‘Mì Nọ Dopẹ́’
‘Mì Nọ Dopẹ́’
“Mì sọ gbọ jijọho [Klisti] tọn ni dugán to ayiha mìtọn mẹ . . . mì nisọ nọ dopẹ́.”—KỌLỌSINU LẸ 3:15.
1. Vogbingbọn tẹ go wẹ mí doayi to agun Klistiani tọn po aihọn he tin to anademẹ Satani tọn glọ po ṣẹnṣẹn?
GBIGBỌ pẹdido tọn nọ yin mimọ to agun 94 600 Kunnudetọ Jehovah tọn lẹ tọn mẹ lẹdo aihọn pé. Opli dopodopo nọ bẹjẹeji bo nọ wá vivọnu po odẹ̀ he nọ bẹ hogbe pẹdido tọn lẹ hlan Jehovah hẹn po. Mí nọ saba sè “a wanu,” “e ma sù,” kavi hogbe mọnkọtọn lẹ to Kunnudetọ yọyọ, numimọnọ, yọpọvu po mẹho lẹ po dè dile yé kọnawudopọ to sinsẹ̀n-bibasi po gbẹdido ayajẹ tọn po mẹ. (Psalm 133:1) Lehe ehe gbọnvona gbigbọ ṣejannabi tọn he gbayipe to mẹsusu ‘he ma yọ́n Jehovah bo masọ nọ setonuna wẹndagbe lọ’ lẹ ṣẹnṣẹn do sọ! (2 Tẹsalonikanu lẹ 1:8) Mí to gbẹnọ to aihọn he nọ dó alọgodopẹ́ de mẹ. Podọ ehe ma dona paṣa mí eyin mí flin mẹhe yin yẹwhe aihọn ehe tọn—yèdọ Satani Lẹgba, heyin tọ́ntlọ́ngbọ́n to godoninọna gbigbọ ṣejannabi tọn mẹ, mẹhe gbigbọ goyiyi po atẹṣiṣi etọn tọn po gbayipe gbọn gbẹtọvi lẹpo mẹ!—Johanu 8:44; 2 Kọlintinu lẹ 4:4; 1 Johanu 5:19.
2. Avase tẹwẹ mí dona setonuna, podọ kanbiọ tẹlẹ wẹ mí na gbadopọnna?
2 Na mí tin to aihọn Satani tọn mẹ wutu, mí dona tin to aṣeji ma nado yin hinhẹnflu gbọn walọ etọn lẹ dali. To owhe kanweko tintan mẹ, apọsteli Paulu flin Klistiani Efesu tọn lẹ dọmọ: “Mìwlẹ ko to zọnlinzin . . . to hohowhenu kẹdẹdi walọ aihọn he tọn, kẹdẹdi ahọvi huhlọn agahomẹ tọn tọn, gbigbọ he to azọ́nwa to dinvie to ovi tolivivẹ tọn lẹ mẹ: to mẹhe mẹ mí omẹ pó ga ko do walọ mítọn to hohowhenu to wantuntun agbasalan mítọn tọn mẹ, bọ mí sọ to ojlo agbasalan tọn po homẹ tọn po hẹndi; gbọn jijọ dali ovi homẹgble tọn wẹ mí, yèdọ kẹdẹdi mẹdevo lẹ.” (Efesunu lẹ 2:2, 3) Enẹ sọ yin nugbo gando mẹsusu go to egbehe ga. To whelọnu lo, nawẹ mí sọgan hẹn gbigbọ pẹdido tọn go gbọn? Alọgọ tẹwẹ Jehovah ko wleawuna? Aliho yọn-na-yizan tẹlẹ mẹ wẹ mí sọgan dohia te dọ mí nọ dopẹ́?
Whẹwhinwhẹ́n He Mí Tindo lẹ Nado Nọ Dopẹ́
3. Etẹlẹ wẹ mí dona dopẹ́ yetọn na Jehovah?
3 Mí duahọ pẹdido tọn do Jehovah Jiwheyẹwhe, Mẹdatọ po Gbẹ̀namẹtọ mítọn po, titengbe eyin mí lẹnnupọndo delẹ to nunina susugege he e ko na mí lẹ ji. (Jakobu 1:17) Mí nọ dopẹ́ na Jehovah egbesọegbesọ dọ mí tin to ogbẹ̀. (Psalm 36:9) Mí nọ mọ kunnudenu susugege alọnuzọ́n Jehovah tọn tọn lẹdo mí pé, taidi owhè, osun, po sunwhlẹvu lẹ po. Adọkunnu aigba glọ tọn susugege he nọ hẹn ogbẹ̀ dote to planẹti mítọn ji lẹ, agahomẹ he tindo onú susu, po lilẹpe gigẹdẹ jọwamọ tọn lẹ po—popolẹpo wẹ dekunnu dọ mí duahọ do Otọ́ owanyinọ olọn mẹ tọn mítọn. Ahọlu Davidi jihàn dọmọ: “OKLUNỌ E Jiwheyẹwhe ṣie, susu wẹ azọ́njiawu he hiẹ ko wà, po linlẹn towe po hlan míwlẹ dali: yè ma sọgan hia yé hlan we kannukannu gba: eyin yẹn na lá, bosọ dọho yetọn, yé hú onú hihia.”—Psalm 40:5.
4. Naegbọn mí dona dopẹ́ na Jehovah na gbẹdido ayajẹnọ he mí to vivi etọn dù to agun mítọn lẹ mẹ?
4 Dile etlẹ yindọ mí ma ko tin to paladisi nujọnu tọn mẹ, devizọnwatọ Jehovah tọn lẹ to egbehe to vivi paladisi gbigbọmẹ tọn dù. To Plitẹnhọ Ahọluduta tọn mítọn lẹ mẹ podọ to plidopọ mítọn lẹ ji, mí nọ mọ nuyiwa sinsẹ́n gbigbọ Jiwheyẹwhe tọn tọn to yisenọ hatọ mítọn lẹ mẹ. Na nugbo tọn, to yẹwhehodidọ na mẹhe mayin sinsẹ̀nnọ sọmọ kavi he mayin sinsẹ̀nnọ paali lẹ whenu, Kunnudetọ delẹ nọ dlẹnalọdo nuhe Paulu dọ to wekanhlanmẹ etọn hlan Galatianu lẹ mẹ. Yé nọ dọ̀n ayidonugo wá “azọ́n agbasalan tọn lẹ” ji whẹ́ bo nọ kàn nuhe todoaitọ yetọn lẹ doayi e go sè. (Galatianu lẹ 5:19-23) Mẹdelẹ nọ yigbe to afọdopolọji dọ ehelẹ sọgbe hẹ nuyiwa gbẹtọvi lẹ tọn to egbehe. Eyin sinsẹ́n gbigbọ Jiwheyẹwhe tọn yin didohia yé bọ yé yin oylọ-basina wá Plitẹnhọ Ahọluduta tọn mẹ nado mọ kunnudenu ehe tọn po nukun yetọn titi lẹ po, mẹsusu nọ dọ to afọdopolọji dọ: “Jiwheyẹwhe tin to mì mẹ nugbonugbo.” (1 Kọlintinu lẹ 14:25) Podọ e mayin Plitẹnhọ Ahọluduta tọn mẹ kẹdẹ wẹ ehe nọ yin mimọ te gba. Fidepope he a yì, eyin a dukosọ hẹ depope to Kunnudetọ Jehovah tọn he hugan livi ṣidopo lẹ mẹ, gbigbọ ayajẹ po aglinjijẹ tọn dopolọ po wẹ a na mọ. Na nugbo tọn, gbẹdido mẹjlọdote tọn ehe dona whàn mí nado dopẹ́ na Jehovah, mẹhe nọ na mí gbigbọ etọn nado hẹn ẹn yọnbasi.—Zẹfania 3:9; Efesunu lẹ 3:20, 21.
5, 6. Nawẹ mí sọgan dopẹ́ na nunina daho hugan Jiwheyẹwhe tọn, heyin ofligọ lọ gbọn?
5 Nunina daho he sọgbe hugan he Jehovah ko na mí wẹ Ovi etọn, Jesu, mẹhe gblamẹ avọ́sinsan ofligọ tọn yin awuwlena. “Eyin Jiwheyẹwhe yiwanna mí sọmọ,” wẹ apọsteli Johanu wlan, “e jẹ dọ mí nisọ yiwanna mínọzo ga.” (1 Johanu 4:11) Mọwẹ, mí nọ dopẹ́ ofligọ lọ tọn na Jehovah e mayin gbọn owanyi po pinpẹn-nutọn didohia na ẹn po dali kẹdẹ wẹ gba ṣigba gbọn gbẹzan mítọn lẹ yiyizan to aliho he nọ do owanyi hia na mẹdevo lẹ mẹ dali ga.—Matiu 22:37-39.
6 Mí sọgan plọn nususu dogọ gando pinpẹn-nutọn didohia go gbọn nulẹnpọndo aliho he mẹ Jehovah yinuwa hẹ Islaeli hohowhenu tọn te dali. Osẹ́n he Jehovah na akọta lọ gbọn Mose gblamẹ plọn nususu gbẹtọ lẹ. Gbọn “apajlẹ oyọnẹn po nugbo po tọn to osẹ́n mẹ” gblamẹ, mí sọgan plọn nususu he na gọalọna mí nado hodo ayinamẹ Paulu tọn dọ: “Mì nisọ nọ dopẹ́.”—Lomunu lẹ 2:20; Kọlọsinu lẹ 3:15.
Nuplọnmẹ Atọ̀n sọn Osẹ́n Mose Tọn Mẹ
7. Nawẹ tito madao nina tọn lọ hùn dotẹnmẹ dote na Islaelivi lẹ nado dopẹ́ na Jehovah gbọn?
7 To Osẹ́n Mose tọn mẹ, Jehovah wleawuna aliho atọ̀n he mẹ Islaelivi lẹ sọgan do pinpẹn-nutọn-yinyọnẹn nujọnu tọn hia na dagbewà etọn te. Tintan wẹ tito madao nina tọn. Madao sinsẹ́n aigba tọn, to pọmẹ hẹ “madao kanlinpó lọ tọn lẹpo kavi kanlinpa lọ” tọn, dona “yin wiwe hlan OKLUNỌ lọ.” (Levitiku 27:30-32) Jehovah nọ dona Islaelivi lẹ susugege to whenuena yé setonu. “Mì hẹn madaotọ lọ pete wá biọ agbànhọ lọ mẹ, na núdùdù nido tin finẹ to ohọ̀ ṣie mẹ, bo yí do tẹ́n mi pọ́n dinvie, wẹ OKLUNỌ awhànpa lẹ tọn dọ, eyin yẹn ma na hùn ovẹ́sẹ olọn tọn lẹ na mì, bosọ kọ̀n dona de jẹgbonu na mì, he otẹn ma na tin finẹ sù nado hẹn ẹn.”—Malaki 3:10.
8. Vogbingbọn tẹwẹ tin to nunina sọn ojlo mẹ wá lẹ po madao nina po ṣẹnṣẹn?
8 Awetọ, gbọnvona nubiọtomẹsi madao nina tọn lọ, Jehovah basi tito na Islaelivi lẹ nado nọ basi nunina sọn ojlo mẹ wá lẹ. E degbena Mose nado dọna Islaelivi lẹ dọmọ: “Whenuena mì wá aigba lọ mẹ fie yẹn hẹn mì wá, whenẹnu e na yin, dọ, whenuena mìwlẹ dù sọn akla aigba lọ tọn mẹ, mì [dona basi nunina de] hlan OKLUNỌ lọ.” Delẹ to sinsẹ́n tintan “jinulili ginglin” yetọn tọn lẹ mẹ dona yin nina taidi ‘nunina de hlan OKLUNỌ’ to whẹndo yetọn lẹpo gblamẹ. Doayi e go dọ sọha tangan sinsẹ́n tintan ehelẹ tọn de ma yin bibiọ gba. (Osọha lẹ 15:18-21) Ṣigba to whenuena Islaelivi lẹ basi nunina pẹdido tọn, yé na mọ dona Jehovah tọn dandan. Tito dopolọ yin mimọ to kọndopọmẹ hẹ tẹmpli he Ezekiẹli mọ to numimọ etọn mẹ. Mí hia dọmọ: “Tintan sọn sinsẹ́n tintan onú lẹpo tọn lẹpo mẹ, po [nunina onú lẹpo tọn] po, sọn avọ́sannu mìtọn lẹpo mẹ, na tin na yẹwhenọ lẹ: mìwlẹ na na sọn tintan ojinu ginglin mìtọn mẹ hlan yẹwhenọ lọ ga, nado hẹn dona de nado jẹ do owhé towe ji.”—Ezekiẹli 44:30.
9. Nuplọnmẹ tẹwẹ Jehovah na gbọn tito wélu-wiwé tọn gblamẹ?
9 Atọ̀ntọ, Jehovah basi tito wélu-wiwé tọn. E na anademẹ dọmọ: “Whenuena mìwlẹ gbẹ̀n ojijẹ aigba mìtọn tọn lọ, hiẹ ma na gbẹ̀n lọnglọnẹn ogle towe tọn lẹ pete gba, mọ hiẹ ma na bẹ wélu ojijẹ towe tọn pli gba. Hiẹ ma na wéwélu vẹngle towe tọn gba, mọ hiẹ ma na bẹ sinsẹ́n jijà vẹngle towe tọn pli gba; hiẹ na jo yé dai na wamọnọ lẹ podọ na jonọ lẹ lọ: yẹn wẹ OKLUNỌ lọ Jiwheyẹwhe mìtọn.” (Levitiku 19:9, 10) Whladopo dogọ, sọha tangan de mayin bibiọ gba. E pò to Islaelivi dopodopo si nado basi dide nuhe ewọ na jodo na wamọnọ lẹ. Ahọlu nuyọnẹntọ Sọlọmọni dọ po gbesisọ po dọmọ: “Ewọ he wàlẹblanu na wamọnọ, OKLUNỌ wẹ e yàn na: nuhe e wà e nasọ suahọ etọn na ẹn.” (Howhinwhẹn lẹ 19:17) Gbọnmọ dali Jehovah plọn yé nado nọ vẹawu wamọnọ lẹ bo nọ hò yetọn pọ́n.
10. Etẹlẹ mẹ wẹ awugbopo nado dopẹ́ dekọtọn do na Islaelivi lẹ?
10 Jehovah nọ dona Islaelivi lẹ to whenuena yé gbọn tonusise dali hẹn madao yetọn wá bo basi nunina sọn ojlo mẹ wá bosọ jo nude dai na wamọnọ lẹ. Ṣigba to whenuena Islaelivi lẹ gboawupo nado dopẹ́, yé hẹn nukundagbe Jehovah tọn bu. Ehe dekọtọn do nugbajẹmẹji mẹ podọ to godo mẹ yé yin bibẹ yì kanlinmọgbenu. (2 Otannugbo lẹ 36:17-21) To whelọnu lo, etẹlẹ wẹ mí sọgan plọn sọn ehe mẹ?
Aliho He mẹ Mí Sọgan Dopẹ́ te Lẹ
11. Aliho tangan tẹ mẹ wẹ mí sọgan do pẹdido mítọn hia Jehovah te?
11 Aliho tangan he mẹ mí sọgan pagigona Jehovah bo dopẹ́ te bẹ ‘avọ́nunina’ de hẹn ga. Taidi Klistiani lẹ, nugbo wẹ dọ mí ma tin to Osẹ́n Mose tọn glọ, bo dona nọ yí kanlin kavi jinukun lẹ do sanvọ́. (Kọlọsinu lẹ 2:14) Etomọṣo, apọsteli Paulu dotuhomẹna Klistiani Heblu tọn lẹ dọmọ: “Mì gbọ mí ni nọ sanvọ́ pipà tọn de hlan Jiwheyẹwhe whepoponu, enẹ wẹ, sinsẹ́n nùflo mítọn tọn, he basi gbeyiyi hlan oyín etọn.” (Heblu lẹ 13:15) Gbọn nugopipe po nutindo mítọn lẹ po yiyizan nado sanvọ́ pipà tọn de hlan Jehovah dali, vlavo to lizọnyizọn gbangba tọn mẹ kavi to “agun” Klistiani hatọ tọn lẹ mẹ, mí sọgan do pẹdido ahundopo tọn mítọn hia hlan Otọ́ owanyinọ olọn mẹ tọn mítọn, Jehovah Jiwheyẹwhe. (Psalm 26:12) To mọwiwà mẹ, etẹwẹ mí sọgan plọn sọn aliho he mẹ Islaelivi lẹ dona dopẹ́ na Jehovah te lẹ mẹ?
12. Gando azọngban he mí tindo taidi Klistiani lẹ go, etẹwẹ mí sọgan plọn sọn tito madao nina tọn mẹ?
12 Tintan whẹ́, dile mí ko mọ do, tito madao nina tọn lọ yin dandannu; Islaelivi dopodopo tindo azọngban de nado hẹndi to whẹho ehe mẹ. Taidi Klistiani lẹ, mí tindo azọngban lọ nado nọ tindo mahẹ to lizọnyizọn lọ mẹ bo nọ yì opli Klistiani tọn lẹ. Nuwiwa ehelẹ yin dandannu ga. To dọdai Jesu tọn mẹ gando ojlẹ opodo tọn lọ go, e dọ madoadúdẹji dọmọ: “Yè nasọ dọyẹwheho wẹndagbe ahọludu tọn helẹ to aigba fininọ lẹpo mẹ na okunnu de hlan akọta lẹpo; whenẹnu wẹ opodo na wá.” (Matiu 24:14; 28:19, 20) Gando opli Klistiani tọn lẹ go, apọsteli Paulu yin gbigbọdo nado wlan dọmọ: “Mì gbọ mí nisọ nọ lẹn mínọzo tọn pọ́n nado nọ jlahomẹdona to owanyi po azọ́n dagbe lẹ po mẹ: to ma gbẹ́ opli míde tọn mẹ, dile jijọ mẹdelẹ tọn te; ṣigba mí ni nọ to homẹjladona mínọzo; humọ na le mì mọ dọ azán lọ to sisẹpọ.” (Heblu lẹ 10:24, 25) Mí nọ do pẹdido mítọn na Jehovah hia to whenuena mí yí ayajẹ do kẹalọyi azọngban mítọn nado dọyẹwheho bo plọnmẹ bosọ dogbẹ́ hẹ mẹmẹsunnu mítọn lẹ to gbesisọmẹ to opli agun tọn lẹ ji, bo pọ́n ẹn hlan taidi lẹblanulọkẹyi po gbégbò de po.
13. Etẹwẹ mí plọn sọn tito nunina sọn ojlo mẹ wá po wélu-wiwé po tọn mẹ?
13 Humọ, mí sọgan mọaleyi sọn dogbigbapọnna tito awe he pò gbọn ehe gblamẹ Islaelivi lẹ sọgan do pinpẹn-nutọn-yinyọnẹn yetọn hia te lẹ mẹ—yèdọ nunina sọn ojlo mẹ wá po wélu-wiwé po. Gbọnvona tito madao nina tọn, heyin nubiọtomẹsi tangan dandan tọn de, tito nunina sọn ojlo mẹ wá po wélu-wiwé po tọn ma biọ nunina sọha tangan de gba. Kakatimọ, yé nọ dike pinpẹn-nutọn-yinyọnẹn sisosiso he devizọnwatọ Jehovah tọn de tindo to ahun etọn mẹ ni whàn ẹn nado yinuwa. To aliho mọnkọtọn de mẹ, dile mí tlẹ yọnẹn do dọ mahẹ tintindo to lizọnyizọn lọ mẹ po opli Klistiani tọn lẹ yìyì po yin azọngban tangan devizọnwatọ Jehovah tọn lẹpo tọn, be mí nọ tindo mahẹ to yé mẹ sọn ojlo mẹ wá po ahun lẹpo po ya? Be mí nọ pọ́n yé hlan taidi dotẹnmẹ hundote de nado do pinpẹn-nutọn ahundopo tọn mítọn hia na nuhe Jehovah ko wà na mí lẹpo ya? Be mí nọ tindo mahẹ susugege to nuwiwa ehelẹ mẹ, sọgbe hẹ ninọmẹ mítọn lẹ ya? Kavi be mí nọ pọ́n ehe lẹpo hlan taidi nuhe mí ma sọgan nọma wà lẹ poun wẹ ya? Na nugbo tọn, dopodopo mítọn wẹ dona na gblọndo na kanbiọ ehelẹ. Apọsteli Paulu dọ ẹ dole: “Gbọ omẹ dopodopo mìtọn ni mọdona azọ́n ede tọn whẹ́, whenẹnu wẹ e na tindo ayajẹ to ede homẹ kẹdẹ, e ma na yin mẹdevo tọn gba.”—Galatianu lẹ 6:4.
14. Etẹwẹ Jehovah nọ donukun sọn mí si to sinsẹ̀nzọn etọn mẹ?
14 Jehovah Jiwheyẹwhe yọ́n ninọmẹ mítọn lẹ ganji. E yọ́n nugopipe mítọn lẹ. E nọ yọ́n pinpẹn avọ́sinsan he devizọnwatọ etọn lẹ nọ basi sọn ojlo mẹ wá lẹ tọn—yèdọ daho kavi pẹvi. E ma nọ donukun dọ mímẹpo ni na sọha onú dopolọ tọn gba, podọ mí ma tlẹ sọgan wàmọ. To whenuena apọsteli Paulu to hodọdo nutindo agbasa tọn lẹ nina ji, e dọna Klistiani Kọlinti tọn lẹ dọmọ: “Eyin ojlo homẹ tọn tin jẹnukọn, yè kẹalọyi i kẹdẹdi ehe omẹ lọ tindo, e ma yin kẹdẹdi ehe e ma tindo gba.” (2 Kọlintinu lẹ 8:12) Nunọwhinnusẹ́n ehe sọ gando sinsẹ̀nzọn mítọn hlan Jiwheyẹwhe go ga. E mayin sọha nuhe mí wà tọn wẹ nọ hẹn sinsẹ̀nzọn mítọn yin alọkẹyi hlan Jehovah gba, ṣigba lehe mí yí ayajẹ do wà ẹ po ahun lẹpo po gbọn.—Psalm 100:1-5; Kọlọsinu lẹ 3:23.
Wleawuna Gbigbọ Gbehosọnalitọ Tọn bo Hẹn E Go
15, 16. (a) Kanṣiṣa tẹwẹ tin to sinsẹ̀nzọn gbehosọnalitọ tọn po pẹdido po ṣẹnṣẹn? (b) Nawẹ mẹhe ma sọgan basi gbehosọnalitọ lẹ sọgan do gbigbọ gbehosọnalitọ tọn hia gbọn?
15 Lizọnyizọn whenu-gigọ́ tọn mẹ bibiọ yin dopo to aliho dagbe pekọhẹnwanamẹ tọn lẹ mẹ nado do pẹdido mítọn hia na Jehovah. Owanyi na Jehovah po pẹdido na ojọmiọn etọn po ko whàn devizọnwatọ Jehovah tọn susu nado basi diọdo daho lẹ to gbẹzan yetọn mẹ nado sọgan tindo whenu susu dogọ nado sẹ̀n Jehovah. Mẹdelẹ penugo nado yin gbehosọnalitọ whepoponu tọn, bo nọ yí madozẹnzẹn ganmẹ 70 zan to sunmẹsunmẹ nado dọyẹwheho wẹndagbe lọ tọn bo plọn nugbo lọ gbẹtọ lẹ. Mẹdevo lẹ, he ninọmẹ voovo lẹ sọgan glọnalina nọ basi tito sọn ojlẹ de mẹ jẹ devo mẹ nado yí ganmẹ 50 zan to osun mẹ taidi gbehosọnalitọ alọgọtọ tọn nado dọyẹwheho.
16 Ṣigba etẹwẹ dogbọn suhugan devizọnwatọ Jehovah tọn lẹ tọn he ma sọgan basi gbehosọnalitọ whepoponu kavi alọgọtọ tọn dali? Yé sọgan do pẹdido yetọn hia gbọn awuwiwlena gbigbọ gbehosọnalitọ tọn bosọ hẹn e go dali. Gbọnna? Yé sọgan nọ na tuli mẹhe sọgan basi gbehosọnalitọ lẹ, bo nọ dó ojlo lọ nado doafọna sinsẹ̀nzọn whenu-gigọ́ tọn do ahun mẹ na ovi yetọn lẹ, bosọ nọ tindo mahẹ gbesisọ tọn to yẹwhehodidọ mẹ sọgbe hẹ ninọmẹ yetọn lẹ. Nuhe mí wà to lizọnyizọn lọ mẹ nọ sinai do obá he mẹ pinpẹn-nutọn-yinyọnẹn mítọn siso jẹ na nuhe Jehovah ko wà, bo to wiwà, bo nasọ wá wà na mí ji.
Yíyí ‘Nuhọakuẹ’ Mítọn lẹ do Dopẹ́
17, 18. (a) Nawẹ mí sọgan yí ‘nuhọakuẹ’ mítọn lẹ do dopẹ́ gbọn? (b) Etẹwẹ Jesu dọ gando nunina asuṣiọsi lọ tọn go, podọ etẹwutu?
17 “Yí [nuhọakuẹ] towe do gbògbéna OKLUNỌ,” wẹ Howhinwhẹn lẹ 3:9 dọ, “podọ sọn sinsẹ́n tintan sudeji towe lẹpo mẹ.” Devizọnwatọ Jehovah tọn lẹ ma nọ na madao ba. Kakatimọ, Paulu wlanwe hlan agun Kọlinti tọn dọmọ: “Omẹ dopodopo dile e lẹn to ayiha etọn mẹ do, mọwẹ mì ni gbọ e ni na do; e yin po hùnhlún po blo, kavi huhlọn do hẹn basi tọn blo: na Jiwheyẹwhe yiwanna nunamẹtọ homẹhunhunnọ.” (2 Kọlintinu lẹ 9:7) Nunina sọn ojlo mẹ nado nọgodona azọ́n yẹwhehodidọ Ahọluduta tọn lẹdo aihọn pé sọ nọ do pẹdido mítọn hia ga. Pinpẹn-nutọn-yinyọnẹn sọn ahun mẹ wá nọ whàn mí nado wà ehe to gbesisọmẹ, vlavo nado tlẹ nọ na nude to sẹmẹsẹmẹ, dile Klistiani fliflimẹ tọn lẹ wà do.—1 Kọlintinu lẹ 16:1, 2.
18 E mayin sọha nuhe mí na lọ tọn wẹ nọ do pẹdido mítọn na Jehovah hia gba. Kakatimọ, gbigbọ he tin to godo na nunina lọ wẹ. Nuhe Jesu doayi e go to whenuena e to gbẹtọ lẹ pọ́n dile yé to nunina yetọn lẹ dlan do adọkun-potin tẹmpli tọn mẹ niyẹn. To whenuena Jesu mọ asuṣiọsi wamọnọ de dlan “abọgan-kuẹ flinflin awe” do e mẹ, e dọmọ: “Sọn nugbo de mẹ yẹn dọ hlan mì, asuṣiọsi wamọnọ he dlan do e mẹ hú yé omẹ pó: na ehe lẹpo sọn susu gbọpọ yetọn mẹ dlan do nunina lọ mẹ: ṣigba ewọ sọn matindo etọn mẹ dlan do e mẹ dùdù he e tindo lẹpo.”—Luku 21:1-4.
19. Naegbọn mí dona vọ́ dogbapọnna aliho he mẹ mí nọ dopẹ́ te lẹ?
19 Mì gbọ nuhe mí plọn gando pẹdido go ehelẹ ni whàn mí nado vọ́ dogbapọnna aliho he mẹ mí nọ do pẹdido mítọn hia te lẹ. Di apajlẹ, be mí sọgan hẹn avọ́sinsan pipà tọn mítọn hlan Jehovah po nunina he mí nọ yí do nọgodona azọ́n lẹdo aihọn pé tọn po jideji ya? Eyin mí wàmọ sọgbe hẹ nugopipe mítọn, mí sọgan deji dọ homẹ Otọ́ owanyinọ alọtlútọ mítọn, Jehovah tọn, na hùn tlala dọ mí nọ dopẹ́.
Be Hiẹ Flin Ya?
• Whẹwhinwhẹ́n tẹlẹ wẹ mí tindo nado nọ dopẹ́ na Jehovah?
• Etẹlẹ wẹ mí plọn sọn tito madao nina, nunina bibasi sọn ojlo mẹ, po wélu-wiwé po tọn mẹ?
• Nawẹ mí sọgan wleawuna gbigbọ gbehosọnalitọ tọn gbọn?
• Nawẹ mí sọgan yí ‘nuhọakuẹ’ mítọn lẹ do dopẹ́ na Jehovah gbọn?
[Kanbiọ Oplọn Tọn Lẹ]
[Yẹdide to weda 15]
“Nunina dagbedagbe po nunina he sọgbe lẹpo po, aga wẹ e sọn”
[Yẹdide to weda 16]
Nuplọnmẹ atọ̀n tẹlẹ wẹ yin didohia tofi sọn Osẹ́n lọ mẹ?
[Yẹdide to weda 18]
Avọ́sinsan tẹlẹ wẹ mí sọgan basi?