‘Tindo Homẹhunhun Susu to Jehovah Mẹ’
‘Tindo Homẹhunhun Susu to Jehovah Mẹ’
“Hẹn homẹ towe hùn susu to OKLUNỌ mẹ; ewọ nasọ yí ovẹ̀ ayiha towe mẹ tọn na we.”—PSALM 37:4.
1, 2. Mẹnu wẹ Asisa ayajẹ nugbo tọn, podọ nawẹ Ahọlu Davidi dọ̀n ayidonugo wá nugbo ehe ji gbọn?
‘AYAJẸNỌ wẹ wamọnọ lẹ to gbigbọmẹ, ayajẹnọ wẹ lẹblanunọ lẹ, ayajẹnọ wẹ jijọho-dintọ lẹ.’ Hodidọ ehelẹ, to pọmẹ hẹ ṣidopo devo lẹ he basi zẹẹmẹ mẹhe yin ayajẹnọ lẹ tọn wẹ yin homẹbibiọ ayidego tọn na Yẹwhehodidọ diyin Osó ji tọn Jesu tọn, dile e yin kinkàndai gbọn Wẹndagbe kàntọ Matiu dali do. (Matiu 5:3-11) Nuhe Jesu dọ lẹ vọ́ jide na mí dọ mí sọgan mọ ayajẹ.
2 Ohàn wiwe de he Ahọlu Davidi kàn to Islaeli hohowhenu tọn mẹ dọ̀n ayidonugo wá Asisa ayajẹ nugbo tọn, Jehovah ji. “Hẹn homẹ towe hùn susu to OKLUNỌ mẹ;” wẹ Davidi dọ, podọ “ewọ nasọ yí ovẹ̀ ayiha towe mẹ tọn na we.” (Psalm 37:4) Ṣigba etẹwẹ sọgan hẹn yinyọ́n Jehovah po adà gbẹtọ-yinyin etọn tọn lẹ po yin ‘homẹhunnu susu’? Nawẹ dogbapọnna nuhe e ko wà bo na gbẹsọ wà to lẹndai etọn hinhẹndi mẹ lẹ ze nukundido lọ donukọnna we nado mọ “ovẹ̀ ayiha towe mẹ tọn” yí gbọn? Sọwhiwhe yíyí do gbadopọnna Psalm 37, wefọ 1 jẹ 11 to gigọ́mẹ na na mí gblọndo lọ lẹ.
‘Hiẹ Yin Nuvẹunnọ Blo’
3, 4. Dile e yin kinkàndai to Psalm 37:1 mẹ do, ayinamẹ tẹwẹ Davidi na, podọ naegbọn mí dona setonuna ẹn to egbehe?
3 Mí to gbẹnọ to “ojlẹ awusinyẹn tọn lẹ” mẹ, podọ ylanwiwa to susudeji. Mí ko mọ hẹndi ohó apọsteli Paulu tọn lẹ tọn dọmọ: “Mẹylankan lẹ, po mẹklọtọ lẹ po na to yinylan yì nukọn, yé na to mẹklọ, yè nasọ to yé klọ.” (2 Timoti 3:1, 13) Lehe e bọawu nado yin nuyiwadeji gbọn nuhe taidi kọdetọn dagbe mẹylankan lẹ tọn dali do sọ! Enẹ lẹpo sọgan fẹayihasẹna mí, bo de nukun gbigbọmẹ tọn mítọn sẹ̀ sọn nuhe sọgbe lẹ ji. Doayi lehe homẹbibiọ Psalm 37 tọn hẹn mí tin to aṣeji hlan owù mọnkọtọn do go dọmọ: “A fiẹ na ylanwatọ lẹ tọn wutu blo, hiẹ sọ yin nuvẹunnọ do yé he nọ wazọ́n mawadodo tọn lẹ go blo.”
4 Linlinnamẹnu aihọn tọn nọ na linlin susugege egbesọegbesọ gando mawadodo go. Ajọwatọ nugbomadọtọ lẹ nọ hò gbẹtọ lẹ dù dọ̀n. Sẹ́nhẹngbatọ lẹ nọ tafu homẹvọnọ lẹ. Alọ ma nọ jẹ mẹhùtọ lẹ go kavi yé sọgan nọma jiya na danuwiwa yetọn. Apajlẹ whẹdida he ko gblezọn tọn enẹ lẹpo sọgan fọ́n homẹgble dote bo dotukla jijọho ayiha mẹ tọn mítọn. Nuhe taidi kọdetọn dagbe ylanwatọ lẹ tọn tlẹ sọgan jẹ jijlo mí ji. Ṣigba be homẹgble mítọn na hẹn ninọmẹ lọ pọnte wẹ ya? Be ojlo tintindo na nuhe taidi ale he mẹylankan lẹ to vivi etọn dù na diọ nudepope wẹ ya? Paali! Na nugbo tọn, mí ma dona “fiẹ” gba. Etẹwutu?
5. Naegbọn mẹylankan lẹ yin yiyijlẹdo ogbé go?
5 Psalm-kàntọ lọ na gblọndo dọmọ: “Na yè na sán yé zindai zandevie di ogbé, yé nasọ fiọ di omá mú.” (Psalm 37:2) Omá mú sọgan yọ́n pinpọ́n, ṣigba e nọ yawu yọ́ bosọ nọ kupẹ́. Onú dopolọ wẹ nọ jọ do mẹylankan lẹ go. Kọdetọn dagbe yetọn ma nọ dẹn-to-aimẹ gba. To whenuena yé kú, ale mawadodo tọn yetọn lẹ ma nọ gọalọna yé ba. To godo mẹ, whẹdida dodo nọ plá mẹlẹpo. “Okú wẹ ale ylando tọn,” wẹ Paulu wlan. (Lomunu lẹ 6:23) Mẹylankan po mawadodonọ lẹpo po na mọ “ale” yetọn yí to godo mẹ bo ma na tin ba. Gbẹzan he ma tindo ale nankọtọn die!—Psalm 37:35, 36; 49:16, 17.
6. Etẹwẹ mí sọgan plọn sọn Psalm 37:1, 2 mẹ?
6 To whelọnu lo, be mí dona dike ale ojlẹ gli mẹylankan lẹ tọn ni dotukla mí wẹ ya? Nuplọnmẹ he mí mọyi sọn wefọ awe tintan Psalm 37 tọn mẹ die: Ma dike kọdetọn dagbe yetọn ni fẹayihasẹna we sọn nudide towe nado sẹ̀n Jehovah ji blo. Kakatimọ, ze ayidonugo towe lẹpo do dona po yanwle gbigbọmẹ tọn lẹ po ji.—Howhinwhẹn lẹ 23:17.
“Dotudo OKLUNỌ Go, Bosọ Nọ Wà Dagbe”
7. Naegbọn mí dona dejido Jehovah go?
7 Psalm-kàntọ lọ dotuhomẹna mí dọmọ: “Dotudo OKLUNỌ go, bosọ nọ wà dagbe.” (Psalm 37:3a) To whenuena magbọjẹ kavi ayihaawe tlẹ to tuklado mí, mí dona dejido Jehovah go mlẹnmlẹn. Ewọ wẹ Omẹ lọ he nọ wleawu hihọ́ gbigbọmẹ tọn to obá gigọ́ mẹ. Mose wlan dọmọ: “Ewọ he sinai to fiwhiwhlá Gigogán tọn mẹ na nọ nọ̀ oyẹ̀ Ganhunupo tọn glọ.” (Psalm 91:1) To whenuena jideji sẹ́nhẹngba tọn to titonu ehe mẹ to tuklado mí, mí dona ganjẹ Jehovah go hú gbede pọ́n tọn. Eyin hiẹ wẹ́n afọ, be homẹ towe ma na hùn nado mọ godonọnamẹ họntọn de tọn ya? Mọdopolọ, mí tindo nuhudo godonọnamẹ Jehovah tọn to whenuena mí to vivẹnudo nado zinzọnlin to nugbonọ-yinyin mẹ.—Isaia 50:10.
8. Nawẹ mahẹ tintindo to lizọnyizọn Klistiani tọn mẹ sọgan gọalọna mí ma nado yin tuklado glanglan gbọn kọdetọn dagbe mẹylankan lẹ tọn dali do?
8 Alọnu hinhẹn ján to gbẹtọ di lẹngbọ lẹ dindinmọ mẹ podọ alọgigọna yé nado tindo oyọnẹn he pegan lẹndai Jehovah tọn na gọalọna mí ma nado yin tuklado gbọn kọdetọn dagbe mẹylankan lẹ tọn dali. Dile kanyinylan fọ́n bo to jijideji, mí dona hẹn alọnu ján mlẹnmlẹn to alọgigọna mẹdevo lẹ mẹ. “Nado nọ wà dagbe podọ nado nọ mánamẹ, mì wọn blo” wẹ apọsteli Paulu dọ, “na avọ́ mọnkọtọn go wẹ homẹ Jiwheyẹwhe tọn nọ vivi do tlala.” “Dagbe” klohugan he mí sọgan wà wẹ nado má wẹndagbe gigonọ Ahọluduta Jiwheyẹwhe tọn tọn hẹ mẹdevo lẹ. Na nugbo tọn, yẹwhehodidọ gbangba tọn mítọn yin ‘avọ́sinsan pipà tọn de.’—Heblu lẹ 13:15, 16; Galatianu lẹ 6:10.
9. Basi zẹẹmẹ tudohomẹnamẹ Davidi tọn nado “nọ nọ̀ aigba lọ ji.”
9 Davidi zindonukọn dọmọ: “Nọ nọ̀ aigba lọ ji, bosọ nọ doafọna nugbo.” (Psalm 37:3b) “Aigba lọ” to azán Davidi tọn gbè wẹ aigba he Jiwheyẹwhe na Islaeli, yèdọ Aigba Pagbe tọn. To gandudu Sọlọmọni tọn whenu, dogbó etọn lẹ dlẹnkan sọn Dani to agewaji jẹ Beẹli-ṣeba to hùwaji. Fininọ Islaeli tọn niyẹn. (1 Ahọlu lẹ 4:25) Mahopọnna fie mí nọ nọ̀ to aigba ji to egbehe, mí to nukọnpọnhlan ojlẹ lọ whenuena aigba lọ blebu na lẹzun paladisi to aihọn yọyọ dodowiwa tọn de mẹ. Todin whẹ́, mí tin to lẹdo hihọ́ gbigbọmẹ tọn de mẹ.—Isaia 65:13, 14.
10. Etẹwẹ nọ yin kọdetọn lọ eyin mí “doafọna nugbo”?
10 Etẹwẹ na yin kọdetọn lọ eyin mí “doafọna nugbo”? Howhinwhẹn gbọdo lọ flin mí dọmọ: “Gbẹtọ nugbonọ na sudeji na dona.” (Howhinwhẹn lẹ 28:20) Na jide tọn, mí na mọ dona Jehovah tọn yí eyin mí yí nugbonọ-yinyin do sinyẹnlin to yẹwheho wẹndagbe lọ tọn didọna mẹdepope to fidepope he mí nọ nọ̀ mẹ. Di apajlẹ, Frank po asi etọn, Rose po, bẹ sinsẹ̀nzọn gbehosọnalitọ tọn jẹeji to owhe 40 die to tòpẹvi de mẹ to agewaji Écosse tọn. Whẹpo yé do wá finẹ, omẹ vude he tindo ojlo to nugbo lọ mẹ dai ko joagọyigodo. Po adọgbigbo po, asu po asi po gbehosọnalitọ ehe bẹ azọ́n yẹwhehodidọ po mẹpinplọn tọn po jẹeji. Todin, agun daho de wẹ tin to tòpẹvi enẹ mẹ. Na nugbo tọn, Jehovah ko dona nugbonọ-yinyin asu po asi po ehe tọn. Frank dọ po whiwhẹ po dọmọ: “Dona daho hugan lọ wẹ yindọ mí gbẹ́ tin to nugbo lọ mẹ bo yọn-na-yizan na Jehovah.” Mọwẹ, eyin mí “doafọna nugbo,” mí nọ mọ dona susu yí bosọ nọ yọ́n pinpẹn yetọn.
‘Tindo Homẹhunhun Susu to Jehovah Mẹ’
11, 12. (a) Nawẹ mí sọgan ‘tindo homẹhunhun susu to Jehovah mẹ gbọn’? (b) Yanwle tẹwẹ hiẹ sọgan zedai gando oplọn mẹdetiti tọn go, podọ etẹwẹ sọgan yin kọdetọn lọ?
11 Nado hẹn haṣinṣan mítọn hẹ Jehovah lodo bo hẹn jidide mítọn go to ewọ mẹ, mí dona ‘tindo homẹhunhun susu to Jehovah mẹ.’ (Psalm 37:4a) Nawẹ mí nọ wà enẹ gbọn? Kakati nado to nulẹnpọn glanglan do ninọmẹ mítọn ji, mahopọnna lehe e sọgan sinyẹn sọ, mí dona ze ayidonugo mítọn lẹpo do Jehovah ji. Aliho dopo nado wà ehe wẹ nado klan whenu dovo na Ohó etọn hihia. (Psalm 1:1, 2) Be hiẹ nọ mọ homẹhunhun to Biblu hihia towe mẹ ya? Hiẹ na wàmọ eyin a nọ hia ẹ po yanwle lọ po nado plọn nususu dogọ gando Jehovah go. Naegbọn a ma do nọte vude to adà de hihia godo bo kanse dewe dọ, ‘Etẹwẹ adà ehe plọn mi gando Jehovah go?’ Hiẹ sọgan mọ ẹn taidi alemọyinu nado tindo kandai-we de to alọji to whenuena hiẹ to Biblu hia. Whedepopenu he a nọte nado lẹnnupọndo zẹẹmẹ nuhe hiẹ ko hia lẹ tọn ji, kàn hogbe kleun de dai he na flin we dopo to jẹhẹnu dagbe Jiwheyẹwhe tọn lẹ mẹ. To psalm devo mẹ, Davidi jihàn dọmọ: “Gbọ ohó onù ṣie mẹ tọn, po linlẹn ayiha ṣie mẹ tọn po, ni yin [awuvivinu] to nukun towe mẹ, OKLUNỌ E, awinyan ṣie, mẹflitọ ṣie.” (Psalm 19:14) Ayidonugo mítọn lẹpo zizedo Ohó Jiwheyẹwhe tọn ji yin “awuvivinu” na Jehovah bosọ nọ hẹn mílọsu jaya.
12 Nawẹ mí sọgan mọ ayajẹ to nupinplọn mítọn po ayihamẹlinlẹnpọn deji po mẹ gbọn? Mí sọgan yí ì do basi yanwle mítọn nado plọn nususu dile e sọgan yọnbasi do gando Jehovah po aliho etọn lẹ po go. Owe lẹ taidi Dawe Klohugan lọ He Nkọtọn Ma Nọgbẹ̀ Pọ́n po Dọnsẹpọ Jehovah po a wleawuna nudọnamẹ susu he ji mí sọgan lẹnnupọndo po pinpẹn-nutọn-yinyọnẹn po. Taidi kọdetọn de, Davidi hẹn dodonọ deji dọ Jehovah “nasọ yí ovẹ̀ ayiha towe mẹ tọn na we.” (Psalm 37:4b) Jidide ehe nkọtọn wẹ na ko whàn apọsteli Johanu nado wlan dọmọ: “Ehe sọ wẹ tudido he mí tindo to ewọ mẹ, dọ, eyin mí biọ nudepope kẹdẹdi ojlo etọn, e sè mítọn: eyin mí yọnẹn dọ e sè mítọn, nudepope mí biọ, mí yọnẹn dọ mí tindo kanbiọ he mí to bibiọ to e dè.”—1 Johanu 5:14, 15.
13. To owhe agọe tọn lẹ mẹ, jideji azọ́n yẹwhehodidọ Ahọluduta tọn tẹwẹ ko yin ayidego to aigba susu ji?
13 Taidi tenọgligo hẹntọ lẹ, nuhe na hẹn homẹhun mí hugan wẹ nado mọ dọ nupojipetọ-yinyin Jehovah tọn yin whẹsuna. (Howhinwhẹn lẹ 27:11) Be ahun mítọn lẹ ma nọ gọ́ na ayajẹ to whenuena mí sè azọ́n pligidi yẹwhehodidọ tọn he mẹmẹsunnu mítọn lẹ to wiwà to aigba he ko tin to gandudu aṣẹ-glanglan panamẹtọ tọn glọ dai lẹ ji ya? Mí to nukọnpọnhlan po jeje po nado mọ aigba devo he mẹdekannujẹ sinsẹ̀n tọn sọgan yin nina whẹpo titonu ehe na wá vivọnu. Susu devizọnwatọ Jehovah tọn he nọ nọ̀ otò he mẹ nuwiwa Klistiani tọn lẹ yin alọkẹyi te lẹ nọ tindo mahẹ zohunhun tọn to kunnudide na wehọmẹvi lẹ, fibẹtado-dintọ lẹ, po jonọ devo lẹ po mẹ bo nọ duvivi mẹdekannujẹ sinsẹ̀n-bibasi tọn. Odẹ̀ mítọn wẹ yindọ dile omẹ ehelẹ na lẹkọyi otò yetọn mẹ, yé na dike hinhọ́n nugbo tọn ni to wunhọ́n zọnmii to zinvlu gọ́ngọ́n mẹ.—Matiu 5:14-16.
“Jo Ali Towe do Alọ OKLUNỌ Tọn Mẹ”
14. Kunnudenu tẹwẹ dohia dọ mí sọgan ganjẹ Jehovah go?
14 Kọgbọ nankọtọn die nado yọnẹn dọ nuhiha po nuhe sọgan taidi agbàn pinpẹn kọgbidinamẹ tọn to mí ji lẹ po sọgan yin didesẹ! Gbọnna? Davidi gblọn dọmọ: “Jo ali towe do alọ OKLUNỌ tọn mẹ, dotudo e go ga; ewọ nasọ basi i.” (Psalm 37:5) To agun mítọn lẹ mẹ, mí tindo kunnudenu susugege dọ mí sọgan ganjẹ Jehovah go na alọgọ. (Psalm 55:22) Mẹhe tin to lizọnyizọn whenu-gigọ́ tọn mẹ lẹpo, vlavo taidi gbehosọnalitọ, nugopọntọ tomẹyitọ, mẹdehlan, kavi mẹdezejotọ he to Bẹtẹli, sọgan dekunnuna nukunpedomẹgo dejidego Jehovah tọn. Naegbọn hiẹ ma do dọho hẹ mẹhe hiẹ yọnẹn to yé mẹ lẹ bo kanse yé lehe Jehovah ko gọalọna yé do? Matin ayihaawe, hiẹ na sè numimọ susu he dohia dọ etlẹ yin to ojlẹ sinsinyẹn lẹ whenu, alọ Jehovah tọn ma nọ whete gbede gba. E nọ wleawuna dandannu gbẹ̀mẹ tọn lẹ to whepoponu.—Psalm 37:25; Matiu 6:25-34.
15. Nawẹ dodowiwa omẹ Jiwheyẹwhe tọn lẹ tọn nọ sẹ́ jẹgbonu gbọn?
15 Eyin mí ganjẹ Jehovah go bo dejido ewọ go mlẹnmlẹn, mí sọgan tindo numimọ nuhe psalm-kàntọ lọ dọ bọdego lẹ tọn dọmọ: “E nasọ de dodo towe jẹgbonu di hinhọ́n, podọ whẹdida towe di okle owhè [ṣádada] mẹ.” (Psalm 37:6) Taidi Kunnudetọ Jehovah tọn lẹ, mí nọ saba yin didohia to aliho agọ̀ mẹ. Ṣigba Jehovah nọ hùn nukun na ahunjijlọnọ lẹ nado sọgan mọ dọ owanyi na Jehovah po kọmẹnu lẹ po wẹ nọ whàn mí nado wà lizọnyizọn gbangba tọn mítọn. To ojlẹ dopolọ mẹ, walọ dagbe mítọn nọ yin mimọ hezeheze dile etlẹ yindọ mẹsusu nọ pọ́n ẹn hlan to aliho agọ̀ mẹ. Jehovah nọ hẹn mí dote to nukundiọsọmẹ po homẹkẹn lẹpo po glọ. Taidi kọdetọn de, dodowiwa omẹ Jiwheyẹwhe tọn lẹ tọn nọ sẹ́ jẹgbonu di owhè ṣádada to okle.—1 Pita 2:12.
“Yin Abọẹnọ . . . Yí Homẹfifa do Nọte”
16, 17. To kọndopọmẹ hẹ Psalm 37:7, ojlẹ tẹmẹ wẹ mí tin te todin, podọ etẹwutu?
16 Hogbe psalm-kàntọ lọ tọn he bọdego lẹ wẹ: “Yin abọẹnọ hlan OKLUNỌ, bosọ yí homẹfifa do nọtepọn ẹn: a fiẹ do ewọ mẹhe nuyọ́nna to ali etọn ji go blo, kavi na dawe he to linlẹn ylankan hẹndi tọn wutu.” (Psalm 37:7) To wefọ ehe mẹ, Davidi to nùzindeji dọ mí dona yí homẹfa do nọtepọn Jehovah nado yinuwa. Dile etlẹ yindọ opodo aihọn ehe tọn ma ko wá, ehe ma dona hẹn mí savò gba. Be mí ma ko mọ dọ lẹblanu po homẹfa Jehovah tọn po sù tlala hú lehe mí lẹn do dai ya? Todin be mí sọgan dohia dọ mílọsu yí homẹfa do to tenọ dile mí hẹn alọnu ján to yẹwheho wẹndagbe lọ tọn didọ mẹ whẹpo opodo lọ nido wá ya? (Malku 13:10) Ojlẹ lọ die nado dapana nuyiwa aplà he sọgan glọnalina ayajẹ po hihọ́ gbigbọmẹ tọn mítọn po lẹ. Ojlẹ lọ die nado nọavunte sinsinyẹn hú gbede pọ́n tọn sọta nuyiwadomẹji gblezọn aihọn Satani tọn. Podọ ojlẹ lọ die nado hẹn wiwejininọ walọyizan tọn go bo ma ze teninọ dodo tọn mítọn hẹ Jehovah do owù mẹ gbede blo. Mì gbọ mí ni zindonukọn nado nọ gbẹkọ linlẹn gblewa tọn lẹ go bo dapana walọ he ma sọgbe dohlan vijinu devo lẹ kavi, dohlan vijinu dopolọ lẹ lọsu.—Kọlọsinu lẹ 3:5.
17 “Gbọ sọn homẹgble go, bosọ jo adánjijẹ zogbe dai,” wẹ ayinamẹ he Davidi na mí. “A fiẹ blo, na oylan dódó wẹ opodo etọn wutu. Na yè na sán ylanwatọ lẹ sẹ̀: ṣigba yé he nọtepọn OKLUNỌ lẹ wẹ na dugu aigba tọn.” (Psalm 37:8, 9) Mọwẹ, po jidide po mí sọgan pọnnukọn hlan ojlẹ lọ—he ko sẹpọ tlala todin—whenuena Jehovah na de walọ gblezọn po mẹhe yin adọ̀ etọn lẹpo po sẹ̀ sọn aigba lọ ji.
“Na Whenu Pẹẹde”
18, 19. Tuli tẹwẹ hiẹ mọyi sọn Psalm 37:10 mẹ?
18 “Na whenu pẹẹde, mẹylankan lẹ ma na tin ba: nugbo, hiẹ na yí sọwhiwhe do lẹn otẹn etọn pọ́n, e ma nasọ tin.” (Psalm 37:10) Lehe hogbe enẹlẹ na tuli mí do sọ dile mí to dindọnsẹpọ vivọnu aihọn ylankan ehe tọn po opodo mẹdekannujẹ sọn Jehovah dè tọn po! Gandudu kavi aṣẹpipa gbẹtọ tọn lẹpo ko gboawupo mlẹnmlẹn. Podọ todin mí to dindọnsẹpọ ojlẹ hẹngọwa yẹwhehọluduta nugbo tọn, yèdọ Ahọluduta Jehovah tọn to alọ Jesu Klisti tọn mẹ. E na deanana whẹho aihọn tọn lẹpo to gigọ́mẹ bo na de mẹhe jẹagọdo Ahọluduta Jiwheyẹwhe tọn lẹpo sẹ̀.—Daniẹli 2:44.
19 To aihọn yọyọ lọ mẹ to Ahọluduta Jiwheyẹwhe tọn glọ, hiẹ sọgan dín to filẹpo, hiẹ ma na mọ “mẹylankan” depope. Na nugbo tọn, mẹdepope he ṣiatẹ sọta Jehovah to whenẹnu na yin didesẹ to niyaniya mẹ. Mẹdepope he diọavunnukunsọ nupojipetọ-yinyin etọn kavi gbẹ́ nado litaina aṣẹpipa etọn ma na tin to finẹ. Kọmẹnu towe lẹpo na tindo ojlo dopolọ nado hẹn homẹ Jehovah tọn hùn. Hihọ́ nankọtọn die enẹ na yin—họnhungan, agasagodo, yèdọ nudepope he na glọnalina jidide po ayajẹ mlẹnmlẹn po ma na tin ba!—Isaia 65:20; Mika 4:4; 2 Pita 3:13.
20, 21. (a) Mẹnu lẹ wẹ “homẹmiọnnọ” Psalm 37:11 tọn lẹ, podọ fie wẹ yé mọ “jijọho susu” te? (b) Dona tẹlẹ wẹ mí na mọyi eyin mí hodo apajlẹ Davidi Daho lọ tọn?
20 To whenẹnu, “homẹmiọnnọ lẹ na dugu aigba tọn.” (Psalm 37:11a) Ṣigba mẹnu wẹ “homẹmiọnnọ” ehelẹ? Hogbe heyin lilẹdo “homẹmiọn” wá sọn hogbe tangan de mẹ he zẹẹmẹdo “jiya, whiwhẹ, yido.” Mọwẹ, “homẹmiọnnọ lẹ” wẹ mẹhe yí whiwhẹ do nọtepọn Jehovah nado hẹn pọngbọ wá na oyà whẹdida mawadodo tọn he yé ko ji lẹpo. “Yé na hẹn homẹhun yede to jijọho susu mẹ.” (Psalm 37:11b) Etlẹ yin todin mí nọ mọ jijọho susu to paladisi gbigbọmẹ tọn he tin to agun Klistiani nugbo lọ tọn mẹ.
21 Dile etlẹ yindọ awufiẹsa mítọn lẹ ma ko yin didesẹ, mí nọ nọgodona ode awetọ bo nọ miọnhomẹna mẹhe jẹflumẹ lẹ. Taidi kọdetọn de, pekọ nugbo ayiha mẹ tọn nọ tin to omẹ Jehovah tọn lẹ ṣẹnṣẹn. Mẹmẹsunnu heyin dide taidi lẹngbọhọtọ lẹ nọ yí owanyi do hẹn pekọwa na nuhudo gbigbọmẹ tọn mítọn lẹ—po agbasa tọn lẹ po to whedelẹnu—nado sọgan hẹn mí penugo nado doakọnna yajiji na dodowiwa wutu. (1 Tẹsalonikanu lẹ 2:7, 11; 1 Pita 5:2, 3) Lehe jijọho ehe họakuẹ do sọ! Mí sọ tindo todido ogbẹ̀ madopodo tọn to Paladisi jijọhonọ he to yakẹ lọ mẹ. Enẹwutu, mì gbọ mí ni hodo apajlẹ Davidi Daho lọ, Klisti Jesu tọn, mẹhe zohunhun etọn na Jehovah whàn ẹn nado wadevizọn po nugbonọ-yinyin po kakajẹ opodo. (1 Pita 2:21) Gbọn mọwiwa dali, mí na hẹn ayajẹ mítọn go, bo na to gigopana omẹ lọ he mẹ mí tindo homẹhunhun susu te, yèdọ Jiwheyẹwhe mítọn, Jehovah.
[Nudọnamẹ Odò Tọn]
a Yin zinzinjẹgbonu gbọn Kunnudetọ Jehovah tọn lẹ dali.
Be Hiẹ Sọgan Na Gblọndo Ya?
• Etẹlẹ wẹ hiẹ plọn sọn Psalm 37:1, 2 mẹ?
• Nawẹ hiẹ sọgan ‘tindo homẹhunhun susu to Jehovah mẹ’ gbọn?
• Kunnudenu tẹwẹ dohia dọ mí sọgan ganjẹ Jehovah go?
[Kanbiọ Oplọn Tọn Lẹ]
[Yẹdide to weda 9]
Klistiani lẹ ma nọ ‘whànwu mẹhe nọ wazọ́n mawadodo tọn lẹ gba’
[Yẹdide to weda 10]
“Dotudo OKLUNỌ go, bosọ nọ wà dagbe”
[Yẹdide to weda 11]
Tindo homẹhunhun susu to Jehovah mẹ gbọn nususu pinplọn gando ewọ go dali
[Yẹdide to weda 12]
“Homẹmiọnnọ lẹ na dugu aigba tọn”