‘Dopo to Anazọ́n He Klohugan lẹ Mẹ’

TO WHENUENA tẹmpli Jehovah tọn yin gbigbá to Jelusalẹm to gandudu Ahọlu Sọlọmọni tọn whenu to nudi owhe 3 000 lẹ die wayi, sinhẹnnú gànvẹẹ tọn he yọnwhanpẹ de yin bibasi bo yin zizedo họntonu tẹmpli lọ tọn to gbonu. Zínpinpẹn etọn hugan tọnu 30 bosọ nọ hẹn nudi osin litli 40 000. Sinhẹnnú blibata ehe yin yiylọdọ ohù kinkọ̀n. (1 Ahọlu lẹ 7:23-26) “Ayihaawe depope matin dọ e yin dopo to anazọ́n klohugan he nkọtọn ma ko yin bibasi pọ́n to akọta Heblu tọn mẹ lẹ mẹ,” wẹ Albert Zuidhof heyin ogán azọ́nyọnẹntọ de to Pipli Dodinnanu Otò tọn to Canada dọ, to Biblical Archeologist mẹ.

Nawẹ ohù kinkọ̀n lọ yin gbigbá gbọn? “To danfafa Jọdani tọn ji wẹ ahọlu kọ̀n [núzinzan gànvẹẹ tọn lẹ] te, to okò yigba ji,” wẹ Biblu dọ. (1 Ahọlu lẹ 7:45, 46) “Gàngbá lọ dona ko yin awuwlena to aliho dopolọ he mẹ ogàn daho gànvẹẹ tọn lẹ nọ yin bibasi te kakajẹ din mẹ,” wẹ Zuidhof dọ. E basi zẹẹmẹ dọ na taun tọn, ehe na biọ dọ osẹ̀n pinpẹn ni yin vivà do sinhẹnnú okò tọn he yin awuwlena do nukunmẹ-ṣinyọndo he ko hú ganji lọ go. To ehe wiwà godo, ayátọ lọ lẹ dona wleawuna sinhẹnnú okò tọn devo ṣinyọndo osẹ̀n pinpẹn lọ bo jo e do nado hú. Afọdide godo tọn lẹ wẹ nado yọ́ osẹ̀n pinpẹn lọ tọ́n bo kọ̀n gànsìn do otẹn etọn mẹ.

Kiklo po zínpinpẹn sinhẹnnú lọ tọn po biọ azọ́nyinyọnẹn anazọnwiwa tọn. Sinhẹnnú okò tọn he yin awuwlena jẹnukọn lọ po dehe wá yin awuwlena ṣinyọndo e lọ po dona lodo taun nado sọgan hẹn nudi tọnu 30 gànsìn tọn he na yin kinkọ̀n do gblagbla yetọn mẹ lẹ, podọ e dona yin bibasi matin alọdidote, e nikaa zẹ̀ kavi tindo oblọ devo lẹ. Vlavo ehe na biọ dọ miyọ́n susu ni yin fiflọ́ lẹdo e nado kọ̀n gànsìn lọ do sinhẹnnú okò tọn lọ lẹ gblamẹ. Azọ́n daho pligidi nankọtọn die!

To odẹ̀ he Ahọlu Sọlọmọni hò to hùnwhẹ tẹmpli lọ hùnhùn tọn tẹnmẹ, e na pipà azọ́n họgbigbá tẹmpli lọ tọn lẹpo hlan Jehovah Jiwheyẹwhe, bo dọmọ: “Hiẹ yí onù towe do dọho, bosọ yí alọ towe do hẹn ẹn ṣẹ.”—1 Ahọlu lẹ 8:24.