Ogú He Họakuẹ Hugan Lọ

APỌSTELI Johanu yọnhonọ lọ wlan sẹpọ vivọnu gbẹzan etọn tọn dọmọ: “Yẹn ma tindo ayajẹ daho de hú ehe gba, dọ yẹn ni to sisè dọ ovi ṣie lẹ to zọnlinzin to nugbo mẹ.”—3 Johanu 4.

Apọsteli nugbonọ lọ to alọdlẹndo ovi gbigbọmẹ tọn etọn lẹ. Matin ayihaawe, mẹjitọ susu wẹ na tindo numọtolanmẹ dopolọ hẹ apọsteli lọ. Yé ko dovivẹnu susu nado pọ́n ovi yetọn lẹ go whẹ́n to ‘hihò po hokọnamẹ Jehovah tọn po mẹ,’ podọ todin yé hùnhomẹ nado nọ mọ ovi yetọn he ko whẹ́n mẹho lẹ to “zọnlinzin to nugbo mẹ.” (Efesunu lẹ 6:4) Na nugbo tọn, ogú he họakuẹ hugan he sọgan yin nina ovi lẹ wẹ nado plọn yé aliho ogbẹ̀ mavọmavọ tọn. Nuhe zọ́n wẹ yindọ jijọ-di-Jiwheyẹwhe, ehe bẹ gbẹninọ dile Jehovah jlo dọ Klistiani lẹ ni nọgbẹ̀ gbọn hẹn, “tindo opagbe aihọn he tin to dinvie tọn, po aihọn he ja tọn po.”—1 Timoti 4:8.

Jehovah, Otọ́ pipé lọ, nọ yiwanna mẹjitọ budisi Jiwheyẹwhe tọ́ he dovivẹnu vẹkuvẹku nado plọn ovi yetọn lẹ to gbigbọ-liho lẹ tlala. Eyin ovi lẹ setonu, yé nọ mọ ayajẹ daho to sinsẹ̀n nugbo lọ bibasi to pọmẹ hẹ mẹjitọ yetọn lẹ mẹ. Dile ovi enẹlẹ to whinwhẹ́n, yé nọ flin numimọ awuvivinamẹ tọn susu lẹ. Delẹ to yé mẹ nọ flin azọ́n tintan he yé wà to Wehọmẹ Lizọnyizọn Yẹwhehọluduta tọn mẹ. a Kavi yé sọgan flin ojlẹ tintan he yé penugo nado hia wefọ Biblu tọn de to whenuena yé to kunnude hẹ dopo to mẹjitọ yetọn lẹ mẹ sọn whédegbè-jẹ-whédegbè. Nawẹ yé na wọn otàn he mẹjitọ yetọn lẹ nọ hia na yé sọn Owe Ṣie heyin Otan Biblu Tọn kavi sọn Didotóayi Hlan Mẹplọntọ Daho Lọ b mẹ gbọn? Gabriel flin nuhe e yiwanna taun de. E dọmọ: “To whenuena yẹn tindo owhe ẹnẹ poun, onọ̀ ṣie nọ jihàn na mi to azán lẹpo gbè dile e to núdà. Yẹn gbẹ́ flin ohàn Ahọluduta tọn de he gbọṣi ahun ṣie mẹ. To nukọn mẹ, ohàn enẹ gọalọna mi nado mọ lehe sinsẹ̀nzọn Jehovah tọn yin nujọnu do sọ.” Vlavo hiẹ lọsu flin ohàn vivi he Gabriel to alọdlẹndo. Ohàn sọha 68 wẹ to ohanwe Jihàn Pipà Tọn Hlan Jehovah mẹ, bọ hosọ etọn yin “Sẹ̀n Jehovah to Ovú Whenu.”

Ohàn lọ bẹjẹeji dọmọ: “Vivu lẹ sin nu mẹ pipà hàn sọn;/Nado pà Jesu Ahọlu yetọn.” Na nugbo tọn, ovi delẹ ko tindo lẹblanulọkẹyi lọ nado dogbẹ́ hẹ Jesu, podọ walọmimiọn po nugbodidọ yetọn po dona ko hẹn homẹ etọn  hùn. Jesu tlẹ yí ojlo tintindo ovi lẹ tọn nado kẹalọyi oplọn zan taidi apajlẹ de he hodotọ etọn lẹ dona hodo. (Matiu 18:3, 4) Enẹwutu ovi lẹ yin apadewhe sinsẹ̀n-basitọ Jehovah tọn lẹ tọn. Mọwẹ, hogbe ohàn lọ tọn lẹ zindonukọn dọ: ‘Jọja lẹ sọgan ze Jiwheyẹwhe daga.’

Gbọn walọ dagbe yetọn—to whégbè, to wehọmẹ, podọ to fidevo lẹ dali—ovi susu ko hẹn gbégbò wá na Jiwheyẹwhe po whẹndo yetọn po. Dona nankọtọn die nado tindo ‘mẹjitọ Klistiani he yiwanna nugbo’ lẹ. (Deutelonomi 6:7) Mẹjitọ Klistiani lẹ nọ setonuna Jiwheyẹwhe, mẹhe taidi Otọ́ owanyinọ de, nọ plọn nudida etọn lẹ nado zinzọnlin to aliho he yé dona gbọ̀n ji. Podọ dona nankọtọn die yé ko mọyi! Dile mẹjitọ lẹ to ovi yetọn lẹ plọn to whẹndo mẹ, lehe yé nọ hùnhomẹ nado tindo ovi he ‘setonu bo hẹn yé hùnhomẹ’ do sọ! (Isaia 48:17, 18) Angélica, he to sinsẹ̀nzọnwa todin to alahọ Kunnudetọ Jehovah tọn lẹ tọn mẹ to Mexique, dọmọ: “Mẹjitọ ṣie lẹ nọ dovivẹnu to whepoponu nado setonuna nunọwhinnusẹ́n Biblu tọn lẹ. Enẹ zọ́n bọ ovu-whenu ṣie yin awuvivinu taun. Yẹn yin ayajẹnọ.”

Klistiani mọnkọtọn lẹ yigbe dọ nuhọakuẹ wẹ e yin nado penukundo ogú gbigbọmẹ tọn towe go ganji. Vlavo hiẹ yin jọja de he to whinwhẹ́n to whẹndo he yọ́n pinpẹn nujinọtedo Klistiani nugbo tọn lẹ tọn de mẹ. Eyin mọwẹ, ohàn dopolọ dotuhomẹna we dọmọ: ‘Jọja Klistiani lẹ dona dovivẹnu nado hẹn ali yetọn wé.’ Ai de na họ́n bọ hiẹ dona basi nudide towe titi lẹ, enẹwutu ‘plọn nado zinyọ́n Jiwheyẹwhe to ovu-whenu./Ma dín gigovọ́ aihọn tọn blo.’

Eyin hiẹ gbọn nuṣiwa dali dó magbọjẹ na dewe to gigovọ́ aihọn tọn dindin mẹ, oplọn he a mọyi lẹpo sọgan lẹzun sin-bado-pápá-nẹgbé podọ hiẹ sọgan ze todido sọgodo tọn towe do owù mẹ. Ojlo lọ nado dín gigovọ́ kavi diyin sọgan zọ́n bọ hiẹ na hẹn aṣejininọ towe bu. Taidi kọdetọn de, mẹdelẹ ko dogbẹ́ hẹ mẹhe ma tindo ojlo depope to nujinọtedo Klistiani tọn lẹ mẹ dile etlẹ yindọ yé sọgan taidi mẹhe tindo walọ dagbe bo tlẹ sọ jọmẹ. Mí mọ enẹ to whẹho Tara tọn mẹ, mẹhe ji video lọ Les jeunes s’interrogent. . . Comment se faire de vrais amis ? sinai do. Taidi Tara, Klistiani jọja depope he nọ dogbẹ́ hẹ mẹhe ma yọ́n pinpẹn sinsẹ̀n-bibasi nugbo tọn lẹ na wá mọ to godo mẹ dọ ‘ogbẹ́ ylankan dido nọ hẹn walọ dagbe gble,’ dile ohàn lọ dọ do. Awuwiwlena walọ dagbe lẹ nọ biọ vivẹnudido owhe susu tọn, ṣigba yé sọgan yin hinhẹngble po awuyiya po.

Na nugbo tọn, gbẹzan jijọ-di-Jiwheyẹwhe tọn zinzan ma bọawu. Ṣogan, dile ohàn lọ dọ do, ‘eyin mì flin Jiwheyẹwhe to ovu-whenu mìtọn,/Bo sẹ̀n Jiwheyẹwhe to gbigbọ po nugbo po  mẹ,’ mì na wleawuna dodonu dagbe de na sọgodo. Podọ dile ‘mì to whinwhẹ́n ayajẹ susu mì na tindo.’ Mì na wá mọnukunnujẹemẹ dogọ dọ to nukunpedomẹgo owanyinọ Jehovah tọn glọ, nudepope ma sọgan glọnalina mì nado wà nuhe sọgbe to nukun etọn lẹ mẹ. Aṣli lọ niyẹn nado lẹzun mẹhomẹ he whèwhín bosọ dibusi Jiwheyẹwhe. Humọ, tintẹnpọn nado mọaleyi sọn oplọn Klistiani tọn he mì to mimọyi mẹ na hùn dotẹnmẹ lọ dote na mì nado ‘hẹn ayiha Jiwheyẹwhe tọn hùnhomẹ.’ Gbégbò he yiaga humọ tẹwẹ gbẹtọ sọgan sọ tindo?—Howhinwhẹn lẹ 27:11.

Enẹwutu, jọja lẹ emi, mì nọ flin lehe nuplọnmẹ Jehovah po mẹjitọ Klistiani mìtọn lẹ po tọn họakuẹ sọ. Mì dike owanyi sisosiso he yé tindo na mì ni whàn mì nado wà nuhe sọgbe to nukun Jehovah tọn mẹ. Taidi Jesu Klisti po jọja nugbonọ Timoti po, mì na hẹn homẹ Otọ́ olọn mẹ tọn mìtọn po mẹjitọ mìtọn lẹ po tọn hùn. Podọ eyin e wá jọ bọ mìlọsu lẹzun mẹjitọ to gbèdopo, vlavo mì na kọngbedopọ hẹ Angélica, heyin nùdego to bẹjẹeji, mẹhe dọmọ: “Eyin yẹn wá jivi gbede, yẹn na wà nuhe go yẹn pé lẹpo nado dó owanyi na Jehovah do ahun etọn mẹ sọn ovu-whenu, bo dike enẹ ni yin hinhọ́n he na deanana ẹn to gbẹ̀mẹ.” Na jide tọn, aliho jijlọ he nọ planmẹ yì ogbẹ̀ mavọmavọ mẹ wẹ ogú he họakuẹ hugan lọ!

[Nudọnamẹ Odò Tọn]