Lilatọ Ahọluduta Tọn lẹ Na Linlin

Nudohia Televiziọn Tọn de Hẹn Ẹn Nado Pagigona Jiwheyẹwhe

APỌSTELI PAULU dọ dọ “mẹdelẹ . . . yí wiwọ́ po nuvẹun po do to yẹwheho Klisti tọn dọ; mẹdelẹ ga, sọn homẹdagbe mẹ.” (Filippinu lẹ 1:15) To mayọnẹnmẹ, mẹhe tlẹ to tintẹnpọn nado hẹn omẹ Jehovah tọn gble lẹ ko hẹn omẹ ahunjijlọnọ lẹ nado kẹalọyi nugbo lọ to whedelẹnu.

To novembre 1998, nudọnamẹ de yin zizedonukọnnamẹ to televiziọn otò France tọn ji he do yẹdide Bẹtẹli, owhé Kunnudetọ Jehovah tọn lẹ tọn he to Louviers, France hia. Mahopọnna linlẹn voovo he gbẹtọ lẹ tindo gandego, nudohia lọ hẹn kọdetọn dagbe lẹ wá to aliho jiawu de mẹ.

Anna-Paula, he nọ nọ̀ nudi kilomẹtlu 60 do Bẹtẹli yin dopo to mẹhe pọ́n nudohia televiziọn tọn lọ lẹ mẹ. Yọnnu he ko yin gbigbẹdai po visunnu awe po ehe to agbasazọ́n de dín. Enẹwutu to wunkẹngbe, e ylọ alokan Bẹtẹli tọn nado kanse eyin e sọgan mọ azọ́n to finẹ. “Sọgbe hẹ nudohia lọ, yẹn mọdọ nọtẹn dagbe de wẹ filọ yin podọ azọ́n he to yìyì to finẹ yin azọ́n dagbe,” wẹ yọnnu lọ dọ. Ṣigba lehe e paṣa ẹ nado sè dọ mẹhe to sinsẹ̀nzọnwa to Bẹtẹli lẹpo wẹ yin lizọnyizọnwatọ he ze yedelẹ jo sọn ojlo mẹ wá do sọ! To hodidọ kleun de hẹ ẹ gando azọ́n Kunnudetọ Jehovah tọn lẹ tọn go godo, e yigbe dọ Kunnudetọ de ni wá dla ẹ pọ́n.

To whenuena Léna, lizọnyizọnwatọ whenu-gigọ́ tọn de to agun lẹdo lọ tọn mẹ dla ẹ pọ́n, yé dọhodopọ na ojlẹ gaa de, bọ Anna-Paula kẹalọyi owe Oyọnẹn He Nọ Planmẹ Sọyi Ogbẹ̀ Madopodo Mẹ. a Jẹnukọnna dlapọn he bọdego, Anna-Paula ko hia owe lọ sọn bibẹ yì vivọnu bo tindo kanbiọ susu. E kẹalọyi plọnmẹ Biblu de. Anna-Paula dọmọ: “Na yẹn tọn, dotẹnmẹ hundote de wẹ e yin nado plọn Ohó Jiwheyẹwhe tọn. Yẹn ma ko tindo Biblu de na dee pọ́n gbede.”

To janvier owhe he bọdego tọn mẹ, Anna-Paula basi dlapọn yì Bẹtẹli, podọ to osẹ he bọdego mẹ e yì opli Klistiani tọn etọn tintan. To madẹnmẹ to enẹgodo, e jẹ Biblu plọn hẹ ovi etọn lẹ ji bosọ nọ dekunnuna họntọn etọn lẹ. “Yẹn ma sọgan whlá nuhe yẹn to pinplọn lẹ do ohò ṣie mẹ gba,” wẹ e dọ. “Yẹn nọ jlo nado má nugbo Biblu tọn lẹ hẹ gbẹtọ lẹ bo miọnhomẹna yé.” To whenuena e tẹnpọn bo duto nuhahun mẹdetiti tọn susu ji, Anna-Paula jẹ opli agun tọn lẹ yì ji to gbesisọmẹ. Nukọnyiyi etọn diun po awuyiya po bọ e sọ yin bibaptizi to 5 mai 2002.

Humọ, na apajlẹ dagbe Anna-Paula tọn po yẹwhehodidọ zohunhunnọ etọn po wutu, onọ̀ etọn lọsu jẹ Biblu plọn ji bo yin bibaptizi to madẹnmẹ. Anna-Paula dọmọ: “Ayajẹ ṣie ma tindo dogbó gba. Yẹn nọ dopẹna Jehovah to azán lẹpo gbè na dotẹnmẹ he e hundote na mi nado yọ́n ewọ bo sẹ̀n ẹn podọ na dona he e kọ̀n do ji e lẹpo.”

[Nudọnamẹ Odò Tọn]

[Yẹdide to weda 8]

Aga: Anna-Paula

Odò: Họntonu alahọ France tọn