Kanbiọ lẹ sọn Wehiatọ lẹ Dè

Linlẹn tẹmẹ wẹ Ezekiẹli lẹzun ‘unbọpẹnnọ’ to ojlẹ mẹgbeyinyan po vasudo Jelusalẹm po tọn mẹ te?

Na taun tọn, to linlẹn lọ mẹ dọ e ma tindo nudepope nado yidogọna owẹ̀n dọdai Jehovah tọn he e ko dó lọ gba.

Yẹwhegán Ezekiẹli bẹ sinsẹ̀nzọn etọn jẹeji taidi nuhọ́tọ nugbonọ de na Islaelivi he tin to kanlinmọgbenu to Babilọni lẹ to “owhe atọ́ntọ mẹmẹglọ ahọlu Jehọiakini tọn tọn,” enẹ wẹ, to owhe 613 J.W.M. (Ezekiẹli 1:2, 3) To azán aotọ heyin osun aotọ owhe 609 J.W.M. mẹ, e mọ numimọ de to gbọdo glọ gando bẹjẹeji mẹgbeyinyan Babilọninu lẹ tọn sọta Jelusalẹm go. (Ezekiẹli 24:1, 2) Etẹwẹ na yin kọdetọn mẹgbeyinyan lọ tọn? Be Jelusalẹm po tòmẹnu mayisenọ etọn lẹ po na họ̀ngán ya? Taidi nuhọ́tọ de, Ezekiẹli ko dó owẹ̀n vasudo Jehovah tọn, podọ Ezekiẹli ma tindo nuhudo nado gọ́ nude na ẹn nado sọgan hẹn gbẹtọ lẹ yí wẹndomẹ lọ sè gba. Ezekiẹli lẹzun unbọpẹnnọ gando nudọnamẹ devo depope do mẹgbeyinyan Jelusalẹm tọn ji go.—Ezekiẹli 24:25-27.

Nudi osun ṣidopo to vasudo Jelusalẹm tọn godo to 607 J.W.M., luntọ́ntọ de hẹn owẹ̀n vasudo tòdaho wiwe lọ tọn wá na Ezekiẹli to Babilọni. To whèjai he jẹnukọnna wiwá luntọ́ntọ lọ tọn, Jehovah “ko hùn onù [Ezekiẹli tọn] . . . , [e] masọ yin unbọpẹn ba.” (Ezekiẹli 33:22) Enẹ hẹn unbọpẹnnọ-yinyin Ezekiẹli tọn wá vivọnu.

Be Ezekiẹli ma sọgan dọho na taun tọn to ojlẹ enẹ whenu wẹ ya? E họnwun dọ lala wẹ gblọndo lọ, na to whenuena e lẹzun ‘unbọpẹnnọ’ godo, e gbẹ́ dọ dọdai lẹ gando otò sẹpọmẹ he jaya do vasudo Jelusalẹm tọn ji lẹ go. (Ezekiẹli, weta 25-32) To bẹjẹeji azọ́ndenamẹ Ezekiẹli tọn taidi yẹwhegán po nuhọ́tọ de po mẹ, Jehovah ko dọna ẹn dọmọ: “Yẹn nasọ hẹn odẹ́ towe tẹ́ do aga onù towe tọn go, bọ hiẹ na yin unbọpẹn, bo ma nasọ yin hlan yé oplọnlọ-namẹtọ de gba: na owhé atẹṣitọ de wẹ yé. Ṣigba whenuena yẹn dọho hẹ we, yẹn na kẹ̀ onù towe.” (Ezekiẹli 3:26, 27) Eyin Jehovah ma tindo owẹ̀n de na Islaeli, Ezekiẹli dona gbọṣi unbọpẹnnọ-yinyin mẹ gando akọta enẹ go. Ezekiẹli dona dọ nuhe Jehovah jlo dọ e ni dọ to ojlẹ he mẹ Jehovah jlo dọ e ni wàmọ te. Unbọpẹnnọ-yinyin Ezekiẹli tọn zẹẹmẹdo dọ e ma dọ ohó dọdai tọn lẹ na Islaelivi lẹ gba.

Hagbẹ nuhọ́tọ egbezangbe tọn, yèdọ Klistiani yiamisisadode lẹ, ko to avase na gando vasudo Mẹylọhodotọklisti tọn, he nọtena Jelusalẹm go. To whenuena “nukunbibia daho” lọ na gbajẹgbonu bo và “Babilọni Daho,” heyin ahọluigba aihọn sinsẹ̀n lalo tọn sudo, hagbẹ yiamisisadode Ezekiẹli tọn ma na tindo nuhudo nado dọ nudepope gando vivọnu Mẹylọhodotọklisti tọn go ba, ehe yin adà nukundeji ahọluigba enẹ tọn.—Matiu 24:21; Osọhia 17:1, 2, 5.

Mọwẹ, azán lọ na wá bọ pipòtọ mẹyiamisisadode lẹ tọn po gbẹdohẹmẹtọ yetọn lẹ po na lẹzun unbọpẹnnọ, bo ma na tindo owẹ̀n depope nado dó na Mẹylọhodotọklisti ba. Enẹ na jọ to whenuena “azò ao” lọ lẹ po “kanlin” lọ po na gbà Babilọni Daho lọ hányán bo hẹn ẹn jẹmẹ́. (Osọhia 17:16) Na nugbo tọn, ehe ma zẹẹmẹdo dọ Klistiani lẹ ma na penugo nado dọho gba. Kẹdẹdile yé nọ wà do todin, yé na pagigona Jehovah bo dọho etọn to azán lẹpo gbè podọ “to whẹndo lẹpo mẹ.”—Psalm 45:17; 145:2.