Kanbiọ lẹ sọn Wehiatọ lẹ Dè
Kanbiọ lẹ sọn Wehiatọ lẹ Dè
Naegbọn Isaia 30:21 dọ dọ “godo towe” wẹ ohó Jehovah tọn to wiwá sọn, to whenuena wefọ he jẹnukọn lọ dọ dọ nukọn wẹ Jehovah tin te gbọn didọ dali dọ, ‘Nukun towe na mọ Nuplọnmẹtọ Daho towe’?
Isaia 30:20, 21 [NW ], hia dọmọ: “Nuplọnmẹtọ Daho towe ma na whlá ede ba, ṣigba nukun towe na mọ Nuplọnmẹtọ Daho towe. Otó towe na se ohó de to godo towe dọmọ: Ehe wẹ aliho lọ. Zinzọnlin to e mẹ, whenuena mì lẹ́ do adusi, podọ whenuena mì lẹ́ do amiyọn.”
Eyin wehiatọ lọ pọ́n wefọ lọ hlan to paa mẹ, e na mọ Jehovah, Nuplọnmẹtọ Daho lọ to nukọn ede tọn ṣigba na se ogbè Etọn sọn godo. Ṣigba, hodidọ yẹhiadonu tọn wẹ e yin bo dona yin nukunnumọjẹemẹ to aliho enẹ mẹ.
Hodidọ yẹhiadonu tọn he wefọ 20 hẹnwa ayiha mẹ wẹ afanumẹ de he to devizọnwa hlan ogán de, he to aṣeji to whepoponu nado yinuwado anademẹ ogán lọ tọn lẹ ji. Kẹdẹdile afanumẹ de nọ yí sọwhiwhe do pọ́n alọ ogán etọn tọn nado yọ́n nuhe e jlo do, mọwẹ omẹ Jehovah tọn lẹ nọ ze ayidonugo yetọn do anademẹ sinai do Biblu ji lẹ he Jehovah to nina gbọn titobasinanu aigba ji tọn etọn gblamẹ ji do gligli. (Psalm 123:1, 2) Mọwẹ, yé nọ yinuwado anademẹ etọn ji, bo nọ to aṣeji gando nudepope he Jehovah na dọ gbọn “afanumẹ nugbonọ, nuyọnẹntọ” lọ gblamẹ go.—Matiu 24:45-47.
To whelọnu lo, etẹwẹ dogbọn ohó he devizọnwatọ etọn lẹ se to godo lọ dali? E sọgbe hẹ lẹnpọn dagbe nado wá tadona kọ̀n dọ ogbè he wá sọn godo lọ wẹ ohó he Jiwheyẹwhe ko dọ to ojlẹ he wayi lẹ mẹ, heyin kinkàndai to Ohó etọn mẹ ehe “họ̀nkọnsi nugbonọ” lọ to zẹẹmẹ etọn basi. (Luku 12:42) Devizọnwatọ Jiwheyẹwhe tọn egbehe tọn lẹ nọ se ogbè etọn gbọn sọwhiwhe yíyí do plọn Biblu dali podọ gbọn nunọwhinnusẹ́n etọn lẹ yíyí-do-yizan mẹ to gbẹzan yetọn mẹ po alọgọ owe he “afanumẹ nugbonọ, nuyọnẹntọ,” yèdọ “họ̀nkọnsi nugbonọ” lọ wleawuna lẹ po tọn dali. Gbọn ginganjẹ anademẹ he wá do ganmẹ he Nuplọnmẹtọ Daho lọ wleawuna lẹ go po yíyí yé do yizan mẹ po dali podọ gbọn Ohó Jiwheyẹwhe tọn heyin kinkàndai sọn owhe kanweko susu die wayi lẹ pinplọn dali, devizọnwatọ etọn lẹ nọ mọ ẹn to nukọn yetọn bo nọ se ogbè etọn to godo yetọn to yẹhiadonu-liho.—Lomunu lẹ 15:4.