‘Mì Plọn Yé Nado Nọ Doayi Nuhe Yẹn Ko Degbena Mì Lẹpo Go’
‘Mì Plọn Yé Nado Nọ Doayi Nuhe Yẹn Ko Degbena Mì Lẹpo Go’
“Enẹwutu mì yì bo hẹn akọta lẹpo zun nuplọntọ . . . na mì nisọ nọ plọn yé nado nọ doayi onú lẹpo go, nudepope he yẹn degbena mì.”—MATIU 28:19, 20.
1. Hodọdopọ tẹwẹ wá aimẹ to devi Filipi po dawe Etiopianu lọ po ṣẹnṣẹn?
DAWE Etiopianu lọ ko zin gbejizọnlin kaka wá Jelusalẹm, fie e wá sẹ̀n Jiwheyẹwhe he e yiwanna lọ, Jehovah te. E họnwun dọ e sọ yiwanna Ohó gbọdo Jiwheyẹwhe tọn ga. To whenuena e lẹkọ jei whé to kẹkẹ etọn mẹ, vọkan owe yẹwhegán Isaia tọn de hia wẹ e te to whenuena Filipi, devi Klisti tọn de pé e. Filipi kanse Etiopianu lọ dọ: “Hiẹ tunwun nuhe hiẹ to hihia?” Dawe lọ gblọn dọmọ: “Nawẹ yẹn sọgan do, adavo mẹde deana mi?” Filipi gọalọna Biblu plọntọ ahundoponọ ehe nado lẹzun devi Klisti tọn.—Owalọ lẹ 8:26-39.
2. (a) Aliho tẹmẹ wẹ gblọndo Etiopianu lọ tọn gọ́ na zẹẹmẹ te? (b) Kanbiọ tẹlẹ wẹ mí na gbadopọnna gando azọ́ndenamẹ Klisti tọn nado hẹnmẹ zun devi go?
2 Gblọndo Etiopianu lọ tọn jẹna ayidego. E dọmọ: ‘Nawẹ yẹn sọgan do, adavo mẹde deana mi.’ Mọwẹ, e tindo nuhudo anademẹtọ de tọn, mẹde he na gọalọna ẹn nado mọnukunnujẹ nuhe hia e te mẹ. Hodidọ ehe do nujọnu-yinyin anademẹ tangan he Jesu na to azọ́n he e dena mí nado hẹnmẹ zun devi mẹ hia. Anademẹ tẹwẹ? Nado mọ gblọndo lọ, mì gbọ mí ni zindonukọn to dogbapọnna hogbe Jesu tọn lẹ heyin mimọ to Matiu weta 28 mẹ. Hosọ he jẹnukọn dọhodo kanbiọ lọ lẹ ji, etẹwutu podọ fie? Todin mí na gbadopọnna kanbiọ awe devo he gando gbedide Klisti tọn nado hẹn gbẹtọ lẹ zun devi go. Mí sọgan blá yé dopọ dọ etẹwẹ podọ whetẹnu?
“Plọn Yé Nado Nọ Doayi Onú Lẹpo Go”
3. (a) Nawẹ mẹde nọ lẹzun devi Jesu Klisti tọn gbọn? (b) Etẹ pinplọnmẹ wẹ gbẹtọ lẹ hinhẹnzun devi bẹhẹn?
3 Etẹwẹ mí dona plọn mẹdevo lẹ nado gọalọna yé nado lẹzun devi Klisti tọn? Jesu degbena hodotọ etọn lẹ dọmọ: “Enẹwutu mì yì, bo hẹn akọta lẹpo zun nuplọntọ, bosọ nọ baptizi yé do oyín Otọ́ tọn, po Ovi tọn po, po [gbigbọ wiwe] tọn po mẹ: na mì nisọ nọ plọn yé nado nọ doayi onú lẹpo go, nudepope he yẹn degbena mì.” (Matiu 28:19, 20) Enẹwutu, mí dona plọn yé nuhe Klisti degbè etọn na mí lẹ. a Ṣigba, etẹwẹ sọgan yin wiwà nado hẹn ẹn diun dọ mẹhe gbedide Jesu tọn lẹ yin pinplọn ma na lẹzun devi kẹdẹ gba ṣigba nasọ gbọṣi devi-yinyin mẹ? Onú titengbe dopo yin mimọ to hogbe he Jesu yizan lẹ mẹ. Doayi e go dọ, ewọ ma dọ poun dọ: ‘Mì plọn yé nuhe yẹn ko degbena mì lẹpo’ gba. Kakatimọ, e dọmọ: ‘Mì plọn yé nado nọ doayi nuhe yẹn ko degbena mì lẹpo go.’ (Matiu 19:17) Etẹwẹ enẹ zẹẹmẹdo?
4. (a) Etẹwẹ e zẹẹmẹdo nado doayi gbedide de go? (b) Na apajlẹ lehe mí sọgan plọn mẹde nado doayi gbedide Klisti tọn lẹ go do tọn.
4 Nado doayi kavi payi gbedide de go zẹẹmẹdo nado “yinuwa sọgbe hẹ” gbedide de—nado setonuna ẹn kavi yìn in. To whelọnu lo, nawẹ mí na plọn mẹde nado doayi, nuhe Klisti degbena mí lẹ go kavi setonuna yé gbọn? Mì gbọ mí ni lẹnnupọndo aliho he mẹ mẹhe nọ plọnmẹ mọto-kùnkùn nọ plọnmẹ nado payi osẹ́n aliho ji tọn lẹ go do ji. Nuplọnmẹtọ lọ sọgan plọn osẹ́n aliho ji tọn lẹ nuplọntọ etọn lẹ to whenue yé to klasi. Ṣigba, nado plọn nuplọntọ etọn lẹ lehe yé na setonuna osẹ́n enẹlẹ gbọn, ewọ dona deanana nuplọntọ lọ lẹ dile yé to mọto kùn to aliji bo to vivẹnudo nado yí nuhe yé ko plọn lẹ do yizan mẹ. Mọdopolọ, to whenuena mí to Biblu plọn hẹ gbẹtọ lẹ, mí nọ plọn yé gbedide Klisti tọn lẹ. Ṣigba, mí sọ dona nọ deanana nuplọntọ lọ lẹ dile yé to vivẹnudo nado yí anademẹ Klisti tọn lẹ do yizan mẹ to gbẹzan yetọn mẹ podọ to lizọnyizọn lọ mẹ. (Johanu 14:15; 1 Johanu 2:3) Enẹwutu, gbedide Klisti tọn nado hẹn gbẹtọ lẹ zun devi hinhẹndi to gigọ́mẹ nọ biọ dọ mí ni yin mẹplọntọ bosọ yin anademẹtọ lẹ. Gbọnmọ dali, mí na hodo apajlẹ he Jesu po Jehovah po zedai.—Psalm 48:14; Osọhia 7:17.
5. Naegbọn mẹhe mí to Biblu plọn hẹ de sọgan whleawu nado setonuna gbedide Klisti tọn nado hẹnmẹ zun devi?
5 Pinplọn mẹdevo lẹ nado doayi gbedide Jesu tọn lẹ go biọ dọ mí ni gọalọna yé nado setonuna gbedide lọ nado hẹn gbẹtọ lẹ zun devi. Enẹ sọgan vẹawuna mẹhe mí to Biblu plọn hẹ delẹ. Eyin yé tlẹ ko yin hagbẹ zohunhunnọ ṣọṣi Mẹylọhodotọklisti tọn lẹ tọn dai, vlavo wẹ sinsẹ̀ngán yetọn lẹ ko plọn yé pọ́n nado yì bo hẹn gbẹtọ lẹ zun devi. Sinsẹ̀ngán delẹ yigbe madoadúdẹji dọ gando pinplọn hagbẹ sinsẹ̀n tọn lẹ nado dọyẹwheho go, ṣọṣi Mẹylọhodotọklisti tọn lẹ gboawupo mlẹnmlẹn to adà enẹ mẹ. To zẹẹmẹ bibasi do gbedide Jesu tọn nado yì aihọn mẹ bo gọalọna gbẹtọ lẹpo nado lẹzun devi ji, weyọnẹntọ Biblu tọn John R. W. Stott dọmọ: “Awugbopo nado setonuna adà gbedide ehe tọn wẹ yin nuhe mẹ pipli sinsẹ̀n Klistiani tọn lẹ gboawupo te hugan to azọ́n wẹndagbe-jijlá tọn mẹ to egbehe.” E yidogọ dọmọ: “E taidi dọ aganu wẹ mí nọ lá owẹ̀n mítọn sọn. To whedelẹnu, mí nọ tin taidi mẹhe nọte do olá to tọ̀tó bo to ayinamẹ na hlan mẹhe to tọ̀kú lẹ. Mí ma nọ biọ otọ̀ mẹ nado whlẹn yé gba. Mí ma jlo dọ avọ̀ mítọn ni yọ̀n.”
6. (a) To alọgigọna Biblu plọntọ de whenu, nawẹ mí sọgan hodo apajlẹ Filipi tọn gbọn? (b) Nawẹ mí sọgan gọalọna Biblu plọntọ de to whenuena e jẹ mahẹ tindo to azọ́n yẹwhehodidọ tọn mẹ ji gbọn?
6 Eyin sinsẹ̀n he ‘ma jlo dọ avọ̀ yetọn ni yọ̀n’ de mẹ wẹ mẹhe mí to Biblu plọn hẹ de tin te dai, e sọgan vẹawuna ẹn nado duto obu etọn ji nado biọ osin lọ mẹ, bo setonuna gbedide Klisti tọn nado hẹnmẹ zun devi. Ewọ na tindo nuhudo alọgọ tọn. Enẹwutu, mí dona yí sọwhiwhe do na ẹn anademẹ he na hẹn nukunnumọjẹnumẹ etọn siso dogọ bo na whàn ẹn nado yinuwa, kẹdẹdile nuplọnmẹ Filipi tọn hẹn Etiopianu lọ tindo nukunnumọjẹnumẹ bo whàn ẹn nado yí baptẹm do. (Johanu 16:13; Owalọ lẹ 8:35-38) Humọ, ojlo mítọn nado plọn Biblu plọntọ lẹ nado nọ doayi gbedide lọ nado hẹnmẹ zun devi go nọ whàn mí nado wazọ́n hẹ yé bo deanana yé to whenuena yé ṣẹṣẹ jẹ yẹwheho Ahọluduta lọ tọn dọ ji.—Yẹwhehodọtọ 4:9, 10; Luku 6:40.
“Onú Lẹpo”
7. Pinplọn mẹdevo lẹ nado ‘nọ doayi onú lẹpo go’ bẹ gbedide tẹlẹ pinplọn yé hẹn?
7 Nuhe mí nọ plọn devi yọyọ lẹ ma yin nado hẹn mẹdevo lẹ zun devi poun gba. Jesu dọna mí nado plọn mẹdevo lẹ nado ‘nọ doayi onú lẹpo’ he e ko degbè etọn go. Na jide tọn, enẹ bẹ gbedide awe he klo hugan lẹ hẹn—nado yiwanna Jiwheyẹwhe podọ nado yiwanna kọmẹnu lẹ. (Matiu 22:37-39) Nawẹ devi yọyọ de sọgan yin pinplọn nado nọ doayi gbedide enẹlẹ go gbọn?
8. Na apajlẹ lehe gbedide lọ nado do owanyi hia sọgan yin pinplọn devi yọyọ de do tọn.
8 Sọ lẹnnupọndo apajlẹ mẹhe to mọto kùnkùn plọn lọ tọn ji. Dile nuplọntọ lọ to mọto kùn to aliji bọ nuplọnmẹtọ lọ tin to apá etọn, nuplọntọ lọ to nuplọn e mayin gbọn todidoai na nuplọnmẹtọ etọn kẹdẹ dali wẹ gba ṣigba gbọn ayidido mọto-kùntọ devo lẹ go dali ga. Di dohia, nuplọnmẹtọ lọ sọgan dọ̀n ayidonugo etọn wá mọto-kùntọ devo ji he jọmẹ bo na tẹnmẹ mẹdevo nado biọ nukọn etọn to aliji; kavi mọto-kùntọ de he yí walọdagbe zan bo ze miyọ́n mọto etọn tọn do odò ma nado yí miyọ́n etọn do dotukla mọto-kùntọ he e to pipé lẹ; kavi mọto-kùntọ de he to alọgọna mẹhe mọto etọn gble de. Apajlẹ ehelẹ yin nuplọnmẹ họakuẹ lẹ bosọ yin apajlẹ dagbe he nuplọntọ lọ sọgan hodo to whenuena ewọ lọsu to mọto kùn. Mọdopolọ, devi yọyọ he to gbejizọnlin zin to aliho ogbẹ̀ tọn ji ma nọ plọnnu sọn mẹplọntọ etọn kẹdẹ dè gba ṣigba e sọ nọ plọnnu sọn apajlẹ dagbe he e to mimọ to agun lọ mẹ lẹ mẹ ga.—Matiu 7:13, 14.
9. Nawẹ devi yọyọ de nọ plọn nuhe e zẹẹmẹdo nado setonuna gbedide lọ nado do owanyi hia gbọn?
9 Di dohia, Biblu plọntọ de sọgan doayi mẹjitọ godoponọ de go he nọ dovivẹnu susu nado wá Plitẹnhọ Ahọluduta tọn mẹ po ovi flinflin etọn lẹ po. E sọgan mọ mẹhe to oyà apọṣimẹ sinsinyẹn tọn ji ṣogan bo nọ wá opli lẹ masúnadú, asuṣiọsi yọnhonọ de he nọ gọalọna mẹhomẹ devo lẹ nado wá opli agun tọn lẹpo, kavi jọja aflanmẹ he nọ doalọ to Plitẹnhọ Ahọluduta tọn hinhẹn do wiwe ji mẹ. Biblu plọntọ lọ sọgan doayi mẹho agun tọn de go he nọ yí nugbonọ-yinyin do yin nukọntọ to sinsẹ̀nzọn kunnudegbe tọn mẹ mahopọnna azọngban susu he e tindo to agun mẹ. E sọgan mọ Kunnudetọ madogánnọ de he azọ̀n glọn do whégbè ṣigba he yin asisa tulinamẹ gbigbọmẹ tọn na mẹhe dla ẹ pọ́n lẹpo. Nuplọntọ lọ sọgan mọ asu po asi po de he to diọdo sinsinyẹn lẹ basi to gbẹzan yetọn mẹ nado sọgan penukundo mẹjitọ yọnhonọ yetọn lẹ go. Gbọn apajlẹ Klistiani homẹdagbenọ, alọgọnamẹtọ, he go yè sọgan ganjẹ enẹlẹ tọn mimọ dali, devi yọyọ lẹ nọ plọn nuhe e zẹẹmẹdo nado setonuna gbedide Klisti tọn nado yiwanna Jiwheyẹwhe po kọmẹnu lẹ po, titengbe yisenọ hatọ lẹ. (Howhinwhẹn lẹ 24:32; Johanu 13:35; Galatianu lẹ 6:10; 1 Timoti 5:4, 8; 1 Pita 5:2, 3) To aliho ehe mẹ, hagbẹ agun Klistiani tọn dopodopo sọgan—podọ dona—yin mẹplọntọ po anademẹtọ po.—Matiu 5:16.
“Kakajẹ Opodo Aihọn Tọn”
10. (a) Nawẹ mí na zindonukọn to gbẹtọ lẹ hinhẹnzun devi mẹ dẹnsọ? (b) Apajlẹ tẹwẹ Jesu zedai gando azọ́ndenamẹ lẹ hinhẹndi go?
10 Kakajẹ whetẹnu wẹ mí na zindonukọn nado to gbẹtọ lẹ hẹnzun devi? Kakajẹ opodo aihọn tọn. (Matiu 28:20) Be mí na penugo nado hẹn adà azọ́ndenamẹ Jesu tọn ehe di ya? Taidi agun lẹdo aihọn pé de, mí magbe nado wàmọ. To owhe he wayi lẹ mẹ, mí ko yí homẹhun do yí whenu, huhlọn, po nutindo mítọn lẹ po zan nado dín mẹhe “yè dè do ogbẹ̀ madopodo mẹ lẹ.” (Owalọ lẹ 13:48) Todin, Kunnudetọ Jehovah tọn lẹ nọ yí madozẹnzẹn ganmẹ hugan livi atọ̀n zan egbesọegbesọ to owhe lọ gblamẹ nado dọyẹwheho Ahọluduta tọn bo hẹn gbẹtọ lẹ zun devi lẹdo aihọn pé. Mí nọ wà ehe na mí to apajlẹ Jesu tọn hodo wutu. E dọmọ: ‘Núdùdù ṣie wẹ nado wà ojlo mẹhe do mi hlan tọn podọ nado dotana azọ́n etọn.’ (Johanu 4:34) Ojlo ahundopo tọn mítọn niyẹn ga. (Johanu 20:21) Mí jlo na wà nususu hugan azọ́n he ko yin zizedo alọ mítọn mẹ bibẹ poun; mí jlo na dotana ẹn.—Matiu 24:13; Johanu 17:4.
11. Etẹwẹ ko jọ do mẹmẹsunnu po mẹmẹyọnnu Klistiani mítọn delẹ po go, podọ etẹwẹ mí dona kanse mídelẹ?
11 Ṣigba, e blawu nado mọdọ delẹ to yisenọ hatọ mítọn lẹ mẹ ko gbọjọ to gbigbọ-liho podọ, taidi kọdetọn de, yé ko dekànpona kavi tlẹ ko doalọtena tonusisena gbedide Klisti tọn nado hẹnmẹ zun devi. Be aliho de tin he mẹ mí sọgan gọalọna yé te nado gọ̀ gbẹdido yetọn bẹ po agun lọ po bo jẹ mahẹ tindo ji to gbẹtọ lẹ hinhẹnzun devi mẹ ya? (Lomunu lẹ 15:1; Heblu lẹ 12:12) Aliho he mẹ Jesu gọalọna apọsteli etọn lẹ te to whenuena yé gbọjọ na ojlẹ gli de do nuhe mí sọgan wà to egbehe hia.
Do Awuvẹmẹ Hia
12. (a) Ojlẹ vude jẹnukọnna okú Jesu tọn, etẹwẹ apọsteli etọn lẹ wà? (b) Nawẹ Jesu yinuwa hẹ apọsteli etọn lẹ gbọn mahopọnna awugbopo sinsinyẹn he yé dohia?
12 To vivọnu lizọnyizọn Jesu tọn to aigba ji, whenuena okú etọn ko tin to bẹbẹnu, apọsteli lẹ “jo e dai, bo họnyi.” Dile Jesu ko dọ dai do, yé ‘vúnvún pé, dopodopo do onú ede tọn kọ̀n.’ (Malku 14:50; Johanu 16:32) Nawẹ Jesu yinuwa hẹ devi etọn he ko gbọjọ to gbigbọ-liho lẹ gbọn? Ojlẹ vude to fọnsọnku Jesu tọn godo, e dọna delẹ to hodotọ etọn lẹ mẹ dọmọ: “Mì dibu blo: mì yì dọ na mẹmẹsunnu ṣie lẹ, na yé ni fọ́n yì biọ Galili, podọ finẹ wẹ yé na mọ mi te.” (Matiu 28:10) Mahopọnna dọ apọsteli lẹ ko do awugbopo sinsinyẹn hia, Jesu gbẹ́ ylọ yé dọ “mẹmẹsunnu ṣie lẹ.” (Matiu 12:49) Ewọ gbẹsọ dejido yé go. To aliho ehe mẹ, Jesu yin lẹblanunọ po jonamẹtọ po, kẹdẹdile Jehovah yin do. (2 Ahọlu lẹ 13:23) Nawẹ mí sọgan hodo apajlẹ Jesu tọn gbọn?
13. Nukun tẹwẹ mí dona nọ yí do pọ́n mẹhe ko gbọjọ to gbigbọ-liho lẹ?
13 Mí dona nọ vẹawu mẹhe ko gbọjọ kavi he ma to mahẹ tindo to lizọnyizọn lọ mẹ ba lẹ. Mí gbẹ́ flin azọ́n owanyi tọn he yisenọ hatọ enẹlẹ ko wà wayi lẹ—ehe delẹ to yé mẹ sọgan ko wà na owhe susu lẹ. (Heblu lẹ 6:10) Na nugbo tọn, mí jẹdò yetọn tlala. (Luku 15:4-7; 1 Tẹsalonikanu lẹ 2:17) Enẹwutu, nawẹ mí sọgan vẹawu yé gbọn?
14. To apajlẹ Jesu tọn hihodo mẹ, nawẹ mí sọgan gọalọna mẹhe gbọjọ de gbọn?
14 Jesu dọna apọsteli etọn he gbọjọ lẹ dọ yé ni yì Galili nado yì pé e to finẹ. Na taun tọn, oylọ basina yé wẹ Jesu te na opli vonọtaun de. (Matiu 28:10) Mọdopolọ to egbehe, mí dona nọ na tuli mẹhe gbọjọ to gbigbọ-liho lẹ nado wá opli agun tọn lẹ, podọ e sọgan biọ dọ mí ni basi oylọna yé hugan whladopo nado wàmọ. To whẹho apọsteli lẹ tọn mẹ, oylọ lọ tindo kọdetọn dagbe, na “nuplọntọ widopo lẹ tọ́n yì biọ Galili, jẹ osó he Jesu dọna yé kọ̀n.” (Matiu 28:16) Ayajẹ nankọtọn die mí nọ mọ to whenuena mẹhe gbọjọ lẹ yigbena oylọ zohunhunnọ mítọn bo gọ̀ opli Klistiani tọn lẹ bẹ!—Luku 15:6.
15. Nawẹ mí sọgan hodo apajlẹ Jesu tọn to kuavọdidona mẹhe gbọjọ he wá nọtẹn opli tọn mítọn lẹ gbọn?
15 Nawẹ mí na yinuwa gbọn to whenuena Klistiani he gbọjọ de wá Plitẹnhọ Ahọluduta tọn mẹ? Eyọn, etẹwẹ Jesu wà to whenuena e mọ apọsteli etọn lẹ, he yise yetọn ko gbọjọ na ojlẹ gli de, to fie yé dó dope do lọ? ‘Jesu wá yé dè bo dọho hlan yé.’ (Matiu 28:18) E ma pọ́n yé hlan sọn aganu gba ṣigba e dọnsẹpọ yé. Yí nukun homẹ tọn do pọ́n kọgbọ he enẹ na ko na apọsteli lẹ to whenuena Jesu yinuwa to aliho enẹ mẹ! Mì gbọ̀ mílọsu lẹ ni yinuwa po zohunhun po bo dokuavọna mẹhe gbọjọ to gbigbọ-liho ṣigba he dovivẹnu nado lẹkọwa agun Klistiani tọn mẹ lẹ.
16. (a) Etẹwẹ mí sọgan plọn sọn aliho he mẹ Jesu yinuwa hẹ hodotọ etọn lẹ te? (b) Nawẹ mí sọgan tindo pọndohlan he Jesu tindo gando mẹhe gbọjọ lẹ go gbọn? (Pọ́n nudọnamẹ odò tọn.)
16 Etẹwẹ Jesu sọ wà? Tintan whẹ́, e lá dọmọ: “Aṣẹ lẹpo wẹ yè ko jo hlan mi.” Awetọ, e deazọ́nna yé dọ: “Enẹwutu mì yì, bo hẹn akọta lẹpo zun nuplọntọ.” Atọ̀ntọ, e dopagbe dọ: “Yẹn tin to mì dè to whepoponu.” Ṣigba be a doayi nuhe Jesu ma wà go ya? E ma wọhẹ devi lọ lẹ na awugbopo po ayihaawe tintindo yetọn po gba. (Matiu 28:17) Be aliho he mẹ e yinuwa te wazọ́n ya? Mọwẹ. To madẹnmẹ, apọsteli lọ lẹ jẹ ‘mẹplọn ji bosọ jẹ yẹwheho wẹndagbe tọn dọ ji’ whladopo dogọ. (Owalọ lẹ 5:42) Gbọn apajlẹ Jesu tọn hihodo gando nukun he mí dona nọ yí do pọ́n mẹhe gbọjọ lẹ podọ lehe mí dona yinuwa hẹ yé do go dali, mí sọgan duvivi kọdetọn ayajẹnọ mọnkọtọn lẹ to agun mítọn mẹ. b—Owalọ lẹ 20:35.
“Yẹn Tin to Mì dè to Whepoponu”
17, 18. Linlẹn mẹhẹnlodo tọn tẹlẹ wẹ hogbe Jesu tọn lẹ dọ “yẹn tin to mì dè to whepoponu” bẹhẹn?
17 Hodidọ he gbọngodo to azọ́ndenamẹ Jesu tọn mẹ, ‘yẹn tin to mì dè to whepoponu,’ na hẹn mẹhe to vivẹnudo nado setonuna gbedide Klisti tọn nado hẹnmẹ zun devi lẹpo lodo. Mahopọnna nukundiọsọmẹ depope he kẹntọ lẹ sọgan hẹnwa azọ́n yẹwhehodidọ tọn mítọn ji podọ aliho depope he mẹ yé sọgan hẹn mí gble te, mí ma tindo whẹwhinwhẹ́n depope nado dibu gba. Etẹwutu? Jesu, Nukọntọ mítọn, he tindo ‘aṣẹ lẹpo to olọn mẹ podọ to aigba ji,’ tin to mí dè nado gọalọna mí!
18 Opagbe Jesu tọn dọ ‘yẹn tin to mì dè to whepoponu’ sọ yin asisa kọfanamẹ tọn daho de ga. Dile mí to vivẹnudo nado hẹn gbedide Klisti tọn nado hẹnmẹ zun devi di, e mayin azán he gọ́ na ayajẹ lẹ kẹdẹ wẹ mí nọ mọ gba ṣigba azán he gọ́ na awubla lẹ ga. (2 Otannugbo lẹ 6:29) Delẹ to mí mẹ jugbọn ojlẹ awubla tọn lẹ mẹ to whenuena yé to aluẹmẹ na okú mẹyiwanna de tọn. (Gẹnẹsisi 23:2; Johanu 11:33-36) Mẹdevo lẹ to akọndona yọnhowhe, whenuena agbasalilo po huhlọn po nọ depò. (Yẹwhehodọtọ 12:1-6) Podọ mẹdevo lẹ nọ jiya apọṣimẹ sinsinyẹn tọn to whedelẹnu. (1 Tẹsalonikanu lẹ 5:14) Humọ, mẹsusu dogọ to mí mẹ to numimọ awusinyẹnnamẹ akuẹzinzan tọn lẹ tindo. Etomọṣo, mahopọnna nuhahun enẹlẹ, mí nọ tindo kọdetọn dagbe to lizọnyizọn mítọn mẹ na Jesu tin to mí dè ‘to whepoponu,’ gọna ojlẹ he sinyẹn hugan to gbẹzan mítọn mẹ lẹ.—Matiu 11:28-30.
19. (a) Anademẹ tẹlẹ wẹ azọ́ndenamẹ Jesu tọn nado hẹnmẹ zun devi bẹhẹn? (b) Etẹwẹ nọ hẹn mí penugo nado hẹn azọ́ndenamẹ Klisti tọn di?
19 Dile mí ko mọ to hosọ ehe po dehe wayi po mẹ do, azọ́ndenamẹ Jesu tọn nado hẹnmẹ zun devi bẹ adà lẹpo hẹn. Jesu dọ nuhewutu podọ fie mí dona hẹn azọ́n he e dena mí lọ di gbọn. E sọ dọ nuhe mí dona plọnmẹ podọ kakajẹ whenue mí dona to mọwà jẹ na mí. Na nugbo tọn, azọ́ndenamẹ daho ehe hinhẹndi ma bọawu. Ṣigba na Klisti he tindo aṣẹpipa lẹpo to godonọna mí bosọ tin to mí dè wutu, mí sọgan hẹn ẹn di! Be hiẹ ma lẹnmọ ya?
[Nudọnamẹ Odò Tọn]
a Owe alọdlẹndonu tọn de zinnudeji dọ gbedide lọ nado baptizi bo plọnmẹ “mayin . . . nuwiwa voovo awe he na yin bibasi debọdo-dego gba.” Kakatimọ, “nuwiwa he to nukọnzindo de wẹ mẹpinplọn yin, ehe apadewhe etọn nọ wá aimẹ jẹnukọnna baptẹm . . . bọ apadewhe etọn sọ nọ bọdo baptẹm go.”
b Na nudọnamẹ dogọ lẹ do nukun he mí dona nọ yí do pọ́n mẹhe gbọjọ lẹ podọ lehe mí sọgan gọalọna yé do ji, pọ́n Atọ̀họ̀-Nuhihọ́ Lọ Tọn 1er février 2003, weda 15-18.
Etẹwẹ Na Yin Gblọndo Towe?
• Nawẹ mí nọ plọn mẹdevo lẹ nado doayi nuhe Jesu degbè etọn lẹ go gbọn?
• Nuplọnmẹ tẹlẹ wẹ devi yọyọ de sọgan plọn sọn mẹdevo lẹ dè to agun mẹ?
• Etẹwẹ mí sọgan wà nado gọalọna mẹhe ko gbọjọ to gbigbọ-liho lẹ?
• Tulinamẹ po kọfanamẹ tẹ po wẹ mí mọ sọn opagbe Jesu tọn mẹ dọ “yẹn tin to mì dè to whepoponu”?
[Kanbiọ Oplọn Tọn Lẹ]
[Yẹdide to weda 15]
Mí dona yin mẹplọntọ podọ anademẹtọ
[Yẹdide to weda 17]
Devi yọyọ de nọ plọn nuhọakuẹ susu sọn apajlẹ mẹdevo lẹ tọn mẹ