Kadaninọ Klistiani Tọn to Azán Godo Tọn lẹ Mẹ
Kadaninọ Klistiani Tọn to Azán Godo Tọn lẹ Mẹ
“Yé mayin aihọn tọn, yèdọ dile yẹn mayin aihọn tọn do.”—JOHANU 17:16.
1, 2. Etẹwẹ Jesu dọ gando kanṣiṣa he hodotọ etọn lẹ tindo hẹ aihọn go, podọ kanbiọ tẹlẹ wẹ hodidọ etọn lẹ fọndote?
TO OZÁN he e yizan gbọngodo to aigba ji taidi gbẹtọ pipé de mẹ, Jesu hodẹ̀ he dite de hẹ devi etọn lẹ. To odẹ̀ lọ whenu, e dọ nude he basi zẹẹmẹ gbẹzan Klistiani nugbo lẹpo tọn. E dọ gando hodotọ etọn lẹ go dọmọ: “Yẹn ko na ohó towe yé; aihọn sọ gbẹwanna yé, na yé mayin aihọn tọn wutu, yèdọ dile yẹn mayin aihọn tọn. Yẹn ma basi okanbiọ dọ, hiẹ nọ fọ̀ yé sọn aihọn mẹ gba, ṣigba dọ hiẹ ni whlá yé sọn oylan mẹ. Yé mayin aihọn tọn, yèdọ dile yẹn mayin aihọn tọn do.”—Johanu 17:14-16.
2 Whlaawe wẹ Jesu dọ dọ hodotọ emitọn lẹ ma na yin apadewhe aihọn tọn. Humọ, kadaninọ enẹ na hẹn nuhahun lẹ wá—aihọn na gbẹwanna yé. Etomọṣo, Klistiani lẹ ma dona yin ahungbàdona; Jehovah na basi hihọ́na yé. (Howhinwhẹn lẹ 18:10; Matiu 24:9, 13) To pọndohlan mẹ na nuhe Jesu dọ, mí sọgan kanse dọ: ‘Naegbọn Klistiani nugbo lẹ mayin apadewhe aihọn tọn? Etẹwẹ e zẹẹmẹdo nado nọ̀ kada na aihọn? Eyin aihọn gbẹwanna Klistiani lẹ, nukun tẹwẹ yewlẹ nọ yí do pọ́n aihọn? Na taun tọn, nukun tẹwẹ yé do nọ pọ́n gandudu aihọn tọn lẹ?’ Gblọndo he Owe-wiwe na do kanbiọ ehelẹ ji yin nujọnu, na yé gando mímẹpo go wutu.
“Jiwheyẹwhe Dè Mí Jọ̀ Sọn”
3. (a) Etẹwẹ nọ hẹn mí tin to kada na aihọn? (b) Kunnudenu tẹwẹ tin to finẹ dọ aihọn lọ tin ‘to huhlọn mẹylankan lọ tọn mẹ’?
3 Dopo to nuhe zọ́n bọ mí mayin apadewhe aihọn tọn lẹ mẹ wẹ haṣinṣan pẹkipẹki he mí tindo hẹ Jehovah. Apọsteli Johanu wlan dọmọ: ‘Míwlẹ sọ yọnẹn dọ Jiwheyẹwhe dè mí jọ̀ sọn, aihọn lẹpo sọ mlọnai to huhlọn mẹylankan lọ tọn mẹ.’ (1 Johanu 5:19) Ayihaawe depope matin gando nuhe Johanu dọ do aihọn ji go. Awhàn, sẹ́nhẹngba, kanyinylan, kọgbidinamẹ, nugbomadọ, po fẹnnuwiwa he gbayipe to egbehe po yin kunnudenu nuyiwadomẹji Satani tọn, e mayin Jiwheyẹwhe tọn gba. (Johanu 12:31; 2 Kọlintinu lẹ 4:4; Efesunu lẹ 6:12) To whenuena mẹde lẹzun dopo to Kunnudetọ Jehovah tọn lẹ mẹ, e na jó walọ ylankan mọnkọtọn lẹ do, podọ enẹ nọ hẹn ẹn tin to kada na aihọn.—Lomunu lẹ 12:2; 13:12-14; 1 Kọlintinu lẹ 6:9-11; 1 Johanu 3:10-12.
4. Aliho tẹlẹ mẹ wẹ mí nọ dohia dọ Jehovah tọn wẹ mí yin te?
4 Johanu dọ dọ Klistiani lẹ, to vogbingbọn mẹ na aihọn, ‘jọ̀ sọn Jiwheyẹwhe dè.’ Mẹhe klan yede do wiwe na Jehovah lẹpo yin etọn. Apọsteli Paulu dọmọ: “Eyin mí tin to ogbẹ̀, mí tin to ogbẹ̀ hlan Oklunọ; podọ eyin mí sọ kú, mí kú hlan Oklunọ; enẹwutu eyin mí tin to ogbẹ̀, kavi eyin mí kú, Oklunọ tọn wẹ mí.” (Lomunu lẹ 14:8; Psalm 116:15) Na mí yin Jehovah tọn wutu, mí nọ ze míde jo na ẹn mlẹnmlẹn. (Eksọdusi 20:4-6) Enẹwutu, Klistiani nugbo de ma nọ ze ogbẹ̀ etọn jo na yanwle aihọn tọn lẹ gba. Podọ dile e tlẹ nọ na sisi asia akọta tọn lẹ, e ma nọ sẹ̀n yé, vlavo to nuyiwa kavi ahun etọn mẹ. Na nugbo tọn e ma nọ sẹ̀n aihundatọ he diyin kavi boṣiọ egbezangbe tọn devo lẹ gba. Nugbo wẹ dọ, e nọ na sisi jlọjẹ mẹdevo lẹ tọn nado wà nuhe jlo yé, ṣigba Mẹdatọ lọ kẹdẹ wẹ ewọ nọ sẹ̀n. (Matiu 4:10; Osọhia 19:10) Ehe lọsu nọ hẹn ẹn tin to kada na aihọn.
“Ahọludu Ṣie Mayin Aihọn He Tọn Gba”
5, 6. Nawẹ taliaina Ahọluduta Jiwheyẹwhe tọn nọ hẹn mí tin to kada na aihọn gbọn?
5 Klistiani lẹ yin hodotọ Klisti Jesu tọn bosọ yin mẹjidugando Ahọluduta Jiwheyẹwhe tọn lẹ. Ehe lọsu nọ hẹn yé tin to kada na aihọn. To whenuena Jesu tin to whẹdọhọsa to Pọntiu Pilati nukọn, e dọmọ: “Ahọludu ṣie mayin aihọn he tọn gba: eyin ahọludu ṣie ko yin aihọn he tọn, be awhàngán ṣie lẹ do hoavùn, na yè ma nado jo mi hlan Ju lẹ: ṣigba dinvie ahọludu ṣie mayin sọn ofi gba.” (Johanu 18:36) Ahọluduta lọ wẹ Jehovah na yizan nado klan oyín etọn do wiwe, suwhẹna nupojipetọ-yinyin etọn, bo hẹn ojlo etọn yin wiwà to aigba ji kẹdẹdile e te do to olọn mẹ. (Matiu 6:9, 10) To lizọnyizọn etọn lẹpo whenu, Jesu dọyẹwheho wẹndagbe Ahọluduta lọ tọn, bo dọ dọ e na yin lilá gbọn hodotọ etọn lẹ dali kakajẹ vivọnu titonu ehe tọn. (Matiu 4:23; 24:14) Hogbe dọdai Osọhia 11:15 tọn lẹ he dọ dọ, “Ahọludu aihọn tọn lẹzun ahọludu Oklunọ mítọn tọn, po Klisti etọn po tọn; ewọ nasọ to ahọludu kakadoidoi” yin hinhẹndi to 1914. To madẹnmẹ, Ahọluduta olọn mẹ tọn enẹ kẹdẹ wẹ na dugán do gbẹtọvi lẹ ji. (Daniẹli 2:44) Ojlẹ de na wá bọ gandutọ aihọn tọn lẹ lọsu na yin hinhẹn gánnu-gánnu nado kẹalọyi aṣẹpipa etọn.—Psalm 2:6-12.
6 Po enẹ lẹpo po to ayiha mẹ, Klistiani nugbo lẹ to egbehe yin mẹjidugando Ahọluduta Jiwheyẹwhe tọn lẹ, podọ yé nọ hodo ayinamẹ Jesu tọn nado ‘to ahọluduta Jiwheyẹwhe tọn po dodo etọn po dín whẹ́.’ (Matiu 6:33) Enẹ ma nọ hẹn yé zun nugbomadọtọ hlan otò yetọn gba, ṣigba e nọ hẹn yé tin to kada na aihọn lọ to gbigbọ-liho. To egbehe, azọngban tintan Klistiani lẹ tọn, dile e yin do to owhe kanweko tintan whenu, wẹ ‘nado dekunnu mlẹnmlẹn na ahọluduta Jiwheyẹwhe tọn.’ (Owalọ lẹ 28:23) Gandudu gbẹtọvi tọn depope ma tindo jlọjẹ lọ nado glọnalina azọ́n he Jiwheyẹwhe denamẹ ehe.
7. Naegbọn Klistiani nugbo lẹ tin to kada, podọ nawẹ yé ko do ehe hia gbọn?
7 Na yé yin Jehovah tọn bosọ yin hodotọ Jesu tọn lẹ po mẹjidugando Ahọluduta Jiwheyẹwhe tọn lẹ po wutu, Kunnudetọ Jehovah tọn lẹ ko gbọṣi kadaninọ mẹ to awhàn akọta po akọjọpli tọn lẹ po mẹ to owhe kanweko 20tọ po 21tọ po mẹ. Yé ma ko nọgodona adà depope, ma ko ze awhànfunnu do mẹde ji, bo ma ko basi nujijla na yanwle otò tọn depope. To yise yetọn didohia to aliho he sẹhundaga mẹ mahopọnna nukundiọsọmẹ he vẹadi lẹ, yé ko hodo nunọwhinnusẹ́n heyin didọna gandutọ Nazi Allemagne tọn lẹ to 1934 dọmọ: “Mí ma tindo ojlo depope to whẹho tonudidọ tọn lẹ mẹ, mí ko ze míde jo mlẹnmlẹn na ahọluduta Jiwheyẹwhe tọn to Ahọlu etọn heyin Klisti glọ. Mí ma na wà danú kavi gbleawuna mẹdepope gba. Homẹ mítọn na hùn nado tin to jijọho mẹ bo wà dagbe na mẹlẹpo dile dotẹnmẹ etọn hùndonuvo na mí do.”
Afọzedaitọ po Dẹ́mẹnu lẹ po na Klisti
8, 9. Aliho tẹmẹ wẹ Kunnudetọ Jehovah tọn lẹ to egbehe yin afọzedaitọ po dẹ́mẹnu lẹ po te, podọ nawẹ ehe ko yinuwado kanṣiṣa he yé tindo hẹ akọta lẹ ji gbọn?
8 Paulu ylọ ede po Klistiani yiamisisadode hatọ etọn lẹ po dọ ‘afọzedaitọ na Klisti, taidi dọ Jiwheyẹwhe to vẹvẹ gbọn míwlẹ dali.’ (2 Kọlintinu lẹ 5:20; Efesunu lẹ 6:20) Sọn 1914 gbọ́n, Klistiani yí gbigbọ do de lẹ sọgan yin alọdlẹndo po gbesisọ po taidi afọzedaitọ lẹ na Ahọluduta Jiwheyẹwhe tọn, ehe yé yin “ovi” lẹ na. (Matiu 13:38; Filippinu lẹ 3:20; Osọhia 5:9, 10) Humọ, Jehovah ko de “gbẹtọ susugege” “lẹngbọ devo” lẹ tọn sọn akọta lẹ mẹ, yèdọ Klistiani he tindo todido aigba ji tọn lẹ, nado nọgodona ovi yiamisisadode lọ lẹ to azọ́n yetọn taidi afọzedaitọ lẹ mẹ. (Osọhia 7:9; Johanu 10:16) “Lẹngbọ devo” ehelẹ sọgan yin yiylọdọ ‘dẹ́mẹnu’ Ahọluduta Jiwheyẹwhe tọn tọn lẹ.
9 Afọzedaitọ de po azọ́nwatọ etọn lẹ po ma nọ dado whẹho otò he mẹ yé to azọ́nwa te tọn lẹ mẹ gba. Mọdopolọ, Klistiani lẹ nọ nọ̀ kada na whẹho tonudidọ akọta aihọn tọn lẹ. Yé ma nọ nọgodona kavi yinuwa sọta pipli akọta, akọ̀, ogbẹ́, kavi ajọwiwa depope tọn gba. (Owalọ lẹ 10:34, 35) Kakatimọ, yé “nọ wà dagbe hlan omẹ popo.” (Galatianu lẹ 6:10) Kadaninọ Kunnudetọ Jehovah tọn lẹ tọn zẹẹmẹdo dọ mẹdepope ma sọgan dín whẹjijọ bo gbẹ́ owẹ̀n yetọn gbọn alọsisọakọ́n dọ yé kọnawudopọ hẹ adà awetọ pipli akọ̀, akọta, kavi hẹnnu depope tọn dali gba.
Owanyi Nọ Do Yé Hia
10. Nawẹ owanyi yin onú titengbe na Klistiani de sọ?
10 To yidogọmẹ na nuhe mí ko dọ wayi lẹ, Klistiani lẹ nọ nọ̀ kada na whẹho aihọn tọn lẹ na haṣinṣan he yé tindo hẹ Klistiani devo lẹ wutu. Jesu dọna hodotọ etọn lẹ dọmọ: “Gbọn ehe dali wẹ gbẹtọ lẹpo na yọnẹn dọ nuplọntọ ṣie wẹ mì, eyin mìwlẹ tindo owanyi hlan mìnọzo.” (Johanu 13:35) Owanyi mẹmẹsunnu tọn yin adà tangan Klistiani-yinyin tọn. (1 Johanu 3:14) Dile Klistiani de nọ tindo haṣinṣan pẹkipẹki hẹ Jehovah po Jesu po do, mọwẹ e sọ nọ tindo haṣinṣan pẹkipẹki hẹ Klistiani devo lẹ do. Owanyi etọn ma nọ yin didohia mẹhe tin to agun etọn mẹ lẹ kẹdẹ gba. E nọ dlẹnkan jẹ ‘gbẹdido blebu mẹmẹsunnu etọn lẹ tọn to aihọn mẹ’ dè ga.—1 Pita 5:9.
11. Nawẹ owanyi he Kunnudetọ Jehovah tọn lẹ tindo na ode awetọ ko yinuwado walọyizan yetọn ji gbọn?
11 To egbehe, Kunnudetọ Jehovah tọn lẹ nọ do owanyi mẹmẹsunnu tọn yetọn hia gbọn hogbe Isaia 2:4 tọn lẹ hinhẹndi dali. E dọmọ: “Yé nasọ yí ohí yetọn do tùn agbogọdọẹ: akọta ma to na ze ohí do akọta ji ba, mọ yé ma to na plọn awhànfun ba.” Na yé ko yin pinplọn gbọn Jehovah dali wutu, Klistiani nugbo lẹ tin to jijọho mẹ hẹ Jiwheyẹwhe podọ hẹ ode awetọ yetọn. (Isaia 54:13) Na yé yiwanna Jiwheyẹwhe po mẹmẹsunnu yetọn lẹ po wutu, e ma na yọnbasi dọ yé ni ze awhànfunnu do Klistiani hatọ yetọn lẹ ji—kavi mẹdevo depope—to aigba devo lẹ ji. Jijọho po pọninọ yetọn po yin adà tangan sinsẹ̀n-bibasi yetọn tọn, yèdọ ohia de dọ yé tindo gbigbọ Jiwheyẹwhe tọn nugbonugbo. (Psalm 133:1; Mika 2:12; Matiu 22:37-39; Kọlọsinu lẹ 3:14) Yé nọ “dín jijọho, bosọ nọ doafọna ẹn,” na yé yọnẹn dọ “nukun OKLUNỌ tọn tin hlan dodonọ lẹ dali” wutu.—Psalm 34:14, 15.
Nukun He Klistiani lẹ Nọ Yí Do Pọ́n Aihọn
12. Walọ he Jehovah tindo dohlan gbẹtọ lẹ to aihọn mẹ tẹwẹ Kunnudetọ Jehovah tọn lẹ nọ hodo, podọ gbọnna?
12 Jehovah ko lá whẹdida whẹgbledomẹ tọn do aihọn ehe ji, ṣigba e ma ko dawhẹna mẹhe tin to aihọn mẹ lẹpo gba. E na wà enẹ gbọn Jesu gblamẹ to ojlẹ sisọ Etọn mẹ. (Psalm 67:3, 4; Matiu 25:31-46; 2 Pita 3:10) Nalete, e ko do owanyi daho hia gbẹtọ lẹ. E tlẹ ze Ovi etọn dopo akàn lọ jo na mẹlẹpo nido sọgan mọ ogbẹ̀ madopodo yí. (Johanu 3:16) Taidi Klistiani lẹ, mí nọ hodo apajlẹ owanyi Jiwheyẹwhe tọn gbọn tito he Jiwheyẹwhe basi na whlẹngán lẹ didọna mẹdevo lẹ dali, eyin vivẹnudido mítọn lẹ tlẹ nọ yin ṣinṣanko gbọzangbọzan.
13. Nukun tẹwẹ mí dona nọ yí do pọ́n gandutọ aihọn tọn lẹ?
13 Nukun tẹwẹ mí dona nọ yí do pọ́n gandutọ aihọn tọn lẹ? Paulu na gblọndo kanbiọ enẹ tọn to whenuena e wlan dọmọ: “Mì gbọ gbigbọ lẹpo ni yin mẹmẹglọ hlan huhlọn daho lẹ. Na huhlọn de matin adavo sọn Jiwheyẹwhe dè; huhlọn he tin lẹ Jiwheyẹwhe dè wẹ yè do yé ai sọn.” (Lomunu lẹ 13:1, 2) Gbẹtọvi lẹ tin to otẹn aṣẹpipa ‘he tindo dogbó’ tọn lẹ mẹ (daho kavi pẹvi, ṣigba e ma sọ Jehovah tọn gba) na Ganhunupotọ lọ wẹ na dotẹnmẹ yé nado tin wutu. Klistiani de nọ litaina aṣẹpipa aihọn tọn na enẹ yin apadewhe tonusise etọn tọn hlan Jehovah wutu. Ṣigba, etẹwẹ, eyin nubiọtomẹsi gandudu gbẹtọvi tọn lẹ sọta Jiwheyẹwhe tọn lẹ?
Osẹ́n Jiwheyẹwhe po Sesali po Tọn
14, 15. (a) Nawẹ Daniẹli penugo nado dapana gbemanọpọ de to whẹho tonusise tọn mẹ gbọn? (b) Teninọ tẹwẹ Heblu atọ̀n lẹ ze to whenuena yé ma sọgan dapana gbemanọpọ de to whẹho tonusise tọn mẹ?
14 Daniẹli po gbẹdohẹmẹtọ etọn atọ̀n lẹ po ze apajlẹ dagbe dai gando lehe taliaina gandutọ lẹ sọgan yin hinhẹn do jlẹkaji po taliaina aṣẹpipa Jiwheyẹwhe tọn po do go. To whenuena dẹpẹ Heblu ẹnẹ lọ lẹ mọ yede to kanlinmọgbenu to Babilọni, yé setonuna osẹ́n aigba enẹ tọn bo yin dide to niyaniya mẹ na azọ́nplọnmẹ vonọtaun de. To yinyọnẹn dọ azọ́nplọnmẹ lọ na dibla sọta Osẹ́n Jehovah tọn mẹ, Daniẹli dọhodo whẹho lọ ji hẹ ahọluzọnwatọ he jẹ lọ. Taidi kọdetọn de, tito vonọtaun lẹ yin bibasi nado na sisi ayihadawhẹnamẹnu Heblu ẹnẹ lọ lẹ tọn. (Daniẹli 1:8-17) Kunnudetọ Jehovah tọn lẹ nọ hodo apajlẹ Daniẹli tọn to whenuena yé yí zìnzìn do basi zẹẹmẹ teninọ yetọn tọn na ahọluzọnwatọ lẹ nado sọgan dapana nuhahun he mayin dandan lẹ.
15 Ṣigba, to nukọn mẹ, yé ma sọgan dapana gbemanọpọ de to whẹho taliai tọn mẹ gba. Ahọlu Babilọni tọn ze boṣiọ blibata de dote do danfafa Dula tọn ji bo degbena ogán lẹ, gọna ogán gbétatò tọn lẹ, nado pli na hùnwhẹ klandowiwe etọn tọn. Todin, họntọn atọ̀n Daniẹli tọn lẹ ko yin dide taidi ogán gbétatò Babilọni tọn lẹ tọn, enẹwutu oylọ lọ gando yé go ga. To ojlẹ tangan hùnwhẹ lọ tọn de whenu, mẹhe pli lẹpo dona litai to boṣiọ lọ nukọn. Ṣigba Heblu lọ lẹ yọnẹn dọ ehe na jẹagọdo osẹ́n Jiwheyẹwhe tọn. (Deutelonomi 5:8-10) Enẹwutu dile mẹlẹpo litai, yé gbọṣi ote. Gbọn tolivivẹ na gbedide ahọlu tọn dali, yé ze ogbẹ̀ yetọn do owù sinsinyẹn mẹ, bosọ yin whinwhlẹngán to azọ́njiawu-liho kẹdẹ; ṣigba yé dè nado kú kakati nado vẹtolina Jehovah.—Daniẹli 2:49–3:29.
16, 17. Nawẹ apọsteli lẹ yigbe gbọn to whenuena yé yin gbedena nado doalọtena yẹwhehodidọ, podọ etẹwutu?
16 To owhe kanweko tintan whenu, apọsteli Jesu Klisti tọn lẹ yin yiylọ wá nukọntọ Ju lẹ nukọn to Jelusalẹm bo yin gbedena nado doalọtena yẹwhehodidọ to oyín Jesu tọn mẹ. Etẹwẹ yé wà? Jesu ko degbena yé nado hẹn akọta lẹpo zun nuplọntọ, podọ ehe na bẹ Jude hẹn. E ko sọ dọna yé nado yin kunnudetọ etọn to Jelusalẹm mẹ podọ jẹ opodo aihọn tọn. (Matiu 28:19, 20; Owalọ lẹ 1:8) Apọsteli lẹ yọnẹn dọ gbedide Jesu tọn lẹ nọtena ojlo Jiwheyẹwhe tọn na yé. (Johanu 5:30; 8:28) Enẹwutu, yé dọmọ: “Míwlẹ ma ha nọ ma setonuna Jiwheyẹwhe hú gbẹtọ.”—Owalọ lẹ 4:19, 20; 5:29.
17 Ehe ma dohia dọ apọsteli lẹ to atẹṣi gba. (Howhinwhẹn lẹ 24:21) Nalete, to whenuena togán lẹ gbẹ́ na yé ma nado wà ojlo Jiwheyẹwhe tọn, nuhe yé sọgan dọ lẹpo wẹ, ‘Mí dona setonuna Jiwheyẹwhe, e mayin gbẹtọ.’ Jesu dọ dọ mí dona “yí nuhe yin Sesali tọn hlan Sesali, podọ nuhe yin Jiwheyẹwhe tọn hlan Jiwheyẹwhe.” (Malku 12:17) Eyin mí vẹtolina gbedide Jiwheyẹwhe tọn na gbẹtọvi de dọna mí nado wàmọ wutu, mí to nuhe yin Jiwheyẹwhe tọn na hlan gbẹtọ niyẹn. Kakatimọ, mí nọ suahọ nuhe mí dù do Sesali lẹpo tọn, ṣigba mí yọ́n aṣẹpipa yiaga hugan Jehovah tọn. Ewọ wẹ Nupojipetọ Wẹkẹ tọn, Mẹdatọ lọ, Asisa aṣẹpipa lẹpo tọn.—Osọhia 4:11.
Mí Na Nọte Gligli
18, 19. Teninọ dagbe tẹwẹ mẹmẹsunnu mítọn susu ko ze, podọ nawẹ mí sọgan hodo apajlẹ yetọn gbọn?
18 To alọnu din, suhugan gandutọ aihọn tọn lẹ tọn yọ́n teninọ kadaninọ Kunnudetọ Jehovah tọn lẹ tọn, podọ mí dopẹ́ na enẹ. Ṣigba, to aigba delẹ ji, Kunnudetọ lẹ ko pehẹ nukundiọsọmẹ he vẹadi. To owhe kanweko 20tọ lọ lẹpo gblamẹ podọ kakajẹ din, delẹ to mẹmẹsunnu po mẹmẹyọnnu mítọn lẹ po mẹ ko vánkan taun, bo to ‘avùn dagbe yise tọn hò’ to gbigbọ-liho.—1 Timoti 6:12.
19 Nawẹ mí sọgan nọte gligli taidi yewlẹ gbọn? Jẹnukọn whẹ́, mí flin dọ mí dona donukun homẹkẹn. E ma dona gbàhundona mí kavi tlẹ paṣa mí eyin mí pehẹ ẹ. Paulu na avase Timoti dọ: “Yé he jlo na nọ̀ jijọ-di-Jiwheyẹwhe tọn mẹ to Klisti Jesu mẹ lẹ, na nọ doakọnna homẹkẹn.” (2 Timoti 3:12; 1 Pita 4:12) To aihọn de he mẹ nuyiwadomẹji Satani tọn pavava do, naegbọn mí ma na yin homẹkẹndo? (Osọhia 12:17) Dile e na dẹnsọ bọ mí gbọṣi nugbonọ-yinyin mẹ, mẹdelẹ na tin janwẹ he na ‘mọ ẹn yin nupaṣamẹ bo nasọ to ohó ylankan dọ do mí go.’—1 Pita 4:4.
20. Nugbo mẹhẹnlodo tọn tẹlẹ wẹ mí yin finflin?
20 Awetọ, mí tindo nujikudo mlẹnmlẹn dọ Jehovah po angẹli etọn lẹ po na nọgodona mí. Dile Eliṣa hohowhenu tọn dọ do, “yé he tin to mí dè yin susu hú yé he tin to yé dè.” (2 Ahọlu lẹ 6:16; Psalm 34:7) E sọgan yindọ na lẹndai dagbe etọn wutu, Jehovah na dotẹnmẹ kọgbidinamẹ sọn nukundiọsọmẹtọ lẹ dè nado zindonukọn na ojlẹ de. Etomọṣo, e na nọ na mí huhlọn he mí tindo nuhudo etọn to whepoponu nado doakọnna. (Isaia 41:9, 10) Mẹdelẹ ko yin hùhù, ṣigba enẹ ma hẹn mí gbọjọ gba. Jesu dọmọ: “Mì dibusi yé he nọ hù agbasa, ṣigba bọ yé ma sọgan hù gbigbọ blo: ṣigba mì kúkú dibusi ewọ he sọgan hù agbasa po gbigbọ po sudo to [Gẹhẹnna] mẹ.” (Matiu 10:16-23, 28) “Wáṣinu” lẹ poun wẹ mí yin to titonu ehe mẹ. Mí na yí ojlẹ he mí tindo tofi zan nado ‘hẹn ogbẹ̀ nujọnu tọn lọ go gligli,’ yèdọ ogbẹ̀ madopodo to aihọn yọyọ Jiwheyẹwhe tọn mẹ. (1 Pita 2:11; 1 Timoti 6:19) Gbẹtọvi depope ma sọgan fìn ahọsumẹ enẹ yí sọn mí si dile e na dẹnsọ bọ mí gbọṣi nugbonọ-yinyin hlan Jiwheyẹwhe mẹ.
21. Etẹwẹ mí dona hẹn do ayiha mẹ to whepoponu?
21 Enẹwutu, mì gbọ mí ni flin haṣinṣan họakuẹ he mí tindo hẹ Jehovah Jiwheyẹwhe. Na mí ni yọ́n pinpẹn dona lọ tọn to whepoponu dọ mí yin hodotọ Klisti tọn lẹ bosọ yin mẹjidugando Ahọluduta lọ tọn lẹ. Mì gbọ mí ni yí ahun lẹpo do yiwanna mẹmẹsunnu mítọn lẹ, bosọ nọ hùnhomẹ to whepoponu to owanyi he yé dohia mí mẹ. Hú popolẹpo, mì gbọ mí ni setonuna hogbe psalm-kàntọ lọ tọn dọmọ: “Nọtepọn OKLUNỌ: yin huhlọnnọ bo gbọ ayiha towe ni deji: nugbo, nọtepọn OKLUNỌ.” (Psalm 27:14; Isaia 54:17) To whenẹnu míwlẹ, taidi Klistiani madosọha he jẹnukọnna mí lẹ, na nọte gligli po todido he diun mítọn po—taidi Klistiani nugbonọ kadanọtọ he ma yin apadewhe aihọn tọn lẹ.
Be A Sọgan Basi Zẹẹmẹ Ya?
• Nawẹ haṣinṣan he mí tindo hẹ Jehovah nọ hẹn mí tin to kada na aihọn ehe gbọn?
• Taidi mẹjidugando Ahọluduta Jiwheyẹwhe tọn lẹ, nawẹ mí nọ gbọṣi kadaninọ mẹ to aihọn ehe mẹ gbọn?
• Aliho tẹlẹ mẹ wẹ owanyi he mí tindo na mẹmẹsunnu mítọn lẹ nọ hẹn mí tin to kada na aihọn te?
[Kanbiọ oplọn tọn lẹ]
[Yẹdide to weda 15]
Nawẹ taliai mítọn na Ahọluduta Jiwheyẹwhe tọn nọ yinuwado kanṣiṣa he mí tindo hẹ aihọn ji gbọn?
[Yẹdide to weda 16]
Hutu po Tutsi po to azọ́nwa dopọ to ayajẹ mẹ
[Yẹdide to weda 17]
Mẹmẹsunnu Klistiani Ju po Arabe po lẹ
Klistiani he wá sọn Serbie, Bosnie, po Croatie po lẹ to vivi gbẹdido ode awetọ tọn dù
[Yẹdide to weda 18]
Etẹwẹ dona yin wiwà eyin gandutọ lẹ degbè dọ mí ni gbà osẹ́n Jiwheyẹwhe tọn?