Yise Tintindo to Jiwheyẹwhe He Mí Sọgan Nọma Yọnẹn Mẹ

To Allemagne, omẹ awe to atọ̀n mẹ yise to Jiwheyẹwhe mẹ. Ṣogan, to whenuena hugan omẹ fọtọ́n yin kinkanse nado basi zẹẹmẹ Jiwheyẹwhe he yé yise tọn, diblayin mẹlẹpo wẹ na gblọndo he gbọnvo. “Allemagne-nu lẹ tindo linlẹn mẹdetiti tọn lẹ gando Jiwheyẹwhe go he gbọnvo tlala dile gbẹtọ lọ lẹ lọsu gbọnvona yede do,” wẹ linlinwe FOCUS dọ. To whenuena yise tintindo to Jiwheyẹwhe mẹ jẹna pipà, be e ma blawu dọ mẹsusu yí Jiwheyẹwhe he yé ma tlẹ yọ́n mẹhe nkọ ewọ yin se ya?

E mayin Allemagne kẹdẹ wẹ ayihaawe gando mẹhe Jiwheyẹwhe yin go tin te gba; e tin to fidevo lẹ to Europe. Dodinnanu heyin bibasi to Autriche, Grande-Bretagne, po Pays-Bas po, do gbekọndopọ he gbayipe de hia dọ Jiwheyẹwhe yin “huhlọn he yiaga hugan de kavi nudabla he ma sọgan yin zẹẹmẹ basina de.” Titengbe to jọja lẹ ṣẹnṣẹn, etlẹ yin to mẹhe yí Jiwheyẹwhe se lẹ ṣẹnṣẹn, nudabla de wẹ ewọ yin.

Be Hiẹ Jẹakọhẹ Jiwheyẹwhe Ganji Ya?

Vogbingbọn daho de tin to yinyọ́n mẹde po akọjijẹ hẹ ẹ ganji po ṣẹnṣẹn. Yinyọ́n mẹde—taidi ahọluigbagán he ma tin to yakẹ de, aihundatọ dagbe hugan de, omẹ nukundeji yẹdide-to-kanji tọn de—zẹẹmẹdo nado yọnẹn poun dọ ewọ tin. Ṣigba, akọjijẹ hẹ mẹde ganji bẹ onú susu hẹn humọ. E zẹẹmẹdo yinyọ́n jijọ, walọ, numọtolanmẹ omẹ enẹ tọn, nuhe e yiwanna lẹ, nuhe e gbẹwanna lẹ, podọ tito he e tindo na sọgodo lẹ. Akọjijẹ hẹ mẹde ganji nọ hẹn ẹn yọnbasi nado tindo haṣinṣan pẹkipẹki de hẹ ẹ.

Omẹ fọtọ́n kanweko susu ko wá tadona lọ kọ̀n dọ linlẹn he gbloada de poun tintindo gando Jiwheyẹwhe go—kavi yinyọnẹn dọ Jiwheyẹwhe tin poun—ma ko pé gba. Yé ko dovivẹnu susu dogọ nado jẹakọhẹ Jiwheyẹwhe ganji. Be yé ko mọaleyi ya? Dawe de he nọ yin Paul, he nọ nọ̀ agewaji Allemagne tọn he tindo linlẹn he gbloada de gando Jiwheyẹwhe go dai, basi dide nado jẹakọhẹ Ẹ ganji. Paul basi zẹẹmẹ dọmọ: “E nọ biọ whenu po vivẹnudido po nado jẹakọhẹ Jiwheyẹwhe ganji, ṣigba ale he e nọ hẹnwa lẹ sù. Haṣinṣan pẹkipẹki tintindo hẹ Mẹdatọ lọ nọ hẹn gbẹzan pọnte dogọ tlala.”

Be whenu po vivẹnudido he e biọ nado jẹakọhẹ Jiwheyẹwhe ganji po jẹna ẹn ya? Jaale hia hosọ he bọdego.

[Nudọnamẹ tangan lẹ to weda 3]

Vogbingbọn daho de tin to yinyọ́n mẹde po akọjijẹ hẹ ẹ ganji po ṣẹnṣẹn