Opagbe He Go Hiẹ Sọgan Dejido Lẹ

YẸWHEGÁN Jiwheyẹwhe tọn Mika yọnẹn dọ opagbe lẹ nọ saba lẹzun dehe go yè ma sọgan dejido lẹ. To azán etọn gbè, họntọn alọmayiemẹ hugan lẹ ma sọgan yin jide-dego to whepoponu nado hẹn ohó yetọn di. Enẹwutu Mika na avase dọmọ: “Mì dotu to họntọn de mẹ blo, mì sọ yí todido do whégbè họntọn de mẹ blo: bọ̀ ohọ̀n onù towe tọn lẹ dó sọn ewọ he mlọnai to akọ́n towe mẹ dè.”—Mika 7:5.

Be Mika dike ninọmẹ blawu ehe ni hẹn ẹn tindo ayihaawe do opagbe lẹpo go wẹ ya? Lala! E do jidide mlẹnmlẹn hia to opagbe he Jiwheyẹwhe etọn, Jehovah dó lẹ mẹ. “Na yẹn tọn,” wẹ Mika wlan, “yẹn na nọ pọ́n hlan OKLUNỌ dè; yẹn na nọtepọn Jiwheyẹwhe whlẹngán ṣie tọn lọ.”—Mika 7:7.

Etẹwẹ hẹn Mika tindo jidide mọnkọtọn? E yọnẹn dọ Jehovah nọ hẹn ohó etọn lẹ di to whepoponu. Nuhe Jiwheyẹwhe ko whlé hlan tọgbo Mika tọn lẹ pete wẹ ṣẹ. (Mika 7:20) Nugbonọ-yinyin Jehovah tọn to ojlẹ  he wayi lẹ mẹ na Mika whẹwhinwhẹ́n lẹpo nado yise dọ Ewọ na hẹn opagbe Etọn lẹ di to sọgodo.

“Onú Dopo Ma Gbòpò”

Di apajlẹ, Mika yọnẹn dọ Jehovah whlẹn Islaelivi lẹ sọn kanlinmọgbenu to Egipti. (Mika 7:15) Jọṣua, he yí nukun do mọ nujijọ mẹwhlẹngán tọn enẹ, na tuli Islaelivi hatọ etọn lẹ nado yí opagbe Jiwheyẹwhe tọn lẹpo sè. Etẹwutu? E flin yé dọmọ: “Mìwlẹ sọ yọnẹn to ayiha mìtọn lẹpo mẹ podọ to gbigbọ mìtọn lẹpo mẹ, dọ onú dopo ma gbòpò sọn onú dagbe he OKLUNỌ Jiwheyẹwhe mìtọn dọ gbọn mì dali lẹ de mẹ; popolẹpo wẹ ṣẹ hlan mì, onú dopo ma gbòpò to e mẹ gba.”—Jọṣua 23:14.

Islaelivi lẹ yọnẹn ganji dọ Jehovah ko wà onú jiawu lẹ na yé. E ko hẹn opagbe he e dó na tọgbo budisi Jiwheyẹwhe tọ́ yetọn Ablaham di dọ kúnkan etọn na sù taidi sunwhlẹvu lẹ bo nasọ dugu aigba Kenani tọn. Jehovah sọ dọna Ablaham dọ kúnkan etọn na jiya na owhe 400 ṣigba na lẹkọyi Kenani “to whẹndo ẹnẹtọ mẹ.” Ehe lẹpo wẹ jọ.—Gẹnẹsisi 15:5-16; Eksọdusi 3:6-8.

Islaelivi lẹ yin alọkẹyi ganji to Egipti to gbẹwhenu Josẹfu heyin visunnu Jakobu tọn tọn. To nukọn mẹ, Egiptinu lẹ yí kanyinylan do hẹn yé wazọ́n huhlọnnọ lẹ gánnu-gánnu, ṣigba dile Jiwheyẹwhe ko dopagbe do, kúnkan Ablaham tọn ehelẹ yin hinhẹn jẹ mẹdekannu sọn kanlinmọgbenu Egipti tọn mẹ to ojlẹ whẹndo ẹnẹtọ tọn mẹ sọn whenue yé yì Egipti. a

To owhe 40 he bọdego lẹ gblamẹ, Islaelivi lẹ tindo kunnudenu yinukọn dogọ dọ Jehovah nọ hẹn opagbe etọn lẹ di to whepoponu. To whenuena Amalẹkinu lẹ tọ́n-awhàn Islaelivi lẹ matin whẹwhinwhẹ́n depope, Jiwheyẹwhe hoavùn na omẹ etọn lẹ bo basi hihọ́na yé. E hẹn pekọwana nuhudo agbasa tọn yetọn lẹpo to owhe 40 he yé do zinzọnlin gbọn zungbo mẹ whenu bo hẹn yé wá Aigba Pagbe tọn ji to godo mẹ. Dile Jọṣua to whenuho nuyiwa Jehovah tọn lẹ tọn hẹ kúnkan Ablaham tọn ehelẹ gbeje pọ́n, e sọgan dọ po jide po dọmọ: “Nude ma gbòpò sọn onú dagbe he OKLUNỌ dọ hlan owhé Islaeli tọn depope mẹ gba; popolẹpo wẹ ṣẹ.”—Jọṣua 21:45.

Tindo Jide to Opagbe Jiwheyẹwhe Tọn lẹ Mẹ

Nawẹ hiẹ sọgan wleawuna yise to opagbe Jehovah tọn lẹ mẹ, dile Mika po Jọṣua po wà do gbọn? Eyọn, nawẹ hiẹ nọ wleawuna jidide to mẹdevo lẹ mẹ gbọn? Hiẹ nọ tẹnpọn nado jẹakọhẹ yé ganji dile e sọgan yọnbasi do. Di dohia, hiẹ sọgan tẹnpọn nado yọ́n lehe yè sọgan ganjẹ yé go sọ gbọn ayidido e go dọ yé nọ tẹnpọn nado hẹn opagbe yetọn lẹpo di po nugbonọ-yinyin po dali. Dile hiẹ yọ́n nususu dogọ gando omẹ mọnkọtọn lẹ go, hiẹ nọ jẹ jidedo yé go vudevude ji. Hiẹ sọgan wà nudopolọ gando yise tintindo to opagbe Jiwheyẹwhe tọn lẹ mẹ go.

Aliho dopo nado wà ehe wẹ nado lẹnayihamẹpọn do nudida lẹ po osẹ́n he nọ deanana yé lẹ po ji. Lẹnunnuyọnẹntọ lẹ nọ dejido osẹ́n ehelẹ go, taidi dehe nọ deanana aliho he mẹ nuvikun tiuntiun dopo nọ má bo nọ jideji nado wleawuna nuvikun madosọha he  agbasa towe bẹhẹn lẹ te. Na nugbo tọn, osẹ́n he nọ deanana nugonu jọwamọ tọn po huhlọn jọwamọ tọn po to wẹkẹ lọ blebu mẹ dona ko yin didoai gbọn Osẹ́n-basitọ dejidego mlẹnmlẹn de dali. Matin ayihaawe hiẹ sọgan dejido opagbe etọn lẹ go, kẹdẹdile hiẹ dejido osẹ́n he nọ deanana nudida etọn lẹ go do.—Psalm 139:14-16; Isaia 40:26; Heblu lẹ 3:4.

Gbọn yẹwhegán Isaia, he nọgbẹ̀ to ojlẹ dopolọ mẹ hẹ Mika gblamẹ, Jehovah yí gbesisọ osaa lẹ tọn po lilẹpe jiawu osin tọn po zan nado dohia dọ ohó etọn sọgan yin jide-dego. Jikun nọ ja to owhe lẹpo mẹ. E nọ hẹn aigba yọ̀n bo nọ hẹn ẹn yọnbasi na gbẹtọ lẹ nado dó jinukun yetọn bo gbẹ̀n sinsẹ́n etọn lẹ. Jehovah dọ gando ehe go dọmọ: “Le jikun po kẹnjikun po nọ sọn olọn mẹ wá, bo masọ nọ lẹgọ do finẹ, ṣigba bọ e nọ hẹn aigba yọ̀n, bosọ nọ hẹn onú wú jẹgbonu, bosọ nọ bligò, na e nido na nọkún jidotọ, podọ núdùdù na núdùtọ. Mọkẹdẹ wẹ ohó ṣie he tọ́n sọn onù ṣie na te: e ma na lẹgọ wá dè e agbá, ṣigba e na dotana nuhe yẹn jlo, e na wadagbe to nuhe mẹ yẹn do e hlan te.”—Isaia 55:10, 11.

Opagbe Dejidego Paladisi Tọn

Nulinlẹnpọn do nudida ji sọgan hẹn jidide lodo to Mẹdatọ lọ mẹ, ṣigba onú devo lẹ dona yin wiwà eyin hiẹ jlo na plọnnu gando opagbe heyin apadewhe ‘ohó he tọ́n sọn onù etọn mẹ’ lẹ tọn go. Nado plọnnu gando opagbe ehelẹ go na hiẹ nido sọgan dejido yé go, hiẹ dona gbadopọnna kandai gbọdo Owe-wiwe tọn gando lẹndai Jiwheyẹwhe tọn na aigba podọ lehe e nọ yinuwa hẹ gbẹtọvi lẹ do go.—2 Timoti 3:14-17.

Yẹwhegán Mika tindo jide to opagbe Jehovah tọn lẹ mẹ. Kandai gbọdo he hiẹ tindo todin lẹ tlẹ sù tlala hú dehe Mika tindo. Dile hiẹ to Biblu hia bo to ayihamẹlẹnpọn do e ji, hiẹ lọsu sọgan wleawuna yise to hẹndi opagbe Jiwheyẹwhe tọn lẹ tọn mẹ. E mayin kúnkan jọwamọ Ablaham tọn lẹ kẹdẹ wẹ opagbe ehelẹ bẹhẹn gba ṣigba gbẹtọvi lẹpo. Jehovah dopagbe na tọgbo budisi Jiwheyẹwhe tọ́ ehe dọmọ: “To okún towe mẹ wẹ yè na dona akọta aigba ji tọn lẹpo: na hiẹ yí ogbè ṣie sè wutu.” (Gẹnẹsisi 22:18) Adà tangan “okún” kavi kúnkan Ablaham tọn lọ tọn wẹ Mẹssia lọ, yèdọ Jesu Klisti.—Galatianu lẹ 3:16.

Gbọn Jesu Klisti gblamẹ, Jehovah na hẹn ẹn diun dọ dona lẹ sà jẹ gbẹtọvi lẹ dè. Podọ etẹwẹ Jiwheyẹwhe ko dopagbe nado wà to ojlẹ mítọn mẹ? Mika 4:1, 2 gblọn po hogbe dọdai tọn ehelẹ po dọmọ: “To azán godo tọn lẹ mẹ e na wá jọ, bọ osó ohọ̀ OKLUNỌ tọn tọn lọ na yin hẹn lodo to ota osó lẹ lọ tọn, podọ e na yin zedaga to okọ́ta lẹ ji; podọ gbẹtọ lẹ nasọ nọ sà jẹ e dè. Akọta susu bo nasọ yì bo dọmọ, Mì wá, bosọ gbọ mí ni jẹte yì jẹ osó OKLUNỌ tọn kọ̀n, podọ jẹ ohọ̀ Jiwheyẹwhe Jakobu tọn tọn lọ kọ̀n; ewọ bo nasọ plọn mí sọn aliho etọn lẹ mẹ, míwlẹ bo nasọ nọ zinzọnlin to omọ́ etọn lẹ mẹ.”

Mẹhe plọn aliho Jehovah tọn lẹ “yí ohí yetọn lẹ do tùn glepọnugàn lẹ, podọ owhán yetọn lẹ do ohànvi lẹ mẹ.” Yé ma tindo ojlo depope na awhàn ba. To madẹnmẹ, aigba na gọ́ na gbẹtọ dodonọ lẹ, podọ mẹde ma na hẹn yé savò to obu mẹ. (Mika 4:3, 4) Mọwẹ, Ohó Jiwheyẹwhe tọn dopagbe dọ to Ahọluduta he Jesu Klisti na dugán do e ji lọ glọ, Jehovah na de kọgbidinamẹtọ lẹpo sẹ̀ sọn aigba lọ ji.—Isaia 11:6-9; Daniẹli 2:44; Osọhia 11:18.

Mẹhe tlẹ ko jiya bo kú na atẹṣiṣi gbẹtọ tọn sọta Jiwheyẹwhe wutu lẹ na yin finfọnsọnku po todido lọ po nado nọgbẹ̀ kakadoi to aigba ji. (Johanu 5:28, 29) Satani po aovi etọn lẹ po, heyin tọ́ntlọ́ngbọ́n to ylanwiwa mẹ, na yin vivasudo  bọ nugandomẹgo ylando Adam tọn lẹ tọn na yin didesẹ gbọn avọ́sinsan ofligọ Jesu tọn gblamẹ. (Matiu 20:28; Lomunu lẹ 3:23, 24; 5:12; 6:23; Osọhia 20:1-3) Etẹwẹ na yin ninọmẹ gbẹtọvi tonusetọ lẹ tọn to whenẹnu? Matin ayihaawe, yé na yin didona po ogbẹ̀ madopodo po to agbasalilo pipé mẹ to paladisi aigba ji tọn mẹ!—Psalm 37:10, 11; Luku 23:43; Osọhia 21:3-5.

Opagbe jiawu nankọtọn lẹ die! Ṣigba be hiẹ sọgan yí yé sè ya? Gbau. Opagbe ehelẹ mayin didó gbọn gbẹtọvi he sọgan tindo ayilinlẹn dagbe lẹ ṣigba he ma tindo huhlọn lọ nado hẹn yé di dali gba. Opagbe Jiwheyẹwhe Gigogán lọ, he ma sọgan dolalo podọ he “ma gboawupo gbọn opagbe etọn dali” lẹ tọn wẹ yé yin. (2 Pita 3:9; Heblu lẹ 6:13-18) Hiẹ sọgan tindo jide mlẹnmlẹn to opagbe he tin to Biblu mẹ lẹpo mẹ, na ‘Jehovah Jiwheyẹwhe nugbo tọn’ wẹ Asisa yetọn.—Psalm 31:5.

[Nudọnamẹ Odò Tọn]

[Blurb to weda 6]

“Onú dopo ma gbòpò sọn onú dagbe he OKLUNỌ Jiwheyẹwhe mìtọn dọ gbọn mì dali lẹ de mẹ.”—JỌṢUA 23:14

[Yẹdide to weda 4]

Jehovah hẹn opagbe he e dó na Islaeli to Ohù Vẹẹ kọ̀n podọ to zungbo mẹ lẹ di

[Yẹdide to weda 7]

Jehovah hẹn opagbe he e dó na Ablaham di. Okún etọn, Jesu Klisti, na hẹn dona lẹ wá na gbẹtọvi lẹ