“Wleawudai Pọ́n Azọ́n Dagbe Lẹpo”

MÌ HÒ (video kavi hoyidokanji lọ)

“Wleawudai Pọ́n Azọ́n Dagbe Lẹpo”

“NỌ FLINNU yé nado nọ tin to taliai mẹ hlan ogán po huhlọn lẹ po, nado nọ setonuna togán lẹ, nado nọ wleawudai pọ́n azọ́n dagbe lẹpo.” (Titu 3:1) Azọ́n dagbe tẹwẹ apọsteli Paulu tindo to ayiha mẹ to whenuena e kàn ohó enẹlẹ hlan yisenọ hatọ etọn lẹ? Weyọnẹntọ Biblu tọn E. F. Scott dlẹnalọdo azọ́n dagbe de, bo dọmọ: “E mayin dọ Klistiani lẹ dona setonuna aṣẹpatọ lẹ kẹdẹ wẹ gba, ṣigba yé dona wleawudai na azọ́n dagbe depope. . . . Whedepopenu he e lẹzun dandan, Klistiani lẹ dona yin tọ́ntlọ́ngbọ́n to alọgigọna mẹdevo lẹ mẹ. Miyọ́n, azọ̀nylankan kavi nugbajẹmẹji wunmẹ voovo lẹ na nọ saba gbajẹgbonu, bọ tòvi dagbe lẹpo na jlo nado gọalọna kọmẹnu yetọn lẹ.”

Klistiani lẹ nọ tindo mahẹ to azọ́n delẹ he nọ wà dagbe na mẹdevo lẹ mẹ eyin azọ́n lọ lẹ ma sọta osẹ́n Jiwheyẹwhe tọn lẹ. (Owalọ lẹ 5:29) Di dohia, to anademẹ azọ́nwatẹn miyọ́n-ṣiṣi otò lọ tọn hihodo mẹ, wekantẹn alahọ Kunnudetọ Jehovah tọn lẹ tọn to Ebina, he tin to Japon, nọ basi tito azọ́nplọnmẹ miyọ́n-ṣiṣi tọn de to whemẹwhemẹ. To ojlẹ enẹlẹ mẹ, hagbẹ whẹndo Bẹtẹli tọn lẹpo nọ pli dopọ nado dotoaina anademẹ he nọ yin nina gbọn afọzedaitọ azọ́nwatẹn miyọ́n-ṣiṣi otò lọ tọn dali lẹ.

Humọ, na owhe susu todin, wekantẹn alahọ Japon tọn ko kọngbedopọ hẹ aṣẹpatọ lẹdo lọ tọn lẹ to nudohia heyin awuwlena de mẹ nado hẹn gbẹtọ lẹ yọ́n lehe yé sọgan glọnalina nujijọ miyọ́n tọn do. To nudohia lọ tẹnmẹ, azọ́nwhé po ajọwhé he tin to tòdaho lọ mẹ lẹ po nọ do azọ́nyinyọnẹn miyọ́n-ṣiṣi tọn yetọn po aṣejininọ yetọn nado glọnalina miyọ́n po hia. Alahọ Japon tọn nọ saba mọ pipà yí na azọ́nyinyọnẹn po gbekọndopọ azọ́nwatọ etọn tọn lẹ po. To 2001, yé mọ nunina daho hugan yí to nudohia lọ mẹ. Yé wleawudai nado wà azọ́n dagbe he sọgan whlẹn gbẹtọ lẹ to whẹho miyọ́n tọn mẹ.

Azọ́n Họakuẹ De

Nalete, Kunnudetọ Jehovah tọn lẹ nọ tindo ojlo to azọ́n titengbe hugan de mẹ, he sọ nọ whlẹn ogbẹ̀ gán. Yé nọ dla kọmẹnu yetọn lẹ pọ́n to gbesisọmẹ nado má wẹndagbe Ahọluduta Jiwheyẹwhe tọn hẹ yé. (Matiu 24:14) Kunnudetọ lẹ nọ na tuli gbẹtọ lẹ nado plọn nunọwhinnusẹ́n Biblu tọn lẹ bo yí yé do yizan mẹ nado sọgan hẹn gbẹzan yetọn pọnte todin bosọ tindo todido ogbẹ̀ madopodo tọn to aihọn de mẹ fie jijọho nugbo po hihọ́ po na gbayipe te.

Mẹdelẹ sọgan nọma yọ́n pinpẹn azọ́n he Kunnudetọ Jehovah tọn lẹ to wiwà tọn, bo na nọ pọ́n yé hlan taidi tukladomẹtọ lẹ. Ṣigba, Whẹdatọ Jean Crepeau Whẹdatẹn Daho Hugan Québec tọn to Canada tindo linlẹn he gbọnvo. Kunnudetọ Jehovah tọn he tin to finẹ lẹ ko jẹagọdo osẹ́n he tòdaho Blainville tọn to Québec detọ́n, he biọ dọ yé dona yí gbedewema de whẹpo do dekunnu sọn họndekọn-jẹ-họndekọn. To nudide whẹdatẹn lọ tọn mẹ, Whẹdatọ Crepeau dọmọ: “Dlapọn Kunnudetọ Jehovah tọn lẹ tọn yin alọgọ de na lẹdo lọ podọ . . . owe he Kunnudetọ lẹ nọ zedonukọnna tòvi he tindo ojlo lẹ yin owe he yọn-na-yizan lẹ, he nọ dọhodo sinsẹ̀n, Biblu, amasin-adínọ, ahànnu zẹjlẹgo, wepinplọn jọja lẹ tọn, nuhahun alọwle tọn lẹ po gbẹdai po ji.” Whẹdatọ lọ zindonukọn dọmọ: “Tadona he kọ̀n whẹdatẹn lọ sọgan wá lẹpo wẹ yindọ Kunnudetọ Jehovah tọn lẹ yiyijlẹdo nusàtọ lẹ go yin nuhe de yẹyi sọn mẹgo, demẹpò, gbleawunamẹ, bo hẹnmẹgble.”

Kunnudetọ Jehovah tọn lẹ nọ yidogọna dagbemẹ-ninọ lẹdo he mẹ yé tin te tọn gbọn alọgigọna gbẹtọ lẹ nado dùto nuhahun yetọn lẹ ji bo hẹn yé tindo todido na sọgodo dali. Biblu wẹ nọ hẹn yé pegan nado wà azọ́n enẹ. “Owe-wiwe lẹpo gbingbọ́n sọn Jiwheyẹwhe mẹ yin alenọ ga na mẹpinplọn, na wọhẹmẹ, na anademẹ, na nuplọnmẹ he tin to dodo mẹ: na Jiwheyẹwhe gbẹtọ nido pegan, he yè hẹn sọgbe mlẹnmlẹn hlan azọ́n dagbe lẹpo.”—2 Timoti 3:16, 17.

Be e na jlo we nado yọ́n lehe Kunnudetọ Jehovah tọn lẹ “wleawudai pọ́n azọ́n dagbe lẹpo” gbọn ya? Mí basi oylọna we nado kẹalọyi alọgọ yetọn nado plọn nususu dogọ do Biblu ji bo gbọnmọ dali mọaleyi sọn azọ́n titengbe he yé to wiwà to lẹdo towe mẹ podọ lẹdo aihọn pé ehe mẹ.

[Yẹdide to weda 30]

Kunnudetọ Jehovah tọn lẹ nọ jlo nado kọngbedopọ hẹ aṣẹpatọ lẹ

[Yẹdide to weda 31]

Kunnudetọ lẹ yin yinyọnẹn taidi mẹhe nọ gọalọna kọmẹnu yetọn lẹ

ATỌ̀HỌ̀-NUHIHỌ́ LỌ TỌN—ZINJẸGBONU OPLỌN TỌN