Nuhahun He Tin to Ovi Pinplọn mẹ to Egbehe

TO WHÈJAI dopo, núdùdù-sàtọ de ko to nusẹdo nado yì whégbè to whenuena nawe awe po ovi pẹvi de po biọ họmẹ bo zọ́n núdùdù. Agbọ́ ko pé núdùdù-sàtọ lọ taun bọ e jlo na dọna yé dọ núdùdù ko vọ̀, ṣigba e diọ linlẹn bo sànú na yé. Dile nawe awe lọ lẹ to hodọ bo to núdù, ovi lọ to wezunhọn gbọn nusatẹn lọ, bo to akla lẹ dlán do kọmẹ bo nọ yí afọ do lì yé. Kakati nado gbẹnuna ovi lọ, onọ̀ etọn to núkò poun. To whenuena yé dùnú fó, nusàtọ he agbọ́ ko pé lọ jẹ diho lọ lẹ zà ji.

Dile a sọgan ko yọnẹn do, ninọmẹ ehe dohia dọ to whẹndo susu mẹ, nuhahun tin to ovi lẹ pinplọn mẹ. Nususu wẹ zọ́n. Mẹjitọ delẹ nọ joalọdokọji na ovi yetọn lẹ nado wà nuhe jlo yé, po linlẹn lọ po dọ ovi lẹ dona yin pinpọ́n whẹ́n to lẹdo he voawu de mẹ. Kavi na alọnu mẹjitọ lẹ tọn nọ ján taun wutu, yé sọgan nọma na ovi yetọn lẹ ayidonugo po oplọn he jẹ po. Mẹjitọ delẹ lẹndọ wehọmẹ yìyì ovi yetọn tọn wẹ yin nujọnu hugan, enẹwutu yé nọ na ovi lọ mẹdekannujẹ mlẹnmlẹn eyin e gbẹ́ sọgan to dagbe wà to wehọmẹ bo mọ tẹnmẹ do wehọmẹ daho he diyin de mẹ.

Ṣogan, mẹdelẹ dọ dọ nujinọtedo mẹjitọ lẹ tọn po gbẹtọ lẹ tọn to paa mẹ po dona yin vivọjlado. Yé dọ dọ ovi lẹ to alọdo to sẹ́nhẹngba wunmẹ lẹpo mẹ yinukọn dogọ bọ danuwiwa sọ to agayi egbesọegbesọ to wehọmẹ. Enẹwutu, wehọmẹ-gán de to Séoul, Corée, zinnudeji dọ ovi lẹ pinplọn nado tindo gbẹtọ-yinyin dagbe dona tin to otẹn tintan mẹ. E dọmọ: “Awuwiwlena jijọ dagbe dona jẹnukọnna oyọnẹn tintindo.”

Susu mẹjitọ he jlo dọ ovi yetọn ni biọ wehọmẹ daho bo geze to gbẹ̀mẹ lẹ tọn nọ gbẹkọ avase lẹ go. Eyin mẹjitọ de wẹ hiẹ yin, gbẹtọ nankọ wẹ a jlo dọ ovi towe ni lẹzun? Mẹhomẹ he tindo walọ dagbe bo nọ hẹn azọngban etọn lẹ di de? Mẹde he nọ hò mẹdevo lẹ tọn pọ́n, he yọ́n alọdiọ, bo tindo gbigbọ alọgọnamẹ tọn de? Eyin mọwẹ, jaale gbadopọnna hosọ he bọdego.