Jiwheyẹwhe Nọ Hò Towe Pọ́n Nugbo

JỌWAMỌNU de wẹ e yin nado dawhá ylọ Jiwheyẹwhe na alọgọ to whenuena adán de gbò mí. Na “kiklo wẹ [ewọ], dahonọ to huhlọn mẹ: madosọha wẹ nuyọnẹn etọn.” (Psalm 147:5) Ewọ wẹ tin to otẹn dagbe hugan mẹ nado gọalọna mí nado duto nuhahun mítọn lẹ ji. Humọ, Biblu basi oylọna mí nado ‘kọ̀n ayiha mítọn jẹgbonu’ to ewọ nukọn. (Psalm 62:8) To whelọnu lo, naegbọn mẹsusu nọ tindo numọtolanmẹ dọ Jiwheyẹwhe ma nọ na gblọndo odẹ̀ yetọn lẹ? Be enẹ dohia dọ e ma nọ homẹtọnpọn wẹ ya?

Kakati nado nọ yawu gblewhẹdo Jiwheyẹwhe dọ e ma yí nude wà, flin whenue a gbẹ́ pò to pẹvi. Eyin mẹjitọ towe lẹ ma na we nuhe a biọ lẹpo, be a nọ gblewhẹdo yé dọ yé ma yiwanna we wẹ ya? Ovi susu wẹ nọ wàmọ. Ṣigba, to whenuena hiẹ wá whẹ́n mẹho hiẹ yọnẹn dọ owanyi nọ yin didohia to aliho susu mẹ podọ nuhe ovi de biọ lẹpo nina ẹn ma yin dohia owanyi tọn na nugbo tọn gba.

Mọdopolọ, eyin Jehovah ma nọ na gblọndo odẹ̀ mítọn lẹ to whepoponu dile mí jlo do, enẹ ma dohia dọ e gbẹ́ mí dai gba. Na nugbo tọn, Jiwheyẹwhe nọ hò mímẹpo tọn pọ́n to aliho susu mẹ.

“Ewọ mẹ Wẹ Míwlẹ Togbẹ̀ Te”

Tintan whẹ́, Jiwheyẹwhe wẹ zọ́n bọ ‘mí togbẹ̀ bo to whinwhàn, bosọ tin.’ (Owalọ lẹ 17:28) Ogbẹ̀ he e na mí dohia dọ e yiwanna mí bo nọ hò mítọn pọ́n!

Humọ, Jehovah nọ na mí nuhe mí tindo nuhudo etọn nado nọgbẹ̀ lẹ. Mí hia dọmọ: “Ewọ hẹn ogbé wú na kanlin lẹ, omá na sinsẹ̀n gbẹtọ tọn; na e nido hẹn núdùdù jẹgbonu sọn aigba mẹ.” (Psalm 104:14) Na nugbo tọn, e mayin dandannu gbẹ̀mẹ tọn lẹ kẹdẹ wẹ Mẹdatọ mítọn nọ wleawuna na mí gba. E nọ gbọn alọtútlú dali “na mí [jikun] sọn olọn mẹ, po whenu sinsẹ́n susugege tọn po, e sọ to núdùdù po ayajẹ po yí do to hògọ́ na mí.”—Owalọ lẹ 14:17.

Ṣogan, e sọgan paṣa mẹdelẹ dọ, ‘Eyin Jiwheyẹwhe yiwanna mí sọmọ, naegbọn e do jotẹnna yajiji?’ Be hiẹ yọ́n gblọndo kanbiọ enẹ tọn ya?

Be Jiwheyẹwhe Wẹ Dona Yin Whẹgbledo Ya?

Suhugan yajiji gbẹtọvi lẹ tọn wẹ nọ yin hinhẹnwa gbọn nuyiwa yetọn titi dali. Di apajlẹ, nuwiwa he bẹ owù hẹn delẹ yin yinyọnẹn ganji. Etomọṣo, gbẹtọ lẹ nọ zan walọ fẹnnuwiwa tọn, ṣì ahàn sinsinyẹn po amasin adínọ lẹ po zan, nù taba, tindo mahẹ to aihundida owùnọ lẹ mẹ, kùnhún po wezun he zẹjlẹgo po, po mọmọ po sọyi. Eyin walọ owùnọ enẹlẹ hẹn yajiji wá, mẹnu wẹ dona yin whẹgbledo? Jiwheyẹwhe kavi mẹhe to nuyiwa po nululu po lọ? Ohó gbọdo Jiwheyẹwhe tọn dọmọ: “Yè klọ mì blo; Jiwheyẹwhe ma yin mẹvivlẹ gba; na nudepope gbẹtọ dó, enẹ wẹ e na gbẹ̀n ga.”—Galatianu lẹ 6:7.

Humọ, gbẹtọ lẹ nọ saba gbleawuna ode awetọ yetọn. Eyin akọta de funawhàn, e họnwun dọ e mayin Jiwheyẹwhe wẹ na yin whẹgbledo na yajiji he dekọtọn lẹ. Eyin sẹ́nhẹngbatọ de gbleawuna tòvi hatọ etọn kavi hù i, be Jiwheyẹwhe wẹ na yin whẹgbledo ya? Paali! Eyin aṣẹglanglan-panamẹtọ de gbidikọna, sayana, kavi hù mẹhe ji e to gandu do lẹ, be Jiwheyẹwhe wẹ mí dona gblewhẹdo ya? E ma sọgbe hẹ lẹnpọn dagbe nado wàmọ.—Yẹwhehodọtọ 8:9.

Ṣigba, etẹwẹ dogbọn gbẹtọ livi susu he jẹhẹ́n klókló kavi bọ huvẹ to hùhù lẹ dali? Be Jiwheyẹwhe wẹ dona yin whẹgbledo ya? Lala. Aigba mítọn nọ de núdùdù susu tọ́n hú dehe na pé mẹlẹpo. (Psalm 10:2, 3; 145:16) Na nunina susugege he Jiwheyẹwhe namẹ lẹ ma nọ  yin mimá do zẹnzẹn wẹ zọ́n bọ huvẹ po ohẹ́n po gbayipe. Podọ ṣejannabi gbẹtọvi tọn wẹ zọ́n bọ pọngbọ ma nọ yin mimọ na nuhahun enẹ.

Asisa Nuhahun lẹ Tọn

Nalete, mẹnu wẹ dona yin whẹgbledo to whenuena mẹde jẹazọ̀n kavi poyọnho bo kú? Be e na paṣa we nado yọnẹn dọ Jiwheyẹwhe ma tlẹ dona yin whẹgbledo na enẹ lọsu wẹ ya? Jiwheyẹwhe ma dá gbẹtọ nado poyọnho bo kú gba.

To whenuena gbẹtọvi tintan lẹ, Adam po Evi po yin zizedo jipa Edẹni tọn mẹ, Jehovah ze nukundido ogbẹ̀ madopodo to paladisi aigba ji tọn de mẹ donukọnna yé. Etomọṣo, e jlo dọ gbẹtọvi he na yọ́n pinpẹn ogú yetọn tọn lẹ wẹ ni nọ̀ aigba lọ ji. Enẹwutu, e ze todido ogbẹ̀ sọgodo yetọn tọn sinai do nubiọtomẹsi de ji. Adam po Evi po na nọgbẹ̀ to Paladisi mẹ kiki eyin yé zindonukọn to tonusise na Mẹdatọ owanyinọ yetọn mẹ.—Gẹnẹsisi 2:17; 3:2, 3, 17-23.

E blawu dọ Adam po Evi po ṣiatẹ. Evi basi dide nado setonuna Satani Lẹgba, na e dolalo na ẹn dọ Jiwheyẹwhe to onú dagbe de ze whlá do e wutu. Enẹwutu Evi basi dide nado jẹ mẹdekannu bo tẹnpọn nado “tin di Jiwheyẹwhe, bo nọ yọ́n onú dagbe po oylan po.” Adam kọnawudopọ hẹ ẹ to atẹṣiṣi etọn mẹ.—Gẹnẹsisi 3:5, 6.

To whenuena Adam po Evi po waylando, yé do yedelẹ hia taidi mẹhe ma jẹ nado nọgbẹ̀ kakadoi. Yé jiya kọdetọn ylankan ylando yetọn tọn. Hlọnhlọn po nugopipe yetọn po depò bọ yé kú to godo mẹ. (Gẹnẹsisi 5:5) Ṣigba, atẹṣiṣi yetọn hẹn kọdetọn ylankan devo lẹ wá ga. Mí gbẹ́ pò to oyà kọdetọn ylando Adam po Evi po tọn ji kakajẹ egbé. Apọsteli Paulu wlan dọmọ: “Le ylando gbọn omẹ dopo dè biọ aihọn mẹ, podọ okú gbọn ylando dali; mọwẹ gbẹtọ lẹpo kú do, na omẹ popo wẹ waylan wutu.” (Lomunu lẹ 5:12) Mọwẹ, na atẹṣiṣi Adam po Evi po tọn wutu, ylando po okú po gbajẹgbonu do gbẹtọvi lẹpo ji taidi azọ̀nylankan bẹplamẹ de.

Kunnudenu Daho Hugan lọ Dọ Jiwheyẹwhe Nọ Homẹtọnpọn

Be enẹ zẹẹmẹdo dọ gbẹtọvi lẹ heyin nudida Jiwheyẹwhe tọn ma tindo todido depope ba wẹ ya? Lala. Todin mí na  dọhodo kunnudenu daho hugan lọ ji he dohia dọ Jiwheyẹwhe nọ hò mítọn pọ́n. Avọ́sinsan daho de wẹ e biọ to Jiwheyẹwhe lọsu si nado fli gbẹtọvi sọn ylando po okú po si. Ahọ́ ofligọ tọn heyin súsú lọ wẹ ogbẹ̀ pipé Jesu tọn, heyin yíyí do sanvọ́ sọn ojlo mẹ do ota mítọn mẹ. (Lomunu lẹ 3:24) Enẹwutu, apọsteli Johanu wlan dọmọ: “Jiwheyẹwhe yiwanna aihọn sọmọ bọ e yí Ovi detọ́n etọn dopo akàn namẹ, na mẹdepope he yí ì sè ma nado dọ̀n, ṣigba e nido tindo ogbẹ̀ madopodo.” (Johanu 3:16) Dohia owanyi tọn vonọtaun ehe hẹn ẹn yọnbasi na mí whladopo dogọ nado tindo todido gbẹninọ kakadoi tọn. Paulu wlanwe hlan Lomunu lẹ dọmọ: “Gbọn walọ dodo dopo mẹ nunina vọ́nu wá omẹ popo dè hlan owhẹwhẹ́n ogbẹ̀ tọn.”—Lomunu lẹ 5:18.

Mí sọgan deji dọ to ojlẹ sisọ Jiwheyẹwhe tọn mẹ, yajiji po okú po na doalọte to aigba ji. To alọ devo mẹ, ninọmẹ he yin mimọ to owe Osọhia tọn mẹ wẹ na wá aimẹ, ehe dọmọ: “Doayi e go, gohọ̀ Jiwheyẹwhe tọn tin to gbẹtọ lẹ dè, ewọ nasọ nọhẹ yé, yé na yin omẹ etọn, Jiwheyẹwhe lọsu nasọ nọhẹ yé, bo nasọ yin Jiwheyẹwhe yetọn. Jiwheyẹwhe nasọ súnsún dasin lẹpo sẹ̀ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba: na onú tintan lẹ ko juwayi.” (Osọhia 21:3, 4) Hiẹ sọgan dọ, ‘Ehe ma na jọ to gbẹwhenu ṣie.’ Nalete, nugbo wẹ dọ hiẹ sọgan kú. Ṣigba eyin hiẹ tlẹ kú, Jiwheyẹwhe sọgan fọ́n we sọnku. (Johanu 5:28, 29) Lẹndai he Jiwheyẹwhe tindo na mí niyẹn, podọ e nasọ jọ domọ. Lehe e na yin lalo do sọ nado dọ dọ Jiwheyẹwhe ma nọ hò gbẹtọvi lẹ tọn pọ́n!

“Mì Sẹpọ Jiwheyẹwhe”

Homẹmiọnnamẹnu de wẹ e yin nado yọnẹn dọ Jiwheyẹwhe ko wleawuna pọngbọ tẹgbẹ tọn de na yajiji gbẹtọvi tọn. Ṣigba to alọnu din lo? Etẹwẹ mí sọgan wà eyin mẹyiwanna mítọn de kú kavi eyin ovi mítọn jẹazọ̀n? Nugbo lọ wẹ yindọ ojlẹ Jiwheyẹwhe tọn ma ko sọ nado de azọ̀n po okú po sẹ̀ gba. Biblu dohia dọ mí na gbẹsọ nọte vude whẹpo do mọ hẹndi enẹ tọn. Ṣigba Jiwheyẹwhe ko wleawu alọgọ tọn na mí. Devi Jakobu dọmọ: “Mì sẹpọ Jiwheyẹwhe, ewọ nasọ sẹpọ mì.” (Jakobu 4:8) Mọwẹ, Mẹdatọ mítọn basi oylọna mí nado tindo haṣinṣan pẹkipẹki hẹ ẹ, podọ mẹhe wàmọ lẹ na nọ mọ alọgọ etọn to whepoponu etlẹ yin to nuhahun sinsinyẹn lẹ whenu.

Nawẹ mí sọgan dọnsẹpọ Jiwheyẹwhe gbọn? Ahọlu Davidi kàn kanbiọ mọnkọtọn sè to nudi owhe foo-fọtọ́n die dọmọ: “[Jehovah], . . . mẹnu wẹ na sinai to osó wiwe towe ji?” (Psalm 15:1) Davidi na gblọndo kanbiọ edetiti tọn dọmọ: “Ewọ he zinzọnlin jlọjlọ, bo to azọ́n dodo tọn wà, bosọ to ohó nugbo dọ to ayiha etọn mẹ. Mẹhe ma yí odẹ́ etọn do dọmẹnu, bo masọ waylan do họntọn etọn.” (Psalm 15:2, 3) To alọ devo mẹ, Jehovah nọ kẹalọyi mẹhe hodo aliho he Adam po Evi po gbẹdai lẹ. E nọ dọnsẹpọ mẹhe to ojlo etọn wà lẹ.—Deutelonomi 6:24, 25; 1 Johanu 5:3.

Nawẹ mí sọgan wà ojlo Jiwheyẹwhe tọn gbọn? Mí dona plọn nuhe “yọ́n bosọ yin alọkẹyi to Jiwheyẹwhe Whlẹngantọ mítọn nukunmẹ,” bo nasọ nọ wà ẹ. (1 Timoti 2:3) Enẹ bẹ oyọnẹn he pegan Ohó Jiwheyẹwhe tọn, yèdọ Biblu tọn tintindo hẹn. (Johanu 17:3; 2 Timoti 3:16, 17) Ehe bẹ nususu hẹn hú Biblu hihia to whenue jlomẹ poun. Mí dona hodo apajlẹ Ju Beleanu owhe kanweko tintan whenu tọn lẹ tọn he sè yẹwhehodidọ Paulu tọn. Mí hia gando yé go dọmọ: “Yé kọ̀n ayiha dai do yí ohó lọ, bo nọ to Owe-wiwe lẹ dín egbesọegbesọ, eyin mọwẹ onú nẹlẹ yin.”—Owalọ lẹ 17:11.

Mọdopolọ to egbehe, Biblu pinplọn po sọwhiwhe po nọ hẹn yise mítọn to Jiwheyẹwhe mẹ lodo bo nọ gọalọna mí nado wleawuna haṣinṣan pẹkipẹki de hẹ ẹ. (Heblu lẹ 11:6) E sọ nọ gọalọna mí nado mọnukunnujẹ lehe Jehovah nọ yinuwahẹ gbẹtọvi lẹ do mẹ hezeheze—e mayin na dona whenu gli tọn lẹ poun wutu gba ṣigba titengbe na dona mavọmavọ tọn lẹ na mẹhe jẹ lẹpo.

Gbadopọnna vude to nuhe Klistiani he tindo haṣinṣan pẹkipẹki hẹ Jiwheyẹwhe lẹ dọ mẹ. “Yẹn yiwanna Jehovah taun, podọ yẹn duahọ pẹdido tọn do e to nususu mẹ,” wẹ Danielle owhe-16-mẹvi dọ. “E na mi mẹjitọ  owanyinọ lẹ he tindo owanyi nujọnu tọn na ẹn bosọ yí Ohó etọn do plọn mi.” Klistiani de to Uruguay wlan dọmọ: “Ahun ṣie gọ́ na pẹdido, podọ yẹn yin whinwhàn nado dopẹna Jehovah na nukundagbe majẹhẹ po họntọnjihẹmẹ etọn po.” Jiwheyẹwhe tlẹ nọ kẹalọyi ovi pẹvi lẹ. Gabriela owhe-ṣinawe-mẹvi dọmọ: “Yẹn yiwanna Jiwheyẹwhe hú onú devo depope lẹdo agosú ẹnẹ aihọn tọn lẹ! Yẹn tindo Biblu ṣie titi. Homẹ ṣie nọ hùn nado plọnnu dogbọn Jiwheyẹwhe po Visunnu etọn po dali.”

Mẹsusu lẹdo aihọn pé wẹ kọngbedopọ mlẹnmlẹn hẹ psalm-kantọ lọ to egbehe dọmọ: “E yọ́n na mi nado sẹpọ Jiwheyẹwhe.” (Psalm 73:28) Yé ko yin alọgọna nado doakọnna nuhahun he yé nọ pehẹ todin lẹ, podọ yé sọ tindo todido he lodo lọ nado nọgbẹ̀ kakadoi to Paladisi aigba ji tọn mẹ. (1 Timoti 4:8) Naegbọn hiẹ ma na yí ì do basi yanwle towe nado “sẹpọ Jiwheyẹwhe”? Na nugbo tọn, jide yin nina mí dọ: “E ma tlẹ dẹn sọn dopodopo mítọn dè gba.” (Owalọ lẹ 17:27) Mọwẹ, Jiwheyẹwhe nọ hò towe pọ́n nugbo!

[Yẹdide to weda 5]

Jehovah nọ hò mítọn pọ́n to aliho susu mẹ

[Yẹdide to weda 7]

Ovi pẹvi lẹ lọsu sọgan dọnsẹpọ Jiwheyẹwhe

[Yẹdide to weda 7]

Jehovah nọ gọalọna mí nado doakọnnanu to egbehe. To madẹnmẹ, e na de azọ̀n po okú po sẹ̀