Etẹwutu E Nọ Sinyẹn Sọmọ Nado Vẹvẹ?

TO Juillet 2000, Osẹ́n-doaitọ Ayimatẹn Californie tọn lẹ to États-Unis ze osẹ́n de dai heyin awuwlena nado de whẹgbledomẹ sẹ sọn gbẹtọ lẹ ji eyin yé do awuvẹmẹ hia mẹhe gbleawu to asidan de he gando yelọsu go mẹ. Etẹwutu osẹ́n ehe yin didoai? E yin ayidego dọ eyin asidan de hẹn awugble wá kavi hẹn nude gble, gbẹtọ lẹ nọ saba whleawu nado vẹvẹ na obu dọ e sọgan yin nukunnumọjẹemẹ to aliho agọ̀ mẹ to whẹdatẹn dọ yé ko yigbe whẹhuhu tọn. To alọ devo mẹ, mẹhe lẹndọ yé dona yin vẹvẹna to afọdopolọji lẹ sọgan gblehomẹ, bọ asidan kleun de sọgan lẹzun nudindọn daho de.

Nugbo wẹ dọ, e mayin dandan dọ a ni vẹvẹ na asidan de he e mayin hiẹ wẹ hẹnwa. Podọ ojlẹ delẹ sọgan tin to whenuena e na yin nuyọnẹnnu dọ a ni payi nuhe a to didọ go. Howhinwhẹn hohowhenu tọn de dọmọ: “To ohó susu mẹ yè ma sọgan ba ylanwa pò: ṣigba ewọ he hẹn nùflo etọn dote wẹ yọnnuin.” (Howhinwhẹn lẹ 10:19; 27:12) Etomọṣo, a sọgan jọmẹ bo gọalọ.

Nalete, be e mayin nugbo wẹ dọ mẹsusu ma nọ vẹvẹ ba, yèdọ eyin e ma tlẹ bẹ  whẹho whẹdatẹn tọn lẹ hẹn ya? Asi de sọgan doavigbe to whégbè dọ, ‘Asu ṣie ma nọ vẹvẹ gbede.’ Azọ́ngán de sọgan wule dọ, ‘Azọ́nwatọ ṣie lẹ ma nọ yigbe nuṣiwa yetọn lẹ tọn, podọ vlavo wẹ yé nọ dọ jaale.’ Mẹplọntọ wehọmẹ tọn de sọgan dọ dọ, ‘Ovi lẹ mayin pinplọn nado dọ jaale gba.’

Obu yinyin gbigbẹdai tọn sọgan yin dopo to whẹwhinwhẹ́n he wutu gbẹtọ lẹ nọ whleawu nado vẹvẹ lẹ mẹ. Omẹ lọ sọgan gọ̀n ma do numọtolanmẹ etọn lẹ hia, na obu dọ emi sọgan yin kọgbẹ́ e go. Yèdọ, mẹhe yin awugblena lọ tlẹ sọgan dapana nuṣiwatọ lọ, bo hẹn whẹgbigbọ sinyẹnawu taun.

Yamakina numọtolanmẹ mẹdevo lẹ tọn sọgan sọ yin whẹwhinwhẹ́n devo he wutu mẹdelẹ nọ whleawu nado vẹvẹ. Yé sọgan dọ dọ, ‘Ovẹvivẹ ṣie ma na basi vọjladona nuṣiwa he n’ko basi lọ.’ Podọ mẹdevo lẹ nọ whleawu nado dọ jaale na kọdetọn he e sọgan tindo lẹ wutu. Yé nọ kanse dọ, ‘Be yẹn na yin whẹgbledo bo na yin bibiọ nado suahọ wẹ ya?’ Nalete, goyiyi wẹ yin aliglọnnamẹnu he klohugan lọ na alọkikẹyi nuṣiwa. Goyitọ he ma sọgan dọ “jaale” de sọgan to didọ to linlẹn de mẹ dọ, ‘Yẹn ma jlo nado duwinyan gbọn alọkikẹyi nuṣiwa ṣie dali gba. Enẹ na de gigo ṣie pò.’

Depope he whẹwhinwhẹ́n lọ yin, e nọ sinyẹnawuna mẹsusu nado vẹvẹ. Ṣigba be dandan wẹ e yin nado vẹvẹ ya? Ale tẹlẹ wẹ nọ wá sọn ovẹvivẹ mẹ?

[Yẹdide to weda 3]

“Ovi lẹ mayin pinplọn nado dọ jaale gba”

“Azọ́nwatọ ṣie lẹ ma nọ yigbe nuṣiwa yetọn lẹ tọn”

“Asu ṣie ma nọ vẹvẹ gbede”