Whẹwhinwhẹ́n He Sọgbe lọ Nado Yise

OWE Corée tọn lọ 31 Reasons Why Young People Leave the Church [Whẹwhinwhẹ́n 31 He Wutu Jọja lẹ Nọ Gbẹ́ Ṣọṣi Yìyì] basi zẹẹmẹ dọ mẹsusu nọ doalọtena ṣọṣi yìyì na yé ma mọ gblọndo pekọhẹnwanamẹ tọn na kanbiọ yetọn lẹ wutu. Di dohia, yé nọ kanse dọ, ‘Naegbọn mẹhe yise to Jiwheyẹwhe mẹ lẹ do nọ jiya?’ podọ ‘Naegbọn mí dona kẹalọyi nuhe ṣọṣi plọnmẹ lẹpo to whenuena suhugan nuplọnmẹ lọ lẹ tọn ma họnwun bosọ jẹagọdo yedelẹ?’

Na gblọndo he sinsẹ̀ngán yetọn na lẹ hẹn yé jẹflumẹ wutu, mẹsusu wá tadona lọ kọ̀n dọ gblọndo depope ma tin to Biblu mẹ. To whenuena sinsẹ̀ngán de basi zẹẹmẹ he sinai mlẹnmlẹn do pọndohlan etọn titi ji, kọdetọn lọ nọ saba yin nukunnumamọjẹnumẹ, bo tlẹ nọ hẹn gbẹtọ lẹ gbẹ́ Jiwheyẹwhe po Biblu po dai.

Numimọ he Abel he whẹ́n to sinsẹ̀n Luther tọn mẹ to Afrique du Sud tindo niyẹn. E flin dọmọ: “Ṣọṣi lọ nọ plọnmẹ dọ mẹhe kú lẹpo wẹ yin ‘yíyí’ gbọn Jiwheyẹwhe dali. Ṣigba yẹn ma yọ́n nuhewutu Jiwheyẹwhe owanyinọ de na ‘yí’ mẹjitọ lẹ sọn ovi yetọn lẹ si. To gbetatò Aflika tọn he mẹ yẹn whẹ́n te, koklosi he flévi de ma nọ yin hùhù kakajẹ whenue ovi etọn lẹ whẹ́n. Eyin mí mọdọ oyìn de to ohò, mí ma nọ hù i kakajẹ whenuena ovi etọn whẹ́n bo dèanọ́. Yẹn ma yọ́n nuhewutu Jiwheyẹwhe owanyinọ de ma nọ do mẹtọnhopọn mọnkọtọn hia na gbẹtọvi lẹ.”

Aram, heyin Canadanu de tindo ayihaawe dopolọ. “Otọ́ ṣie kú to whenuena yẹn tindo owhe 13,” wẹ e dọ. “To amísa ṣiọdidi tọn lọ whenu, sinsẹ̀ngán he diyin de basi zẹẹmẹ dọ Jiwheyẹwhe wẹ jlo dọ otọ́ ṣie ni kú na e nido sọgan dọnsẹpọ Jiwheyẹwhe to olọn mẹ.  ‘Jiwheyẹwhe nọ yí omẹ dagbe lẹ,’ wẹ e dọ, ‘na Jiwheyẹwhe yiwanna dodonọ lẹ wutu.’ Yẹn ma yọ́n nuhewutu Jiwheyẹwhe na yin ṣejannabinọ sọmọ.”

To nukọn mẹ, Abel po Aram po dukosọ hẹ Kunnudetọ Jehovah tọn lẹ, bo plọn Biblu hẹ yé, podọ to godo mẹ, yé mọ gblọndo na kanbiọ yetọn lẹ. Yé wleawuna owanyi na Jiwheyẹwhe bo tindo yise he lodo to ewọ mẹ. To godo mẹ, yé klan gbẹzan yetọn do wiwe hlan Jehovah bo lẹzun devizọnwatọ nugbonọ etọn lẹ.

Oyọnẹn He Pegan—Dandannu de Nado Yise

Etẹwẹ mí sọgan plọn sọn numimọ ehelẹ mẹ? Yé dohia mí dọ nado tindo yise to Jiwheyẹwhe mẹ, oyọnẹn Biblu tọn he pegan yin dandannu. Apọsteli Paulu dọna Klistiani he tin to tòdaho Filippi hohowhenu tọn mẹ lẹ dọmọ: “Yẹn sọ to dẹ̀ho na ehe dọ, na owanyi mìtọn ni to susudeji to nuyọnẹn [kavi oyọnẹn he pegan] po zinzin lẹpo po mẹ ga.” (Filippinu lẹ 1:9) Paulu zinnudeji tofi dọ wanyina Jiwheyẹwhe po yisenọ hatọ lẹ po tindo kanṣiṣa pẹkipẹki hẹ oyọnẹn Jiwheyẹwhe tọn he pegan po nukunnumimọjẹ nuhe yin ojlo etọn lẹ mẹ po.

Ehe sọgbe hẹ lẹnpọn dagbe, na nubiọtomẹsi tintan nado dejido mẹde go wẹ nado yọ́n mẹlọ ganji—podọ lehe hiẹ yọ́n mẹlọ kitokito sọ, mọwẹ jidide towe na lodo dogọ do. Mọdopolọ, hiẹ tindo nuhudo oyọnẹn he pegan tọn nado yin whinwhàn nado yise to Jiwheyẹwhe mẹ. “Yise wẹ dodo onú yè to todo tọn, okunnu onú he mí ma mọ tọn,” wẹ Paulu dọ. (Heblu lẹ 11:1) Yise to Jiwheyẹwhe mẹ matin oyọnẹn Biblu tọn he pegan tin taidi ohọ̀ he yọpọvu lẹ nọ yí wema do gbá. Eyin jẹhọn vude yìn do e, tlolo wẹ e na họ́jai.

Biblu pinplọn sọgan gọalọna we nado mọ gblọndo na kanbiọ lẹ taidi dehe Abel po Aram po ma mọ gblọndo na sọn whenu dindẹn die. Di dohia, naegbọn gbẹtọ nọ kú? Biblu basi zẹẹmẹ dọ “ylando gbọn omẹ dopo dè biọ aihọn mẹ, podọ okú gbọn ylando dali; mọwẹ gbẹtọ lẹpo kú do, na omẹ popo wẹ waylan wutu.” (Lomunu lẹ 5:12) Gbẹtọ lẹ nọ poyọnho bo nọ kú, e mayin na Jiwheyẹwhe nọ yí yé nado nọhẹ ẹ wutu wẹ gba, ṣigba na Adam waylando wutu. (Gẹnẹsisi 2:16, 17; 3:6, 17-19) Humọ, Biblu do todido nugbo lọ he Jehovah Jiwheyẹwhe zedonukọnna mí hia. Gbọn Visunnu etọn, Jesu Klisti gblamẹ, e wleawu todido fọnsọnku tọn na gbẹtọvi ylandonọ lẹ.—Johanu 5:28, 29; Owalọ lẹ 24:15.

Nado gọalọna mí nado mọnukunnujẹ nugbo lọ mẹ dogbọn fọnsọnku dali, Biblu bẹ apajlẹ mẹhe Jesu hẹn gọwá ogbẹ̀ lẹ tọn susu hẹn. (Luku 7:11-17; 8:40-56; Johanu 11:17-45) Dile hiẹ to kandai Biblu tọn ehelẹ hia, doayi ayajẹ po aglinjijẹ po he họntọn po whẹndo mẹhe yin finfọnsọnku lọ tọn lẹ po tindo go. Sọ doayi e go ga dọ yé yin whinwhàn nado pagigona Jiwheyẹwhe bo tindo yise to Jesu mẹ.

Oyọnẹn he pegan tintindo dogbọn Jiwheyẹwhe po lẹndai etọn lẹ po dali sọgan yinuwado gbẹtọ lẹ ji domọ to egbehe. Mẹsusu ko jẹflumẹ, yin agbanpinpẹn dó na, bo tlẹ ko dahli to ojlẹ de mẹ wayi, na yé ma mọ gblọndo pekọhẹnwanamẹ tọn na kanbiọ titengbe delẹ wutu. Ṣigba to whenuena yé plọn Biblu, yé mọ gblọndo lẹ, podọ enẹ diọ gbẹzan yetọn mlẹnmlẹn.

Owanyi Na Jiwheyẹwhe—Whẹwhinwhẹ́n Tintan Nado Sẹ̀n Ẹn

Dile oyọnẹn he pegan tlẹ yin dandannu de nado yise to Jiwheyẹwhe mẹ, enẹ ma ko pé nado whàn mẹde nado setonuna ẹn bo sẹ̀n ẹn gba. To whenuena gbedide Jiwheyẹwhe tọn he klohugan lọ yin kinkanse Jesu, e dọmọ: “Hiẹ na yiwanna Oklunọ Jiwheyẹwhe towe sọn ayiha towe lẹpo mẹ, podọ sọn alindọn towe lẹpo mẹ, podọ sọn nuyọnẹn towe lẹpo mẹ, podọ sọn huhlọn towe lẹpo mẹ.” (Malku 12:30) Eyin mẹde yiwanna Jiwheyẹwhe to aliho he Jesu dohia ehelẹ mẹ, e ma na vẹawuna ẹn nado setonu bo sẹ̀n Ẹn gba. Be enẹ yin nugbo gando hiẹ go ya?

Rachel, mẹhe ko sẹ̀n taidi mẹdehlan to Corée na owhe susu, na whẹwhinwhẹ́n yise etọn tọn dọmọ: “Yẹn nọ lẹnnupọndo alọtútlú Jehovah tọn hlan nudida etọn lẹ, jonamẹ etọn, podọ lehe e nọ hẹn mí yọ́n nubiọtomẹsi etọn lẹ na e jlo dọ mí ni mọaleyi wutu ji. Ehe lẹpo wẹ  hẹn owanyi ṣie na Jiwheyẹwhe whẹ́n deji. Podọ owanyi enẹ nọ sisẹ́ mi nado sẹ̀n ẹn.”

Martha, asuṣiọsi de to Allemagne, ko sẹ̀n Jehovah na owhe 48. E dọmọ: “Naegbọn yẹn do sẹ̀n Jehovah? Na yẹn yiwanna ẹn wutu wẹ. Yẹn nọ dọho hẹ Jehovah to whèjai lẹpo to odẹ̀ mẹ bo nọ dọ lehe yẹn yọ́n pinpẹn dona etọn lẹpo tọn sisosiso sọ na ẹn, titengbe avọ́sinsan ofligọ tọn lọ.”

Mọwẹ, owanyi na Jiwheyẹwhe nọ sisẹ́ mí nado sẹ̀n ẹn sọn ahun mẹ. Ṣigba nawẹ mẹde sọgan wleawuna owanyi mọnkọtọn gbọn? Pinpẹn nutọn sisosiso na owanyi he Jiwheyẹwhe ko dohia mí wẹ nọ whàn mí hugan nado yiwanna ẹn. Doayi nuflinmẹ ojlofọndotenamẹ tọn ehe go to Biblu mẹ dọmọ: “Ewọ he ma yiwanna omẹ, ma yọ́n Jiwheyẹwhe gba; na Jiwheyẹwhe wẹ owanyi. Ehe mẹ wẹ yè do owanyi Jiwheyẹwhe tọn hia hlan mí te, na Jiwheyẹwhe do Ovi detọ́n etọn dopo akàn lọ hlan aihọn he mẹ, na mí nido nọgbẹ̀ gbọn ewọ mẹ. Ehe mẹ wẹ owanyi te, e ma yindọ míwlẹ yiwanna Jiwheyẹwhe gba, ṣigba dọ ewọ yiwanna mí bosọ do Ovi etọn hlan nado yin oyẹ̀su na ylando mítọn.”—1 Johanu 4:8-10.

Be hiẹ yọ́n lehe owanyi ehe klo sọ ya? Mí ni dọ dọ hiẹ to tọ̀kú to otọ̀ he to sisà po zingidi po de mẹ bọ dawe de ze ogbẹ̀ ede tọn do owù mẹ nado whlẹn we. Be hiẹ na wọ̀n ẹn pọ́n gbede ya? Kakatimọ be hiẹ ma na dopẹ́ na ẹn taun ya? Be hiẹ ma na jlo nado wà nuhe go a pé lẹpo na ẹn ya? Owanyi he Jiwheyẹwhe dohia bo yí Visunnu etọn, Jesu Klisti do basi avọ́sinsan ofligọ tọn klo tlala hú enẹ. (Johanu 3:16; Lomunu lẹ 8:38, 39) To whenuena owanyi Jiwheyẹwhe tọn yinuwado ahun towe ji, e na whàn we nado yiwanna ẹn bo sẹ̀n ẹn po ahun lẹpo po.

Dona lẹ Todin Podọ to Sọgodo

Dile etlẹ yindọ owanyi mítọn na Jiwheyẹwhe wẹ dona yin whẹwhinwhẹ́n tintan he wutu mí to ojlo etọn wà, ojlofọndotenamẹnu de wẹ e yin nado yọnẹn dọ Jiwheyẹwhe nọ suahọ mẹhe sẹ̀n ẹn lẹ. Apọsteli Paulu dọmọ: “Matin yise, e glo nado hẹn homẹ etọn hùn: na ewọ he ja Jiwheyẹwhe dè, ma sọgan nọma yise dọ e  tin, podọ ewọ wẹ ahọsutọ yé he whèsọ do dín in lẹ tọn.”—Heblu lẹ 11:6.

Jiwheyẹwhe nọ dona mẹhe yiwanna ẹn bo setonuna ẹn lẹ. Susu yetọn nọ tindo agbasalilo dagbe na yé hodo nunọwhinnusẹ́n Biblu tọn lẹ wutu. (Howhinwhẹn lẹ 23:20, 21; 2 Kọlintinu lẹ 7:1) Mẹhe nọ yí nunọwhinnusẹ́n Biblu tọn lẹ gando nugbodidọ po azọ́n sinsinyẹn wiwà po go do yizan mẹ lẹ nọ saba yin jidedego gbọn azọ́nmẹyimẹdotọ yetọn lẹ dali podọ ehe nọ zọ́n bọ yé ma nọ yawu hẹn agbasazọ́n yetọn bu. (Kọlọsinu lẹ 3:23) Na devizọnwatọ Jiwheyẹwhe tọn lẹ nọ dejido Jehovah go wutu, yé nọ tindo jijọho ayiha mẹ tọn etlẹ yin to ninọmẹ sinsinyẹn lẹ mẹ. (Howhinwhẹn lẹ 28:25; Filippinu lẹ 4:6, 7) Hú popolẹpo, adọ̀ nọ gbó yé gando dona ogbẹ̀ madopodo tọn to Paladisi aigba ji tọn mẹ go.—Psalm 37:11, 29.

Numọtolanmẹ tẹwẹ mẹhe to vivi dona mọnkọtọn lẹ tọn dù sọn Jehovah dè lẹ nọ tindo gando ewọ go? Jacqueline, Klistiani de to Canada dopẹna Jiwheyẹwhe dọmọ: “Ewọ nọ na nunina jiawu lẹ mí to whepoponu, podọ e sọ wleawuna todido dejidego ogbẹ̀ madopodo tọn.” Abel, mẹhe dọho to bẹjẹeji hosọ ehe tọn, basi zẹẹmẹ numọtolanmẹ etọn tọn dole: “Onú yọyọ de wẹ nukundido lọ nado nọgbẹ̀ kakadoi to paladisi aigba ji tọn mẹ yin na mi, podọ yẹn to jejeji na ẹn. Ṣigba, eyin Paladisi de ma tlẹ tin, e na gbẹsọ yin ayajẹnu de na mi nado do owanyi ṣie na Jiwheyẹwhe hia gbọn sinsẹ̀n ẹn dali.”

Hiẹ Lọsu Sọgan Tindo Yise Nugbo Tọn

“OKLUNỌ awhànpa lẹ tọn, he nọ yí dodo do dawhẹ, . . . nọ whlé otù po ayiha po pọ́n,” wẹ Biblu dọ. (Jẹlemia 11:20) Mọwẹ, Jehovah nọ gbadopọnna nuhe tin to ohò mítọn mẹ lẹ. Mẹdopodopo dona gbadopọnna nuhe whàn ẹn nado yise to Jiwheyẹwhe mẹ. Nuyise po pọndohlan agọ̀ dogbọn Jiwheyẹwhe dali po sọgan ko hẹn mí yinuwa to aliho agọ̀ mẹ wayi. Ṣigba oyọnẹn Biblu tọn he pegan sọgan hẹn mí nado tindo haṣinṣan dagbe hẹ Mẹdatọ lọ, Jehovah Jiwheyẹwhe.—1 Timoti 2:3, 4.

Gbọn tito plọnmẹ Biblu vọnu whégbè tọn yetọn gblamẹ, Kunnudetọ Jehovah tọn lẹ to alọgọna gbẹtọ lẹ nado tindo oyọnẹn Jiwheyẹwhe tọn he pegan. (Matiu 28:20) Susu mẹhe ko kẹalọyi alọgọ mọnkọtọn lẹ tọn wẹ ko wá yiwanna Jiwheyẹwhe bo ko wleawuna yise nujọnu tọn to ewọ mẹ. Gbọn Biblu pinplọn gblamẹ, yé ko tindo “nuyọnẹn he pé po zinzin po,” ehe gọalọna yé nado “to zọnlinzin . . . to jijọho mẹ” to ojlẹ owù tọn ehelẹ mẹ. (Howhinwhẹn lẹ 3:21-23) Hú popolẹpo, yé ko wá tindo todido he “diun bosọ nọte gligli” na sọgodo. (Heblu lẹ 6:19) Hiẹ lọsu sọgan tindo yise nugbo tọn bo duvivi dona ehelẹ tọn.

[Apotin to weda 6]

Kanbiọ Mẹhẹnjẹflumẹ Tọn He Dona Mọ Gblọndo Lẹ

“To whenuena yẹn to dotozọ́n plọn to dotowhé de, yẹn nọ mọ mẹdagbe lẹ he to hunwẹn to awufiẹsa mẹ na azọ̀n kavi nugbajẹmẹji lẹ wutu. Eyin Jiwheyẹwhe de tin, naegbọn onú helẹ do nọ jọ? Be aliho de poun wẹ sinsẹ̀n yin nado mọ jijọho ayiha mẹ tọn ya?”—Hagbẹ sinsẹ̀n Presbytérien tọn de dai to Corée.

“E nọ saba paṣa mi vlavo zomẹ kavi olọn mẹ wẹ otọ́ ṣie, heyin ahànnumunọ lọ yì. Okú po linlẹn olọnzomẹ tọn po nọ dobuna mi. Yẹn ma yọ́n nuhewutu Jiwheyẹwhe owanyinọ de na do mẹde hlan zomẹ nado yì jiya kakadoi.”—Hagbẹ sinsẹ̀n Katoliki tọn de dai to Brésil.

“Etẹwẹ sọgodo bẹhẹn na aigba podọ na gbẹtọvi lẹ? Nawẹ gbẹtọvi lẹ sọgan nọgbẹ̀ kakadoi gbọn? Nawẹ gbẹtọvi lẹ sọgan tindo jijọho nugbo gbọn?”—Hagbẹ sinsẹ̀n Katoliki tọn de dai to Allemagne.

“Nuplọnmẹ vọji tọn ma sọgbe hẹ lẹnpọn dagbe to nukun ṣie mẹ gba. Kanlin lẹ ma nọ basi sinsẹ̀n, enẹwutu eyin mẹde yin vivọji na whẹwhinwhẹ́n delẹ wutu taidi kanlin de nado jiya ylando etọn lẹ tọn, nawẹ mẹlọ na lẹnvọjọ bo tọ́nsọn ninọmẹ enẹ mẹ gbọn?”—Hagbẹ sinsẹ̀n Hindu tọn de dai to Afrique du Sud.

“Whẹndo sinsẹ̀n Confucius tọn de mẹ wẹ yẹn whẹ́n te, podọ yẹn nọ tindo mahẹ to hunwhẹ homẹmimiọnna tọgbo he ko kú lẹ tọn mẹ dai. Eyin yẹn to mahẹ tindo to awuwiwlena tafo avọ́sinsan lọ tọn mẹ bo to taliai, e nọ paṣa mi eyin tọgbo he ko kú lẹ na wá dù núdùdù lọ bo mọ lehe mí to taliai do nugbonugbo.”—Hagbẹ sinsẹ̀n Confucius tọn de dai to Corée.

Omẹ ehe lẹpo wẹ mọ gblọndo na kanbiọ yetọn lẹ to whenuena yé plọn Biblu hẹ Kunnudetọ Jehovah tọn lẹ.