Kanbiọ lẹ sọn Wehiatọ lẹ Dè

To 2 Kọlintinu lẹ 6:14, mẹnu lẹ wẹ Paulu to alọdlẹndo to whenuena e yí hogbe lọ “mayisenọ lẹ” zan?

To 2 Kọlintinu lẹ 6:14, mí hia dọmọ: “Mì yin omẹ yè yí gbemasọ do dopokle dopọ po mayisenọ lẹ po blo.” Eyin mí pọ́n lẹdo hodidọ lọ tọn, e họnwun dọ mẹhe ma yin hagbẹ agun Klistiani tọn lẹ hodọ wẹ Paulu te. Wefọ Biblu tọn devo lẹ he basi kandai aliho he mẹ Paulu yí hogbe lọ “mayisenọ” kavi “mayisenọ lẹ” zan te nọgodona nukunnumọjẹnumẹ ehe.

Di apajlẹ, Paulu wọhẹ Klistiani lẹ na yìyì “mayisenọ lẹ nukọn” to whẹdatẹn. (1 Kọlintinu lẹ 6:6) Tofi, mayisenọ lọ lẹ wẹ whẹdatọ he nọ dawhẹ to whẹdatẹn Kọlinti tọn mẹ lẹ. To wekanhlanmẹ etọn awetọ mẹ, Paulu dọ dọ Satani ko “tọ́nnukunna nuyọnẹn omẹ he ma yise lẹ tọn.” “Nukunmẹṣinyọnnu” de ko sú nukun mayisenọ enẹlẹ tọn ma nado mọ wẹndagbe lọ. Mayisenọ ehelẹ ma ko do ojlo hia to Jehovah sinsẹ̀n mẹ, na Paulu dọ jẹnukọn dai dọ: “Whenuena e na gọ̀ do [Jehovah] dè, yè na bẹ nukunmẹṣinyọnnu lọ sẹ̀.”—2 Kọlintinu lẹ 3:16; 4:4.

Mayisenọ delẹ nọ doalọ to sẹ́nhẹngba po boṣiọ-sinsẹ̀n po mẹ. (2 Kọlintinu lẹ 6:15, 16) Ṣigba, e mayin mayisenọ lẹpo wẹ jẹagọdo devizọnwatọ Jehovah tọn lẹ gba. Delẹ nọ do ojlo hia to nugbo lọ mẹ. Susu tindo alọwlemẹ heyin Klistiani lẹ bosọ yí ayajẹ do to ninọ̀ hẹ yé. (1 Kọlintinu lẹ 7:12-14; 10:27; 14:22-25; 1 Pita 3:1, 2) Ṣigba, to owe he Paulu kàn lẹpo mẹ, e yí hogbe lọ “mayisenọ” zan na mẹhe, dile e yin nùdego to aga do, ma yin hagbẹ agun Klistiani tọn, ehe bẹ “yisenọ [to Oklunọ mẹ, NW]” lẹ kẹdẹ hẹn.—Owalọ lẹ 2:41; 5:14; 8:12, 13.

Nunọwhinnusẹ́n heyin mimọ to 2 Kọlintinu lẹ 6:14 mẹ yin anademẹ họakuẹ de na Klistiani lẹpo to adà gbẹzan tọn lẹpo mẹ bo ko sọ yin alọdlẹndo taidi ayinamẹ nuyọnẹn tọn na Klistiani he to alọwlemẹ dín lẹ. (Matiu 19:4-6) Klistiani he ko klan ede do wiwe bo ko yí baptẹm de nọ gbọn nuyọnẹn dali dapana alọwlemẹ dindin to mayisenọ lẹ ṣẹnṣẹn, to whenuena e yindọ nujinọtedo, yanwle, po nuyise mayisenọ lẹ tọn po gbọnvo tlala na Klistiani nugbo tọn lẹ.

Ṣigba, etẹwẹ dogbọn mẹhe to Biblu plọn bosọ nọ dogbẹ́ hẹ agun Klistiani tọn lẹ dali? Etẹwẹ dogbọn mẹhe yin wẹnlatọ he ma ko yí baptẹm lẹ dali? Be yelọsu lẹ yin mayisenọ wẹ ya? Lala. Mẹhe ko kẹalọyi nugbo wẹndagbe lọ tọn bosọ to nukọnyi ganji hlan baptẹm kọ̀n lẹ ma dona yin yiylọdọ mayisenọ gba. (Lomunu lẹ 10:10; 2 Kọlintinu lẹ 4:13) Jẹnukọnna baptẹm Kọneliọsi tọn, e yin yiylọdọ “gbẹtọ ayihawiwenọ, mẹhe dibusi Jiwheyẹwhe.”—Owalọ lẹ 10:2.

To whelọnu lo, be nuyọnẹnnu wẹ e na yin dọ Klistiani he ko klan ede do wiwe de ni biọ họntọnmẹ nado wlealọ hẹ mẹhe ko yin alọkẹyi taidi wẹnlatọ he ma ko yí baptẹm, to whenuena e yindọ ayinamẹ Paulu tọn he tin to 2 Kọlintinu lẹ 6:14 mẹ ma gando omẹ mọnkọtọn go tlọlọ ya? Lala, e mayin nuyọnẹnnu gba. Etẹwutu mí do dọmọ? Na ayinamẹ tlọlọ he Paulu na gando asuṣiọsi Klistiani lẹ go wutu wẹ. Paulu wlan dọmọ: ‘E vò nado yin mẹwlealọna hlan mẹhe jlo e; to Oklunọ mẹ kẹdẹ.’ (1 Kọlintinu lẹ 7:39) To kọndopọmẹ hẹ ayinamẹ enẹ, Klistiani he ko basi klandowiwe lẹ yin tudohomẹna nado dín alọwlemẹ to mẹhe tin “to Oklunọ mẹ kẹdẹ” lẹ ṣẹnṣẹn.

Etẹwẹ hodidọ lọ “to Oklunọ mẹ” podọ hodidọ he gandego lọ “to Klisti mẹ” zẹẹmẹdo? Paulu dlẹnalọdo mẹdelẹ he tin “to Klisti mẹ” kavi “to Oklunọ mẹ” to Lomunu lẹ  16:8-10 po Kọlọsinu lẹ 4:7 po mẹ. Eyin hiẹ hia wefọ enẹlẹ, a na mọ dọ omẹ mọnkọtọn lẹ yin ‘alọgọnamẹtọ lẹ,’ ‘mẹsuwhẹ̀na lẹ,’ ‘mẹmẹsunnu yiwanna lẹ,’ ‘devizọnwatọ nugbonọ lẹ,’ podọ ‘mẹdagungbẹ́ lẹ.’

Whetẹnu wẹ mẹde nọ lẹzun ‘mẹdagun to Oklunọ mẹ’? Enẹ nọ jọ to whenuena e desọn ojlo mẹ bo wà nuhe mẹdagun kavi afanumẹ dona wà bo mọ́n ede. Jesu basi zẹẹmẹ dọmọ: “Eyin mẹdepope jlo na hodo mi, gbọ e ni mọ́n ede, bosọ ze [yatin] etọn, bo hodo mi.” (Matiu 16:24) To whenuena mẹde klan ede do wiwe hlan Jiwheyẹwhe wẹ e nọ jẹ Klisti hodo ji bo nọ yinuwa mlẹnmlẹn sọgbe hẹ ojlo Jiwheyẹwhe tọn. Enẹgodo, e nọ ze ede jo nado yí baptẹm bo nọ lẹzun lizọnyizọnwatọ dide de he yin alọkẹyi to Jehovah Jiwheyẹwhe nukọn. a Enẹwutu, nado ‘wlealọ to Oklunọ mẹ’ zẹẹmẹdo nado wlealọ hẹ mẹde he ko dohia dọ ewọ yin yisenọ de nugbonugbo, yèdọ “afanumẹ Jiwheyẹwhe tọn po Jesu Klisti Oklunọ po tọn” he ko klan ede do wiwe de.—Jakobu 1:1.

Mẹhe to Biblu plọn hẹ Kunnudetọ Jehovah tọn lẹ bosọ to nukọnyi ganji to gbigbọmẹ jẹna pipà. Ṣigba, ewọ ma ko klan ede do wiwe hlan Jehovah bo ze ede jo nado yí gbẹzan etọn zan na sinsẹ̀nzọn lọ bosọ yí ede do sanvọ́ gba. Ewọ pò to diọdo he jẹ lẹ basi. E dona dotana diọdo tangan he lilẹzun Klistiani he ko basi klandowiwe bo yí baptẹm bẹhẹn lẹ whẹpo do lẹnnupọndo diọdo tangan gbẹzan tọn devo ji, taidi alọwle.

Be nuyọnẹnnu wẹ e na yin na Klistiani de nado biọ họntọnmẹ hẹ mẹhe sọgan to nukọnyi ganji to Biblu pinplọn etọn mẹ—vlavo po linlẹn lọ po nado nọte kakajẹ whenuena e yí baptẹm whẹpo do wlealọ hẹ ẹ ya? Lala. Mẹwhinwhàn Biblu plọntọ de tọn sọgan yin hinhẹn biọ bẹwlu mẹ eyin e yọnẹn dọ Klistiani he ko basi klandowiwe de jlo na wlealọ hẹ ẹ ṣigba bo to tenọpọn ẹn kakajẹ whenuena ewọ yí baptẹm godo.

To paa mẹ, ojlẹ gli de poun wẹ mẹde nọ yin wẹnlatọ he ma ko yí baptẹm na, kakajẹ whenue e yinukọn jẹ baptẹm kọ̀n. Enẹwutu ayinamẹ aga tọn lọ nado wlealọ to Oklunọ mẹ kẹdẹ mayin hẹngogo tọn gba. Ṣigba, etẹwẹ dogbọn họntọnmẹ bibiọ hẹ mẹhe ko tindo owhe alọwle tọn, he ko yin pinpọ́n e go whẹ́n to whẹndo Klistiani tọn mẹ, bo ko do zohunhun hia to agun lọ mẹ na ojlẹ delẹ, ṣigba he gbẹsọ yin wẹnlatọ he ma ko yí baptẹm de dali? Eyin ninọmẹ lọ niyẹn, etẹwẹ glọnalina ẹn ma nado klan gbẹzan etọn do wiwe hlan Jehovah? Naegbọn e whleawu nado wàmọ? Be e gbẹ́ tindo ayihaawe wẹ ya? Dile etlẹ yindọ ewọ mayin mayisenọ, mí ma sọgan dlẹnalọdo e taidi mẹhe tin “to Oklunọ mẹ” gba.

Ayinamẹ Paulu tọn do alọwle ji yin na ale mítọn. (Isaia 48:17) Eyin omẹ awe he to họntọnmẹ biọ lẹ ko klan yede do wiwe na Jehovah, gbemima yetọn nado wlealọ nọ tindo dodonu he lodo, gbigbọmẹ tọn de. Yé nọ tindo nujinọtedo po yanwle dopolọ lẹ po. Ehe nọ yidogọna alọwle ayajẹ tọn taun. Humọ, eyin mẹde ‘wlealọ to Oklunọ mẹ,’ ewọ do ede hia nado yin nugbonọ hlan Jehovah, podọ enẹ nọ planmẹ jẹ dona mavọmavọ lẹ kọ̀n, na ‘Jehovah na do ede hia di pipenọ kavi nugbonọ hẹ mẹhe yin nugbonọ.’—Psalm 18:25.

[Nudọnamẹ Odò Tọn]

[Yẹdide to weda 31]

‘Jehovah na do ede hia di nugbonọ hẹ mẹhe yin nugbonọ’