẹdai lọ; enẹwutu, eyin asu etọn huwhẹ̀ ayọdide tọn, asi lọ he doalọ ehelẹ mẹ to didọ dọ emi gbẹ́ sunnu lọ dai.

Suhugan mẹhe tin to lẹdo lọ mẹ podọ to agun lọ mẹ lẹ ma na yọ́n zẹẹmẹ gigọ́ lẹ gba, taidi vlavo eyin gbẹdai lọ sọgbe hẹ Owe-wiwe. Enẹwutu whẹpo onú lẹ nido zindonukọn jẹ obá enẹ mẹ, e na yin nuyọnẹnnu na asi lọ nado dọ ninọmẹ taun whẹho lọ tọn lẹ na nugopọntọ azinponọ po mẹho devo po to agun lọ mẹ (dehe yọ́n hugan wẹ nado kàn ẹn dai). To aliho enẹ mẹ ninọmẹ taun whẹho enẹlẹ tọn na tin-to-aimẹ vlavo e yin kanbiọ depope wá fọ́n—to whenẹnu kavi to enẹgodo.

Mì gbọ mí ni lẹkọwa zẹẹmẹ Jesu tọn ji dọmọ: “Mẹdepope he na jo asi etọn dai, adavo na whẹho galilọ tọn, bosọ wlealọ hẹ devo, e deayọ.” Eyin asu de na taun tọn huwhẹ̀ fẹnnuwiwa zanhẹmẹ tọn ṣigba jlo nado gbọṣi alọwle mẹ hẹ asi etọn, yọnnu lọ  (homẹvọnọ lọ to apajlẹ Jesu tọn mẹ) dona basi nudide vlavo nado jona ẹn bosọ zindonukọn nado to pọnọ hẹ ẹ kavi nado gbẹ́ ẹ dai. Eyin e jlo nado jona ẹn bosọ zindonukọn hẹ asu sọgbe hẹ osẹ́n etọn, ewọ ma túnwán na mọwiwà etọn gba.—Hosea 1:1-3; 3:1-3.

To whẹho de mẹ fie asu fẹnnuwatọ lọ dín gbẹdai, asi lọ sọgan gbẹsọ tindo ojlo nado jonamẹ, po todido lọ po nado tindo e lẹkọ. E pò to yọnnu lọ si nado basi nudide, sinai do ayihadawhẹnamẹnu po ninọmẹ etọn po ji, vlavo nado ylọwhẹ̀ afọdide gbẹdai asu etọn tọn. To fidelẹ yọnnu he ylọwhẹ̀ afọdide gbẹdai tọn sọgan penugo nado doalọ owe delẹ mẹ he bẹ gbekọndopọ na nukunpipedo ovi lẹ go po alọgọ akuẹzinzan tọn po hẹn matin gbeyiyi dọ yọnnu lọ kẹalọyi gbẹdai lọ; alọdido owe mọnkọtọn lẹ mẹ etọn ma na dohia dọ ewọ to gbigbẹ́ ẹ dai gba. Ṣigba, to fidevo lẹ asi de he ylọwhẹ̀ gando gbẹdai de go sọgan yin didọna nado doalọ owe lẹ mẹ he dohia dọ ewọ kọngbedopọ hẹ gbẹdai lọ; alọdido owe gbẹdai tọn mọnkọtọn lẹ mẹ na dohia hezeheze dọ ewọ gbẹ́ asu whẹhutọ etọn dai.

Nado dapana yọnbasi nukunnumamọjẹnumẹ tọn, mọdopolọ e na yin nuyọnẹnnu to whẹho ehe mẹ na asi lọ nado yí wekanhlanmẹ he basi zẹẹmẹ afọdide he yin zize lẹ po tito tangan he e bẹhẹn lẹ po tọn na nukunmọnu agun tọn lẹ. E sọgan dọ dọ emi dọna asu emitọn dọ e jlo emi nado jona ẹn podọ nado yin asi etọn. Enẹ na zẹẹmẹdo dọ gbẹdai lọ yin bibasi jẹagọdo ojlo etọn lẹ; kakati nado gbẹ́ asu etọn dai, ewọ gbẹsọ wleawufo nado jona. Gbọnmọ dali, to whenuena e ko hẹn ẹn họnwun dọ emi jlo nado jona ẹn bosọ gbọṣi alọwle mẹ hẹ ẹ godo, alọdido owe lẹ mẹ etọn he dohia lehe whẹho akuẹzinzan tọn podọ/kavi nukunpedomẹgo tọn na yin dididẹ̀ gbọn poun ma na dohia dọ e to asu etọn gbẹdai gba. a

Gbọn ojlo etọn didohia hezeheze nado jona ẹn etlẹ yin to gbẹdai de godo dali, yèdọ ewọ kavi asu etọn ma na tindo mẹdekannujẹ nado wlealọ hẹ mẹdevo gba. Eyin ewọ, alọwlemẹ homẹvọnọ lọ he obiọ etọn nado jonamẹ yin gbigbẹdai, wá basi nudide to godo mẹ nado gbẹ́ ẹ dai na fẹnnuwiwa etọn wutu, yé omẹ awe lẹ vò to whenẹnu. Jesu dohia dọ alọwlemẹ homẹvọnọ lọ tindo jlọjẹ nado basi nudide mọnkọtọn.—Matiu 5:32; 19:9; Luku 16:18.

[Nudọnamẹ Odò Tọn]