Kanbiọ lẹ sọn Wehiatọ lẹ Dè

Ninọmẹ tẹlẹ wẹ hẹn Juda nado tindo kọndopọ zanhẹmẹ tọn hẹ yọnnu he e lẹn nado yin ayọdetọ de, dile Gẹnẹsisi 38:15, 16 dọ do?

Nugbo wẹ dọ Juda tindo kọndopọ zanhẹmẹ tọn hẹ yọnnu he e lẹn nado yin ayọdetọ de, ṣigba na taun tọn yọnnu lọ mayin ayọdetọ de gba. Sọgbe hẹ Gẹnẹsisi weta 38, nuhe jọ die.

Na visunnu plọnji Juda tọn “yin mẹylankan to nukun OKLUNỌ tọn mẹ” wutu, asi etọn, Tamali ma ji ovi depope na ẹn whẹpo e do yin hùhù. (Gẹnẹsisi 38:7) To ojlẹ lọ mẹ, tito yọnnu sínsọ́n tọn yin aṣa he gbayipe de. Ehe biọ dọ to whenuena sunnu de kú bo ma tindo whédutọ de, nọvisunnu etọn dona sọ́n asi etọn nado sọgan ji ovi he na yin whédutọ de. Ṣigba visunnu awetọ Juda tọn, Onani, gbẹ́ nado hẹn azọngban etọn di. Enẹwutu, e yin hùhù taidi kọdetọn whẹdida Jiwheyẹwhe tọn tọn. Enẹgodo Juda do asi ovi etọn tọn yèdọ Tamali lẹkọ yì owhé otọ́ etọn tọn gbè kakajẹ whenue visunnu atọ̀ntọ Juda tọn, Ṣela, na whẹ́n mẹho nado sọgan sọ́n ẹn. Ṣigba, dile owhe lẹ to jujuyi, Juda ma kọ̀n Ṣela po Tamali po dopọ to alọwle mẹ ba. Enẹwutu to whenuena Juda hẹn asi etọn bu to okú mẹ, Tamali kàn ayiha de nado tindo whédutọ de gbọn Juda, yèdọ Islaelivi he ko yin asu-tọ́ etọn gblamẹ. E wà ehe gbọn nusisọ́ taidi ayọdetọ tẹmpli mẹ tọn de dali bo sinai to alitó fie e yọnẹn dọ Juda na gbọ̀n.

Na Juda ma yọ́n Tamali wutu, e tindo kọndopọ zanhẹmẹ tọn hẹ ẹ. Tamali yí ayiha wintinwintin do yí núzinzan etọn lẹ taidi ahọsumẹ de, podọ ehelẹ wẹ e yizan taidi kunnudenu to godo mẹ dọ Juda wẹ dóhò na emi. To whenuena nugbo lọ yin didegbà, Juda ma gblewhẹdo Tamali gba ṣigba yí whiwhẹ do yigbe dọmọ: “Ewọ ko yin dodonọ hú yẹn; sọle yẹn ma yí ì na Ṣela ovi ṣie wutu.” Po gbesisọ po, “ewọ ma sọ yọ́n ẹn dogọ [kavi, zanhẹ ẹ] gbede ba.”—Gẹnẹsisi 38:26.

Aliho he mẹ Juda yinuwa te ma sọgbe na e ma yí Tamali na ovi etọn Ṣela dile e ko dopagbe do. E sọ tindo kọndopọ zanhẹmẹ tọn hẹ yọnnu he e lẹn nado yin ayọdetọ tẹmpli mẹ tọn de. Ehe jẹagọdo lẹndai Jiwheyẹwhe tọn, dọ sunnu de dona tindo kọndopọ zanhẹmẹ tọn to tito alọwle tọn kẹdẹ mẹ. (Gẹnẹsisi 2:24) Ṣigba, nado dọ hójọhó, Juda ma tindo kọndopọ zanhẹmẹ tọn hẹ ayọdetọ de gba. Kakatimọ, azọngban visunnu etọn Ṣela tọn wẹ e yiwà to mayọnẹn mẹ gbọn tito yọnnu sínsọ́n tọn hinhẹndi dali bo gbọnmọ dali lẹzun otọ́ ovivi lọ tọn po jlọjẹ po.

Na nuhe dù Tamali, nuhe e wà mayin ayọdide gba. Ahoho sunnu he e ji lẹ mayin pinpọnhlan taidi ayọvi lẹ gba. To whenuena Boazi Bẹtlẹhẹm tọn sọ́n Luti Moabinu lọ, mẹho Bẹtlẹhẹm tọn lẹ dọho to aliho dagbe mẹ gando visunnu Tamali tọn, Pelẹzi go, bo dọna Boazi dọmọ: “Na owhé towe ni tin di owhé Pelẹzi tọn, mẹhe Tamali ji hlan Juda, sọn okún he OKLUNỌ na na we sọn nawe he mẹ mẹ.” (Luti 4:12) Pelẹzi sọ yin sislẹ do tọgbo Jesu Klisti tọn lẹ mẹ.—Matiu 1:1-3; Luku 3:23-33.