Otándò He Ma Nọ Hẹn Osin Lẹ

TO HOHOWHENU, otándò lẹ yin odò daho he nọ yin kùnkùn gbọn gbẹtọ lẹ dali he nọ yin yiyizan na taun tọn di sinhẹnnú. To ojlẹ delẹ mẹ, to Aigba Pagbe tọn lọ ji, ehe wẹ aliho dopo gee lọ nado mọ osin zan.

To ohó Jiwheyẹwhe tọn kinkàndai whenu, yẹwhegán Jẹlemia dlẹnalọdo otándò lẹ to aliho yẹhiadonu tọn mẹ, dọmọ: “Omẹ ṣie lẹ ko wà oylan awe; yé ko gbẹ́ yẹn asisa osin ogbẹ̀ tọn lẹ dai, bo dè otándò lẹ na yede, otándò gbigbà lẹ he ma sọgan hẹn osin de.”—Jẹlemia 2:13.

Islaelivi lẹ ko gbẹ́ Jehovah, Jiwheyẹwhe yetọn—“asisa osin ogbẹ̀ tọn lẹ” dai—bo ko basi gbekọndopọ awhànfunfun tọn he ma tindo jide lẹ hẹ akọta kosi lẹ bosọ to yẹwhe lalo madogánnọ lẹ sẹ̀n. Dile Jẹlemia dọ ẹ do, fibẹtado mọnkọtọn lẹ he mẹ yé ze todido yetọn do wá lẹzun otándò gbigbà tata lẹ he ma tindo huhlọn hihọ́-basinamẹ kavi mẹwhlẹngán tọn depope.—Deutelonomi 28:20.

Be mí sọgan plọn nudepope sọn apajlẹ ehe mẹ to egbehe ya? Kẹdẹdile e te do to azán Jẹlemia tọn gbè, Jiwheyẹwhe madopodo lọ, yèdọ Jehovah, wẹ gbẹ́ pò to Asisa osin ogbẹ̀ tọn dopo akàn lọ yin to egbehe. (Psalm 36:9; Osọhia 4:11) Ewọ dopo kẹdẹ wẹ sọgan na gbẹtọvi lẹ ogbẹ̀ madopodo gbọn Visunnu etọn, Jesu Klisti gblamẹ. (Johanu 4:14; 17:3) Ṣogan, kẹdẹdi mẹhe nọgbẹ̀ to ojlẹ Jẹlemia tọn mẹ lẹ, suhugan gbẹtọ lẹ tọn to egbehe ko gbẹ́ ohó Jiwheyẹwhe tọn he yin didọ to Biblu mẹ dai bo tlẹ nọ yí nukunpẹvi do pọ́n ẹn. Kakatimọ, yé ze jide yetọn do pọngbọ he yé lẹndọ tonudidọ, nuyọnẹn ovọ́ gbẹtọvi tọn lẹ, gọna linlẹn po tamẹnuplọnmẹ he kọnmasin do Jiwheyẹwhe go lẹ po sọgan hẹnwa lẹ mẹ. (1 Kọlintinu lẹ 3:18-20; Kọlọsinu lẹ 2:8) Dide he dona yin bibasi lọ ko họnwun. Fie wẹ hiẹ na ze jidide towe do? Be “asisa osin ogbẹ̀ tọn,” he yin Jehovah mẹ wẹ, kavi do “otándò gbigbà lẹ he ma sọgan hẹn osin de” mẹ?

[Yẹdide to weda 32]

Yẹdide okò tọn de he do onọ̀ yẹwhe-yọnnu de tọn he yin mimọ to yọwhé Islaeli tọn de mẹ hia

[Asisa Yẹdide tọn]

Yẹdide lọ yin dide gbọn alọgọ British Museum tọn dali