Plitẹnhọ Ahọluduta Tọn lẹ Tin to Nùvo Hlan Mẹlẹpo
Lilatọ Ahọluduta Tọn lẹ Na Linlin
Plitẹnhọ Ahọluduta Tọn lẹ Tin to Nùvo Hlan Mẹlẹpo
TO WHENUENA e to azọ́nplọn devi etọn lẹ na lizọnyizọn gbangba tọn lọ, Jesu Klisti na yé tuli nado ‘dekunnu sọn ohọ̀ta lẹ.’ (Matiu 10:27) Mọwẹ, yé dona wà lizọnyizọn Klistiani tọn yetọn to gbangba, to nukun mẹlẹpo tọn mẹ. Nuwiwa Kunnudetọ Jehovah tọn lẹ tọn lọsu nọ yin wiwà to gbangba, to gbesisọmẹ hẹ ayinamẹ ehe. Onú lẹ wiwà to gbangba ko hẹn Kunnudetọ lẹ penugo nado duto agọjẹdomẹ ji bo mọ ayidonugo dagbe lẹ yí.
Dile etlẹ yindọ mẹlẹpo wẹ vò nado wá opli Kunnudetọ Jehovah tọn lẹ tọn, nuvẹun nọ hẹn mẹdelẹ whleawu nado biọ Plitẹnhọ Ahọluduta tọn de mẹ. Ehe yin nugbo to Finlande. Winyan wẹ nọ glọnalina mẹdevo lẹ sọn ofi yọyọ lẹ yìyì mẹ. Eyin Plitẹnhọ Ahọluduta tọn yọyọ de yin gbigbá kavi hoho de yin vivọjlado, tito de nọ saba yin bibasi na mẹlẹpo nado wá. Vivẹnu vonọtaun de sọgan yin dido nado ylọ kọmẹnu lẹ nado dla Plitẹnhọ Ahọluduta tọn lọ pọ́n bo jẹakọhẹ nuwiwa Kunnudetọ Jehovah tọn lẹ tọn.
To lẹdo dopo mẹ, Kunnudetọ lẹ basi titona nujijla linlinnamẹwe tọn do azán dopolọ ji he yé na hùn Plitẹnhọ Ahọluduta tọn yọyọ yetọn. Kunnudetọ awe dukosọ hẹ dawe mẹhomẹ de he dọ dọ emi nọ duvivi Atọ̀họ̀-Nuhihọ́ Lọ Tọn po Réveillez-vous! po tọn hihia. Mẹmẹsunnu lọ lẹ dọna ẹn gando Plitẹnhọ Ahọluduta tọn lọ hùnhùn go bosọ biọ dọ yé na ze e yì finẹ. Dawe lọ dọ dọ homẹ emitọn na hùn nado yì hẹ yé. Na asi etọn ko dotoaina hodọdopọ lọ wutu, e dawhá dọ, “Yẹn lọsu jlo na yì ga!”
Tlolo he dawe lọ biọ Plitẹnhọ Ahọluduta tọn lọ mẹ, e pọ́n lẹdo pé bo dọ: “File ma dozinvlu paali. Etẹ, e yọnwhanpẹ bọ hinhọ́n sọ tin. Yẹn yin didọna dọ zinvlu na dó to Plitẹnhọ Ahọluduta tọn lọ mẹ!” Asu po asi po lọ nọ̀ finẹ na ojlẹ de bosọ biọ owe heyin didohia delẹ.
Agun dopo jlo nado lá dọ mẹhe tindo ojlo lẹpo yin oylọ basina wá klandowiwe Plitẹnhọ Ahọluduta tọn yetọn tẹnmẹ to linlinwe lẹdo lọ tọn de mẹ. To sise gando nujijọ lọ go mẹ, ogán linlin-kàntọ lẹ tọn lọ biọ dọ hosọ dopo ni yin kinkàn do nujijọ lọ ji. Mẹmẹsunnu lẹ yigbe, bọ hosọ he ma pé weda dopo sọawuhia to linlinwe lọ mẹ to ojlẹ gli de godo, bo dọhodo nujijọ lọ ji bosọ basi zẹẹmẹ nuwiwa agun Kunnudetọ Jehovah tọn lẹ tọn he tin to lẹdo lọ mẹ tọn.
To whenue hosọ lọ ko yin zinzinjẹgbonu godo, Kunnudetọ yọnhonọ de dukosọ hẹ kọmẹnu de he dọna ẹn dọ: “Hosọ whanpẹnọ de sọawuhia to linlinwe mẹ to egbehe gando Kunnudetọ Jehovah tọn lẹ go!” Mẹmẹyọnnu lọ penugo nado dekunnu bosọ do alọnuwe Les Témoins de Jéhovah du XXe siècle gbonu na ẹn to godo mẹ.
Gbọnvona linlẹn agọ̀ lẹ didesẹ gando Kunnudetọ Jehovah tọn lẹ go, tito mọnkọtọn lẹ, gọna tito-to-whinnu Plitẹnhọ Ahọluduta tọn yọyọ lẹ kinklandowiwe tọn ko dozolanmẹ na wẹnlatọ lẹ gbọn tulinina yé nado ylọ mẹsusu wá opli lẹ dali. Mọwẹ, to aigba susu ji, taidi Finlande, gbẹtọ lẹ ko wá yọnẹn dọ Plitẹnhọ Ahọluduta tọn Kunnudetọ Jehovah tọn lẹ tọn tin to nùvo hlan mẹlẹpo.