Mì Pagigona Jiwheyẹwhe—E Mayin Gbẹtọ
Mì Pagigona Jiwheyẹwhe—E Mayin Gbẹtọ
TO OSUN he wayi lẹ mẹ, wanyina dodowiwa tọ́ lẹ lẹdo aihọn pé plọn lehe yé sọgan pagigona Jiwheyẹwhe do dile yé pli dopọ to Plidopọ Agbegbe Kunnudetọ Jehovah tọn lẹ tọn “Mì Pagigona Jiwheyẹwhe” tẹnmẹ. Mì gbọ mí ni gbadopọnna tito-to-whinnu nuplọnmẹ tọn heyin zizedonukọnnamẹ to otẹn lọ mẹ lẹ.
Tito-to-whinnu he sinai do Biblu ji lọ nọ aimẹ na azán atọ̀n na suhugan plidopọ-watọ lẹ tọn podọ azán ẹnẹ na mẹhe penugo bo yì plidopọ akọjọpli tọn lẹ. To lẹndopọ mẹ, plidopọ-watọ lẹ dotoaina nuzedonukọnnamẹ sinai do Owe-wiwe ji he hugan 30, he bẹ hodidọ he hẹn pinpẹn-nutọn-yinyọnẹn na gbigbọnu lẹ siso deji, numimọ he hẹn yise lodo lẹ, wadohia he zinnudo yizan dagbe nunọwhinnusẹ́n Biblu tọn ji lẹ, po nupinpọn-do-plọnnu he do avùnnukundiọsọmẹ he Klistiani owhe kanweko tintan whenu tọn lẹ pehẹ lẹ hia po hẹn. Eyin hiẹ yì dopo to plidopọ lọ lẹ mẹ, naegbọn hiẹ ma nado gbadopọnna kandai towe lẹ dile hiẹ to hosọ ehe hia? Mí deji dọ e na hẹn we flin núdùdù gbigbọmẹ tọn dojó lẹ bo nasọ plọnnu we ga.
Hosọ Azán Tintan Tọn: ‘Jehovah, Hiẹ Wẹ Jẹ Nado Yí Gigo’
To ohàn po odẹ̀ bẹjẹeji tọn po godo, hodọtọ tintan yí zohunhun do dokuavọna mẹplidopọ lẹpo gbọn hodidọ do hosọ he do whẹwhinwhẹ́n tangan plidopọ lọ tọn hia ji dali: “Mí Plidopọ Nado Pagigona Jiwheyẹwhe.” To hoyidọ sọn Osọhia 4:11 mẹ, hodọtọ lọ zinnudo hosọ plidopọ lọ tọn ji. To afọdopolọji, e zinnudo nuhe e zẹẹmẹdo nado pagigona Jiwheyẹwhe ji. Gbọn owe Psalm tọn lẹ yiyizan dali, e zinnudeji dọ gigopipana Jiwheyẹwhe bẹ ‘sinsẹ̀n-bibasi,’ “opẹ́,” po “pipà” po hẹn.—Psalm 95:6; 100:4, 5; 111:1, 2.
Hosọ adà he bọdego tọn wẹ “Donanọ Wẹ Mẹhe Nọ Pagigona Jiwheyẹwhe Lẹ.” Hodọtọ lọ basi ayidonugo ojlofọndotenamẹ tọn de. To whenuena e yindọ nuhe hugan gbẹtọ livi ṣidopo wẹ yin Kunnudetọ Jehovah tọn to aigba 234 ji lẹdo aihọn pé, e sọgan yin didọ dọ okle po ozán po wẹ gbẹtọ lẹ nọ to gigopana Jehovah. (Osọhia 7:15) Hokinkanse Klistiani mẹmẹsunnu po mẹmẹyọnnu po delẹ he ko tin to adà sinsẹ̀nzọn whenu-gigọ́ tọn de mẹ yin adà de he fọnjlodotena hosetọ lẹ taun to hodidọ ehe mẹ.
“Nudida lẹ to Gigo Jiwheyẹwhe Tọn Dehia” wẹ yin hodidọ he bọdego. Dile e ma tlẹ nọ dọho, olọn yinukundomọ lẹ nọ do kiklo-yinyin Jiwheyẹwhe tọn hia bo nọ gọalọna mí nado hẹn pinpẹn-nutọn-yinyọnẹn mítọn siso deji na nukunpedomẹgo owanyinọ etọn. Zẹẹmẹ ehe tọn yin bibasi to gigọ́mẹ.—Isaia 40:26.
Homẹkẹn, agọjẹdomẹ, nuyiwadomẹji aihọn tọn lẹ, po ayilinlẹn ylando tọn lẹ po nọ yin avùnnukundiọsọmẹnu na tenọgligo-hinhẹn Klistiani nugbo lẹ tọn. Enẹwutu, hodidọ lọ “Zinzọnlin to Tenọgli Mẹ” jẹna ayidonugo sọwhiwhenọ mẹplidopọ lẹ tọn. Dogbapọnna wefọ debọdo-dego weta 26tọ Psalm tọn yin bibasi, enẹgodo Kunnudetọ jọja he ko hẹn tenọgli etọn go to walọdagbe mẹ de yin hokanse podọ jọja devo he ko nọ yí whenu zan zẹjlẹgo to ayidedai he ma sọgbe lẹ kọ̀n dai ṣigba bo ko ze afọdide lẹ nado duto nuhahun lọ ji sọ yin hokanse ga.
Hodidọ ayidego tọn lọ, “Numimọ Gigonọ Dọdai Tọn lẹ Nọ Dozolanmẹna Mí!” wẹ dotana tito-to-whinnu afọnnu lọ tọn. Hodọtọ lọ na apajlẹ yẹwhegán Daniẹli, apọsteli Johanu po Pita po tọn taidi mẹhe yise yetọn yin hinhẹn lodo gbọn numimọ gigonọ dọdai heyin didoai po nuyiwa Ahọluduta Mẹssia Jiwheyẹwhe tọn lẹ po tọn dali. To hodidọ na mẹdepope he sọgan ko wọ̀n kunnudenu họnwun he dohia dọ mí ko to gbẹ̀nọ to ojlẹ opodo lọ tọn lẹ mẹ, hodọtọ lọ dọmọ: “Todido ahundoponọ mítọn wẹ yindọ omẹ mọnkọtọn lẹ ni vọ́ ayidonugo yetọn zedo hẹndi tintin tofi Klisti tọn to gigo Ahọluduta tọn mẹ ji bo yin alọgọna nado vọ́ huhlọn mọyi to gbigbọmẹ.”
Tito-to-whinnu whèmẹ tọn bẹjẹeji po hodidọ de po he hosọ etọn yin “Jehovah Nọ Do Gigo Etọn Hia Whiwhẹnọ Lẹ.” Hodọtọ lọ do lehe Jehovah ze apajlẹ dagbe dai to whiwhẹ didohia mẹ hia, dile etlẹ yindọ ewọ wẹ yin Omẹ he yiaga hugan to wẹkẹ mẹ. (Psalm18:35) Jehovah nọ do nukundagbe hia mẹhe yin whiwhẹnọ nugbonugbo lẹ, ṣigba e nọ diọnukunsọ mẹhe nọ sọawuhia di whiwhẹnọ kiki to whenuena yé to nuyiwahẹ hatọ yetọn lẹ kavi ogán yetọn lẹ ṣigba bo nọ fiẹ do mẹhe to anademẹ yetọn glọ lẹ go.—Psalm 138:6.
Enẹgodo, dọdai Biblu tọn de yin hodọdeji to adà voovo hómadọ de tọn mẹ he hosọ etọn yin: “Dọdai Amọsi Tọn—Avase He E Tindo Na Mí to Egbehe.” To alọdindlẹndo apajlẹ Amọsi tọn mẹ, hodọtọ tintan dọ̀n ayidonugo wá azọngban he mí tindo ji nado na avase gbẹtọ lẹ gando whẹdida Jehovah tọn he ja go. Hosọ hodidọ etọn tọn wẹ “Dọ Ohó Jiwheyẹwhe Tọn po Adọgbigbo Po.” Hodọtọ awetọ fọ́n kanbiọ lọ dote dọ: “Be Jehovah na gbẹ́ hẹn kanyinylan po yajiji po wá opodo to aigba ehe ji to gbèdopo ya?” Hosọ etọn heyin “Whẹdida Jiwheyẹwhe Tọn Sọta Mẹylankan Lẹ,” dohia dọ whẹdida nọ saba yin nuhe jẹ, he ma sọgan yin hinhọ̀n na, podọ e ma nọ bẹ mẹlẹpo hẹn to paa mẹ gba. Hodọtọ he dọhodo hómadọ godo tọn ji na ayidonugo hosọ lọ “Jehovah Nọ Gbeje Ahun Pọ́n.” Mẹhe jlo nado hẹn homẹ Jehovah tọn hùn lẹ na setonuna ohó he tin to Amọsi 5:15 mẹ lẹ he dọmọ: “Mì gbẹwanna oylan, bo yiwanna dagbe.”
Ahàn sinsinyẹn lẹ taidi ovẹn he nọ hẹnmẹ jaya, sọgan yin ṣiṣizan. To hodidọ etọn “Dapana Omọ̀ Ahàn Sinsinyẹn Ṣiṣizan Tọn” mẹ, hodọtọ lọ slẹ owù agbasamẹ tọn po gbigbọmẹ tọn lẹ po he ahàn sinsinyẹn nùnù zẹjlẹgo nọ hẹnwa, eyin mẹlọ ma tlẹ nù in mú. E na nunọwhinnusẹ́n anademẹ tọn de dọmọ: Whenuena e yindọ ahàn sinsinyẹn nọ yinuwado mẹdopodopo ji to aliho voovo mẹ, depope he sọgan gbleawuna ‘nuyọnẹn yọn-na-yizan po huhlọn nulẹnpọn tọn’ towe po ko sù hugan na we.—Howhinwhẹn lẹ 3:21, 22.
To whenuena e yindọ ojlẹ awusinyẹn tọn lẹ mẹ wẹ mí te, hosọ he bọdego lọ “Jehovah, ‘Figángán Mítọn to Ojlẹ Ayimajai Tọn lẹ Mẹ,’ ” yin homẹmiọnnamẹnu na mẹplidopọ lẹ. Odẹ̀, gbigbọ wiwe, po Klistiani hatọ lẹ po sọgan gọalọna mí nado doakọnna.
Hosọ he gbọngodo to azán lọ gbè, “ ‘Aigba Dagbe lọ”—Numọdohlan-Nukọn Paladisi Tọn,” yin tadona po nupaṣamẹ de po he hẹn ayajẹ wá na mẹlẹpo—enẹwẹ, owe yọyọ de he bẹ yẹdide otò Biblu whenu tọn susu hẹn! Hosọ etọn wẹ Voyez le bon pays.
Hosọ Azán Awetọ Tọn: ‘Mì Lá Gigo Etọn to Akọta lẹ Ṣẹnṣẹn’
To dogbapọnna wefọ egbesọ tọn godo, hómadọ awetọ plidopọ lọ tọn yin zizedonukọnnamẹ, po hosọ lọ po “Do Gigo Jehovah Tọn Hia Taidi to Mẹpọnnu de Mẹ.” Adà tintan dọhodo hosọ lọ “Wẹndagbe lọ Lilá to Filẹpo” ji gọna wadohia numimọ sinsẹ̀nzọn kunnudegbe tọn tangan delẹ vivọbasi. Hodidọ awetọ bẹ wadohia gọyìpọn bibasi tọn de hẹn dile hodọtọ lọ to hodọ do hosọ lọ ji “Nukunmẹṣinyọnnu Didesẹ Na Mẹhe Yin Nukuntọ́nna Lẹ.” Adà godo tọn he hosọ etọn yin “Mọwiwa Yinukọndogọ to Lizọnyizọn Mítọn Mẹ,” yin hinhẹn gbloada dogọ gbọn hokansemẹ ojlofọndotenamẹ tọn lẹ dali he bẹ numimọ kunnudegbe tọn lẹ hẹn.
Adà he bọdego to tito-to-whinnu lọ mẹ tindo hosọ lọ “Yin Wangbẹna Matin Whẹwhinwhẹ́n.” E bẹ hokansemẹ tulinamẹ tọn lẹ hẹn sọn omẹ nugbonọ he huhlọn Jiwheyẹwhe tọn gọalọna nado hẹn tenọgligo to homẹkẹn glọ lẹ dè.
Adà he nọ yin nukundo hugan to plidopọ lẹ ji wẹ hodidọ baptẹm tọn to ehe godo baptẹm-yitọ he pegan lẹpo nọ yin yinylọndo sinmẹ mlẹnmlẹn. Baptẹm to osin mẹ yin yẹhiadonu klandowiwe mlẹnmlẹn mẹde tọn hlan Jehovah. Enẹwutu, hosọ lọ yin dehe sọgbe taun: “Gbẹninọ Sọgbe hẹ Klandowiwe Mítọn Nọ Pagigona Jiwheyẹwhe.”
Tito-to-whinnu whèmẹ tọn bẹjẹeji po hodidọ de po he namẹ tuli nado basi dodinnanu mẹdetiti tọn, “Awuwiwlena Pọndohlan He Taidi Klisti Tọn Gando Kiklo-Yinyin Go.” Hodọtọ lọ donù nuagokun ojlofọndotenamẹ tọn ehe go: Kiklo-yinyin nọ wá sọn apajlẹ whiwhẹ Klisti tọn hihodo mẹ. Enẹwutu, Klistiani de ma dona dín otẹn azọngban tọn nado sọgan hẹn pekọwana ojlo mẹdetiti tọn gba. E dona kanse ede dọ, ‘Be yẹn nọ jlo nado wazọ́n alọgọnamẹ tọn he ma na yawu yin ayidego lẹ ya?’
Be onú ko ṣikọna we pọ́n ya? Gblọndo lọ họnwun. Mẹlẹpo wẹ duvivi hodidọ lọ tọn “Nuṣikọ na Mí, Ṣigba E Mayin to Gbigbọ-Liho Gba.” Hokinkanse mẹhe ko yin Kunnudetọ sọn owhe susu die lẹ dohia dọ Jehovah sọgan hẹn mí “dogán gbọn [gbigbọ] etọn mẹ.”—Efesunu lẹ 3:16.
Alọtútlú yin jẹhẹnu de he mí ma nọ dugu etọn ṣigba he mí dona plọn. Nuagokun ehe yin nùzindeji to hosọ lọ mẹ “Nọ Tlúalọ, Wleawu Nado Mánamẹ.” Podọ kanbiọ mẹhẹnlẹnnupọn tọn ehe yin finfọndote: “Be mí nọ jlo nado yí ganmẹ mítọn delẹ zan hẹ mẹmẹsunnu po mẹmẹyọnnu lẹ po he ko poyọnho, kavi he to azọ̀njẹ, kavi jẹflumẹ, kavi he to yedeṣo lẹ ya?”
“Mì Họ́ Mìde Sọta ‘Ogbè Jonọ lẹ Tọn’ ” yin hosọ devo he dọ̀n ayidonugo mẹplidopọ lẹ tọn. Hosọ ehe yí hodotọ Jesu tọn lẹ jlẹdo lẹngbọ he nọ dotoaina ogbè etọn kẹdẹ taidi “lẹngbọhọtọ dagbe” lọ bo masọ nọ dotoaina “ogbè jonọ lẹ tọn” he nọ wá sọn asisa gbẹtọ lẹ tọn he nọ yin nuyiwadeji gbọn Lẹgba dali lẹ dè go.—Johanu 10:5, 14, 27.
Hànjigbẹ́ de dona jihàn to pọmẹ nado yin nukunnumọjẹemẹ. Nado sọgan pagigona Jiwheyẹwhe, sinsẹ̀n-basitọ nugbo lẹ dona tin to kọndopọmẹ lẹdo aihọn pé. Enẹwutu, hosọ lọ “Pagigona Jiwheyẹwhe ‘Po Onù Dopo Po’ ” na mí anademẹ lẹ do lehe mí sọgan dó ‘ogbè wiwe-ṣeke’ dopo lọ bo sẹ̀n Jehovah “po abọ́ dopo po” do ji.—Zẹfania 3:9.
Hodidọ godo tọn azán lọ gbè tọn “Ovi Mítọn lẹ—Ogú Họakuẹ De” hẹn homẹ mẹjitọ lẹ, titengbe mẹhe tindo ovi pẹvi lẹ tọn hùn taun. Owe yọyọ weda 256 tọn de yin didetọ́n, taidi nupaṣamẹ de he hẹn ayajẹ wá na mẹplidopọ lẹ. Plọnnu sọn Mẹplọntọ Daho lọ Dè yin owe de he na gọalọna mẹjitọ lẹ nado yí whenu he na hẹn ale wá to gbigbọ-liho zan hẹ ovi yetọn lẹ, heyin nunina sọn Jiwheyẹwhe dè.
Hosọ Azán Atọ̀ntọ Tọn: “Mì Nọ Wà [Onú] Popo Hlan Gigo Jiwheyẹwhe Tọn”
Azán godo tọn plidopọ lọ tọn bẹjẹeji po nuflinmẹ wefọ egbesọ tọn po. Ayidonugo vonọtaun yin nina whẹndo lẹ to adà tintan tito-to-whinnu azán ehe tọn mẹ. Hodidọ tintan lọ, “Mẹjitọ lẹ Emi, Mì Jlọ Whédo Mìtọn Dote,” wleawuna ayiha mẹplidopọ lẹ tọn. To dogbigbapọnna azọngban mẹjitọ lẹ tọn nado penukundo nuhudo agbasamẹ tọn whẹndo yetọn tọn lẹ go godo, hodọtọ lọ dohia dọ azọngban mẹjitọ lẹ tọn tintan wẹ nado penukundo nuhudo gbigbọmẹ tọn ovi yetọn lẹ tọn go.
Hodọtọ he bọdego dọhona ovi lẹ bo gbadopọnna hosọ lọ “Lehe Jọja lẹ to Jehovah Pà Gbọn.” E dọ dọ jọja lẹ yin yiyijlẹdo “ahún” go na sọha yetọn sù taun bọ zohunhun jọja-whenu tọn yetọn sọ fọnjlodotenamẹ. Homẹ mẹhomẹ lẹ tọn nọ hùn nado wazọ́n hẹ yé to sinsẹ̀nzọn Jehovah tọn mẹ. (Psalm 110:3) Adà ehe bẹ hokansemẹ awuvivi tọn lẹ sọn jọja apajlẹ dagbenọ lẹ dè hẹn.
Nupinpọn-do-plọnnu he sinai do Biblu ji lẹ nọ saba yin adà awuvivi tọn to plidopọ agbegbe lẹ ji, podọ mọjanwẹ e yin to plidopọ ehe ji ga. Nupinpọn-do-plọnnu lọ “Kunnudide po Adọgbigbo po Mahopọnna Nukundiọsọmẹ” basi zẹẹmẹ hodotọ Jesu tọn owhe kanweko tintan whenu tọn lẹ tọn. E mayin nudohia ayidedai tọn de poun gba, ṣigba na taun tọn, nuplọnmẹ de. Hodidọ he bọdo nupinpọn-do-plọnnu lọ go, “Lá Wẹndagbe lọ ‘Madoalọte,’ ” zinnudo nuagokun he tin to nupinpọn lọ mẹ lẹ ji.
Mẹplidopọ lẹpo wẹ to nukọnpọnhlan na adà vonọtaun tito-to-whinnu Sẹgbe tọn, yèdọ hodidọ na mẹlẹpo, “Mẹnu lẹ Wẹ to Gigopana Jiwheyẹwhe to Egbehe?” Hodọtọ lọ na kunnudenu dolido lẹ do lehe lẹnunnuyọnẹntọ lẹ po sinsẹ̀nnọ lẹ po to pọmẹ ma ko pagigona Jiwheyẹwhe do ji. Mẹhe tindo oyín etọn to ota, bo to yẹwhehodọ bosọ to nugbo Jehovah tọn plọnmẹ lẹ kẹdẹ wẹ to gigopana oyín etọn nugbonugbo to egbehe.
Bladopọ oplọn Atọ̀họ̀-Nuhihọ́ Lọ Tọn na osẹ lọ wẹ bọdo hodidọ na mẹlẹpo lọ go. To enẹgodo, hodidọ godo tọn bọdego, “ ‘Mì to Sinsẹ́n Susu Detọ́n’ Hlan Gigo Jehovah Tọn.” Hodọtọ lọ ze gbemima he bẹ nuagokun ao hẹn donukọnna mẹplidopọ lẹpo. E gando aliho voovo he mẹ gigo sọgan yin pipà na Jehovah, Mẹdatọ lọ do go. Mẹplidopọ lẹpo yigbe dopọ dọ “Mọwẹ” to plidopọ lẹpo ji lẹdo aihọn pé.
Gbọnmọ dali plidopọ lọ wá vivọnu bọ hosọ lọ “Mì Pagigona Jiwheyẹwhe” yin didó do ahun mẹ na plidopọ-watọ lẹ dopodopo. Podọ, mì gbọ gbigbọ Jehovah tọn po titobasinanu yinukundomọ etọn po ni gọalọna mí nado nọ dovivẹnu to whepoponu nado pagigona Jiwheyẹwhe, e mayin gbẹtọ.
[Apotin/Yẹdide to weda 23]
Plidopọ Akọjọpli Tọn Lẹ
Plidopọ akọjọpli tọn azán ẹnẹ tọn lẹ yin bibasi to Aflika, Agewaji po Hùwaji Amérique tọn po, Asie, Australie, po Europe po. Kunnudetọ he pegan lẹ yin oylọ-basina lẹdo aihọn pé nado yin afọzedaitọ lẹ to plidopọ ehelẹ tẹnmẹ. Gbọnmọ dali jonọ lẹ po whétọ yetọn lẹ po na tuli, kavi “miọnhomẹna” ode awetọ yetọn. (Lomunu lẹ 1:12) Mẹhe ko yọ́n yede dai lẹ vọ́ kanṣiṣa yetọn lẹ hẹn jẹ yọyọ, podọ họntọn yọyọ lẹ sọ yin jiji. Adà tito-to-whinnu lọ tọn he hosọ etọn yin “Linlin lẹ sọn Aigba Devo lẹ Ji” wẹ yin adà vonọtaun plidopọ akọjọpli lẹ tọn.
[Apotin/Yẹdide to weda 25]
Owe Yọyọ He Pagigona Jiwheyẹwhe Lẹ
Owe yọyọ awe yin didetọ́n to Plidopọ Agbegbe “Mì Pagigona Jiwheyẹwhe” tọn lẹ ji. Owe yẹdide otò Biblu whenu tọn lẹ tọn Voyez le bon pays tindo wepa sinsinyẹn bo tindo weda 36 he bẹ yẹdide otò tọn po fọto aigba Biblu whenu tọn lẹ po hẹn. Weda lẹpo wẹ tindo yẹdide sinmẹ whanpẹnọ lẹ he bẹ yẹdide ahọluigba Assilia, Babilọni, Mẹdo-Pẹlsia, Grèce, po Lomu po tọn lẹ hẹn. Yẹdide otò tọn devo lẹ tin he do fie lizọnyizọn Jesu tọn dlẹnkan jẹ lẹ po fie sinsẹ̀n Klistiani tọn gbloada jẹ lẹ po hia.
Owe Plọnnu sọn Mẹplọntọ Daho lọ Dè tindo weda 256 bo bẹ yẹdide 230 hẹn. Ojlẹ awuvivi tọn susu sọgan yin yiyizan hẹ ovi lẹ nado pọ́n yẹdide lẹ dopọ poun bo na gblọndo na kanbiọ mẹhẹnlẹnnupọn tọn he to owe lọ mẹ lẹ. Owe yọyọ ehe yin awuwlena nado duto mẹgbeyinyan Satani tọn sọta ovi jọja mítọn lẹ ji, ehe e nọ yizan nado hẹn walọdagbe yetọn lẹ gblezọn.
[Yẹdide to weda 23]
Mẹdehlan lẹ na numimọ yise hẹnlodo tọn lẹ
[Yẹdide to weda 24]
Baptẹm yin adà titengbe de to plidopọ “Mì Pagigona Jiwheyẹwhe” tọn lẹ ji
[Yẹdide to weda 24]
Yọpọvu po mẹho po wẹ duvivi nupinpọn- do-plọnnu he sinai do Biblu ji lọ tọn