Kanbiọ lẹ sọn Wehiatọ lẹ Dè
Kanbiọ lẹ sọn Wehiatọ lẹ Dè
Be e ylan nado hòakọ wẹ, yèdọ eyin akuẹ vude poun wẹ e tlẹ bẹhẹn?
Ohó Jiwheyẹwhe tọn ma dọhodo akọhiho ji to gigọ́mẹ gba, ṣigba e basi zẹẹmẹ he pé nado dohia dọ akọhiho ma sọgbe hẹ nunọwhinnusẹ́n Biblu tọn lẹ gba. a Di dohia, e yin alọkẹyi gbayipe dọ akọhiho nọ hẹn nukunkẹn wá. Nugbo enẹ kẹdẹ ko pé na Klistiani lẹ nado lẹnnupọndeji, na Biblu dọ dọ “nukunkẹnnọ lẹ” ma na dugu Ahọluduta Jiwheyẹwhe tọn bo blá nukunkẹn do boṣiọ-sinsẹ̀n go.—1 Kọlintinu lẹ 6:9, 10; Kọlọsinu lẹ 3:5.
Akọhiho sọ nọ hẹn ṣejannabi po gbigbọ ylankan agbàwhinwhlẹn tọn po wá, yèdọ ojlo zògbè nado dutomẹji. Apọsteli Paulu na avase sọta onú mọnkọtọn lẹ to whenuena e wlan dọmọ: “Mì dike mí sọ to gigo ovọ́ jlo blo, to [agbàwhinwhlẹn hẹ] mínọzo mẹ, to mínọzo nuvivẹun mẹ.” (Galatianu lẹ 5:26) Humọ, akọhiho nọ na tuli mẹdelẹ nado ganjẹ afinyọnnuwiwa go na tadagbe. Akọhotọ lẹ nọ tindo mahẹ to afinyọnnuwiwa wunmẹ lẹpo mẹ, po todido lọ po dọ e na hẹn yé tindo tadagbe. Yé hẹn mí flin Islaelivi nugbomadọtọ lẹ he ‘wleawu tafo de tọn dai na yẹwhe Tadagbe tọn, bosọ yí nunina nùnù de na yẹwhe Jọgbe tọn.’—Isaia 65:11.
Mẹdelẹ sọgan lẹndọ súgbigbò do akuẹ vude poun ji to kalti họntọnjihẹmẹ tọn de hihò kavi ludo-hihò hẹ hẹnnumẹ kavi họntọn vivẹ lẹ whenu yin ayidedai he ma nọ gbleawunamẹ de poun. Nugbo wẹ dọ mẹhe gbòsú do akuẹ vude poun ji sọgan nọma pọ́n ede hlan taidi nukunkẹnnọ, awagundotọ, agbàwhlẹnhẹmẹtọ, kavi afinyọnnuwatọ de gba. Ṣogan, nuyiwadomẹji tẹwẹ akọhiho etọn sọgan tindo do mẹhe e to akọ̀ hò hẹ lẹ ji? Suhugan akọhotọ egblemakunọ lẹ bẹjẹeji gbọn súgbigbò flinflin lẹ bibasi ‘na aihundida poun wutu’ dali. (Luku 16:10) Ayidedai he taidi nuhe ma nọ gbleawunamẹ ko lẹzun nuhe ylan tlala de to whẹho yetọn mẹ.
Enẹ yin nugbo titengbe eyin e bẹ ovi lẹ hẹn. Ovi susu ko duvivi dùdù to súgbigbò pẹvi de ji bo ko yin whiwhlepọn nado gbòsú do akuẹ susu ji. (1 Timoti 6:10) Dodinnanu ojlẹ dindẹn tọn de heyin zinzinjẹgbonu to États-Unis gbọn Pipli Arizona tọn do Akọhiho Egblemaku tọn ji dali zinnudeji dọ susu mẹhe ko peve do akọhiho mẹ lẹ bẹjẹeji to vuwhenu “gbọn súgbigbò do akuẹ vude poun ji na aihundida lanmẹyiya tọn lẹ kavi kalti hihò hẹ họntọn lẹ kavi hẹnnumẹ lẹ dali.” Linlin devo dọ dọ “ovi lẹ nọ jẹ akọ̀ hò ji to whégbè, titengbe to kalti hihò hẹ whẹndo yetọn po họntọn lẹ po whenu.” Linlin lọ yidogọ dọ “ogbàn to ovi kanweko ji he nọ hòakọ wẹ jẹ mọwà ji whẹpo yé tindo owhe widopo.” Jọja aflanmẹ susu heyin akọhotọ wẹ nọ suahọ na akọhiho yetọn gbọn mahẹ tintindo to sẹ́nhẹngba kavi fẹnnuwiwa mẹ dali, sọgbe hẹ hosọ lọ Why Do People Gamble Too Much—Pathological and Problem Gambling. Kọdetọn nugbajẹmẹji tọn nankọtọn die na nuhe sọgan taidi aihundida he ma nọ gbleawunamẹ to bẹjẹeji!
To whenuena e yindọ mí to gbẹ̀nọ to aihọn he ko tindo omọ̀ po whlepọn susu hugan po mẹ, etẹwutu mí na hùn mídelẹ donuvo hlan devo sọn ojlo mẹ wá? (Howhinwhẹn lẹ 27:12) Akọhiho—vlavo to ovi lẹ nukunmẹ kavi to godo yetọn, na akuẹ vude kavi susu—nọ ze gbigbọnọ-yinyin do owù mẹ bo dona yin didapana. Klistiani he nọ duvivi kalti hihò tọn taidi ayidedai lẹ na wà dagbe hugan nado nọ kàn sọha heyin dùdù lẹ dai kavi nado hò e na aihundida poun matin kandai de. Klistiani nuyọnẹntọ he gbigbọnọ-yinyin yetọn gọna họntọn po whẹndo yetọn lẹ tọn po nọ duahunmẹna lẹ nọ dapana akọhiho—eyin akuẹ vude poun wẹ e tlẹ bẹhẹn.
[Nudọnamẹ odò tọn]
a World Book Encyclopedia basi zẹẹmẹ akọhiho tọn taidi “súgbigbò do kọdetọn aihundida, nujijọ, kavi nujijọ kosọ tọn de ji.” E dọ yinukọn dogọ dọ “akọhotọ kavi aihundatọ lẹ nọ saba gbòsú do akuẹ ji . . . na aihundida lẹ taidi loterie, kalti hihò, po yizan ludo-kún tọn po.”