Gbẹzan to Osla Fibẹtado Tọn Mẹ
Gbẹzan to Osla Fibẹtado Tọn Mẹ
Etẹwẹ nọ wá ayiha towe mẹ eyin hiẹ se hodidọ lọ “osla fibẹtado tọn”? Be hiẹ ko dla dopo pọ́n ya? Etẹwẹ e tlẹ nọ taidi na taun tọn?
To whenuena hosọ ehe to yinyin awuwlena, osla fibẹtado tọn voovo 13 ko yin didoai to whèyihọ-waji Tanzanie tọn. To gbekọndopọ mẹ hẹ Afọzedaitọ-gán Plidopọ Akọta lẹ tọn na Fibẹtado-dintọ lẹ (APAF), gandudu Tanzanie tọn to alọgọna nudi fibẹtado-dintọ 500 000 sọn aigba Aflika tọn devo lẹ ji he họ̀njẹgbé na tòwhan wutu. Nawẹ onú lẹ nọ yì do to osla de mẹ?
Osla lọ mẹ Wiwá
Viyọnnu aflanmẹ de he nọ yin Kandida basi zẹẹmẹ nuhe jọ tọn to whenuena ewọ po whẹndo etọn po wá to owhe vude die wayi dọmọ: “Yé na mí kalti he tindo sọha mẹyinyọnẹn tọn de, bọ whẹndo mítọn yin dide do osla fibẹtado-dintọ lẹ tọn he tin to Nyarugusu mẹ. To whenuena mí jẹ finẹ, yé do fie owhé mítọn na nọ̀ po fie mí na sán atin bo dà ogbé te po hia mí, nado gbá owhé jlẹmẹ mítọn. Mí sún bliki okọ́-vẹẹ tọn lẹ. Ogán APAF tọn na mí họgbánú lọbanọ he mí do gbá họta lọ. Azọ́n sinsinyẹn wẹ e yin, ṣigba homẹ mítọn hùn to whenuena ohọ̀ jlẹmẹ mítọn fó.”
Kalti lọ nọ yin yiyizan to mercredi osẹ awe awe tọn lẹpo. “Mọwẹ, mí nọ tò do núdùdù-họsa nado yí núdùdù he nọ yin mimá gbọn APAF dali,” wẹ Kandida dọ.
Nawẹ núdùdù egbesọ mẹdopo tọn nọ sù sọ?
“Dopodopo mítọn nọ mọ nudi gbado-linfin kọfo 3 yí, apakun kọfo dopo, ayivi-linfin nudi ṣivi 2, amì ṣivi 2 po ojẹ nudi ṣivi dopo po. To whedelẹnu mí sọ nọ mọ adi gaa dopo yí, ehe mí na zan na osun dopo blebu.”
Be osin he wé tin ya? Yọnnu jọja de he nọ yin Riziki dọmọ: “Mọwẹ, osin nọ yin dindọ̀n gbọ̀n dòglọ sọn tọ̀sisa he tin to yakẹ lẹ mẹ biọ osin-hẹnnu dahodaho lẹ mẹ. Amasin nọ yin didó osin lọ mẹ whẹpo do nọ yin dindọ̀n biọ osla dopodopo mẹ. Mí gbẹsọ nọ tẹnpọn bo dà osin lọ whẹpo do nù in nado dapana azọ̀n. Osin yíyí po avọ̀ mítọn lẹ yinyan to osin-yitẹn ehelẹ kọ̀n po nọ saba hẹn alọnu mítọn ján sọn afọnnu jẹ whèjai. Osin panu dopo daa poun wẹ mẹdopo sọgan mọyi to gbèdopo.”
Eyin hiẹ disa gbọn osla lọ mẹ, hiẹ sọgan mọ wehọmẹ dokọ tọn po wehọmẹ daho lẹ po. Tito wepinplọn tọn tlẹ sọgan tin na mẹhomẹ lẹ to osla lọ mẹ. Ponọ-pamẹ po ahọlu-zọnwatẹn de po nọ tin to gbonu osla lọ tọn tlolo nado hẹn ẹn diun dọ osla lọ tin to hihọ́ glọ. Hiẹ sọgan mọ ahi daho he tindo nusatẹn flinflin susu fie fibẹtado-dintọ lẹ sọgan họ̀ omá, atin-sinsẹ́n, whèvi, koklo-làn, po núdùdù devo lẹ po te. Delẹ to tòmẹnu he tin to lẹdo lọ mẹ lẹ nọ wá ahi lọ mẹ nado wà ajọ́. Ṣigba fie wẹ fibẹtado-dintọ lẹ nọ mọ akuẹ te nado họ̀ onú lẹ? Delẹ to yé mẹ nọ lẹgle bo nọ sà jinukun lọ lẹ to ahi lọ mẹ. Mẹdevo lẹ sọgan sà apadewhe linfin kavi ayivi heyin nina yé tọn, bo gbọnmọ dali mọ akuẹ nado họ̀ olàn kavi atin-sinsẹ́n. Mọwẹ, osla lọ sọgan taidi gbétatò daho de. Nuhe gbayipe wẹ e yin nado mọ bọ mẹdelẹ na to núkò bo to ayajẹ to ahi lọ mẹ, kẹdẹdile yé na ko wà do to otò yetọn mẹ.
Eyin hiẹ nọte to dotowhé daho lọ, dopo to doto lẹ mẹ sọgan dọna we dọ nọtẹn nukunpedomẹgo tọn delẹ tin to osla lọ mẹ fie whẹho he ma sinyẹn sọmọ lẹ nọ yin nukunpedego te. Whẹho ajiji tọn lẹ po whẹho he sinyẹn lẹ po nọ yin didohlan dotowhé daho lọ. Na nugbo tọn, vigopọntẹn po abò vijiji tọn po to dotowhé lọ yin nujọnu, to whenuena e yindọ to osla he bẹ fibẹtado-dintọ 48 000 hẹn, nudi ovi 250 sọgan yin jiji to osun dopo mẹ.
Yé Nọ Dùnú Ganji to Gbigbọ-Liho
Lẹdo aihọn pé, Kunnudetọ Jehovah tọn lẹ sọgan hanú gando mẹmẹsunnu gbigbọmẹ tọn yetọn he nọ nọ̀ osla he tin to Tanzanie mẹ lẹ go. To lẹndopọ mẹ, omẹ nudi 1 200 wẹ tin to finẹ, bo yin tito basina do agun 14 po kándo 3 po mẹ. Nawẹ yé te do?
To whenuena Klistiani mẹdezejotọ ehelẹ wá osla lọ lẹ mẹ, onú tintan he yé wà wẹ nado biọ aigba de fie Plitẹnhọ Ahọluduta tọn na yin gbigbá do. Ehe na hẹn fibẹtado-dintọ lẹpo penugo nado yọ́n fie Kunnudetọ lẹ tin te podọ fie yé na yì opli sẹmẹsẹmẹ tọn yetọn lẹ te. Agun 7 wẹ tin to osla Lugufu tọn mẹ, po lẹndopọ Klistiani zohunhunnọ 659 tọn po. To opli dimanche tọn yetọn lẹ ji, sọha mẹplidopọ lẹ tọn na agun 7 ehelẹ nọ saba yì nudi 1 700.
Kunnudetọ lẹ to osla lẹpo mẹ sọ nọ mọaleyi sọn plidopọ lẹdo po agbegbe tọn lẹ po mẹ. To whenuena plidopọ agbegbe tintan yin bibasi to osla Lugufu tọn mẹ, omẹ 2 363 wẹ wá. Kunnudetọ lọ lẹ ko wleawuna baptẹm-yitẹn de to gbonu aigba plidopọ lọ tọn tlolo. Baptẹm-yitẹn lọ yin odò heyin kùnkùn bọ lọba yin titẹdo e mẹ na e nido sọgan hẹn osin. Mẹmẹsunnu lẹ nọ hẹn osin do kẹkẹ ji sọn tọ̀sisa he tin to nudi kilomẹtlu awe nkọ mẹ wá. To whenuena e yindọ yé ma sọgan hẹn hugan litli 20 to gbejizọnlin dopo whenu, yé dona basi yigọyigọ susu. Baptẹm-yitọ he do avọ̀ jlẹkaji tọn lẹ, tò nado yí baptẹm. To lẹndopọ mẹ, omẹ 56 wẹ yin bibaptizi gbọn yinyin yinylọ́n do osin mẹ pete dali. Lizọnyizọnwatọ whenu-gigọ́ tọn de heyin hokanse to plidopọ lọ ji dọ dọ emi nọ deanana plọnmẹ Biblu hẹ omẹ voovo 40. Ẹnẹ to nuplọntọ etọn lẹ mẹ yí baptẹm to plidopọ enẹ ji.
Wekantẹn alahọ Kunnudetọ Jehovah tọn lẹ tọn ko basi tito na nugopọntọ tomẹyitọ lẹ nado nọ dla yé pọ́n to gbesisọmẹ. Dopo to yé mẹ dọmọ: “Mẹmẹsunnu mítọn lẹ tindo zohunhun to lizọnyizọn lọ mẹ. Yé tindo aigba-denamẹ daho, podọ to agun dopo mẹ, Kunnudetọ dopodopo nọ yí nudi ganmẹ 34 zan to osun mẹ to lizọnyizọn lọ mẹ. Mẹsusu nọ deanana plọnmẹ Biblu atọ́n kavi humọ hẹ jlodotọ lẹ. Gbehosọnalitọ [lizọnyizọnwatọ whenu-gigọ́ tọn] de dọ dọ aigba-denamẹ he yọnhugan wẹ e yin. Gbẹtọ lẹ yọ́n pinpẹn owe mítọn lẹ tọn tlala to osla lọ mẹ.”
Nawẹ owe sinai do Biblu ji lẹ nọ jẹ osla lọ mẹ gbọn? Alahọ nọ do yé hlan Kigoma gbọn pinpán dali, yèdọ tòpẹvi he tin to whèzẹtẹn-waji Tándo Tanganyika tọn. Mẹmẹsunnu lẹ nọ mọ owe lẹ yí to finẹ bo nọ basi tito nado do yé hlan agun lẹ mẹ. To whedelẹnu yé nọ haya agbànbẹhun bo nọ bẹ owe lọ lẹ yì osla lẹpo mẹ na yede. Ehe nọ yin gbejizọnlin azán atọ̀n kavi ẹnẹ tọn gbọn ali ylankan lẹ ji.
Alọgọ Agbasanu lẹ Tọn
Kunnudetọ Jehovah tọn lẹ to France, Belgique, po Suisse po ko gọalọ titengbe to awuwiwlena nutindo lẹ na fibẹtado-dintọ he tin to osla ehelẹ mẹ. Delẹ to yé mẹ ko dla osla lọ lẹ pọ́n to Tanzanie, to alọkẹyi Agbagogán Whẹho Otò tọn lẹ po APAF po tọn glọ. Kunnudetọ he tin to Europe lẹ ko bẹ nuyizan susu pli taidi yìnnọsìn, avọ̀, afọpa, saki, po adi po. Nuyizan ehelẹ ko yin nina fibẹtado-dintọ lẹpo, to kọndopọmẹ hẹ nunọwhinnusẹ́n Biblu tọn lọ he dọmọ: “Le míwlẹ mọtẹn do, mì gbọ mí ni nọ wà dagbe hlan omẹ popo, humọ hlan yé he yin yise whédo tọn lẹ.”—Galatianu lẹ 6:10.
Alọgọ dagbewiwa tọn ehelẹ ko hẹn kọdetọn dagbe susu wá bọ fibẹtado-dintọ susu ko yin alọgọna. Wedegbẹ́ Lẹdo Fibẹtado tọn to osla lọ lẹ dopo mẹ do pinpẹn-nutọn-yinyọnẹn hia to hogbe ehelẹ mẹ dọmọ: “Do ota lẹdo mítọn blebu tọn mẹ, mí tindo yẹyi lọ nado dọnudo mì na alọgọ dagbewiwa tọn he titobasinanu mìtọn ko basi whla atọ̀n . . . Avọ̀ lọ lẹ ko yin nina omẹ 12 654 he bẹ sunnu, yọnnu, yọpọvu, gọna viyẹyẹ he tin to nuhudo mẹ lẹ hẹn . . . Fibẹtado-dintọ he tin to osla Muyovozi tọn mẹ lẹ yì 37 000 to alọnu din. To pọmẹ, gbẹtọ 12 654 wẹ yin alọgọna.”
To osla devo mẹ, fibẹtado-dintọ 12 382 yin nina avọ̀ bọ mẹdopodopo mọ atọ̀n yí, podọ osla devo mọ owe fọtọ́n susu yí he na yin yiyizan to wehọmẹ daho po wehọmẹ dokọ̀ tọn lẹ po mẹ. Ogán ayinamẹtọ APAF tọn to lẹdo de mẹ dọmọ: “Mí dopẹ́ susu na nunina heyin mimọyi [ehe hẹn pekọ wá na] nuhudo daho hugan mẹhe tin to osla fibẹtado tọn mẹ lẹ tọn. Nunina he mí mọyi to agọe yin agbàn owe wehọmẹ tọn lẹ tọn, ehe azọ́nwatẹn lẹdo mítọn tọn lẹ ko má to fibẹtado-dintọ lẹ ṣẹnṣẹn. . . . Mì wanu susu.”
Linlinwe lẹdo tọn lẹ tlẹ ko dọhodo alọgọ heyin nina ji. Hosọ de to linlinwe Sunday News 20 mai 2001 tọn mẹ, dọmọ: “Nunina Avọ̀ lẹ Tọn na Fibẹtado-Dintọ lẹ to Tanzanie.” Vọkan etọn 10 février 2002 tọn dọmọ: “Fibẹtado-dintọ lẹ yọ́n pinpẹn nunina lọ tọn na delẹ to ovi lẹ mẹ, he ko jo wehọmẹ yìyì do na yé ma tindo avọ̀ wutu, ko to wehọmẹ yì to gbesisọmẹ todin.”
Yé Tin to Awufiẹsa mẹ Ṣigba E Mayin Matin Todido Gba
E nọ yí nudi owhe dopo to suhugan fibẹtado-dintọ lẹ tọn si nado diọada jẹ aliho gbẹzan yọyọ lọ tọn ji to osla lọ mẹ. Yé nọ zan gbẹzan he bọawu. Kunnudetọ Jehovah tọn he tin to osla ehelẹ mẹ lẹ to suhugan whenu yetọn yizan nado má wẹndagbe homẹmiọnnamẹ tọn sọn Ohó Jiwheyẹwhe tọn, Biblu lọ mẹ hẹ kọmẹnu fibẹtado-dintọ yetọn lẹ. Yé nọ dọhodo aihọn yọyọ de ji, fie mẹlẹpo na “yí ohí yetọn lẹ do tùn glepọnugàn lẹ, podọ owhán yetọn lẹ do ohànvi lẹ mẹ [te]: akọta ma nasọ ze ohí daga do akọta ji, mọ yé ma nasọ plọn awhàn gbede ba.” Enẹgodo mẹlẹpo “na sinai omẹ dopodopo to vẹntin etọn glọ podọ to ovotin etọn glọ; podọ mẹde ma nasọ hẹn yé savò gba: na onù OKLUNỌ awhànpa lẹ tọn ko dọ ẹ.” E họnwun dọ, po dona Jiwheyẹwhe tọn po, ehe na yin aihọn de he ma na tindo osla fibẹtado tọn lẹ.—Mika 4:3, 4; Psalm 46:9.
[Yẹdide to weda 8]
Owhé lẹ to osla Nduta tọn mẹ
[Yẹdide lẹ to weda 10]
Plitẹnhọ Ahọluduta tọn Lukole tọn (to adusi) Baptẹm to Lugufu (to odò)
[Yẹdide to weda 10]
Plidopọ agbegbe tọn to osla Lugufu tọn mẹ