‘E Plọn Mí Nado Na Sisi Sinsẹ̀n Etọn’

KUNNUDETỌ Jehovah tọn de sọn ayimatẹn Rovigo tọn, to Italie, to azọ̀n agbasa wiwọ̀ tọn sinsinyẹn de jẹ. To dotowhé ninọ̀ na ojlẹ dindẹn de godo, to ehe whenu e biọ dọ emi ni yin nukunpedego matin ohùn, e lẹkọyi whégbè bọ doto mẹgopọntọ lẹdo lọ tọn lẹ nọ gọalọna ẹn.

Yise dolido po ojlo awutunọ owhe 36-mẹvi ehe tọn po nado kọngbedopọ mlẹnmlẹn hẹ dotozọ́nwatọ he to nukunpedo e go lẹ yinuwado yé ji taun. Ojlẹ vude whẹpo azọ̀n ehe do hù mẹmẹyọnnu lọ, dopo to doto he nọ gọalọna ẹn lẹ mẹ wlan numimọ he e tindo gando awutunọ he e ylọ dọ Angela go do linlinwe mẹgopinpọn tọn de mẹ.

“Angela gọ́ na zohunhun bosọ jlo na nọgbẹ̀. E yọ́n ninọmẹ ede tọn bosọ yọnẹn dọ emi to azọ̀n sinsinyẹn jẹ, podọ dile depope to mí mẹ na wà do, e to pọngbọ kavi amasin he na hẹn azọ̀n etọn gbọ̀ dín. . . . Taidi doto mẹgopọntọ lẹ, mí tẹnpọn nado jẹakọ hẹ ẹ. Angela kẹalọyi alọgọ mítọn podọ awuvivo etọn hẹn onú lẹpo bọawu. Homẹ mítọn nọ hùn nado yì e dè, na mí yọnẹn dọ mí to nuyiwa hẹ gbẹtọ ahundoponọ de bọ pọninọ mítọn sọ nọ hẹn ale wá na mímẹpo. . . . To afọdopolọji mí doayi e go dọ sinsẹ̀n etọn na glọnalina mí nado penukundo azọ̀n etọn go.” Linlẹn etọn niyẹn na e mọdọ Angela dona dó ohùn, bọ e gbẹ́.—Owalọ lẹ 15:28, 29.

“Taidi dotozọ́nwatọ lẹ, mí dọna Angela dọ mí ma kọngbedopọ hẹ nudide etọn gba, ṣigba e gọalọna mí nado yọ́n lehe ogbẹ̀ yin nujọnu na ẹn sọ. Mí sọ mọnukunnujẹ lehe sinsẹ̀n etọn yin nujọnu na ewọ po whẹndo etọn po do mẹ. Angela ma jogbe gba. E ma joawuna azọ̀n etọn gba. E gbẹ́ hẹn gbemima etọn go. E jlo na nọgbẹ̀, bosọ magbe nado diahi hẹ azọ̀n lọ. E ko dọ gbemima etọn po nuhe e yise po na mí. Gbemima nujikudo tọn etọn ma sọgan yin jijlẹdo mítọn go, podọ yise mítọn ma lodo sọmọ gba. . . . Angela ko plọn mí lehe e yin nujọnu do nado na sisi sinsẹ̀n etọn, eyin nunọwhinnusẹ́n amasinzọnwiwa tọn mítọn tlẹ gbọnvo. . . . Mí yise dọ nuhe Angela ko plọn mí yin nujọnu taun, na mí nọ pehẹ gbẹtọ voovo, ninọmẹ voovo, po sinsẹ̀n voovo lẹ po, podọ mí sọgan plọnnu sọn mẹhe mí dukosọ hẹ lẹpo dè bosọ má nude hẹ yé.”

To enẹgodo linlinwe lọ zinnudo Nunọwhinnusẹ́n Doto Mẹgopọntọ Italie tọn lẹ tọn, heyin alọkẹyi to 1999 ji, dọmọ: “Nuyiwa doto mẹgopọntọ tọn lẹ dona ze sinsẹ̀n, walọ, akọ̀, podọ nujinọtedo mẹdopodopo tọn vlavo sunnu kavi yọnnu tọn do lẹnpọn mẹ.” To whedelẹnu, e sọgan sinyẹnawuna doto lẹ nado na sisi nuyise sinsẹ̀n mẹde tọn, podọ na jide tọn, mí yọ́n pinpẹn doto he tindo ojlo nado wàmọ lẹ tọn.

Kunnudetọ Jehovah tọn lẹ nọ lẹnnupọn sisosiso do nudide yetọn lẹ ji gando agbasalilo yetọn po nukunpedomẹgo amasinzọnwiwa tọn he yé na mọyi lẹ po go. Yé ma nọ yí nukunpẹvi do pọ́n nuhe Owe-wiwe dọ, podọ dile whẹho Angela tọn dohia do, yé ma yin mẹhe sinsẹ̀n gbà tamẹ na lẹ gba. (Filippinu lẹ 4:5) Lẹdo aihọn pé, sọha doto he nọ jlo nado na sisi ayihadawhẹnamẹnu Kunnudetọ he to azọ̀njẹ lẹ tọn to susudeji.