Mímẹpo Wẹ Tindo Nuhudo Pipà Tọn

AZÁN awuvivi tọn de wẹ e yin na viyọnnu lọ. Dile etlẹ yindọ e ko nọ tindo nuhudo hokọnamẹ tọn to ojlẹ devo lẹ mẹ, azán enẹ lọ ko yin vonọtaun de, walọ etọn gbọnvo taun. Ṣigba, to whenuena e ko mlọnai to zánmẹ godo, onọ̀ etọn se bọ e to avivi. To whenue onọ̀ lọ kàn nuhe zọ́n se, e dọ po dasin po dọ: “Be yẹn ma ko yin ovi dagbe de to egbehe wẹ?”

Kanbiọ enẹ sọwhán onọ̀ lọ taun. E ko nọ saba yawu kọhona viyọnnu etọn. Ṣigba todin, mahopọnna lehe viyọnnu lọ ko tẹnpọn taun nado zan walọ dagbe sọ, onọ̀ lọ gboawupo nado dọ hogbe pipà tọn dopo tata.

E mayin viyọnnu lẹ kẹdẹ wẹ tindo nuhudo pipà po mẹhẹndeji po tọn gba. Mímẹpo wẹ—kẹdẹdile mí nọ tindo nuhudo ayinamẹ po hokọnamẹ po tọn do.

Etẹwẹ nọ yin numọtolanmẹ mítọn eyin mí mọ pipà he wá sọn ahun mẹ yí? Be e ma nọ dozolanmẹna mí bo nọ hẹn mí jaya ya? Vlavo mí nọ mọdọ mẹde doayi mí go, bo to mítọn hò pọ́n. E nọ hẹn mí deji dọ nuhe mí ko wà lọ sọgbe, podọ e sọ nọ whàn mí nado dovivẹnu dogọ to sọgodo. E mayin nupaṣamẹ gba dọ pipà ahundopo tọn nọ saba dọ̀n mí sẹpọ mẹhe yí whenu zan nado dọ hogbe tulinamẹ tọn lọ.—Howhinwhẹn lẹ 15:23.

Jesu Klisti yọ́n nujọnu-yinyin mẹpipa tọn. To oló talẹnti tọn mẹ, ogán lọ (he Jesu lọsu nọtena) pà afanumẹ nugbonọ dopodopo po zohunhun po dọmọ: “Enẹ yì dagbe, hiẹ afanumẹ dagbe nugbonọ.” Lehe e dozolanmẹ namẹ do sọ! Dile etlẹ yindọ nugopipe po wadotana voovo lẹ po wẹ yé tindo, pipà dopolọ wẹ yé mọyi.—Matiu 25:19-23.

Enẹwutu mì gbọ mí ni flin onọ̀ viyọnnu enẹ tọn. Mí ma dona nọte jẹ whenue mẹdevo lẹ na jẹ avivi ji whẹpo mí nido pà yé gba. Kakatimọ, mí sọgan yí i do basi yanwle nado nọ dín dotẹnmẹ hundote lẹ nado pà yé. Na nugbo tọn, mí tindo whẹwhinwhẹ́n dagbe lẹ nado na pipà ahundopo tọn to dotẹnmẹ hundote lẹpo mẹ.